Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, May 19, 2013

صدفة مش سعيدة



ف يوم كنت رايحة مناسبة لناس اقاريبى.. ف لفت نظرى انسان وسيم وذوق.. كنت كل ما اتكلم فى حاجة الاقيه بيدخل ف الحوار ويناقشنى.. 

ف عجبتنى دماغه وفضلنا نتكلم بقية اليوم ونسينا الناس
وفضل بعدها بفترة شاغلنى.. 

لحد ما ف يوم فوجئت بيه بيكلمنى ع تليفون البيت وبيعرفنى ع نفسه وبيقولى انه معجب بيا وحابب اننا نتعرف ع بعض اكتر وادانى ع رقم موبيله.. 

انا مارضتش اتصل بيه غير لما اعرف ايه حكايته.. هو انا كنت معجبه بيه وبأسلوبه لكن كان فيه حاجة قلقانى بس ماكنتش عارفة ايه هى

ف اتصلت بقريبتى اللى قابلته عندها.. ف ماكنتش تعرف عنه معلومات كتير غير انه قريبهم من بعيد وانه عايش ف القاهرة وانا كنت عايشة ف محافظة صغيرة
بس برضه محاولتش اتصل بيه

وف يوم وانا ف الشغل لاقيت ورقة بتتحط قدامى فيها ايميل..
لاقيته هو 

وراح قايلى: طالما التليفون مش نافع نمشيها ايميل.. بس خلى بالك انا مش هاجى البلد هنا تانى.. وسابنى ومشى

شدنى له بتصميمه.. ضيفته فعلا ع الفيس.. ومن وقتها وانا بدأت اتشد له بطريقة غريبة.. 

وهو كمان صارحنى بمشاعره وقالى انه عايز يرتبط بيا.. كنت طايرة من الانبساط.. كنت حاساه حاجة كبيرة قوى.. وماكنتش مصدقة ان شخص زيه محترم ووسيم ممكن انه يكون نصيبى

كان فيه بينا توافق غريب ف كل حاجة.. وفعلا اتصل بأهلى واتفق معاهم انه هيجى البلد عندنا عشان يتقدم لى بس لما يقدر ياخد اجازه من شغله ف القاهرة

وبعدين فجأة بقى موبيله يتقفل بالايام.. ولما كنت أسأله يقولى كنت ف مهمة تبع الشغل ف مكان مفيهوش شبكة.. 
وكنت بعديها

بقى غامض وغريب.. يختفى من ع النت ومن الدنيا كلها بالشهر ويرجع فجأة ويقولى معلش اصل كان عندى ظروف.. 

بدأت أقلق منه واحس ان فيه حاجة مخبيها عليا بس مش عارفة ايه هى

واخيرا حدد ميعاد لزيارتنا وجه فعلا بس جه لوحده ع اساس انها قعدت تعارف.. واهلى كانوا مبسوطين بيه..

 وبعد ما مشى لقيت قريبتى بتكلمنى وتقولى ع خبر نزل عليا زى الدُش البارد.. ان الباشا طلع متجوز ومعاه ولد عنده سنتين
دماغى كانت هتنفجر من كتر علامات الاستفهام.. 

طب هو ليه جه اتقدم لى؟ كل ده بيلعب بيا؟ طب ليه؟ كان عايز منى ايه ؟

استوعبت بقى وقتها كل الغموض اللى كان حوليه.. وعرفت ان الموبيل اللى كان مدينى رقمه.. 

كان موبيل بيسيبه ف الشغل مش بياخده معاه البيت عشان المدام ف البيت ماتحسش بحاجة..

 واكتشفت ان كل حاجة كانت كذب ف كذب.. وبعد الحب الكبير اللى كنت حاسه بيه ناحيته تحول لقرف فظيع بقيت حساه تجاهه
فضلت فترة منهارة من كمية الكذب المهولة اللى عرفتها.. 
كل ده وماكنش لسه يعرف انى عرفت كل حاجة
ولما ظهر بمزاجه واتصل بيا وجهته

 وسألته: ان كان متجوز؟
فارتبك وقالى: اه
قلت له: وعايز منى ايه؟
قالى: هنتجوز
قلت: له ليه؟
قالى: كدة ايه المشكلة؟

