Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, September 27, 2012

من الحب ما قتل

أنا كنت بنت عادية.. من اسرة متوسطة.. أحلامى كتير وطموحة لدرجة فوق الوصف..

 عشت طفولة عادية وهادية.. حتى سن المراهقة عدى ف هدوء، وعمرى ما سببت مشكلة لأهلى..

وأيام الجامعة كان ليا زمايل وزميلات كتير.. وكنت بعتبرهم كلهم زى اخواتى.. وكانوا بيحبونى، ومعنديش مشاكل مع حد.. واسرار كتير منهم معاية.. عشان عارفين انى حد موثوق فيه.

طلعت بأصحاب كتير قوى بعد ما اتخرجنا من الجامعة.. وكنا قريبين من بعض وبنخرج مع بعض ع طول

بعدها اشتغلت فى شركة سياحة.. واتعرفت على زمايلى ف الشغل.. وكنا دايما مع بعض.. وف رمضان نفطر سوا.. كنا عيلة واحدة وقريبين برضه قوى من بعض

وف يوم صارحنى زميل ليا انه معجب بيا.. ولإنى معنديش تجارب ومش بعرف المفروض ارد عليه اقوله ايه.. وكمان انا كنت بحس ان معاملاتى مع الناس طفولية جدا.. ف معرفش اتصرف ازاى ف موضوع زى ده

لكن مع الوقت قربنا من بعض اكتر واتكلمنا اكتر.. بس فكرة انى ارتبط كانت فكرة ابعد من خيالى ولا حتى فكرت فيها.. ف كنت مترددة جدا.. لحد ما بدأت احس إنى فعلا بحبه.. وان هو ده اللى عايزاه شريك لحياتى 

قبل الخطوبة شرط عليا انى اسيب الشغل.. (يا هو يا الشغل).. ف من غير تفكير اختارته هو.. بعدها شرط عليا انى اقطع مع كل أصدقائي..

اقوله: ليه بس؟ دول كلهم زى اخواتى والله مش اكتر.. 

يقولى: انا مايعجبنيش الكلام ده.. البنت لما تتجوز تقطع مع كل معارفها وأصدقائها.. لازم مايكنش ف حياتك غيرى.. وانا هعوضك ع الدنيا واللى فيها

وخلانى اكلم كل أصدقائى قدامه واحد واحد غصبا عنى،
واقولهم بالدموع: مش هينفع اعرفكوا تانى..

 وكان ردهم: طالما ده هيبسطك، ربنا يسعدك

وبرغم ان دى كلها كانت علامات تورينى بوضوح انه حد مش طبيعى ولكن حبى له عمانى.. وكنت بترجم افعاله دايما انها حب وغيرة

يوم الخطوبة عزمت اخر صديقة متبقية ف أصحابى.. وكان جى معاها أخوها الصغير.. فضل خطيبى طول الخطوبة مكشر ف وشى..
يسألنى: مين ده اللى مع صاحبتك؟ 

خلانى اقوم مخصوص أسألها.. وقبل ما تخلص الخطوبة كنت نهيت علاقتى بأخر صديقة ليا

استمرت الخطوبة سنتين ونص ماكنش بيخلينى اخرج بره البيت غير مع ماما.. ومع كل ده كنت بحاول اقنع نفسى ان اكيد اكيد دى كلها مشاكل عابرة وهتخلص بعد الجواز
ولكـــــــــن

بعد الجواز اتقلب حاله 360 درجة.. بقى انسان مجرد من المشاعر والاحاسيس.. عمل فيا ما لا يتخيله عقل.. بقى يصبحنى بعلقة ويمسينى بعلقة، ومن غير سبب أو على اتفه الاسباب

يعنى مثلا كنا ف رمضان ع الفطار.. وانا لسه حتى ماحطتش حاجة ف بُقى.. لقى الشوربة سخنة
اتعصب لسخونيتها..

 قلت له: معلش انفخ فيها وهى تبرد.. نفخ فيها مابردتش..
راح رزعنى قلم سخن وزعيق وشتيمة وإهانة

ماكنش بيخلينى اروح عند ماما من غيره.. ولما كنت اروح كنت بفضل طول الطريق اتفرج ع الشارع.. لإنى محرومة حتى انى اشوفه غير بأمره.. محرومة من الدنيا كلها

 فى مرة أول ما رجعنا من عند ماما لسه بكلمها اطمنها اننا وصلنا البيت..

