قصة غريبة جديدة

كانت قاعدة تتفرج من شباك الطيارة وعلى وشها ابتسامة عذبة تحمل الكثير من التفاؤل، محجبة، قمة فى الشياكة، لون بشرتها ابيض قشطة

تحسها من اصل تركى مثلا

لفت نظرى شكلها ودفعنى الفضول انى اعرف عنها اكتر.. قربت منها وقلت اجرب اكلمها عربى..

رميت عليها السلام، ف ردت السلام

قلت: انتى مصرية؟

ابتسمت وقالت بثقة: لأ، انجليزية

قلت: طب ازاى؟

قالت: انا متجوزة مصرى

قلت: حتى لو، ده انتى بتتكلمى مصرى احسن منى

ضحكت وقالت: هحكيلك حكايتى، انا دخلت كل الأديان، مفيش حاجة استريحت فيها

لحد ما قابلت جوزى وحبيته واعتنقت الاسلام.. فعلا الاسلام الدين الوحيد اللى حسيت فيه بالأمان وانى مستريحة، وافتخر انى مسلمة

قلت: طب ازاى بتتكلمى مصرى لبلب كدة، مش انتى عايشة ف انجلترا برضه؟

قالت: لااااااااا، انا عايشة فى بلدى التانية مصر

قلت: هه؟

قالت: مش مصدقانى، صح؟

قلت: لأ، طبعا مش مكذباكى، بس مش قادرة استوعب.. جديدة دى

قالت: انا عندى 5 ولاد، من وهما صغيرين اخدت قرارى ونزلت بيهم مصر.. من ناحية لإنى بحب مصر جدا.. ومن ناحية لإن فى انجلترا، لا هيكون فى تعليم ولا فى اخلاق.. قلت فى نفسى عشان يتعملوا صح ويتربوا صح يبقى اعيشهم فى بلد ابوهم

قلت: وجوزك فين؟

قالت: جوزى مقيم فى انجلترا، بسافر له كل كام شهر اقعد معاه شوية.. وبعدين انزل لولادى تانى مصر

قلت: حكاية غريبة!!

قالت: يمكن تكون غريبة بالنسبالك، بس بالنسبة لى هو ده الصح

قلت: ولادك ع كدة صغيرين بقى؟

قالت: لأ مش كلهم، بنتى الكبيرة جوزتها مصرى وعايشة مبسوطة فى مصر الحمدلله، وعندى ولدين فى الجامعة، وتوأم لسه فى ابتدائى

قلت: اممممم، وجوزك مش زعلان من عدم وجودكوا معاه؟

قالت: طالما احنا مبسوطين هو كمان راضى ومبسوط، وانا كل كام شهر بروحله انجلترا اخد له معاية تموين الكام شهر كله معاية من مصر.. وشايفة انى كدة بوفرله.. انى اخد منه الاسترلينى احوله مصرى واشتريله كل احتياجاته من بلده .. والحمدلله احنا عيلة سعيدة ومبسوطة

وصلت الطيارة ارض الوطن مصر

قلت: ربنا يكتر من امثالك، والله اسعدنى الكلام معاكى.. ادتينى بارقة أمل فى بلدى أم الدنيا مصر

رحاب المليحي