Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, March 07, 2012

كواليس التعليم بره


دايما بنشوف ف المسلسلات واحد او واحدة شيك كدة يقولك انا هروح اعمل تشيك اب (check-up) فى لندن

لحد ما عيشوا الناس ف الوهم، ان اللى بيسافر لندن بيرجع طاير مش ماشى حتى ع رجليه.. وانه لو مش عيان بيعيوه ويخفوفه تانى
لندن بقى مش اى حاجة

وبرضه ف التعليم، تلاقيه يقولك التعليم بره غير.. ويا بخته اللى تجيله الفرصة يعيش ولاده عيشة نضيفه ويعلمه تعليم نضيف

دى الناس اللى ايديها ف المية.. دى الناس اللى شايفة الموضوع من بره

خلينا ندخل كدة كواليس التعليم ونشوف ايه النظام
زى ما كل حاجة فيها الكويس برضه فيها الوحش

ندى ف امثال بقى، عشان الرغى النظرى الكتير بيصدع.. وعشان كمان انا اتكلمت كتير عن ايجابيات التعليم

تخيل معاية:-
- طفل 5 سنين فى حمام المدرسة، يدخل عليه طفل تانى ويقوله: (تعال ورينى وانا اوريك)
- طفلين ف اعدادى يلحقوهم فى حمام المدرسة قبل ما يقوموا بحركات جنسية
- المُدرسة تحكى ف الفصل قدام اطفال ابتدائى انها سابت صاحبها وبتدور ع مكان تانى تعيش فيه.. وده عشان هما ف السن اللى المفروض يفهموا فيه الحاجات دى (من وجهة نظرها)
- صورة ولد بيسلم ع بنت ف كتاب.. تسأل طفلة عمرها 4 سنين تفتكرى معانها ايه الصورة دى؟ تقولك ببساطة: الولد بيقول للبنت بحبك.. مين دخل ف دماغ بنت عمرها 4 سنين الكلام ده؟
- لما طفلك يغلط تضربه وتقوله عيب.. ويعلموه ف المدرسة ان ممنوع الضرب وحتى الزعيق ممنوع.. ولو اهلك عملوا فيك كدة قولنا او كلم البوليس واحنا هنوديهم ورا الشمس.. وتلاقى الطفل بكل براءة بيهددك انه هيقول لمُدرسته عليك

- بنات ف اعدادى مش حابين مُدرسة يتفقوا عليها انها ضربت واحدة منهم والباقى يشهد.. وبكل بساطة تترفد
- ولاد اعدادى يضربوا المُدرس ويدولوه بالجزمة بيس جدا.. مايقدش المُدرس ينطق.. مهو ممنوع الضرب ولو عمل حاجة يبقى هو الغلطان
- لما تبقى بتقول للطفل عيب واحد يبوس واحدة ف فيلم ف التلفزيون.. ويشوفوا ده بيحصل قدامهم لايف ف الشارع
- لما تقول لاخت عيب تغيرى هدومك قدام اختك.. وتلاقى ف غرفة خلع الملابس كله قالع قدام كله.. وماشين كدة بيس يا مان، خليك فريش احنا ف رحلة
لما ولما ولما
بس ف النهاية لا يصح الا الصحيح

ولازم نحط عينينا ف وسط راسنا عشان يطلع الطفل سوى ومتربى وف وسط كل الاغراءات اللى هو شايفها دى.. واللى مع الاسف البلد بتحليلهاله ومش محتاج يعملها ف الخفى.. نخليه يودى وشه الناحية التانية ويقول حرام وعيب

والاهم انه مايسبش اهله ويدور ع شقة تانية مع صاحبته من عمر 16 سنة.. ودى حرية شخصية ولو عمل كدة القانون معاه وماتقدرش تقوله لأ

هييييييح ف ايه بقى؟
ان مش دايما كل حاجة احنا شايفنها نعمة فى ايد غيرنا.. بتكون فعلا نعمة احيانا بتكون نقمة
بلاش نشوف الحاجة من بره ونحكم عليها.. ندى نفسنا فرصة اننا نشوفها بنظرة اعمق
يمكن نطلع غلطانين
حوبا الاروبة

10 comments:

Anonymous said...

Ramy Elalfy
فعلا محدش بيشوف الحاجه من براها لازم يدخل جواها ويشوف ويحكم عليها صح
تسلم ايدك ياحوبا

Anonymous said...

Samah Hassanien
حلوه اوىىى

Anonymous said...

Samah Gebril
الحمدلله احنا فى نعمه بجد

Anonymous said...

انا مصريه
دا انتى فى معاناه يا حوبا وفى وسط كل الاغراءات دى فالقابض على دينه كالقابض على الجمر وربنا يعينك ويحفظ لك بنوتاتك الحلوين ... وتسلم ايدك

Anonymous said...

Mohamed Mashaly
طب عندك فرصه تعليم ليا ف لندن ؟انا جاهل و عايز اتعلم

Anonymous said...

Sarah El-Eskafy
تلات ارباع الحاجات دى بقت بتحصل فى المدارس المصرية بيس بقى احنا فى رحلة .. قطعت العولمة على اللى بدعها

Anonymous said...

Emy Farouk
جميل جدا البوست و فعلا محتاجين نعرف ان مش كل الى بره يبقى بيلمع

Anonymous said...

Mohamed Shouman
تعالي وريني وأنا أوريك موجودة في مصر برضه يا حوبا والدليل لعبة عريس وعروسة .

وعلي فكرة موضوع ضرب الأطفال أثبت فشله وإن العقاب الجراوندد أفضل بكتير .

تعالي شوفي العيال هنا بتعمل ايه في المدرس والسبب كان الكبت

Anonymous said...

Doha Helmy
حوبا..
الكلام تمام
بس دى مشكلة اخلاقيات
فامننكرش بردهن ان التعليم "كمناهج" متطور عننا بمراحل!

قلـمـــــى يعنــــى أنــــــا said...

دايما لما بتفرج ع افلام اجنبي مبيشدينيش فيها غير الطبيعة الجميلة لكن احداثها وغالبا العلاقات الانسانية فيها للاسف بزدريها لاني بتعمق ف كل كلمة ونظرة الطفل بيقولها لابوه او امه بحس بجفاااااااء رهييب وكأن الفكر السائد هناك ( انا ورغباتي واهدافي فقط وليذهب الباقي للجحيم )

اول مرة اقري مدونتك وبصراحة عجبتني