Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, January 18, 2012

عفركوش.. مرتكوش

- هى مامى عامله اكل ايه النهاردة؟

- وانا ايش عرفنى.. ما تروحى تسأليها

- ما تروحى انتى، انتى اختى الصغنانة ولازم تسمعى كلامى

- وانا مالى ياختى، الجوع اهون من الزعيق اللى هنسمعه يشبعنا

- طب بصى روحى أسأليها براحة كدة.. وانا هستناكى هنا

- لأ، بصى روحى انتى أسأليها وانا اكنى مش هنا

- شم، شم، شكلها عاملة ملوخية، صح؟ شمى معاية كدة!
- شممممم، ايه الريحة دى؟ دى شكلها حرقت الأكل

- عااااااااااااااااا
********
- مامى

- ها؟

- انا عايزة اروح للكرافير؟

- كرا... مين؟ اه الكوافير.. ليه؟

- صاحبتى (حلقت) شعرها لحد هنا هو

- حلقت؟ اسمها قصت

- اه قصت شعرها وانا عايزة اعمل زيها

- هنا هو ده يعنى قصته قصير قوى.. هى شعرها سايح ونايح انتى لأ

- يا مامى انا شعرى (استريت)

- لأ، كيرلى

- لأ يا مامى طب حتى بصى بصى شعرى استريت اهو

- لأ، كارلى.. ده استريت بعد ما بيتغسل.. ساعة وبيتحول للنوع الكنيش

- يااااا مامى بقى.... اهىء اهىء

- خلاص خلاص، بكرة نروح نشيله خالص، ولا تزعلى نفسيتك
*******
- يا بنتى افهمى، بلاك يعنى اسود بالعربى

- طب واورنج؟

- هه؟ بالعربى اورنج برضه

- بتعلمى اختك غلط ..وعاملة فيها فلحوسة.. اورنج يعنى برتقانى

- يا مامى احنا مش بنتكلم ع (الفروتس).. احنا بنتكلم عن (الكلارز)

- ما انا فاهمة ياختى.. اللون الاورنج يعنى برتقانى

- ااااه يعنى برتقانى واستفاندى وكدة، صح؟

- جرررررررر ، بقول اللون مش طبق فاكهة هو
*******
- مامى، ممكن نعمل الهوم ورك؟

- طيب، هاتى..... ايه دى؟

- دى سونج لازم احفظها

- نعم ياختى؟ هو ده الهوم ورك؟

- لأ، بس التيتشر قالت اننا لازم نحفظ السونج دى عشان حفلة المدرسة

- وماله مش عيب.. الصبر من عندك يارب

- ياللا حفظينى بقى، بلييييييييييز

- بصى يا بنتى، هى مرارة واحدة اللى عندى ومع الأسف انا محتاجها عشان اكمل المشوار

رحاب المليحي

13 comments:

Anonymous said...

Nona El Shamy Hhhhhhhhhhhhhhhhhhhhhhhhhhhhhhhhhhhhhhhhhhhhh
Bgd 7elwaaaaaaaaaaaaaa awiiiiiiiii deeeeeeee , 2al te7fz song ( a7naa Makonaaash f madareeeeees )

Anonymous said...

Shahinaz Ahmed
اختلفت الاسباب وفقع العيال للمرارة واحد

Anonymous said...

Mohamed Metwali
مشاعر ولا اروع براءه ولا اجمل

Anonymous said...

Amr Aly
جميلة اووووووووي خالص

Anonymous said...

Sami Ahmed
ههههههههههههههه, جامدة جدآ
أنا عاوز هوم وورك من ده :)

Anonymous said...

Samah Hassanien
‫حلوة اوى‬

Anonymous said...

انا مصريه
جميله يا حوبا زى ما عودتينا وربنا يعينك ....
المهم قصيتى شعر البونيه ولا لسه هههههه

Anonymous said...

Ramy Elalfy
يااااه ياحوبا واحشتني حاجاتك والله
ضحكت وماما قاعده جنبي بتبصلي وتضحك عليا تقريبا افتكرتني مجنون

Anonymous said...

Gehan Diab
Hahaha:)

Anonymous said...

Asmaa Bent Elshams هههههههههههههههههههههههههه هو ده بيحصل مع عيالك بجد ولا انتى بتألشى

لو حقيقى قوليلى عشان انا مش عندى مرارة خلاص اتفقعت اعمل حسابى ومخلفش هههههههههههههههههههههههههههههههههههههه

Anonymous said...

Nermin Hussien
ربنا يعينك :)

Anonymous said...

احمد ونان
الاطفال احباب الله

Anonymous said...

Ahmed Mamdouh
هههههههههههههههههههههههههههه الله ،، يا بختك :D :D