Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, January 09, 2012

ابنى بقى انجليزى مش مصرى

بحبه قوى، لو طلب عمرى كله مش هستخسره فيه
ما انا اصلى ماليش غيره ف حياتى وكمان ف غربتى
اى حاجة بيطلبها بعملهاله، اى حاجة نفسه فيها بجبهاله
حتى لو معيش فلوس، حتى لو كان عندى اولوليات تانية اهم، تتأجل عشانه

اه، نسيت اعرفكم بيا وبيه

انا سيدة مصرية اتجوزت من واحد مصرى.. وسافرت عيشت معاه بره
يادوب ماكملتش كام سنة وحصلت مشاكل كتير مع جوزى، هو مصرى ومسلم اه لكن ع الورق بس.. كل حياته لا تمط للاسلام بصلة

حاولت اصمد واكمل معاه عشان اربى ابنى الوحيد اللى خلفته منه.. لكن المشاكل كبرت وبقيت اصعب من انى استحمل

انفصلت من حوالى 3 سنين.. ومن وقتها وانا ف مشاكل وقضايا ومحاكم معاه
حاولت ارمى ورا ضهرى واعيش عشان اربى ابنى الوحيد
حاولت ادفن حزنى جوايا عشان خاطر ابنى الصغير مايحسش بأى حاجة.. وكمان عشان مايطلعش فى بيت فيه امراض نفسية

اول كام سنة فى عُمر ابنى، كان زى البلسم، كله براءة
علمته اننا نتعامل كأصحاب مش أم وابنها.. كان يرجع من المدرسة يحكيلى كل حاجة حصلت

وعشان احنا عايشين ف بلد اوروبية، ف كان لازم اتكلم معاه ف كلام مش سنه خالص.. بس عشان اوعيه وافهمه ان مش كل حاجة بيشوفها بتحصل قدام عينيه تبقى صح
كنت بالنسبة له كل حاجة، علمته حاجات كتير جميلة ف سنه الصغير.. منها الصلاة وقراءة القرأن

لكن السنة دى بعد ما كمل 7 سنين.. بدأت احس باختلاف، مابقاش يجي يتكلم معاية زى الاول خالص، مابقاش يحكى لى ع حاجة.. واحيانا كمان بيكون عايز يروح يشتكينى لمُدرسة الفصل بتاعته لو ضايقته

بقى عنيف، يضرب، ويشتم، ويقل ادبه حتى عليا انا امه
بعد ما اخرجه واصرف كل اللى فى جيبى عشان اشوفه مبسوط.. اخر اليوم لما يطلب حاجة تانية واقوله لا خلاص فلوسى خلصت.. يشتمنى ويضربنى قدام الناس
وطبعا قوانين البلد هنا مفيش تعدى على الاطفال، ف محدش بيقوله انت ازاى بتعمل كدة مع امك؟ محدش بيقوله لأ على حاجة

حتى ف المدرسة فيه اطفال كتير كدة شابهه، بيضربوا بعض ويشتموا بعض.. شتايم انا نفسى مافهمهاش

وبعدين تيجى المدرسة تشتكيلى منه، يعنى اكيد هو متعلم من المدرسة كل الحاجات دى منبع الفساد كله مش الدراسة

يبقى انا المفروض اعمل ايه؟؟؟ ده طول اليوم ف المدرسة
وكل شوية شكوى شكل، دى وصلت لحد السرقة، ابنى انا بقى بيسرق
وياريتها حاجات عليها القيمة، بيسرق حاجات قمة ف التفاهة، اكيد شاف حد بيعمل كدة ف بيقلد من باب التقليد وخلاص..

