Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, October 05, 2011

مايحكمشى


ما تحسبوش يا بنات إن الجواز راحة.. وماتزعلوش يا بنات إن قلنا بصراحة إن ....


- مالك ماسكة فى الأغنية دى بقالك يومين ليه يعنى؟

- نعم؟ هو الواحد مش هيعرف كمان يفرغ عن نفسه بأغنية!!! وبعدين يا حبيبى دى مش مجرد أغنية ده واقع مرير

- واقع؟ ليه بقى؟ ده انتى قاعدة واكلة شاربة نايمة.. وبتاخدى مصروف إيدك الشهرى وبفسحك على قد ما بقدر مش بخليكى عايزة حاجة.. عايزة ايه تانى!!! اكتر من كدة يبقى معندكيش دم لا مؤاخذة

- تيراراراراراراراااا... اوعى الجنة ونعيمها.. قدام ده بتاخد ايه بقى؟؟؟ بتاخد اهتمام ورعاية لولادك واساسا متعرفش عنهم حاجة نهائى.. ده احيانا لما حد يسألك عندهم كام سنة ولا فى سنة كام بتهنج مبتعرفش ترد.. ولا حتى تعرف حاجة عن البيت واحتياجاته.. وكمان بترجع البيت تلاقى غداك جاهز وهدومك مكوية.. الخ، الخ.. لعلمك الشغالة الفليبنية بتاخد اكتر من كدة

- طيب مهو، خلصين كدة.. يكفيكى إن أنا بجيب الفلوس عشان انتى تصرفيها ومش بحسبك

- هأ، أصلى متجوزاك على طمع

- ايوووووة ، قولى كدة بقى... اخدتينى لحم وهترمينى عضم.. وانا شاب ساذج كنت فاكرك واخدنى عن حب.. إهىء إهىء

- لا لا، احنا كدة هنقرع وهتوسع منك.. ده انا واخداك 80 كيلو.. دلوقتى لما بتوزن نفسك، الميزان بيلف مرتين بخاف عليه من الانفجار.. ال اخدتك لحم ورميتك عضم ال

- يا ماما ده متربى على العز .. انتى ايش فهمك انتى.. أصلى قررت استثمره .. اهو ينفع فى اليوم الأسود

- هأ، ما يحكمشى

_________________

- مامى، مامى، (ماى فريند) فى المدرسة عاملى اكونت على النت

- على فين يا حبيبتى؟

- على النت يا مامى، اسمه ....، اسمه.....

- ماتقوليش الفيس بوك

- ايوووووة، هو ده.. صح

- حلاوتك، وجابلك ايميل منين؟

- عاملى يا مامى واحد بس مش فاكرة على ايه

- وماله!!!! وحطلك صورة يا روحى؟

- صورنى من كاميرة اللاب توب وحطها.. وقالى اقولك انه خلانى اعملك اد

- .................

- مامى، بيقولك اعملى اكسيبت

- إلا هو انتى بقيتى تعرفى تقرى؟

- إيه يا مامى انتى بتتريقى عليا!! ما انتى عارفة انى لسه صغيرة مش بعرف اقرا

- امممممممممم، لسه مابتقراش واتعملها اكونت وعملت لى اد.......... مايحكمشى

_______________

- مامى، أنا هطلع الشارع العب مع صحابى

- نعم ياختى.. الساعة 2 بليل ولا هو عشان احنا فى مصر بقى ف هيصة يعنى!!

