Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, February 28, 2013

محدش كامل


-         بتحب صحابك؟
-         اكيد طبعا، ايه السؤال الشاذج ده؟
-         طب بتحب لهم الخير؟
-         هه؟ اه، لأ، اكيد، بص مش دايما
-         منين بتحب اصحابك ومنين مش بتحب لهم الخير!!!! فزورة دى؟
-         لأ، اصله مش كدة بالظبط.. اصل انت مش فاهم
-         طب فهمنى عشان انا فعلا محتاج افهم
-         زى ما انت عارف ان كل شخص فينا جواه الخير والشر
-         طبعا، وبعدين؟
-         ف يعنى ساعات لما الاقى حد من صحابى حصل له حدث سعيد.. اكيد بفرح له بس
-         ها، كمل بس ايه؟
-          بتمنى انى اكون مكانه.. لأ،لأ، مش مكانه بس يعنى ع الأقل اكون زيه
-         اشرح لى اكتر اصلى لسه مش فاهم
-         يعنى مثلا مثلا لما واحد من صحابى يشترى عربية جديدة.. بحس انى بحقد عليه شوية، إنى أنا مترمط ف المواصلات وهو باشا وراكب عربية بتكييف
-         مش ممكن يكون طافح الكوته وصارف كل اللى وراه عشان يجيبها.. مش ممكن يكون عنده مشكلة صحية ف لازم يركب عربية ومايتبهدلش..
-         مممممم ممكن، بس اكيد وقتها مش هقعد أفكر ف كل اللى انت بتقوله ده.. مهو برضه يمكن يكون معاه فلوس ومدكن وعامل قدامى غلبان وع الحديدة
-         حتى لو، كل واحد حُر.. مش يمكن حاسس بالحقد ف عينيك ف بيخاف منك!
-         مهو ده يخلينى أغل ف نفسى أكتر وأحقد أكتر وأكتر.. بس أنا والله مش بنى ادم وحش.. أنا جوايا خير كتير وبحب الناس
-         انا مصدقك، واحنا كلنا بشر ودائما بنحب اللى ف ايد غيرنا ودايما مش شايفين النعم اللى ف ايدينا
-         طب اعترف لك بحاجة كمان
-         اعترف
-         احيانا كمان بحس انى فضولى قوى
-         ازاى؟
-         ليا صحاب مرتبطين.. ف لما احس ان فيه خناقة حصلت ما بينهم.. بيبقى هيجرالى حاجة لو معرفتش تفاصيل الخناقة
-         ويا ترى لما بتعرف بتحاول تصلح ما بينهم؟
-         لأ ليه؟ انا بحب اعرف بس
-         وبعدها تمصمص شفايفك وتقول: هىء عالم هايفة
-         عرفت ازاى!!
-         مش مهم، ايه تانى حاسه عيب فيك؟
-         ف مجال الشغل مثلا، بــ ...
-         ايه؟ ماتقولش بتدى خوازيق لزمايلك عند مديرك!
-         أنا؟ لا يا راجل انا مش واطى قوى كدة.. أنا بس بحب ابقى احسن منهم وشغلى ظاهر عنهم.. ما انا بشر يعنى.. ومجال المنافسة مسموح
-         منافسة شريفة يا ترى؟
-         هه؟ اه طبعا
-         نسيت تقولى انك لما بتتزنق بتكدب
-         لأ مش بكدب، أنا بس مابحبش حد يصارحنى بعيوبى.. ع الأقل جملها يا اخى.. ماتخبطش الكلام ف وشى كدة.. ايه ده؟ هو انا بكلم مين؟؟ هو أنا كل ده واقف قدام المراية بكلم نفسى.. ليه هو أنا اتجننت!!!
-         لأ لسه، بس احيانا لازم نقف وقفة مع نفسنا نعيد اوراقنا ونواجه نفسنا بعيوبنا.. لعل وعسى نقدر نغيرها ف يوم من الايام قبل ما تزيد.. وتبقى عيوبنا ماشية ف دمنا وصفة من صفاتنا صعب تغيرها
رحاب المليحي

12 comments:

Anonymous said...

Marwa El Etriby
للاسف في ناس كده

Anonymous said...

Ilı Nada Ilı
This is the definition of a bad person .

Anonymous said...

Nora Galal
حلو يا حوباااا

Anonymous said...

Mohamed Ibrahim El Banna
بس بقى عشان أنا قابلت الشخصيه معفنه أكتر من كده بمراحل كل السلبيات اللى فى الدنيا فيها و للأسف بتبقى الشخصيه ذى فاكره أنها بنت ناس وهى بنت صرمه وجزمه كمان

Anonymous said...

Sheroo Ahmad
اييييييييييييييه دنيا مليانه بلاوى والله يا حوبا وناس مريضه العقل والقلب وناس من بره هالله هالله ومن جوه يعلم الله اخ يع يع :)

Anonymous said...

لايك كبيره بقى
:)

zooma zooma

Anonymous said...

Ragaa Mostafa
اللي بيعجبني فيكي انك بتكتبي من واقع الحياة و كلامك بيدخل القلب على طول

Anonymous said...

جامدة يا حوبا.. يسلم قلمك
رامى

Anonymous said...

Amr Aly
في فترة من الفترات حسيت احساس سلبي تجاه س من اصحابي وسالت ربنا اشمعنى انا بس
الحمد لله استغفرت ربنا وهذبت نفسي وعملت النقاعة كتير وفرحتله اوي وقولتله على اللي حسيته

Anonymous said...

Nermin Hussien
عاوزين كتابات اكتر في النواحي النفساوية الي جوانا دي يا حوبا

Anonymous said...

حلو الحوار مع النفس
mama

Anonymous said...

Sugar Sprinkles
بس انا مش شايفة ان اللي أدام المرايا دة حد وحش
عادي , دة بس مش راضي عن نفسه و دة حال الغالبية و مش حاجة وحشة خالص طالما مش وصلت لحد تمني الأذى للغير او الاقدام عليه