Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, September 23, 2012

مش عايزة اتجوز.. أنا حره يا ناس


أنا بنوتة حياتها بسيطة جدا مش مكلعكة.. بحب الخروج والسفر والتنطيط زى اى حد فى سني.. 

بحب الحياة الاجتماعية وبحب الصداقة.. ليا أصحاب كتير قوى.. بس نسبة الولاد اكتر من البنات.. وده راجع لإنى اخدت مقالب كتيرة جدا من صداقة البنات.. وكلهم صداقتهم معاية قايمة على المصلحة.. 

بعكس صداقة الولاد بتكون قايمة ع الجدعنة.. وكلهم فعلا زى اخواتى مش اكتر
بحب يكون ليا انتيم ولد.. بحب احكي له وارتاح للكلام معاه.. وبحس انه بينصحنى زى اخته فعلا.. من غير اى مصلحة او نفاق ف نصيحته

مرة واحدة جربت أحب ايام الجامعة.. وده كان من اربع سنين تقريبا.. ارتبط بشخص حوالى سنة ونص.. كنت بدى ومش باخد.. وهو كان بيحب نفسه بس.. اكتر حاجة يقدر عليها (بحبك، وحشتينى).. 

ولما وجهتنا شوية مشاكل.. للاسف موقفش جانبى.. وبدأت احس انه بيفضل الانسحاب.. واول ما حسيت بكدة سابقته انا و انسحبت من حياته.

من بعدها مافكرتش ف الحب تانى.. مش عشان اتعقدت منه.. بس ملاقتش حد يخطفنى، ملاقتش حد ممكن اتخيله جوزى، وعايشين تحت سقف بيت واحد

يمكن احيانا كنت بفتقد الحب ومشاعره.. بس كنت بشوف ف (الأنتمة ) بديل.. مشاعر مستمرة دافية وجميلة

أنا دايما مُستمعة جيدة لمشاكل أصحابى العاطفية.. واحيانا بقدر اساعدهم ف حل مشاكلهم.. بس كل ما اسمع، كل ما خوفى لخوض قصة حب يزيد اكتر.. وبقيت احس انى شايلة همهم ومشاكلهم.. وعايشة فيها من غير ما اجربها

يمكن ده كمان راجع لحاجتين مهمين.. ان اهلى ربونى على ان الحب هيكون سبب ف فشلى ف دراستى.. ولما جربت الحب وفشلت فيه.. حسيت انهم صح.

وتانى حاجة والأهم، انى مش عايزة اتجوز حد يطلع ف الاخر صورة من والدى.. والدى اللى مش عاجباه والدتى وكان عايز يتجوز عليها لمجرد انها سيدة فاضلة، غلبانة ومنكسرة وف حالها .. (مش مدردحة).. ودايما محسساه انها محتاجله.. وللاسف هو بيستغل النقطة دى ع طول الخط

وعشان كدة مش بلاقى الامان وسط اهلى ودايما بخاف من والدى لإنه كمان عصبى جدا.. وع طول مشغول وبشوفه صدف..
ف دورت ع الامان بره.. بس بدور عليه ف أنتمة مش ف حب وارتباط

المشكلة اللى دايما بتوجهنى ان الانتمة كتير بتقلب بحب.. بس من الطرف التانى ولما ارفض الفكرة واعترض واقول انى شايفاك كأخ وصديق مش اكتر.. تنتهى علاقتى بيه ويرفض انها تستمر..

 لإنه بدأ يشوفنى كزوجة وحبيبة وبيغير عليا.. ويطلع من حياتى واتكسر انا..  وارجع من تانى افتقد الامان واخاف.. لكن ارجع احاول اتماسك واقول وجع ساعة ولا كل ساعة

حاولت ف مرة ادى لنفسى فرصة.. ولما اتقدم لى شخص، قلت له ع عيوبه.. صلحها ورجع لى تانى.. حاولت والله، حاولت اشوفه كزوج.. بس ماقدرتش.. ولما صرحته، انفعل عليا وحس قد ايه انا ظالمه ف قرارى

برغم انى والله حد ضعيف جدا من جواه ومش زى ما بظهر قدام الناس.. 

أنا عايزه اعيش بحرية بدون قيود.. بس نفسي اقابل انسان يفهمني ويعرف يطمني

 نفسي يخطفني عشان اعجز عن رفضه.. يا كده يا اما تحيا عيشة الحرية

كمان انا متقلبة المود جدا وعيوبى كتير وانا عارفها.. عشان كدة بوفر الاحراج ع نفسى.. ف لا عايزة احب ولا عايزة اتجوز.. 

مش عارفة اعمل ايه عشان اتغلب ع خوفى.. فعلا مش عارفة


رحاب المليحي

16 comments:

Anonymous said...