اتجننت من كلامه بس جزيت ع اسنانى وحاولت ابقى هادية 

وسألته: ومراتك؟
قال لى: وانتى مالك ومال مراتى؟
قلت له: هتعمل ايه معاها؟ انت بتحبها ولا لأ؟
قال لى: بحبها طبعا وهتفضل مراتى
قلت له: انتوا بقالكوا قد ايه متجوزين؟
قال لى: ماكملناش اربع سنين
قلت له: طب عايز تتجوز تانى ليه؟ وللا انت كنت بتلعب بيا؟
قال لى: لو بلعب ماكنتش اتقدمت لاهلك
قلت له: ومراتك دى ايه ذنبها تتجوز عليها؟
قال لى: مهى هى مش هتعرف
قلت له: اه يبقى متجوز واحدة ف الاقاليم وواحدة ف العاصمة.. وبما ان شغلك ف العاصمة يبقى اكيد هنتقابل ف الاجازات الرسمية بس؟

سكت معرفش يرد

قلت له: انا ماشفتش حقارة كدة.. الموضوع بالنسبة لى انتهى خلاص

حاول بعدها كتير انه يخلينا نستمر ولكن فشل

انا فعلا حتى الان مش قادرة افهم ولا استوعب ازاى كنت عايشة ف كدبة كبيرة زى دى.. ده كم الكذب اللى كان بيكذبوا عشان يدارى انه متجوز كان مُبهر

انا مابقاش عندى ثقة ف اى راجل مهما بان محترم وصادق بحس ان ده مجرد قناع مخبى وراه كدب كتير..

 وحمدت ربنا انه نجانى من تجربة زى دى.. وخصوصا انى بالصدفة شفت مراته ولاقيتها انسانه طيبة ومحترمة جدا وحسيتها خسارة فيه
الحمدلله ع كل حال

رحاب المليحي


15 comments:

Anonymous said...

Dalia Hazem
بني ادم معندوش دم صحيح

Anonymous said...

Ragaa Mostafa
يخرب بيت البجاحة

Anonymous said...

Samah Abdou
يا مآمنة للرجالة... انا كمان ما بقاش عندي ثقة في اي راجل من كثر اللي قريته هنا و اللي شفته في الواقع ... احييييييييييييييييييه

Anonymous said...

د.محمد بريك

الحمد لله انها اكتشفت حقيقته
محدش عارف الأمور كانت ممكن توصل لفين لو مكانتش اكتشفت الحقيقة
هوا صحيح درس مش مجاني
بس يلا قدر الله وما شاء فعل

Anonymous said...

Hëñd Êl-Shãmý
Tab a2ol eh a2ol eh a2oool eeeeeh :S
Ragel ramraaam b sa7i7

Anonymous said...

Tito Soliman
فيه فعلا رجاله كدة كذابين و معفنين و كمان فية سيدات نفس الشكل كاذبات و مخادعات

Anonymous said...

Ahmed Ibrahim Aly Elsheikh
قصه جميله من الحياه ..... كوكتيل من الكذب والخداع والطمع ..... ينتج فى النهايه مأساه .... الحمد لله على النهايه السعيده للطرفين .... هو أخذ درسا لن ينساه ( ان كان لا زال عنده احساس ) ، وهى انقذت نفسها من عريس زائف .... انها الطاف القدر ... والحمد لله .... اما حضرتك استاذه/رحاب .... فشكرا على صياغتك واسلوبك الرائع .... جازاكى الله كل خير .

Anonymous said...

Mona Omar
عارفة
بقيت بخاف اوي لما اقرا حاجة او اسمع حوار يبتدي الكلام فيه بجملة شكله محترم ووسيم
معظم الوقت بيبقى ختامها زفت زي كده

Anonymous said...

Amr Aly
المفروض كان ت تقولها وتفضحه

Anonymous said...

Huda Hamza
يا مامنه الرجال ياما منه. المياه في الغرررررربال مثل ستي الله يرحمها

Anonymous said...

Islam Sabahy
مافي بنات بتعذب ولاد
بيموتوا فيهم

Anonymous said...

Mayoya Imam
It's true story bnshofha kol yom, elregala elmo7trama 2olaeleen 2wi

Anonymous said...

Basma Bahaa
لا حول ولا قوة الا بالله الرجالة اتجننت! بس بصراحة متغاظة من قريبتها دى يعنى مكانتش عارفة تسال عليه من أول مسألتها من البداية! كانت توفر عليها الليلة الزرقا دى!

Anonymous said...

Asmaa Afify
بكره الصنف ده اللى بيبنى حياته على كدب ويفضل يكدب لحد مايصدق الكدبه ولما يتواجه بالحقيقه تلاقى قمه فى الحقاره والبرود حاجه زفت بجد

Anonymous said...

Maha Mohamed Shehata
حسبي الله ونعمه الوكيل