Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, January 19, 2012

انا طيبة ولا ساذجة؟

كنت بحبها جدا.. كانت انتمتى وصاحبتى وكل حاجة فى حياتى.. لو تطلب عينيا ماتأخرش..

كنت بحب المدرسة عشان هى فيها.. لو بس غابت يوم واحد.. لازم اروحلها البيت اشوفها وكمان اشرحلها اللى فاتها واديها كتبى تذاكر منها

استمرت علاقتنا ك اخوات وانتيم لمدة سنتين.. كنت دايما انا اللى بعملها كل حاجة.. ومافتكرلهاش مرة واحدة عملت هى حاجة عشانى.. لكن عمرى ما حطيت ف دماغى الموضوع ده.. حبى ليها كان عندى الدنيا وما فيها.. وكان وجودها فى حياتى اكبر هدية

انتمتى كان ليها اخت اصغر.. كنت بعتبرها زى اختى وبحبها برضه قوى.. فى مرة لاقيتها جاية تحكيلى عن انها مرتبطة وفتحت لى قلبها واتكلمت معاية.. والشخص اللى كانت مرتبطة بيه كان معانا ف المدرسة.. وكان يعزنى ويحترمنى قوى

واعتبرنى اخته الكبيرة، لو حصلت اى مشاكل ما بينهم كان يجي يحكيلى عشان انصحه واحلهالهم ع قد ما اقدر

ف مرة لاقيته جى يحكي لى على سر يخصه.. وكان سره صدمة بالنسبة لى.. بس حلفنى انى ماقلش لمخلوق حتى لصاحبته.. وبرغم انه سر قديم فى حياته لكن حابب انى اعرفه وخلاص

وانا استحالة لو حد استأمنى ع سر انه يطلع بره.. لإنها امانة اتحاسب عليها قدام ربنا

بعدها بكام شهر لاقيت صاحبته بتكلمنى ومتضايقة قوى عشان عرفت السر اللى هو كان مخبيه عليها.. وحكيت لى عليه

انا تنحت وسكت معرفتش ارد عليها..

سألتنى هو انتى كنتى عارفة؟ معرفتش ارد عليها عشان كان فيه مية علامة استفهام بتدور ف بالى..

يعنى ايه اللى خلاه يقولها دلوقتى؟ والموضوع اصلا قديم جدا..

طب اقولها انا عارفة ولا اكدب عليها؟ ولو قلت لها هاخسرها عشان هى اخت انتمتى وماكنش المفروض إنى اخبى عليها..

طب لو كدبت عليها، مهو ممكن يوقع بينا ويقولها لا دى عارفة من زمان وبتضحك عليكى

ف الاخر قلت لها الحقيقة انى كنت عارفة.. البنت زعلت منى قوى وتعبت صحيا جدا

اختها بقى اللى هى فى الأصل انتمتى.. لاقيتها بتكلمنى تتخانق معاية وبتقولى انتى السبب فى مرض اختى.. ولو حصلها حاجة عمرى ما هسامحك

طلعت انا الوحشة ف الاخر.. ونسيوا سبب الموضوع الرئيسى اللى هو الولد، وانه هو اللى صاحب السر مش انا.. وان كل غلطتى انى حفظت على سره

مش كدة وبس .. لكن سيحت لى كمان فى المدرسة جامد جدا.. وقالت كلام عنى من اوله لأخره غلط.. كل ده عشان تاخد حق اختها المريضة منى.. وانا ماليش ذنب فى اى حاجة

كانت بجحة لأقصى درجة ومش بيكفيها تتكلم عنى من ورايا.. لا كانت بكل بجاحة تتكلم فى وشى وتقول كلام مايصحش يتقال من غريب عشان يتقال من قريب

ومع ذلك كنت بسكت وعندى يقين تام ان ربنا هياخد لى حقى منها.. وهينصرنى قدام اصحابى

وسبحان الله كل ما كانت تفترى عليا الاقيها تانى يوم تعبانة تعب شكل وفى المستشفى.. وبرغم كدة ماشمتش فيها وكنت بزعل عشانها.. انا عارفة انها زعلانة عشان اختها وخايفة لا يجرالها حاجة.. بس مرضها ده بإيد ربنا ومش انا السبب فيه

ولما اختها خفت شوية جاتلى تعتذر لى وتقولى انا عارفة ان مش انتى السبب فى اللى انا فيه.. اخدتها فى حضنى وقلت لها انا مسمحاكى ومش زعلانة منك ومارضتش اعمل معاها اللى (كانت) انتمتى عملته فيا

طب ليه؟

ليه الطيبة مابقاش ليها تمن؟

ليه الطيب ف الزمن ده مغفل وبياخد على قفاه؟

يا ترى احنا اللى غلط؟

وكلمة طيبة تحولت لساذج!

يا خسارتك يا طيبة ف زمن الغابات


رحاب المليحي


9 comments:

Anonymous said...

Nehal Rashed
ya alf 5sara ll2saf eltayb msh b2a leh 2ema

Anonymous said...

Mona Moustafa
تخيلي ان حصلي نفس الموقف بس اكبر من كدا شوية علشان بردة حفظت سر اختها وبعدها عرفت وقالتلي انت عارفة فا قولتلها اة علشان مش بعرف اكدب عليها بعد صداقة اكتر من 10 سنين انتهت دلوقتي بس انا ادام ربنا مرتاحة ومش مضايقة ومش غلطانة

Anonymous said...

Mo'men Sa'ad
‫طب الولية التانية عاملة ايه دلوقتي ؟! ..
وبلاش النهايات المفتوحة لأنها بتخليني اتخيل .. وانا معنديش وقت

Anonymous said...

Nona El Shamy
ana No Comment :D , Bs Tari2et Kalmaaak Gamdaaaa kl3adaaa ♥

Anonymous said...

Samar Maya
طيبة :))

Anonymous said...

Amr Aly
بما ان دي قصة واقعية اكيد صاحبتها هتقرا كلامي وبما إنها عن الصحاب فأنا أحسن واحد اتكلم في الموضوع دا وبما إنها عن جرح الصحاب ومقابلة الإحسان بالإسائة فيبئى اكيد عارف طعمها ايه

انتي طبعا مش غلطانة في حاجة ابدا بس احمدي ربنا إن الزمن وراكي صاحبتك في المرايا وعرفهالك كويس جدا وانها في الشدة او غير الشدة ممكن تعمل ايه احسن ما كان الموقف دا مش يحصل وتفضلي عمرك معاها كله عايشاه وانتي مش عارفاها يبئى اكيد انتي ربنا رزقك بنعمة كبيرة وهي نعمة البصيرة

Anonymous said...

Yom Gdeed
طيبة طبعااااااااا

Anonymous said...

Amy Queen
ع فكره انا حصل معايا موقف زي ده بس بختلاف التفاصيل . انا دلوقتي لوحدي بس مرتاحه ع الاقل مش هكمل مع واحده مقدرتش انا كنت بحبها قد ايه

Anonymous said...

Mahmoud Abdo
لا حول ولا قوة الا بالله