Nehal Rashed
حسيت نفسى اوى فالجمله دى " برغم انى والله حد ضعيف جدا من جواه ومش زى ما بظهر قدام الناس.. أنا عايزه اعيش بحرية بدون قيود.. بس نفسي اقابل انسان يفهمني ويعرف يطمني نفسي يخطفني عشان اعجز عن رفضه.. يا كده يا اما تحيا عيشة الحرية"

تسلمى يا حوباااااااا قولتى كل اللى جوايا استمرى بقى جميله اوى القصه دى

Anonymous said...

ZǿǾmẫ ZǾǿmä Shŗbãtiķǻ
:) من الاخر

Anonymous said...

Mohamed Samir
"الفرق بين الزواج والموت:انه ليس من الضرورى اذا مت ان ادخل جهنم" ...................... انا برضه شايف ان الجواز مش مهم وانا عندي 29 سنه وصحابي بيزنوا عليا اني اتجوز بس انا مودي جدا وبحب اعيش حياتي وماشي بمبدأ واحده لا هي مامتك ولا هي اختك حتصرف عليها ليه ؟؟؟؟ ( هزار طبعا انا مش بخيل ) :) :) :) :) بس انا بقي بجيب من الاخر يعني لو حد قالي اتجوز يابني وشوف عيالك بقوله علي فكره دي حياتي انا مش حياتك انت كانوا بيزعلوا شويه في الاول بس دلوقتي اتعالجوا واقتنعوا انها حياتي انا مش حياه حد تاني ....... وبالتالي انا كويس جدا

Anonymous said...

Samah Hassanien
واتكسر انا.. وارجع من تانى افتقد الامان واخاف :(

Anonymous said...

Hend El Shamy
( واتكسر انا.. وارجع من تانى افتقد الامان واخاف ) اهيئ فعلا :(

Anonymous said...

Sayed El Keblawy
عجبك كدا قلبتى المواجع على اصحابك:)
مال لونك بقى حزاينى اوى كدا ليه ..نفسنا نفرح :)

Anonymous said...

Ahmad Helmi Al-Zawawy
رائعة يا حوبة و الله

Anonymous said...

Basma Kamal
جميله قوى قوى يا حوبا

Anonymous said...

Hesham Sayed Ahmed
ع فكره انك ظلمتي الانسن اللي اشتراكي وغير من نفسه وجالك وانتي ظلمتيه تاني ده الوحيد اللي عمره ماهيقدر يزعلك لو انتي مزعلتهوش وكمان عشان هو اللي اختارك واكيد حبك بجد او كان بيحبك قبل كده ومن معملته صدقني انه هيخاف عليكي ويصونك ويحبك ويحميكي من الدنيا دي بس ياريت تصرحيه بحقيقتك دي وتشيلي موضوع الانتمه وانك سوري تبقي كوبري وتحلي مشاكل وياريت تركزي في الكومنت بتاعي انك تكوني متزوجه هتشوفي المسؤليه مع انسان بيحبك وبلاش تكوني جبانه وخوافه وجبانه مره تانيه بس على سبيل تحمل المسئوليه

Anonymous said...

Hiba Hamduk
انا من راي في مجتمعنا العربي دة الملء بالضغوطات صعب الانسان يعيش لوحدة من غير صديق او حبيب لكن طالما ليك صديق فدية نعمة من ربنا اما بالنسبة للحبيب فهو دة هايكون الشخص البساعدك تكملي ذاتك وراح يتغلب على خوفة وفشلة ويتحدى المستحيل عشانك طالما نحن عاييذين حياة كريمة في الواقع دة لازم نصبح ناس متميزين مش عادين ابدا كدة هاتبني نفسك وعلى الاقل ترتبط بانسان يقدرك وتكمل الحياة بسعادة ومهما واجهتكم مشاكل راح تقدرو تواجهوها فقط بالحب والايمان بحبكم

Anonymous said...

Eman Mahmoud
بجد رائعه :)

Anonymous said...

Eman Mahmoud
بجد رائعه :)
بس عارفه دايما بقول حياة السينجل اريح لكن مش احلى بس لما اى حد هيقابل الشخص اللى فعلا يحس انه حته منه و هيبقى سعيد اكتر معاه مبيفكرش فى اى حاجه من دى و بيبقى عايزه هو بس

Anonymous said...

مؤمن النجار
ممكن تتجوز وهى مغمضة

Anonymous said...

Lila Lexus
ANA zayk bzbt

Anonymous said...

Jennifer Lopez
super likeiton '

Anonymous said...

Mohamed Khaled
فرصة تانية بيتهئيلى ان اى حد لازم ياخد فرصة تانية اديها لنفسك متبغليش عليها