Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Saturday, May 18, 2013

مريض نفسى



كان عندى 26 سنة لما اتعرفت بشاب عن طريق شغلى بس كان ف اطار الشغل بس.. 
وبعدها بفترة فوجئت بيه بيتصل بيا (دولى) بعد سفره ، حاولت أصده باحترام.. لكن هو عرف بأسلوبه إنه يشدنى له

أنا كان عمرى ما مرت بأى تجربة عاطفية.. كل تركيزى واهتمامى كنت حطاه ف إنى اكون حد كويس وله مستقبل

بعد ست شهور من علاقة مجرد نت وتليفونات رفضت انى اكمل من غير ما يكون فيه حاجة رسمى ما بينا.. 

واتصل هو بوالدى وقاله انه هيخلى عيلته المتواجدين ف القاهرة يقابلونا.. ومر الوقت وبرضه لا حس ولا خبر.. فهمنى بعدها ان والدته رافضه الجوازه دى عشان عايزه تجوزه من بنت خالته

فضلت أحب فيه نت بس لمدة سنتين.. وحوارات اد كدة عشان والدته مش موافقة وعشان بنت خالته..


عرفت بعدها من أخوه انه لما هيرجع مصر هيتقدم  لواحدة تانية.. وان اساسا ماكنش فيه حوار بنت خالته ده.. وكان مفهمنى ان والدته معاه بره مصر.. اكتشفت انها عمرها ما سابت مصر وسافرت اساسا


قطعت علاقتى بيه بعدها.. كلمنى واعتذر لى واعترف انه غلطان وانه فعلا بيحبنى وللمرة التانية أثر كلامه فيا.. 
وبرغم انى تحملت ظروفه ومشاكله اللى كان وهمنى بيها لمدة سنتين


لاقيته فجأة اتجوز.. وكل ما اعمله بلوك ع الفيس.. الاقيه عامل لنفسه اكونت جديد وبعت لى منه صوره مع مراته وصوره مع بنته لما خلف.. ولسه برضه بيقولى انا غلطان وانا لسه بحبك.. بقفل رسايله ومابرضاش اكملها


بقيت باحس انه طوق حولين رقبتى.. كل ما احاول اتناسى يطلع لى من حيث لا ادرى ويفكرنى بيه.. فعلا انسان مريض


مابقولش غير حسبى الله ونعمة الوكيل.. انا عارفة انى غلطانة انى استمريت ف علاقة وهمية وجت ع نفسى وكرامتى وصدقته الفترة الطويلة دى كلها


وكمان اصعب حاجة ف الدنيا انك تحبى حد ع النت بس.. من غير ما تقابليه أو تخلى العلاقة دى تاخد الشكل الرسمى


وعموما انا مش ندمانة انى خُضت تجربة فاشلة زى دى.. ادينى اتعلمت منها وخلتنى ابطل اثق ف اى حد.. وبحمد ربنا انى خلصت منه واحنا ع البر.. وان شاء الله ربنا يعوضنى خير



رحاب المليحي

11 comments:

Anonymous said...

Ahmed El Desouky
مش فاهم منين بيبعتلها صورة مع مراته وبنته ومنين بيقولها أنه لسه بيحبها !!!!! طب إيه الغرض من بعت الصور ؟

Anonymous said...

Samah Gebril
للاسف فى ناس كدا كتير فى العالم الافتراضى اللى بنعيش فية ....ربنا يكفينا شرهم

Anonymous said...

Hëñd Êl-Shãmý
almarda al nafsyen b2oo kteer :(

Anonymous said...

Haitham Ahmed
ده مش مريض ده انسان كذاب و مخادع بس مش اكتر

Anonymous said...

Ramy Elalfy
اكتر الحاجات اللي بكرهه في حياتي منا العالم الافتراضي اللي احنا عايشين فيه

بس ده مفيش كلام ده مريض نفسي

Anonymous said...

Marwa El Etriby
مريض حقيقي !

7dmo3yen said...

ده ايه السادية دي ايه الفكرة من انه يعذب انسانه بالشكل ده

Anonymous said...

Sarah El-Eskafy
ابن الهبلة

Anonymous said...

Samah Abdou
و تاني قصص حب عالنت فاشلة و بنهاية تنسيك في القصة اللي قبلها ..

Anonymous said...

Ahmed Samy
ربنا يهديكي اقفلي الصفحه خالص، ده انسان كذاب
واو علي الفيس ممكن تقفلي ان حد غريب يبعتلك رسايل اصلا

Anonymous said...

Hossam Hanafy
الراجل من الأول أهدافه واضحة تماما ... و الأخت دى هى اللى بتصتنع لنفسها اى سبب عشان تستمر علاقتها بيه بس عاوزه الموضوع يبان ان هو اللى بيجرى وراها ... و هو فعلا بيجرى وراها ولكن عشان هو حاسس انها حتقبل تستمر معاه بنفس النظام السابق ... يعنى من الأخر الأتنين فاهمين بعض كويس بس بيمثلوا بيحاولوا يجملوا شكل علاقتهم