Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, December 21, 2011

كفاية بقى


احيانا لما الاحداث تبقى كتيرة اكتر من اللازم

عقل البنى ادم مش بيقدر يستوعبها كلها ف وقت واحد

لازم يقعد يفنطها ويحللها ويدرسها عشان يقدر يميز مين فيها صح ومين غلط

مين بيزيف الحقائق ويجملها ويوهمك عشان تصدق الاكاذيب بجدارة

ومين بيحطك قدام الحقيقة عارية ويصدمك بيها.. بس لازم تستوعب ان هى دى الحقيقة من غير تزويق كلام ومن غير لعب بالألفاظ

لكن بتوصل لمرحلة تلاقى نفسك عامل زى الكورة اللى بتتشاط من كل الاتجاهات، تتطلع لفوووووق للسما وجمالها.. بس ف لحظة وبكل قسوة تنزل لتحت تخبط ف الارض

لكن كتير قوى تلاقينا احنا نفسنا اللى بنزيف الحقايق ونألف الأكاذيب عشان نضحك بيها ع روحنا.. عشان نقنع بيها نفسنا ان احنا اللى صح، ونبرر بيها قلة شهامتنا وعدم جدعتنا ومعيلتنا

لأ وبيوصل بينا الجُرم كمان اننا عايزين كل اللى حاولينا يصدقوا اننا احنا اللى صح وكمان يمشوا ع خُطانا.. ولما ده يحصل يبقى احنا كدة وصلنا لقمة نجاحنا

لما نقلب الصح غلط والغلط صح
لما نبقى مانفهمش حاجة ونفتى بكل ثقة
لما نعمل فيها رجالة بشنبات واحنا خسارة فينا حتى كلمة (ذكر) اللى مكتوبة ف البطاقة
لما نرضى بالغلط ونأيده مادام ع هوانا.. ونوقف للصح ونعرضه طالما مش قادرين نعملوا
لما نخوض ف اعراض الناس ع اساس اننا ملايكة نازلين من السما
لما نطلع صور وفيديوهات غير حقيقية عشان ندارى بيها الحقيقة.. ونخلى ناس كتير فى صفنا
لما نقف قدام بعض كمسلمين نشتم ونسب ونلعن سنسفيل بعض، تحت مُسمى الدين والأخلاق
لما نتصدر للهايفة ونمسك ف ديل الموضوع ونسيب المبدأ والمضمون

لما ولما ولما

يبقى احنا اكيد محتاجين وقفة مع نفسنا
محتاجين نقتنع ان الكدب مالوش رجلين
محتاجين نعيد حسابتنا

محتاجين حد يقولنا زى زمان ان اللى بيكدب (النوز) بتاعته بتكبر ..وكمان بيروح النار وربنا مش بيحبه

مهو مش معقول للدرجة دى يعنى جتتنا نحست.. ومش قادرين نُدرك حقيقة واحدة
ان الموت مش بعيد عن حد فينا وان عمره ما كان بالسن
واننا هنُسأل عن كل حاجة عملنها ف الدنيا اللى جابتنا لورا بأفعالنا دى

كفاية بقى تزييف ف الحقايق
كفاية تشكييك ف نوايا الناس
كفاية تاخدوا العاطل بالباطل

الرحمة حلوة برضه

ارحموا من ف الارض
يرحمكم من ف السماء

رحاب المليحي

14 comments:

Anonymous said...

Samah Hassanien
كفاية تشكييك ف نوايا الناس
حلوة اوى حوبا بجد

Anonymous said...

Mo'men Sa'ad
بجد حلوة قوي .. وعجبني التعبير دا " تلاقى نفسك عامل زى الكورة اللى بتتشاط من كل الاتجاهات، تتطلع لفوووووق للسما وجمالها.. بس ف لحظة وبكل بقسوة تنزل لتحت تخبط ف الارض ."

Anonymous said...

Mona Moustafa
الله يكرمك يارب
كفاية، فعلا انا نفسي اقف اصوت ف الشارع واقول كفاية

ياسمين said...

الله يسترها علينا يارب ويرحمنا برحمته

Anonymous said...

Ahmed Elsheikh
صدقتى يا رحاب ، ولكن من يسمع ومن يعقل هذا !!!!!!

Anonymous said...

Nona El Shamy
‎7elwaaaa awii bgd :)

Anonymous said...

Sami Ahmed
حلوة قوى يا حوبا, وفعلآ محتاجة تطبع وتتعلق ع كل جدار فى مصر

Anonymous said...

Sayed Shaban
حلوة اوى يا حوبا بجد
تسلم ايدك

Anonymous said...

Maram El-Gendy
TSlm edk ya Hopppaaa ♥

Anonymous said...

Ramy Elalfy
ارحموا من في الارض يرحمكم من في السماء
ابدعت يا حوبا كعادتك

Anonymous said...

قرات من القديم والجديد علي صفحتك – يبدو لي ان كلماتك تميل كثيرا الي خيبه امل – عموما الامل دايما موجود – الامه كلها في حاله بناء وهدم في ذات الوقت – هذه الحاله تحتاج بعض الوقت قد يكون قريب او بعيد قليلا

أيمن المليحي

Anonymous said...

خواطرك الأخيرة عن الحاله الراهنه جميله عجبتنى

بابا

Anonymous said...

جميلة قوى صفحة الخواطر
كده أنا حاسة أنك أبتديتى الطريق الصح وكلماتك بقت أقل وأكثر تأثيراً
ربنا يوفقك ويفتح لك الأبواب

ماما

Anonymous said...

Sara Noury
بتوجع اوى يا حوبا
...واجمل ما فيها انها من قلبك اوى اوى