Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, May 02, 2013

حكاية ولا ف الحواديت



أنا حكايتى غريبة قوى حتى ليا أنا شخصيا

أنا شاب متجوز وعندى أطفال.. بدأت حكايتى على الفيس بوك..

 كان ليا شلة بقابلهم على أرض الواقع.. وكنا بنقعد نهزر على الفيس..

 وفى مرة واحدة معرفهاش لاقيتها بعتالى اضافة.. ولما لاقيتها كومون فريند ما بينى وبين شلتى قبلت الاضافة

وبقيت اتكلم معها ع الفيس عادى جدا زيها زى بقية الشلة اصحابنا.. وقابلتها وسطهم برضه.. وكنت احيانا بوصلها لحد اقرب مكان لبيتها أو لموصلة هتاخدها.. وده برضه كان العادى لما بيكون معانا بنات 

العلاقة بينا قعدت فترة طويلة صداقة بس.. لكن انا كنت حاسس ان الموضوع بالنسبة لها اكتر من كدة.. بس ماكنتش بقولها حاجة.. 

لحد ما هى بدأت تلمح وصارحتنى انها بتحبنى.. كنت متردد اقولها انى متجوز برغم انها بالنسبة لى ماكنتش اكتر من صديقة..

ولما سألتها ايه اللى خلاها تحبنى.. قالت لى ان جدعتنى  وحنيتى يخلوا اى واحدة تتعلق بيا وان من جوايا حد جميل

كنت كل ما اقرر انى هواجها واقولها انى متجوز كنت ارجع بعدها ف قرارى خوفا انى اكسر قلبها..

 بس بقيت حاسس انها لود على اعصابى.. خصوصا انها كانت احيانا بتتصل بيا بليل.. ومارضاش ارد عشان مراتى ماتحسش بحاجة.

 لحد ما فى يوم اخدت القرار وطلبت منها اننا نتقابل لوحدينا.. وفعلا قابلتها وقلت لها انى منفعهاش عشان انا متجوز.. 

هى ماكنتش مستوعبة الكلام واتصدمت.. حاولت اقنعها ان علاقتنا دى ماينفعش تستمر ولازم ننهيها.. لكن هى رفضت بشدة..

 وهددتنى انها هتقول لأصحابنا كلام كتير ماحصلش.. زى اننا كنا مرتبطين عشان كدة كنت مخبى عليها انى متجوز.. وانى طلبت منها نروح شقة وهى اللى رفضت.. وكمان هتوصل لمراتى وتقولها نفس الكلام

مافرقش معاية كلامها وقلت لها اللى عندك اعمليه انا مابتتهددش.. ولا هاخسر بيتى واسرتى عشانك

وفعلا بدأت تنتقم وراحت حكيت لأصحابنا كلام ماحصلش.. وجم هما يعاتبونى.. 

وبرغم ان هى كانت صعبانة عليا بس ماكنتش طايق افعالها.. وكان نفسى انهى الموضوع بأى شكل.. 

انا فعلا ماكنتش عارف ايه سبب تعلقها الكبير بيا ده.. خصوصا انها بنت آيه ف الجمال ومتعلمة وأى واحد يتمناها

بعدها قلت اتكلم معاها تانى وافهمها الوضع ، يمكن تحل عن نافوخى.. فوجئت بيها بتقولى يإما اكون معاك يإما هنفذ تهديدى واديك شفت البداية.. 

ولما لاقيت نفسها ممكن تخسرنى عرضت عليا نفسها ف الحرام.. رفضت بشدة، ف قالت لى انا راضية اكون معاك جنب مراتك بس ماتسبنيش

بقيت حاسس انى مُطارد ومش عارف اتصرف معاها ازاى.. عملت لها بلوك ع الفيس وبطلت انزل اقابل اصحابى علشان هى كانت عارفة ممكن تلاقينى فين

لحد ما لاقيت واحدة صاحبتها جاية تصارحنى بسر كانت هى مخبياه عنى.. انها عندها ورم خبيث ف المخ ونسبة شفاها ضعيفة

الموضوع ده زلزلى دماغى وخلانى اتراجع عن اى حاجة كنت بفكر اعملها.. ورجعت كلمتها وصارحتها انى عرفت.. 

