Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Friday, January 27, 2012

بنحبك يا مصر


قبل الثورة بسنين كانت عايشة فى بلدها مش شايلة هم حاجة.. مبسوطة وراضية.. كل حياتها فى اصحابها واهلها.. كانت عاملة زى السمكة اللى لو طلعت من المية تموت
ماكنش طموحها لا فى جواز ولا فى سفر

كانت مكتفية بحُب كل اللى حوليها ليها.. وده كان بالنسبة لها الدنيا وما فيها
ولما سألوها لو جالك شغل بره مصر تسافرى؟

رفضت من غير ما تفكر ..وقالت انها ماتسبش بلدها وناسها عشان تعمل فلوس

ولكــــــن
لإن مش شرط اللى البنى ادم عايزه بيكون هو ده الخير له
جالها نصيبها واتجوزت ومش بس كدة لأ دى كمان اتغربت.. ومابقتش تنزل بلدها غير مرة فى السنة..

ترجع لبلدها كل سنة وهى طايرة فوق السحاب.. وتسافر منها وهى مخبية دموعها ف ايديها

لما رجعت بعد الثورة قالولها صحابها بتهريج: انتى اتفرجتى ع الثورة فيديو
ابتسمت بمرارة وايدت الكلام.. عشان ماكنش بإيديها تكون بعيدة

كان كل اللى كان بإيديها إنها تدعى لمصر فى غربتها لعل ربنا يستجيب لها
كانت لما تتفرج على الفيديوهات والصور وكمية الإهانة والسحل اللى بيحصل ف الشباب والبنات.. ماكنتش بتقدر تمسك دموعها

وكان سؤال واحد اللى بتفكر فيه.. يا ترى لو كانت موجودة فى مصر كانت هتنزل معاهم؟ ولا هتخاف؟

وماكنتش بتلاقى اجابة مقنعة.. لكن كانت ترجع وتقول (لن يصيبكم الا ما كتب الله لكم)

وانها اكيد كانت هتنزل بس ع الاقل مش لوحدها.. كانت هتنزل فى وجود صحابها اللى البهدلة اخدت منهم رئات وبقى الغاز بالنسبة لهم ادمان بيجرى فى دمهم

اكتر حاجة بتضيقها كمية الناس اللى بتقعد تخون وتشتم على النت بسبب او من غير..
والاكتر مرارة بقى لو عملت شير لحاجة حصلت فعلا، بعضهم يتهمها إنها عايزة تولع فى البلد عشان هى مش فيها.. ف منعا لحرقة الدم على اقرب زرار بلوك وتبليك

ولما تفكر ترجع تستقر فيها يقولوا عليها مجنونة ومش عارفة هى بتعمل ايه.. وان كله عايز يهج منها وهى اللى غاوية شقا وعايزة ترجعلها برجليها

بس مع الاسف اللى ايده ف الميا.. مهو محدش بيعرف قيمة الحاجة اللى فى ايديه غير لما تروح منه.. ومحدش بيعرف قيمة بلده غير اللى اتغرب وبقى يزورها كل سنة مرة
بس ف النهاية كل واحد بيحبها بطريقته وكل واحد عايزها اجمل بلد ف العالم

ويارب يجي اليوم اللى تقفى فيه ع رجلك من تانى يا مصر.. وكل اللى اتغرب وسابك عشان عيشة افضل يرجع لحضنك ويلاقى فيكى افضل من كل اللى اتمناه

♥ بنحبك يا مصر يا أم الدنيا ♥

رحاب المليحي

9 comments:

Anonymous said...

Mohamed Mashaly
بالنسبه ليا الكلام فيه غلطه واحده بس ... خليه بالمذكر و يبقى محمد مشالى بالظبط.... الله ينور

Anonymous said...

Nehal Rashed Elgazar
مبيحسش بقيمتها الا اللى متغرب منها صح
ربنا يكون فعونك يا حوبا بس انا بقى عندى بابا عكسك مصر بالنسبه ليه غربه لانه مسافر من 45 سنه وعاش بره قد ما عاش فمصر مرتين وماشى فالتالته

Anonymous said...

Sarah El-Eskafy
كل منا له قدره اللى ربنا بيكتبهوله لكن مفيش حد بيعجبه حاله
وله فى ذلك حكم

Anonymous said...

Sami Ahmed
جميلة يا حوبا, فعلآ ما
يحسش بالغربة غير اللى جربها, وربنا يقرب اليوم اللى تقف فيه مصر ع رجليها من تانى

Anonymous said...

Nona El Shamy
تحفة بجد و فعلا محدش بيحس بقيمة بلده زى اللى متغرب :@
نفسي ارجعلهاااااا بقى و اعيش فيها مرة من نفسي :(

Anonymous said...

انا مصريه
جميله يا رحاب
باذن الله مصر ها تكون زى ما كلنا نفسنا نشوفها

Anonymous said...

Ramy Elalfy
ربنا يحميكي يامصر

Anonymous said...

حلوة يارحاب
وكل واحد يقدر يساعد مصر ممكن يساعدها سواء من جوة مصر أو من برة مصر
ماما

نيللى على said...

ربنا يرجعك بسلامة لمصر, ويارب يرجعلنا بلدنا بسلاة يارب