Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, December 11, 2011

حجاب بلا حجاب


المتعارف عليه عادة اننا مانجبرش بنت ع الحجاب.. يعنى لو مش عايزة تتحجب من نفسها يبقى خلاص ربنا يهديها.. ننقشها ونفهمها اهمية الحجاب ونسيبها لضميرها بقى

دايما البنت بتبرر عدم حجابها مثلا بإن فيه بنات كتير محجبات شكلا بس لكن كل تصرفاتهم بعيدة كل البعد عن الحجاب والدين
وع النقيض فيه بنات مش محجبات لكن محترمات ومؤدبات وضفرهم برقبة محجبات كتير

كل الكلام ده معروف ومحفوظ

لكــــــــن

لم نيجى بقى نطبق ده ف بلاد الفرنجة هل هينفع اننا نسيب البنت براحتها لحد ما تاخد الخطوة دى بنفسها؟

هل هينفع انها بعد ما توصل لمرحلة المراهقة ويبقى ليها صاحبتها الغير مسلمات.. واللى كل واحدة فيهم مصاحبة ولابسه كل ما هو قل ودل

هل هينفع تيجى بقى وقتها تقولها يا حبيبتى انتى كبرتى ولازم تتحجبى

- هتقولك بكل سلاسة: نعممممم يا عمر؟؟؟

- اصل يا حبيبتى عارفة انتى، القصة القديمة بتاعة لما يخيروكى ما بين البونبونية المُغلفة واللى متسابة كدة ف الهوا.. هتختارى انتى ايه؟؟
اقولك انا.. المفروض انك تختارى المغلفة

- لا شغال معاية اللى متسابة ف الهوا.. طالما سليمة ومفيش حاجة تقول انها وحشة او ماتتاكلش


- لألأ، يا حبيبتى هى القصة بتقول انك لازك تختارى المغلفة عشان تبقى متأكدة انها مش بايظة ومش متاكلة قبل كدة، ومش فيها اى ميكروبات من الهوا اللى رايح جاى ع اللى مش مغلفة

- لا انت مش فاهم ما هى المغلفة الحلوة الامورة ممكن برضه تترمى ف الزبالة لو بصيت ع تاريخ صلاحيتها لقيته انتتتتتتتهى،

يعنى من الاخر ماتخدش بالمظاهر، ممكن تكون مغلفة ويخدعك شكلها لكن لو كلتها يا حرام بطتنك هتوجعك..

وقتها بقى ماتلومش غير نفسك.. اصل انت اللى ماخدتش بالك وماركزتش وماهتمتش انك تاخد من وقتك ثانية وتبص ع تاريخ الصلاحية وخدعك شكلها.. وللا ايه سعادتك؟

- هه؟؟؟؟ احم، مش مهم القصة دى يا حبيبتى، بلاها خالص الحوار، ده مش موضوعنا

انا بس بحاول اقربلك الفكرة مش اكتر.. ان دايما الحاجة المتغلفة المتحافظ عليها الناس بتحبها وبتتطلبها اكتر من الحاجة اللى كاشفة نفسها للناس

- ع فكرة انا مش معترضة ع كلامك نهائى، وعارفة ان عادة الشيوخ ف بلاد الغرب بتقول ان يُستحب أن الأهل تعود بناتها ان الحجاب يكون تكملة للبسهم من صغرهم عشان يتربوا ويكبروا ع كدة

بس هو احنا مالناش الحق ف اننا يبقى لينا مُطلق الحرية ف الاختيار؟ زينا زى البنات ف مصر مثلا؟

اصل ببساطة ممكن ارضيكم والبسوا قدامكم ولما اخرج اقلعه.. وخلى بالك ان القانون ف اوروبا ف صفنا.. يعنى طالما بنمارس حريتنا ومش بنتعدى ولا بنأذى حد.. بيطلعوا ليكوا انتوا كارت اصفر للتحذير بعدم التعدى ع حريتنا
صح وللا ف كلامى حاجة غلط؟؟

- عندك حق، وانا عارف ان دايما الرك ع التربية وع البيت.. بس مازلت شايف ان لما البنت من صغرها تتربى ان الحجاب حاجة مُكملة للبسها وتستوعب ان ده حفاظا عليها وتبقى مقتنعة بكدة ده هيسهل الأمور كتير
ها بقى قلتى ايه؟؟

..........!!!!.........


