Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, December 15, 2011

العين فلقت الحجر

دارى ع شمعتك تقيد

كنا دايما زمان بنسمع المثل ده
ساعات كنا بنعمل بيه بس لحد ما الموضوع يكمل وبعدين ننشر الخبر..
واحيانا تانية ماكناش بنقدر نصبر وننشر الخبر من قبل حتى ما يحصل
تلاقى الناس خايفة عليك وتقولك: (انت ايييييه! مش بتتبل ف بقك فولة؟ يا عم دارى ع شمعتك... عشان الحسد)

لكن احنا كان لينا وجهة نظر تانية، وهى إننا فرحانين وعيونا بتلمع من الفرحة.. ف مش عايزين نكتم فرحتنا..

كمان عايزين الناس اللى حولينا تشاركنا فرحتنا.. لإن لما بنشوف فرحتهم ف عينيهم لحاجة تخصنا احنا مش هما، ده بينعكس علينا ويخلينا طايرين من ع الأرض طير
حاسين بمدى حبهم ومعزتهم لينا.. مقدرين فرحتهم بينا اللى احيانا ممكن توصل لدموع الفرحة

ده كان زماااااااااااااااااان***

دلوقتى بقى تحس ان كل الناس بتتصنت ع كل الناس.. عشان يشوفوا يا ترى ايه اللى عند ده مش عند ده!!

يا ترى ايه اللى فيه ايدك مش عنده، ف يرشقك العين المتينة ويقول ف عقله:( ياااااا بختك)..

لكن ف وشه الابتسامة تكون من هنا لهنا مع الجززز ع الاسنان
ويقولك من تحت ضرسه: (يا حبيبببببى مبروووووووووك، انت مش متخيل فرحنلك قد ايييييه)

وف سره يقول: (ياريتنى كنت انا مش انت يا بعيد، هو انا ناقص ايد ولا رجل عشان ماوصلش للى انت وصلت له؟!)

- الكحكة ف ايد اليتيم (كتير) بتكون عجبه


ولما تقول: (ده انا حصلى وجرالى مصايب قد كدة.. بس ياللا الحمدلله)..

يقول: (اااااه خايف من الحسد، بيبعد عنه العين.. ليه يعنى؟ هنحسده ولا هنحسده!! حكم)

بس يبوصلك وتحس الدمعة هتفر من عينيه ويقولك: (معلش اهى اخدت الشر وراحت، المهم الصحة، هتعمل غيرها اكيد. بس انت متزعلش نفسك)

ومن جواه تلاقى قلبه بينط يفط لحد ودانه.. فرحان انه شايفك متكدر وحزين
______________

ليه بقينا وحشين قوى كدة؟
ليه مابقناش شايفين غير نفسنا وبس؟
ليه محدش بيفرح لحد وكله بيضرب ويخزوق كله؟
ليه؟

رحاب المليحي

8 comments:

Anonymous said...

Maram El-Gendy
rbna y7meenaaaaa

Anonymous said...

Asmaa Bent Elshams
عشان الايمان بالله قل ... آه والله لو كل واحد مؤمن ان له رزق هياخده استحاله حد يقاسمه فيه وان لكل انسان نصيب من الدنيا لا مفر من ملاقاته استحاله يبص للى فى ايد غيره ... والقناعه قلت .. لو فى قناعة ورضا وحمد لله على نعمه .. وبدال ما يبص للى جاله رزق يبص للى اقل منه ويشكر ربنا عالنعم اللى اداهاله عمر ما هيبقى فى اى حاجه من اللى فى البوست ... شعور طيب انك تبقى مستاءه من حاجه حقيقية بتحصل والله وكلنا بنعانى منها ... انا نفسى ليا ناس مقربين بقت عينهم معرووووووفه قووووووووى اللهم صلى عالنبى ... فى ناس اول ما تدخل بيتنا وتقعد شويه اول ما يخرجوا البيت يتحول لنااااااااااار اجاركم الله خنااااااااااااق وزعيق ومشااااااااااااااااااااكل ربنا يقينا شر امراض النفوس ويطهر نفوسنا من اى حسد والحمد لله على نعمه

Anonymous said...

Amgad Megahed
‫وليه يا زمان مسبتناش ابريا‬

Anonymous said...

Amr Aly
فعلا مفيش حد مجربش نار الحسد
بس اعتقد انه مش منتشر اوي موضوع ان الناس بتتمنى شئ غير الخير لبعض اكيد موضوع تمني غير الخير موجود بس قليل فطرتنا اللي فطرنا ربنا عليها هي الخير

Anonymous said...

Ahmed Mamdouh
الحسد موجود ،، وبيوجع اللي ملسوع منه

Anonymous said...

انا مصريه
فعلا موجود كتير ولو حتى على نعمه قليله زى ما يكون الناس مستخسره تحس بنعمه ربنا او تشوفك مرتاح فى حاجه معينه عاوزينك دايما فى مرار ومصايب ربنا يحفظنا كلنا يارب من شر الحاسدين والحسد(ومن شر حاسد اذا حسد)صدق الله العظيم

Anonymous said...

Sami Ahmed
سبحان الله, والله يا رحاب البوست بتاعك ده جايلى ع الجرح, أنا بعانى من الموضوع ده اليومين دول :(
ربنا يسترها ع الجميع

Anonymous said...

Sara Noury
حوبا .. نظرتك تشاؤمية جدا وعامة اوى .. لا يا حوبا .. حبيبتى فيه ناس كتير كويسين جدا وبيفرحوا لغيرهم بجد ، ممكن متكونيش شايفاهم لان الكذابين و المنافقين مغطيين على صدق التانيين انما والله العظيم موجودين ، مش عايزة كلامى يدخل فى حيز الشعارات ، لكن اللى مقتنعة بيه تماما انا شخصيا مبدأ "دارى على شمعتك تقيد" لانى بتأثر موت من الحسد او من مجرد ان الخبر يطلع منى ، بحس ان ربنا بيعاقبنى انى سبقت بالكلام فى الموضوع قبل ما الموضوع يكمل ، لازم تتم مشيئة الله كاملة وبعدها ابدأ اقول ..
حوبا حبيبتى والله العظيم الدنيا لسة والمصحف فيها خير الازمة كلها فى اختيارنا للناس اللى حوالينا