- مامى، كل صحابى بيلعبوا برة فى الشارع.. هقعد انا فى البيت اعمل ايه؟

- بالنسبة ان الساعة 2 بليل ممكن ننام يعنى.. صح؟ فكرة برضه

- لا، انا مش عايزة انام.. عايزة العب

- اتفضلى حضرتك بس ياريت ما تتأخريش عن الفجر لحسن أقلق

- (بعد عشر دقايق جت تانى)

- مامى، هو انا ممكن احط (ليب ستيك وبرفيوم)؟

- نعم؟ مش واخدة بالى حضرتك؟؟

- هو انا ممكن احط (ليب ستيك وبرفيوم)؟

- اه وماله؟ هو سعادتك ماقلتيليش عندك كام سنة؟

- عندى اربعة ولما اخلصهم هبقى خمسة

- وعايزة تحطى ليب ستيك وبرفيوم!!!!! هى مرارة واحدة لو اتفقعت مش هتلاقينى.. مايحكمشى

_______________

- ماتيجى شات عايزاكى

- ادينى جيت اهو.. نحم؟

- تاكلى كنافة؟

- لا لسه ضاربة كشرى.. ها عايزة ايه؟ ارغى

- ننميلنا نمية كدة.. ماتقوليش انك توبتى وعايزة توردى ع جنة يعنى

- اطلاقا، هو اللى يعرفك يورد ع جنة ابدا

- انا قلت كدة برضه، اصل الواحد لو فضل ساكت كدة هيطق لازم يفش غليلوه شوية

- انسانة طول عمرك، فشى ياختى فشى

- فاكره الموضوع إياه؟

- انهى فيهم؟ مهى مواضيعك مابتخلص!!

- يا بنتشى الخناقة الآخرنية دى

- اه، مالها؟

- مش جه بقى بسلمته يجر شكلى بكلمتين على اساس انى هنسى العك اللى قاله اخر مرة.. بما إن الزهايمر عندى شغال ع ودنه.. واكلمه عاتى، بس هو فاكر ايه؟ ده لا منكن يحصل اباتا.. طلعت قرفى بقى فيه

- امممم، ومين اللى اتعور ف الاخر؟

- عيب عليكى يا بنتشى ده انا اللى يجي عليا مايكسبش.. والله ياختشى بقيت بخاف على اللى بغضب عليهم من كتر المصايب اللى بتحصلهم بعدها.. بس ده لا يمنع ان من جوايا، جوه قوى كدة اللى هى كدة حاجة ماتتشافش تلاقينى طيوبة وعثولة

- اااااااااااااه طبعا، ده الواحد لازم يتقى شرك.. انتى هتقوليلى.. طيبة ايه، وبراءة اييييه.. مش بقولك انسانة.. مايحكمشى

____________

- أنا نازلة؟

- رايحة فين؟

- خارجة

- ايوة، يعنى رايحة فين؟

- اروح ما اطرح ما اروح بقى.. هو انت شريكى!!! ده انت حايله جوزى

- امممم، هى بقيت كدة يعنى؟ طب معلش اعصرى ع نفسك شجرة ليمون وقوليلى

- لع، ماليش مزاج.. ياللا هش بقى عشان هتأخر

- لا يا شيخة، طب هتقولى رايحة فين ولا اقولك مفيش خروج.. هاااااااااا؟

- عندى ميعاد مع الكوافيرة الساعة 3 وربع، الساعة 4 هعمل شوبينج، 5 إلا دقيقتين هروح لمامتى، وعلى 6 ونص وخمسة هكون فى البيت حضرتك.. مايلزمش اى خدمات؟

- ايوة كدة، هتنسى نفسك ولا ايه؟ هع هع هع

- (فى سرها) هع هع؟ اللى يضحك ف الاخر يا عينيا.. ولا مكان من دول رايحاه.. فاكرين نفسكوا ايه!! ده احنا نلعبكوا ع السبع شناكل. مايحكمشى



رحاب المليحي

24 comments:

Anonymous said...

Asmaa Fouad
‫دمك سكر
^_^‬

Anonymous said...

Hend Hamdy ·ههههههههههههههههههههههههههههههههههه جااااااااامده

Anonymous said...

Noha Abdel Fattah Khalil
حلوة قوي،
كأنك عايشه مع كل واحده في بيتها، هو ده اللي بيحصل فعلا، ههههه ربنا يصبرنا ويقوينا

Anonymous said...

