Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Friday, April 01, 2011

هاتتجوزى بمزاجك وللا .........؟؟؟


- هو انتى يا بنتى إيه حكايتك؟


- هه؟ بتقولى حاجة يا مامتى؟


- اهو ده اللى انتى فالحة فيه.. ترجعى من شغلك يإما وشك فى الكمبيوتر لحد ما تتقلبى تنامى.. يإما تصيعى مع صحابك وماشفكيش غير على النوم برضه


- عايزة منى إيه بس يا مامتى!! أنا قاعدة فى حالى أهو


- عايزة أجوزك وأخلص منك.. واشوف لى يومين بقى


- ههههه، أوعى يا وزه شوشو يلعب فى دماغك وتخلعى حمادة وتشوفيلك مز صغنان كدة.. حكم أنا عارفة شوشو ده منحرف ويعملها


- بت؟؟...... لكن تصدقى احتمال كبير برضه.. كفاية عليكم كدة بقى.. اشوف لى انا واد أوز كدة أموور يرجع لى شبابى


- وأنا موافقة.. سيب لى أنا الطلعة دى وأنا هجيبلك سيد سيده (حمادة) ده.. إيه؟ عادى، هابيع أبويا على أول ناصية، بيس يعنى


- يا بنتى هتجبيلى برى برى وجوى جوى وشلل رعاش.. ارحمينى بقى.. عايزة أطمن عليكى ...


- استنى ماتكمليش.. هتقوليلى قبل ما اموت ودمعتين يفروا من عينيكى والحوارات الفاكسانة دى.. نو مامى نو.. ده انتى قديمة قوى


- أموت فى عينيك بعد الشر عليا يا باردة.. أنا كان قصدى قبل ما القرشين اللى أنا محوشاهم لجوازك أستخسرهم فيكى وأصرفهم على نفسى


- إيه ده يا وزه؟ هو انتى محوشالى قرشين؟ لأ ده كلام كبير.. طيب هما يطلعوا كام بالظبط؟ أقولك، ما تيجى نينصص بلا جواز بلا قرف.. ويبقى طلعتيلك بسبوبة برضه من الليلة دى.. اه، صدقينى.. ده عرض مش هيتكرر تانى على فكرة.. الحقينى بقى قبل ما اغير رأيي


- ده على اساس إيه بقى يا حيلتها؟ على اساس ان انتى اللى هاتتعطفى عليا بيهم.. ده انا أجتلك وأجطعك إربا إربا.. وأديكى للبوبى يجرجش اللى فاضل منك يا بنتى يا حبيبتى.. تصدقى هتوحشينى


- يا سلااااام يا مامتى.. والله الدمعة هتفر من عينى على حنيتك دى.. تصدقى من باختى وسعدى إنك مامتى يا وزه.. والله يا أمى يا غالية ده أنا قلت أضحى دونا عن البنات دى كلها وتبقى أمى أنا بس.. ليا لوحدى.. عشان أدخل الجنة كدة حدف


- تضحى ايه يا أم تضحية انتى!!! ده أنا خلفتك بس شفقة.. اه والله شفقة، قلت بنتى ضنايا برضه بلاش أخلص منك.. ماكنتش مثلا سيبتك على باب كبايره.. أهو كنتى عملتى بلقمتك.. مه أنا لو كنت واعية.. كنت قطعت لك ايد وللا رجل وكسبت من وراكى دهب.. ايوة، ما تنحيش كدة.. وبرضه هيبقى قلبى بيتجطع إربا إربا وأنا بعمل كدة.. بنتى برضه أُمال


- ههههه، تصدقى يا مامتى أحسن حاجة بحبها فينا إننا اصحاب.. مش بنت وأمها


- أه تصدقى دى الحسنة الوحيدة العدلة فى خلفتك اشاسا اصلا


- وزه حمادة بينده عليكى ياللا بقى وقتك خولص


- خلصت روحك يا بعيدة.. برضه مش هاسيبك لحد ما تريحنى وتقوليلى هاخلص منك امتى بقى؟ الواحد عايز يخلص من ماضيه


- طيب لو خلصتى منى هتخلصى من حمادة ازاى؟


- هبقى أحط له سم فى الأكل وللا حاجة مش قصة يعنى.. الأكياس السودا والسكاكين مفيش اكتر منها فى الليفينج رووم


- قصدك الكيتشن يا ريا


- لأ الليفينج.. هو أنا لسه هروح لحد المطبخ!