فوجئت بيه بيقولى: اه ما أنا أصلى جزمة..
وراح حدفنى بالجزمة.. اقمت اشيل الجزمة احطها ف الجزامة.. قام يضرب فيا زى المجنون، 

وقعنى على الأرض ومسكنى من رجلى.. وقعد يسحل فيا ف كل الشقة.. وانا اصرخ واعيط من كتر السحل.. 

اهله ساكنين ف الشقة اللى فوقينا.. عقبال ما نزلوا ينجدونى من تحت ايده كان أُُغم عليا.. 

ولما كنت بروح عند ماما وبتسألنى ايه سبب الزرقان اللى مالى جسمى ؟ كنت بقولها اى حاجة.. اتخبط ف الرخامة، وقعت ف الحمام.. اى حاجة غير ان جوزى ممرمط بيا الارض

كنت فاكرة انى لما استحمل وادارى واصون بيتى وجوزى، ده معناه انى بنت أصول.. وده هيخليه يتغير على اساس انه بيحبنى..

 وقفت جانبه عشان يسدد ديونه.. عمرى ما اشتكيت ولا قلت محتاجة حاجة.. حتى حاجات البيت كانت كتير ماما اللى تشتريهالى عشان ماطلبش منه هو..

 افتكرت انى بضحى وبستحمل عشان حد يستاهل.. كنت من جوايه رافضة فكرة الطلاق.. يعنى ايه اخد لقب مطلقة؟ لأ طبعا استحالة.. يبقى استحمل بقى لعل وعسى اقدر اغيره ف يوم من الايام

لكن لكل بنى ادم طاقة وانا لو كنت جبل كان زمانى اتهديت بدل المرة مية مرة.. ده انا بطلت ابص ف المراية من كتر ما ملامحى اتغيرت من الضرب والسحل.. 

ف مرة منهم الكرسى اللى انا كنت قاعدة عليه اتكسر من كتر ما هو عمال يخبطنى بيه ف الحيطة.. وبرضه اهله خلصونى من ايده بعد ما كان أُغم عليا

بعدها دخلت ف دور اكتئاب استمر 20 يوم قعدت فيهم عند اهلى.. رافضة رجوعى له وبرضه ماقولتش لاهلى حاجة عن اهانته وضربه ليا..

بقى يبعت لى اهله كل يوم البيت عشان ارجع له.. وهو يجي يقعد تحت البيت بالتالت ساعات يبعت لى ف رسايل ويتوسل لى إنى ارجع له.. ويوعدنى انه هيتغير وانه مش هيمد ايده عليا تانى

وللاسف قررت اديله فرصة تانية كنت لسه شايلاله جوايا شوية حب.. وكان عندى أمل انه يتغير.. وبعد ما رجعت معاه البيت 

قالى: لو كنتى صممتى على قرارك كنت احترمتك، دلوقتى لأ
كنت مصدومة فيه جدا مش عارفة اقول ايه وللا اعمل ايه..

يقولى: ايه الزرقان اللى ف جسمك ده؟
اقوله: يعنى مش عارف من ايه؟
يقولى: قبل ما يروح هتلاقى زرقان غيره

وكل ما أسأله: انت ليه بتعمل فيا كدة؟ يقولى: بحبك

الكلمة اللى بيحاول يمسح بيها أى غلطة

فضلت سنة كاملة ماقولش لأهلى اى حاجة عن ضربه ليا.. وعشان كدة هو تمادى.. شد وسحل واهانة وابشع الشتايم.. وف الاخر يقولى بحبك

كنت فاكرة انى صعبانة ع أهله.. لحد ما ف مرة سمعت أمه بالصدفة بتهديه وتقوله: أهى ست وخلاص ف البيت

قررت وقتها انى ارجع بيت اهلى.. اقولهم انى خذلتهم ،كمان قررت اخد لقب مطلقة.. خليته يودينى عند اهلى.. واول ما بقيت وسطهم طلبت منه الطلاق.. حاول كتير يرجعنى ويوعدنى.. بس كان قرار بلا راجعة.. والمرة دى ماكنش فاضل له اى حاجة ف قلبى.. كنت خلاص استنذفت.. مابقاش فيا اى حاجة ممكن تشفع له.. سنة ونص استحملت فيه ما لا يطيقه بشر.. كفاية بقى

وقتها بس حكيت لأهلى كل حاجة.. ماكنوش مصدقين اللى بيسمعوه.. ولامونى وعاتبونى ازاى كنت مخبية عليهم كل ده !