قالت لى انها ماكنتش عايزة تقولى خوفا من انى اسيبها.. شجعتها وقلت لها انها هتعيش وماتخفش 

بس لاقيتها بتقولى انا عايزة اموت نفسى قبل ما المرض يموتنى.. وكمان عشان انا مش ف قلبك وانت متعرفش يعنى ايه حب
قلت لها لو معرفش يعنى ايه حب ماكنتش ابقى متمسك ببيتى ومراتى 

بقيت بكلمها بس ع فترات متباعدة.. وكان بقالى شهر ونص معرفش عنها حاجة.. فجأة لاقيتها قدامى ف الشارع صدفة

صدفة ماكنتش اكتر من دقيقتين،
 اول ما شافتنى قالت لى: انت بتبعد عنى بس عشان ربنا عايزنى اكون معاك خلانى اقابلك صدفة

حسيت انى نفسى احضنها.. كانت صعبانة عليا قوى.. كنت حاسس انها مش هتكمل

بعدها بخمس ايام بالظبط جالى خبر وفاتها.. 

ماكنتش عارف انا صاحى ولا نايم؟ 
دى حقيقة ولا كابوس؟
 كنت حاسس انى عايز اموت نفسى.. 
حاسس ان فيه حاجة ربطانى بيها، هى ايه؟ مش عارف، لكن مش حب

اصحابها قالولى انها انتحرت بسببي وكمان عشان نسبة شفاها ضعيفة.. 

وكل شلتنا اللى كانت كومون ما بينى وما بينها قطعوا معاية بعد وفاتها

انا فعلا تايه ومش عارف انا كنت صح ولا غلط؟ 
كنت قاسى معها ؟
 ولا كان لازم اعمل اللى كنت بعمله عشان تبعد عن طريقى وتشوف حالها؟

بس ف كل الاحوال ربنا يرحمها ويغفر لها يارب   

رحاب المليحي             

21 comments:

Anonymous said...

انا مش مصدقة
و لا انا انا كنت فاكرة انها هتخليه يطلق مراته
و تفضحه قدامها
بس بجد بعيدا عن اي حاجة الفيس بوك ده مجنن الرجالة و مخليهم يعرفوا ستات على مراتتهم و كمان كان بيوصلها

رجاء

Anonymous said...

Ramy Elalfy
في رأيي هو عمل الصح

Anonymous said...

Sarah El-Eskafy
بس الواد ما غلطش يعنى اصلا هى اللى المرض جننها وجنته معاها
يبطل اوهام ويلتفت لمراته وبيته احسن
مش شايفة لتانيب الضمير ده داعى

Anonymous said...

Marwa El Etriby
عشان ماتت .. لو مكنتش ماتت مكنش هيحس بحاجه ..
هو صح طبعاً .. واللي هو فيه طبيعي .. تأنبيب ضمير ..

Anonymous said...

Whisper Heart
بجد وجعتني

Anonymous said...

Tota Adham
هو عمل الصح .. بس حتى الصح ساعات ببوجع اوى لما يكون مرتبط بغيرنا .. ربنا يرحمها

Anonymous said...

Ahmed El Desouky
هو ممكن يكون حاسس بالوجع لأنه اتعلق بيها زي ما بيقول وحاسس أن فيه حاجة ربطاه بيها

دا كله وهو معملش حاجة غلط وحاول يحافظ على بيته وعياله

تخيلي بقى لو هو كان دخل في علاقة معاها كان احساسه هيكون إيه بعد ما هي تموت !!!
كان تعلقه بيها هيكون أكبر وتأثره أكبر

هو ممكن بعد وفاتها يتأثر شوية، أنتي لو كلمتي حد وحش وتاني يوم جالك خبر وفاته هتحسي بتأنيب الضمير أنك كلمتيه وحش، دا شيء طبيعي
لكن شوية هو لما يقعد يفكر هيلاقي أنه معملش حاجة غلط وأنه عمل الصح وهينسى ويعيش حياته عادي،

وسوري يعني أصحابه اللي شايفينه غلط ده لو هم قطعوا معاه لأنه صدها ومرضاش يدخل في علاقه معاها وهم عارفين أنه متجوز يبقى هم أصحاب زبالة وهو كسبان أنهم قطعوا معاه

Anonymous said...

Nourmina Nermeen Saad Eldein
عمل الصح بعد أيه بعد ما أتعلقت بيه حد الجنون

Anonymous said...

Ghada Srour
رغم القصة المؤثرة فعلا و مع احترامي ليه و ليكوا الا اني شايفة انه كان بيستهبل و سايق الهبل علي الشيطنة لما هو عنده ضمير اوي كده و خايف علي مراته وولاده ليه ماكنش صريح من الاول مع البنت دي !!!!

Anonymous said...

