Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, January 03, 2012

انتمة اه، انتمة لأ


لما تسأل حد ايه رأيك ف الأنتمة ما بين الولد والبنت؟ بتؤمن بيها ولا لأ؟
أول رد تلقائى ومن غير تفكير تلاقيه بيسألك:
أنتمة ارتباط ولا صداقة؟!

هى الأنتمة بقيت تُعبر عن (الارتباط) من امتى؟
ماكنتش على ايامى الكلام ده
ما علينا

هتلاقى نوعين من التفكير لا يمتوا لبعض بصلة

التفكير الأول** ( رأى آيا منهم: ولد أو بنت)

- اه طبعا مؤمن بيها جدا.. لازم يكون ف حياتى صديقة وتكون غير كل بقية البنات اللى فى حياتى.. ماكدبش عليك احيانا ممكن الصداقة تقلب بحب وف الاخر ممكن نخسر بعض خالص

- لكن ده مش قانون متعارف عليه يعنى.. كتير جدا الصداقة بتستمر.. وبالعكس ممكن البنت تكون أقرب لى من انتيمى الولد

- احيانا بتفهمنى من غير ما اتكلم.. وبنكون فعلا اخوات واصدقاء وبنخاف على بعض.. اخوات بمعنى الكلمة مش مجرد عنوان لحاجات بتحصل غلط بينا

- بتكون صداقة مبنية ع الاحترام والتفاهم.. حتى الغيرة فيها مسموحة.. لإنها غيرة معزة وخوف ع الطرف التانى.. مش غيرة خنقة وحب، وارتباط، وجواز، وكوشة.. ومانجيلكش ف حاجة وحشة يا معلم

- بتكون أنتمة تحمل مشاعر جميلة لطرفين بيكملوا بعض.. لكن مش عايزين من ورا معزتهم لبعض لا مصلحة ولا ارتباط

- اسرارهم مع بعض.. ومصايبهم كمان مع بعض

- بس احيانا لما كل طرف منهم بيرتبط رسمى. تلاقى الخطيب أو الخطيبة بيغيروا من كونهم (انتيم)

- العريس يقول: مارضاش يكون لمراتى انتيم.. ع اساس انى كيس جوافة يعنى؟

- والعروسة تقول: طالما انا دخلت حياتك يبقى محتاج انتيمة ف ايه؟ متهيألى انا أولى بأسرارك.. ولا ناوى تحكيلها بقى حاجات مش هتحكيهالى؟ ولا يكونش ناوى تشتكيلها منى لما اضايقك؟ هاااااااه ؟

- هما عيلة ف بعضيهم بقى ودى مشاكلهم يحلوها مع بعض.. بلا وجع دماغ
**************

التفكير التانى** (رأى الولد أو البنت)

- انتمة؟ انتمة؟

- هو فيه انتمة ما بين ولد والبنت؟ تفى من بقك

- دى كلها افتكاسات ابدوعها الشباب عشان يحللوا اللى بيعملوه

- طبعا حرام.. يعنى ايه يكون ليا انتيم ولد؟ مالهم البنات يعنى؟ خلصوا ولا خلصوا؟

- احنا اتولدنا وكبرنا على العيب والحرام.. ومفيش حاجة اصلا اسمها صداقة ما بين الولد والبنت.. ده فُجر

- ده لو ولد طلب منى كشكول المحاضرات بتكسف وبقول يا ارض ابلعينى.. ما عنده ياختى صحابه الصيع.. وانا مالى كان من بقية اهلى.. اللى اختشوا ماتوا صحيح

- لا لا لا، انتمة؟ يا حوستى... انتى عايزة اهلى يقطعونى حتت ولا ايه؟

- اللى يكتب عليا رسمى هو ده اللى يبقى جوزى وصديقى وانتيمى.. غير كدة يبقى لا يجي جانبى ولا لسانه يجى ع لسانى

- حتى زمالة الشغل الواحد.. لازم تبقى محسورة على صباح الخير يا جارى انت ف حالك وانا ف حالى.. وكبيرنا كلام ف الشغل.. لكن مرقعة البنات بتاعة اليومين دول بقى بحجة انهم زمايل ف الشغل.. دى قلة ادب وقلة تربية..

- اهالينا ربونا ع ان ده حرام.. يبقى ده حرام ومايصحش من غير تفكير

- ال انتمة ال؟

رحاب المليحي

9 comments:

Anonymous said...

Amr Aly
انا كل ما اعرف بنت وتبئى مهمة في حياتي تتنيل تتجوز ولا تتخطب وتنسحب من حياتي بالتدريج اكيد بتوجع بس سنة الحياه بس الشهادة لوجه الله حق ان البنات في صحوبيتهم أرجل من الرجالة ميت مرة دي كلمة حق يعني

Anonymous said...

Halol Halol ‎
7elwa ya hoba

Anonymous said...

Nona El Shamy
Likeeeeeeeeeeeeee :D :D :D

Anonymous said...

Sarah El-Eskafy
انا هأنتم مع عمرو :D

Anonymous said...

Ramy Elalfy

حلوه موت ياحوبا

Anonymous said...

Maram El-Gendy
wenbeeee enta prince :D:D:D

Anonymous said...

Samah Gebril
زمان مش من زمان قوى يعنى المهم كان فى انتمه وجدعنه فوق الوصف وفى يوم ظهر اللى حولها ووصفها بانها (متخذات اخدان) ومش بس كده ده حللها لنفسه

Anonymous said...

انا ليا أنتيم واحد وبتاع 6-7 انتيمات

ومأنتمين مع بعض الحقيقة
منكرش ان ده عملي مشاكل في بداية ارتباطي
بس فعلا على أد ما بحتاج للصداقة دي جدا
على أد ما بتعمل مشاكل لما تيجي ترتبط
وانت وظروفها بقى ممكن تكون ايزي ممكن تعصلج
ممكن متفرقش معاها ممكن تقبلهالك ضلمة
وده متوقف على تظبيطك ليها ومدى تمسكها بيك

بس بالنسبالي ،، انا فاصل الانتمة عن الارتباط تماما
يعني اتجوزت متجوزتش هنفضل مأننتمين بردو
:D :D

Ahmed Mamdouh

Anonymous said...

Amin El-Masry
قرأتها روعة :)

تسلم دماغك ^_^