ولما أسأله انت بتشوف ماما بتعمل كدة؟ يرد ببرود يقولى: لأ، بس انا عايز اكتشف
لا وقدام ده كله بيتكسف من البنات.. لو بنت قدامه وشه يحمر ويبص فى الارض.. ومايحبش حتى يلعب معاهم.. اهو الحمدلله لسه فيه حاجة عدله

انا فعلا مش عارفة اعمل معاه ايه.. ولو اخدته ونزلت بيه مصر.. البلد مش مستقرة خالص الايام دى.. وانا مش هقدر على مصاريفه هناك.. كمان انا بدرس هنا ولسه فاضلى سنتين على الاقل.. عايزة اخلصهم الاول وانزل قبل ما اخلاقه تسوء عن كدة
مش عارفة والله هيعمل فيا ايه اكتر من كدة، قدام كل اللى بعملهوله يقولى انا مش بحبك وانا مايهمنيش حاجة ويضربنى ويشتمنى وهو كله على بعضه 7 سنين

فكرت حتى اتجوز لكن كل اللى قابلتهم مش مُريحين.. يإما معُهمش ورق وعايزنى اعملهم الباسبور الاوروبى

انا فعلا تعبت وكلمت ابوه يجي ياخده.. ابوه شايل ايده تماما عنه لا مصاريف ولا حتى بيشوفه كتير.. بس هو نفسه ياخده شوية

لكن المشكلة ان ابوه لا بيضرب ولا بيزعق وعنده الحياة سهلة قوى.. وانا متأكدة ان ابنى هيحب الحياة معاه اكتر.. عشان هيقوله مش مهم تذاكر.. مش مهم اى حاجة.. اعمل اللى انت عايزه

ده مبسوط جدا انه هيروح عند ابوه.. برغم ان من ساعة ما اتولد لحد دلوقتى ماسبنيش يوم

يمكن مايرجعليش تانى.. يمكن يحب عيشة ابوه اكتر.. مش عارفة بس انا فعلا تعبت ومش لاقية حل

رحاب المليحي

20 comments:

Anonymous said...

Sarah El-Eskafy
الولد ده محتاج دكتور امراض نفسية وبسرعة جدا

Anonymous said...

Rody Alaa El Din
la 7wl wla kwat 2ela belah rbna y3enha bgd.

Anonymous said...

Hanem Esoo Hanem
للاسف المشكلة دهين مكررة سواء كانت في مصر أو في اي بلد ثاني الولد خصوصاً بييجي عليه فترة بيبقى محتاج أب يقومه ويوجهه للصح من الغلط .. وده بتبقى مشكلة لو إن الأب زي قلته فعلاً

Anonymous said...

Nona El Shamy

Yaraaaaaaaaaaaaabyyyyyyyyy :S rabenaaa yhaween 3alyhaaa :(

By3gebnyyy fikyyy Taree2t kalamk

Anonymous said...

Samah Hassanien
حلوة اوىىىىىىىىىىىىىىىى

Anonymous said...

Amr Aly
ربنا
يفك كربها ودا أحد أثمان الغربة وبجد اللي يشوف بلاوي الناس

Anonymous said...

Sami Ahmed
هى مشكلة فعلآ, بس المشكلة انها مش قادرة تسيطر عليه!

Anonymous said...

Ramy Elalfy
بالنسبه لي لازم تنزل مصر بالولد
يتربى وسط المصريين من اهلها وهايظبطوله حياته من اول وجديد
هايعيدوا برمجته بالبلدي
انما طول ماهو هناك مش هايتعدل ابدا

Unknown said...

مشكلة كبيرة
كان الله فى عون صاحبتها

Anonymous said...

Marwa El Badry
حاجة تحزن والله

7dmo3yen said...

ارجعي بيه ده اسلم حل قبل ما يحب الحياة هناك ويتغير اكتر من كده

Anonymous said...

Dalia Ibrahim
ربنا يعينها بجد انا شايفه انها دلعته بزيادة هو مش مريض نفسى ولان الناس بره بتهتم بالتخصص يبقى اكيد الطبيب النفسى هيقول انه سليم ماعندوش هلاوس ولا توحد او اى مرض من الامراض النفسية التانية هو محتاج تعديل سلوك معرفش التخصص ده بره بيندرج تحت مسمى ايه ولازم المدرسة يكون ليها دور هى كمان- وبالنسبة لانه هيحب يروح يقعد مع باباه علشان مش هيقوله ذاكر او صلى او او.... كل الاطفال بتعمل كده زي مثلا لما يبقوا بيحبوا يروحوا عند جدو و تيتا او خالتو او عمو علشان بيسيبوهم يلعبو و مش بيطلبوا منهم يعملوا اي حاجة او بيحبوا بابا اكتر علشان بيفسحهم وماما بتكون هى الوحشة علشان طول الوقت بتقولوهم ذاكروا

Anonymous said...