حمدت ربنا وشكرت فضله انى اخيرا اتخلصت من البنى ادم ده.. اللى بغلط ف حقه لما اقول عليه بنى ادم ده حيوان.. مجرد من اى نعمة  موجودة ف الانسان

حاولت افوق من الكابوس اللى عيشته سنة ونص من عمرى.. وبعد ما فوقت، حاولت اقف ع رجلى من تانى.. ورجعت الشغل.. 

وهو اتجوز.. وجه  ف يوم جايب لى معاه مراته تحت شغلى.. يورينى يعنى انى ولا فرقت وفيه غيرى كتير يتمنوه

بدأت ارجع واحدة واحدة تانى للدنيا اللى اتحرمت منها.. اشتركت مع صناع الحياة.. وبقيت انزل معاهم نعمل نداوات ونجمع تبرعات ونرعى أسر محتاجة

بدأت احس انى عايشة وبتنفس هوا نضيف

ودخلت على الفيس بوك، ومع الوقت بقى ليا أصدقاء عليه بحبهم ويحبونى.. واتعلمت منه حاجات كتير مفيدة

مابقاش ليا طموح ولا احلام خلاص.. لكن على الأقل نفسى اكون جزء من حلم أو هدف اكون سبب ف تحقيقه لغيرى.. يمكن اقدر اساعد حد يفتكرنى بالخير ف يوم من الايام.
******
·         دى كانت قصتى واسفة لو طولت عليكوا.. واسفة كمان مرة انها ممكن تضايقكوا وتوجع قلوبكم.. ربنا يعينكم على قريتها كلها

رحاب المليحي

44 comments:

Anonymous said...

Marwa El Etriby
يالهوي :(

Anonymous said...

Amr Aly
أسلوبك يوجع أكني أول مرة اسمعها

Anonymous said...

Basma Abdelbaset
إيه وجع القلب ده :(

Anonymous said...

Hossam Ashoub
الكلام ده اذا كان بجد فأنا أحب أعتزرلك بالنيابه عن شباب كتير قلبهم مليان رحمه و حب و أحترام و هاقولك كلمه واحده " ان مع العسر يسرا" فرج ربنا قريب و هاتلاقي الشخص الي مكان عنيه حاطك

Anonymous said...

Nagwan R. Afify
بجد وجعتلى قلبى جداااااااااااا ازاى فى حد يستحمل دة كله :((

Anonymous said...

Rana Badawy
طبعا دي مش إنتي يارحاب وربنا يارب يهديها للخير وان شاء الله يكون ربنا شايلها نصيب أحسن باذن الله

Anonymous said...

Mohamed Hany
ربنا يعوضك خيير ويرزقك باحسن منة

Anonymous said...

عمرو بصل
ياااااه معقول في الزمن ده حد كده ربنا يعينك علي كل ظالم

Anonymous said...

Reham Mohamed
da bgd da ..........!! howa fe keda ?

Anonymous said...

Mohamed Ibrahim El Banna
لها الله لو حلوه أبعتيهالى :p

Anonymous said...

Hend El Shamy
بجد حاجة تحزن :( مش لاقيه كلام اقوله بس ربنا يقويها

Anonymous said...

Ragaa Mostafa
هما الرجالة دول ايه ....يا ساتر يارب

Anonymous said...

Sayed El Keblawy
دا معقد نفسيا لايمكن يكون بنى ادم طبيعى

Anonymous said...

Nehal Rashed
اووووووووووووف والله دمعت ايه ده هو فى كده ؟؟ ربنا يعينها ويوفقها فالطريق اللى اختارته وينتقم منه

Anonymous said...

Shref Ashraf
انا مش عارف اكتب ايه

Anonymous said...