رحاب المليحي

8 comments:

Anonymous said...

Mona Moustafa
انا معاكي ف الكلام دة
بس انا عندي قرايبي كانو محجبين بناتهم من وهما صغيرين قوي والبنات جلها كبت وقلعوه لما كبرو شوية فا من راي يعني ان يبقي البس الي حد ما محافظ علية علشان ميبقاش التحول للنقيض فجاءة يعمل دروب وبعدين اول ما تبتدي تكبر فكريا وتستوعب الفكرة تبدأ تحصل تدريجي ف التحبيب ليه شوية وشوية ترهيب وشوية ترغيب لحد ما تقتنع بيه وانا بفضل سن البلوغ وما بعدة لكن قبل كدا غلط كبير علي الطفلة بس خلاص

Anonymous said...

Asmaa Bent Elshams
والله الكلام جامد وانا معاكى ان البيئه بتفرض على الشخص مظهره ( أحياناً) حسب مزاجه هو .... وتربيته هو .. كلامك رائع .. وزى ما انتى قلتى التربيه بتفرق كتييييييييييييييير من البيت .. وتسهل كتييييييييييييير جداً ... وعلى فكره انا محدش فى البيت لا أمرنى بحجاب ولا غيره .. فأنا مقدرش افرض على حد لا فى اوروبا ... ولا حتى فى المناخ الاسلامى .. ان مكانتش نابعه من ارادة شخصيه .. هيضيعها شكل المجتمع .. وده فى عموم الفكره ..

Anonymous said...

Asmaa Bent Elshams
وبعدين فى آية عظيمة جداً من آى القرآن العظيم بتقول بسم الله الرحمن الرحيم (يا أيها الرسول لا يحزنك الذين يسارعون فى الكفر من الذين قالوا آمنا بأفواههم ولم تؤمن قلوبهم ) ربنا بيأمر سيدنا محمد انه ميحزنش من ارتداد ناس قالوا انهم اسلموا بألسنتهم فقط ... فالمطلووووب فى كل حال الوصول للايمان القلبى لو وصل الايمان القلبى بفرض الله لقلب البنت من ناحية الحجاب والله لو كانت فى قلب مجتمع مبيلبسش خالص اهم حاجه ايمانها بالفرض وحبها ليه بارادتها وعن حب من مش مجرد كلام على لسان اهل او سمعته من حد

Anonymous said...

Sami Ahmed
موضوع جميل ومهم, أنا شايف
ان نقطة الحجاب ممكن تبقى زيها زى الصلاة من باب التفضيل يعنى, يبقى ممكن نعمل بحديث الرسول عليه الصلاة والسلام:
"مروا ابناءكم بالصلاة وهم أبناء سبع واضربوهم عليها وهم ابناء عشر"

Anonymous said...

Sara Noury
انا كسارة العاصي متحجية
وبعيد عن المعاصي :))))))

Anonymous said...

Shahenda Salem
Ah ya 7oba rabana yostor 3ala banatna , bs f3lan lama tebtady temaiez laziem a7ababha feh w 2labsholha ...

خالد said...

المسألة مش مسألة تعودي البنت على لبس الحجاب بس
طيب و الصلاة؟ هتعوديها على حركات الصلاة بس تطلع تؤدي حركات؟
و الصوم؟ مجرد امتناع عن الأكل و الشرب؟
الحقيقة التربية الإسلامية حلقات لا تنفصل عن بعضها
لازم قلبها يكون "متشرب" الإيمان عشان تعرف حلاوته

elkilany22 said...

كلامك روعة يارحاب منتحرموش منك