Ahmed Saad Elkassapy
معلشى بس فيه ناس بتحب على روحها .. فيه حاجه اسمها انسانيات .. ممكن الواحد يعامل حد حلو وبطريقه كويسه وهى تقلب معاه بحب ( وعن تجربه ) .... الله يرحمها

Anonymous said...

Que En
يعنى هو ف الاول عقة بية وادها كل المساحة للحب وبعدين افتكر انة متجوز مفروض الصراحة ف الاول وكمان هو مش مفروض صحابة عارفين انة متجوز يعنى حاجات زى دى بديهيات الصحبية وهى ربنا يرحمها وهو ربنا يتقبل منة لو حاسس بالذنب نحيتها

Anonymous said...

Hanadi Awed
هو مش مبرر ان علشان مرضها يخون مراته معاها ومراته ذنبها ايه اصلا فى كل دا العلاقه من الاول كانت غلط اساسا ومش معنى اننا عملنا علاقه غلط مع حد وطلع مريض اننا نكمل معاه وعلى فكره هو بيحاول يبرأ نفسو بس هو مكنش صح المفروض اصلا مكنش بدأ العلاقه ولو بداها فى اسوأ الظروف لازم كان ينهيها وبحسم مش يكلمها كل فين وفين ويقول انا مش على علاقه بيها ولو عليها هى الله يرحمها هى الى اختارت تموت كده وتغضب ربنا يمكن مرضها كان اختبار ليها وهى كده فشلت فالاختبار

Anonymous said...

Yassmin Mohamed
هو غلطان من الاول لأنه مقالش انه متجوز يعنى عايزه تفهمينى مثلا ان موضوع جوازه ده شئ مش مهم فا ماجتش فرصه انه يقولها هو اصلا ماكنش فى دماغه بيته ومراته من الاول لو كانوا فى دماغه ماكنش حصل كل ده بس عموما ربنا يرحمها ويغفرلها ويعينه بس برضه هو اللى غلطان بس الحاجه اللى تشفع له انه افتكر بيته ومراته وعمل اللى المفروض يتعمل ومدخلش فى علاقه معاها

Anonymous said...

Nermin Hussien
هو ده حقيقي بجد ؟!

Anonymous said...

Toksee Do
باختصار شديد ،، أخطأ وأجرم ،، ثم فاق

Anonymous said...

Amr Aly
الله يكون في عونه ويقدره ويصبره
على اللي هو فيه غلطته انه ما احترمش مشاعرها ولا قدرها لان المشاعر دي حاجة مش بإيدين صاحبها ولو حصلت مش فضيحة ولا ذنب يتعاقب عليه وكان لازم يحترمها مش يحسسها انها ولا حاجة ونتيجة دا الاحساس اللي هو حاسه دلوقتي

Anonymous said...

Karim Elsheikh

القصة رغم سلاستها وسلاسة احداثها الا انها قاسية ولكن انا لو مكان اصحابه هعمل كدا لأنه الشاب ده من البداية مكنش صادق ولا صريح
فين دبلته طالما وفي لزوجته كدا !!
فين الاخلاص اللي بيقول عليه انه لمجرد ما حس انه في اعجاب من ناحيتها مقالهاش ليه
نقطة تالتة البنت دي عقيدتها مخلخلة .. ولكن ربنا يرحمها يا رب

Anonymous said...

Anặ ßàñợtà
ربنا يحفظنا
ابتدت بملهاه وانتهت بمأساه

Anonymous said...

Rania Lelah
مش عارفة الومه هو مغلطش اما حاول يبعد , يمكن غلطته انه اما حسها انها بترتبط بيه وجدانيا كان لازم يبعد و اوى و من غي اى تفاهم
الله يرحمها و يجعل مثواها الجنه

Anonymous said...

Ikhlaas Abdelmohsen
هو مش غلطان انه سابها هو غلطان انه خبى عليها وتمادى معاها لغاية ما اتعلقت بيه وهي ربنا يغفرلها ويرحمها

Anonymous said...

سوسن بيسان
الاكيد انك شخص أناني ،أنت ظالم
ولست مظلوما ،حبيت تتسلى معاها والدليل
لم تخبرها بزواجك ،وبقيت تتمشى معها ،
ممكن تسأل نفسك لماذا؟؟
والأكيد الثاني ان غرورك و أنانيتك سيمنعوك
من تحمل المسؤولية فيما حدث ،وإلقاء اللوم على نفسك .
ولهذا السبب بالذات تركك أصحابك ،
فهموك ولم تفهم نفسك