Ahmad Helmi Al-Zawawy
ده حيوان ابن ستين تييييييت..ربنا بكرة يعوضها اللي برقبته

Anonymous said...

Seham Gebreil II
ايه النظره السوداويه دي للبشر معقول القصه دي حقيقيه!!!! ده اكيد حيوان في صوره بني ادم :(

Anonymous said...

Nermin Hussien
من امثاله كثبر ومشكلة في بيوت كتير بيفضلوا يربوا بناتهم علي الصوت الواطي ويخوفوهم من انهم يطلبوا حقوقهم وفي النهاية البنت وحدها بتجني ثمار ده وبتتصدم بالواقع قصة متكررة للأسف في الاونه الاخيرة بس نقول ربنا يهدي ويرزقها بزوج صالح لانها بنت اصول لاخر الخط معاه

Anonymous said...

Mohamed A. Rahman Alghrbawy
ربنا يعوض الصابرين بكل الخير. ان شاء الله يكون فيه طموح تانى وامانى وتتحقق بإذن الله.

Anonymous said...

Basma Kamal
المفترى عليه ربنا وكل قوى فى الى اقوى منه وربنا يعوضها خير عن الى هى شافته وصبرت عليه

Anonymous said...

Mona Rady EbId
حسبى الله و نعم الوكيل ربنا يعفينا و يعفى عنا

Anonymous said...

Orked Mohammed
انا كنت متخيله انى استحملت كتير وانى بطله خارقه انى اتحملت المرمطه والعذاب وصبرت لحد ماقدرت بفضل الله اغير جوزى ويبقى انسان طبيعى يعنى
عمرى ماتخيلت ان فى واحده ممكن تعيش مأساه اكبر من مأساتى
وجعتنى لانى عشت شبه جزء من قصتها بس الفرق انى ما استسلمتش فتره طويله كده زيها وانى اخدت مواقف بدرى عن كده وانه انسان مهما كان كان عايز يتغير واتغير بفضل الله لكن اللى فالقصه دى مريض واهله مرضى زيه
ربنا يعوضك خير يارب

Anonymous said...

Eman Mahmoud
:( بجد صعبانه عليا اوى بس هى غلطانه انها ما اخدتش بالها من تصرفاته قبل الجواز و رضيت بالاهانه بعد الجواز ربنا يعوضها بحد كويس يارب

Anonymous said...

Rasha Zizoo
حسبي الله ونعم الوكيل فيه علي فكرة انا تقريبا اعرف صاحبة القصة واعرف صاحب القصة وكل كلمة اتكتبت اقسم بالله حقيقة وعلي ايدي وكنت سبب اني اقنع الملاك ده انها تتزوج من الشيطان ده بعد اصرار منه طبعا ... مع الاسف اللي سمعتوه ده جزء صغير من الحقيقة

Anonymous said...

Yassmin Mohammed
ايه ده دى صعبه
اووووووى يا حوبا بجد وجعت قلبى اوووووى ربنا معاها ويعوضها خير عن اللى شافته ده :'(

Anonymous said...

Amira Samir
هى ازاى يعنى صبرت كل ده .. الانسانة تصبر مع جوزها لما يكون فى عيب عادى وممكن يتغير لكن ده انسان مريض نفسيا ده كان ممكن يموتها الحمد لله انها لسه عايشة بس بجد اللى مش متخيلاه ازاى انسانة تتنازل عن كرامتها بالشكل ده !!!!

Anonymous said...

Dina Hafz
شىء مؤلم وموجع فعلا ربنا معاها ومع بنات المسلمين وربنا يرزقها باللى يطبب اوجاعها وينسيها كل اللى شافته

Anonymous said...

DodOo LuḈky
:( noo comment bgd

Anonymous said...

فعلا ومن الحب ما قتل .. ومش قادر اتخيل انه في ناس بيطلق عليهم لقب "رجالة" ممكن تعمل ده كله

كريم الشيخ

Anonymous said...

Ashey Lu
:'(
Rbna. Yekremk ISA

Anonymous said...

AsMaa FaDly
de t2rebn nafs 7akya w7da sa7bty ..bs sana w nos kteer awee enk test7mely da ..hya 3 shohor w 5alas ..rabna yent2m men el regala elly bel shakal da ..7asby allah wn3m el wakeel :(

Anonymous said...