Afham meen keda enaha betdawar 3ala 3arees
ana ra2yee tenzel beeh masr kam esboo3 we terga3 tanyee, yemken yekadar el ne3ma eli hwa feeha we yetlam,
we lazem tewareeh el madares fe masr we el 3yal eli betmooot meen darb el asatza fehom

law fedel fe England mesh haynfa3 tanyee
"من شب علي شيء شاب عليه"

Ahmed Shehata

Anonymous said...

Orked Mohammed
ده نتيجة طبيعه انها دلعته وكانت علشان ترضيه تخرجه وتدفع كل الى فجيبها لما يقل ادبه عليها تلطشه بالقلم وتربيه ده كلام فارغ لسه مطلعش من البيضه وببيعمل كده
ابنى لما بيطول لسانه على بقه واديله والضرب من التربيه مهياش ضد التربيه والكلام الى بنسمعه الفارغ ده انا مع الضرب مان للتقويم وتدلع بحدود وتنقله من المدرسه الى فيها قلة الادب دى
وبعدين بتفكر تتجوز ليه على اساس ان الى هييجى هيربيه ! ده هيبوظ اكتر هيه تكون الاب والام والافضل ترجع مصر اخلاقه وتربيته اهم من اى حاجه فالدنيا ولا تكسب شهاده وتخسر ابنه

Anonymous said...

Roba Mohammed
المشكلة فعلا صعبة وربنا يعين صاحبتها عليها..نصيحتى ليها الدعاء ثم الدعاء ثم الدعاء ده أولا وثانيا :"ومن يتق الله يجعل له مخرجا "والله العظيم عن تجربة كل ما أمر بمشكلة أو أمر عسير بفتكر هذه الأية وأنفذها وبحاسب نفسى ألاقينى فعلا برتكب اثم حتى ولو صغير فأبعد عنه وأتصدق بصدقة حتى ولو صغيرة بنية حل المشكلة وربنا الحمد لله بيفرجها من عنده..ثالثا : القدوة بالنسبة للطفل مهمة جدا وخصوصا ان مفيش قدوة غير أمه يعنى لازم لما تيجى تصلى تقوله :ايه رأيك نصلى أنا وانت جماعة وتبقى انت الامام وبعدين تعلمه ازاى يبقى امام شاطر صوته حلو فى القران

Anonymous said...

Maram Abd El-megeed A
ايه يا جماعه دا ههههههههههه اللي يسمع كدا يقول مراهق دا طفل صغير بعيد عن قوانينهم وقوانينا الدين مقالش الضرب ودا طفل فسن التدليل مش الضرب بس دا ميمنعش ان في وسائل للعقاب يعني مينفعش تنفذ كل اللي بيطلبه ولا انها تصرف اخر مليم عشانه وطبعا متسيبش الولد لابوه لانه ابسط حاجه ممكن ميرجعهوش في كتب كتير عن تربيه الطفل والتعامل معاه واضح ان الام معندهاش خلفيه كفايه عن ازاي تربي طفل لدرجه ان طفل عنده 7 سنين يتقال اخلاق بايظه

Anonymous said...

Shahenda Salem
Ah ya Balad , 2t2latly f yoom mn sha5s 3aiesh hiena b2alo akter mn 30 years 2w3iy f yoom teftakry en elbint de bintk '' de bien elbalad '' :( ya tara da kaman taman el3'orba ?????

Anonymous said...

Mohamad Elmetwally
امهات اخر زمن

Anonymous said...

Shirehan Mohamed Salem
هو لازم يتعرض على دكتور بس هو القانون شاف حق الولد وحق الام مفيش هى المفروض تتهان هو ده الطفل الصحى ؟؟!!!!!!

Anonymous said...

أبوه يرض يخد تدهول د أحسن حل، الولد خد عليها مش حتقدر تسيطر عليه. وملء تش الا الكراتيه ده عايز موسيقي عشان يهد
سيهام