- ههههه، وأنا أقول فى حاجة بتشخشخ تحتى وأنا قاعدة على الكنبة


- كلمة زيادة يا قلب وروح وزة هتلاقى نفسك فى أول كيس.. حتى تكسبى فيا ثواب وتجربيهولى.. هاااااا؟


- استنى يا ريا.. سامعة الصوت ده؟


- صوت ايه؟ شخشخة الكيس؟


- شخشخة ايه بس!!!! ده صوت بابا


- إيه مات؟


- توب عليا يا رب.. أمهات على ما تُفرج


.

.

.

.

.

- عبعاااااااال


- بتندهى عليا يا ريا؟؟


- السنيورة بنتك مش هانقدر عليها، ونجوزها وللا ايييييييه؟


- لأ إزاى، هاتجوز أنا من بكرة.. هو أنا لسه هاتجوز.. أنا اتجوزت خلاص وقطعت الخلف.. يوووه قصدى وخلفت دستة كمان

بس انصرفوا.... انصررررفوا


رحاب المليحي




22 comments:

Anonymous said...

هههههههههههههههههه حلوة
نادين

Anonymous said...

اجمل حاجة في الحوار دا انه حوار مرن جدا ملوش علاقة بحوار بين بنت وامها خالي من الرسميات اتنين صحاب اصغر من بعض بيتكلموا مع بعض ولو كل ام وكل اب ربى اابنه او بنته على كدا مش هيكون في مشاكل الاختلاف بين افكار الجيلين لان الابن او الابنة لما هيقابل مشكلة مش هيخاف انه يلجأ لحد عارف انه هيفهمه وبيحبه اكتر من نفسه انما لو فيه تسلط واجبار وتعامل على ان الصغير دا عاجز عن التفكير ومش عارف والكبير عارفله كل حاجة من هنا بتبدأ المشاكل
جميلة بجد يا رحاب
عمرو على

Anonymous said...

"هههههه ... جامدة جد وضحكتني قوي .. هي دي الامهات والا فلا"

احمد مختار

Anonymous said...

Shahenda Salem
Roshy Wala jojo?? .....looooooooool , enty moseba Walahy , f3lan motasaweraky w motasawera shaklek ....

Anonymous said...

Khaled Farouk
ههههههه أشد من عيلة مرزوق يا عينى عليا

Anonymous said...

Mo'men Sa'ad هههههههههههههههههههههههههههه ... حلوة قوي يا ريا

Anonymous said...

Noha Rabie
w goal w goal w goal ;)))) fi el goal ya roubyyyyyy ;DD

بسمه محمد said...

قصه جميله قوى واسلوب الحوار بينهم لذيذ مش روتينى وخنيق ههههههههههههه تسلمى يا حوبا ودائما ننتظر منكى الجديد

Anonymous said...

Nancy Safwat
البنت عندها حق والله ان هى مش عوزه تتجوز بلا جواز بلا وجع قلب

Anonymous said...

Sami Ahmed
هههههههههههه, حلوة قوى يا حوبا

Anonymous said...

Nora Galal
هههههههه حلوة

Anonymous said...

Asmaa Bent Elshams
جامده .... جامده عندكيش بقا لأختك عريس أوووز هههههههههههههههههههههههههههههههههههههههههههههههههههه
اصل امى برضه عايزه تخلص منى ... بقا جايبينلى عرسان بدقون ويا اخت والكلام ده

Anonymous said...

Shaimaa
حسيت اننا كلنا أبطالها يا رحاب هههههه

Anonymous said...

Hala Ali
والنعمة قريتها وحلوة قوي وانا عشان متجوزة كبرت دماغي

Anonymous said...

Khaled Farouk
أنا أوز السيد أوز حد سأل عليا هههههههه

Anonymous said...

Dalia
"double like ya hoba :))"

Anonymous said...

Ramy Elalfy
A el gamal da ante konte 2a3da ma3aya ana w mamte wla a (ma3a a5tlaf l sha5syat tab3an) nice gdan

Anonymous said...

Bent Masr
لغتك فى الكتابة مختلفة يا حوبا

Anonymous said...

Ola Mostafa
عجباني قوي الصوره اصل عندي ميول شريره شويه نياهاهاهااهاهاهاها .......... تسلم ايدك يا ريري

Anonymous said...

Mohamed Abd El Daym
ههههههه قبل ما اتجوز هعمل بوليصه تامين على الحياة و اكتبها باسم امى :) حلوة يا حوبا

naceryo said...

كلمات ساخرة تدل على ابداع في رؤية الواقع بطريقة ساخرة. احسنت

Mohamed said...

لطيف اوي الحوار دا بس في الاخر بيفضل الجزئ اللي مش مفهوم هما عايزين يجوزوهم ليييييييه؟