Mohamed Eliwa
قولي الحمد لله ع كل شئ و ربنا يرزقك باللي احسن منه و انتي مش غلطانه ف احاجه كل اللي عملتيه صح

Anonymous said...

Rabab Gooda
انا لو منك اصلى ركعتين شكر كل يوم انه نجدنى من الحيوان ده مع الاعتذار للحيوان

Anonymous said...

Ahmed Aborwan
لاحول ولا قوه الا بالله .. ربنا يعوضك يارب ... وافتكري انك اتظلمتي .. وما تنسيش الايه الي بتقول .... ومآكان ربك نسيآ .. ربنا مش بينسى حد ويعوضك وترجعي حياه احسن من الاول بس عليكي بالصبر .. وادعي لنفسك كتير .. تحياتي لك يا عزيزتي

Anonymous said...

Mazen Waly
enti shofty keteer awe , bas rabena akeed 7ay3awadek 3an kol da , we yemken mesh7et7essi belne3ma ella lamma tet7ermi menha

Anonymous said...

رينيه فرج
الله بعينك تعرفى انا بعتقد انة ممكن يكون علية شيطان لان الناس اللى عليهم شياطين بيبقة زى المجانيين

Anonymous said...

Karim Hassan
والله حسبي الله ونعم الوكيل في كل رجل يعامل زوجته بسوء لان النساء هم القوارير ( يعني زجاج )
وربنا امرنا بالمحافظة عليهم
واولي المسلمين خديجة وكان الرسول يضع رجله علي الارض لكي تصعد عليها لتركب الجمل
والله الدين الاسلامي كله رومانسية وحب واولهما حب الله

Anonymous said...

Rehab Magdy
beeing alone better than being with the wrong person

Anonymous said...

Samar Hamdy
rabna e3awed3alekee ISA

Anonymous said...

Dina El-bakry
Rbna ynt2em meno 7ywan w7aker wzanbk f r2bto wenty Rbna yktblk el 5er kolo isa

Anonymous said...

مينے دوڪ
معنديش تعليق...

بس عندي جزء بسيط اقتبسه وهعلق عليه ...

(( يعنى مثلا كنا ف رمضان ع الفطار.. وانا لسه حتى ماحطتش حاجة ف بُقى.. لقى الشوربة سخنة
اتعصب لسخونيتها..

قلت له: معلش انفخ فيها وهى تبرد.. نفخ فيها مابردتش..
راح رزعنى قلم سخن وزعيق وشتيمة وإهانة ))

اولا معنديش اخوات بنات .. ومش متجوز .. لكن والله لو كان عندي اخت بنت او ربنا رزقني ببنت واتجوزت وحصل معاها كدة والله والله والله لاعلقه من رجليه ... احنا معندناش بنات يتعمل فيها كدة حتى لو متجوزين ... احنا متربيناش ع كدة !!! البنات والزوجات لا هما خدامات ولا عبيد !!!!!

بقول لصاحبة القصة .. الصنف دا موجود منه فالدنيا .. وربنا قرنك بيه عشان يمتحنك ويخلصك من سيئات كتير عملتيها ربنا وانتى بس الى تعرفوها .. عشان لما تقابليه تكونى نظيفة ... احتسبي الاجر عند ربنا واشكريه انك اتخلصتي منه ... حاجة اخيرة ... الارض كروية .... الايام هتلف تلف وبكرة هتشوفيه .. مش هقولك مذلول وبس.. بس بكرة تشوفي.. داين تدان .

Anonymous said...

Bassem Elganouby
قولي الحمد لله..وأهي تجربة وأكيد انتي استفدتي منها..ع الأقل دي تجربة..وإن شاء الله اللي جاي يكون احلي..تفائلوا واستمري في اللي انتي فيه دلوقتي ومش تفرطي فيه تاني لأي سبب ...حمد الله ع السلامة :)

Anonymous said...

Marwa ELokely
مفيش حاجة من غير سبب اكيد فر حاجة مفقودة علشان يوصل بية الحال لكل دة اكيد فى سبب

Anonymous said...

ماشاء الله يارحاب كتاباتك بقت أسرع ومعبرة وبتوصل بسرعة ربنا يكرمك ويوفقك

ماما