Eslam Mohamed
الكلام دة بجد ولا اية :S
ممممممم ، إنتي كدة هتخليني اعيد نظر في موضوع الجواز دة ، لأ و نهي بتأكد كلامك ، يعني واضح إن فية إجماع علي ان الازواج بيقفوا لبعض في وقت من الاوقات و كل واحد يفرش للتاني باللي بيعملة :)

Anonymous said...

Maha Muhammed Abd-Elmaqsoud ‎
3awdon 7amed w ahmed w hussein kman :D
bgd yaaaaaah, 7amdel allah 3la elslama. Really moftkdake w 3o2bal alle gay ISA

Anonymous said...

Rana Badawy
تحفة يا حوبة تسلم
ايدك..بجد عيشتيني الجو :D

Anonymous said...

Muhammad Fattouh
الاول حمد لله على السلامه
و ميحكمشى :p بس لازم تبقى عرفه ان بما ان انتى نسمه ربنا بيخلص

Anonymous said...

Mo'men Sa'ad
ههههههههههههه .. علي فكرة انا لاقطت تقريبا 90% من الشخصيات .. بس حفاظا علي حياتي مش هقول .. :D


حلوة قوي يا حوبا .. :)

Anonymous said...

Mohamed El Bermawy
اه والله ...مايحكمشى

Anonymous said...

SoŁŁŸ Emad
rabenna ytmenek :D

Anonymous said...

Nouran Heider
la keda 3ageb wala keda 3agb

Anonymous said...

Noha Rabie
very true ya 7oba bas elli yefeham ;)

Anonymous said...

كتبتك جميله خليتني ابتسم وكاني شايف الشخصيات قدامي

ايمن المليحي

Anonymous said...

Grêêŋ Applê
مسسسسس ( دا صوت مصمصة
شفايف ) مايحكومشـــى :))

ياسلام على البنت الصغيرة بتاع الفيسبوك دى وعايزة تطلع تلعب الساعة اتنين باليل يالهوى وكمان جاية تقول عايزة احط ليب استيك هى نزلت انهى شارع بالظبط ههههههههههـ

تحفة النوت دى ودايما كلامك فالصميم :))

Anonymous said...

نهلة عزو
شوقتنى للجواز :D

Anonymous said...

ッ Esoo Hanem ッ
هو الجواز ايه غير
شوية مشاكل وحوارات في قلب بعضيها :D
حلوة يا حوبا :)

Anonymous said...

Maram El-Gendy
to7fa bgd gamila awe

Anonymous said...

Nancy Safwat
to7fa kal3da ya rehab

Anonymous said...

Hager Emad
ههههههههههههههه اكثر
واحدة ضحكت عليها اخر واحدة هههههههههههههههه

Anonymous said...

Ahmed Mamdouh
انا حاسس اني دخلت زرت
مكان انبسطت جدا ،، بس حسيت اني تايه

تعددت المواضيع
بس لفت انتباهي ان الرابط الوحيد بينهم " ميحكمشي" صح :D

Anonymous said...

سارة نورى

مممممم دى حاجة عظيمة خالص
..
بصي يا ستى موضوعك دة مهم جدا مش مجرد كلام وخلاص .. الموضوع دة ليه ابعاد كتير جدا جدا وبجد نفسي اللى يقراه مياخدوش كموضوع خفيف دمه لطيف وخلاص .. عايزة اقولك يا رحاب انى مع كل موقف وفقت وسألت نفسي ليه الدنيا وصلت لكدة وهل هتستمر وبما ان الاستمرار في حياتنا من المستحيلات فآخرة دة ايه ...... وطبعا الاجابة عن كل دة يتكتب فيها مجلدات!!
رحاب موضوعك "مهم وخطير " بجد مش هزار !!

Anonymous said...

Halol Halol
‎7elwa awy ya hoba :)))))

Unknown said...

مدونه رائعه بالتوفيق دائما

مدونة حكاوي الراوي

Anonymous said...

Amr Aly
جمييييييييييييييلة جدا