Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Saturday, January 01, 2011

ليه؟ وعشان ايه؟


- هابى نيو يير يا ساندرا.. كل سنة وانتى طيبة

- وانتى طيبة يا مى.. انا بحبك قوى على فكرة.. انتى أجدع صاحبة ليا

- وانا كمان بحبك.. بس ايه اللى فكرك يعنى دلوقتى؟؟ مش واخدة عليكى ذوق كدة!

- يا بت، هو انتى على طول كدة لسانك متبرى منك.. انا مبسوطة عشان انتى على طول فاكرانى فى أعيادى

- يعنى انتى يا ساندرا اللى بتنسينى فى عيدى؟!!! ده انتى حتى فى رمضان.. مش بترضى تاكلى قدامى وانا صايمة

- طبعا، لازم أخد بالى من حاجة زى كدة.. حرام، ده انتى بتكونى جعانه، واقعة.. أجى أنا بقى أكمل عليكى.. ده انا حتى ابقى مفترية

- هههههه، لأ حونينة.. هتروحى فين النهاردة؟

- هروح الكنيسة مع بابا وماما بليل

- ياللا يا عم هاتزوغى اهو من المذاكرة

- ااااه، فرصة بلاش حقد بقى.. انتى هاتعملى ايه؟

- ولا حاجة، هاقعد فى البيت اذاكر شوية.. وبعدين اتفرج على الحفلة اللى هايجبوها فى التلفزيون

- امممم، طيب ماتنسيش بقى يا مى عيد ميلادى كمان يومين

- انسى؟ انتى بتهزرى شكلك!! هو انا يا بنتى بفتكر تاريخ عيد ميلاد حد غيرك انتى

- وجبتيلى إيه بقى يا ترى يا هل ترى السنة دى؟

- ايه الناس دى؟ هو انا لازم كل سنة اجيبلك هدية!! يا بنتى انا أكبر هدية حصلت لك فى حياتك

- ايوة طبعا يا مى يا حياتشى.. بس زيادة الخير خيرين

- هههههه، ماشى يا ساندرا هانم.. جيبتلك أحلى خاتم دهب.. يارب بس يعجبك

- دهب؟؟؟؟ بجد؟؟ وااااااااااو.. بس جيبتى فلوسه منين؟ ده اكيد غالى

- كنت بحوش مصروفى لحد ما تقلت جيبى كدة وروحت اشتريته ع طول.. انتى بجد يا ساندرا متعرفيش انتى إيه بالنسبة لى.. انتى أقرب صاحبة ليا.. اقرب ليا من أخواتى كمان..

- اقول انا ايه بس بعد الكلام الحلو ده!! بجد خلتينى أدمع.. عجبك كدة؟

*(أخدوا بعض بالحضن.. وكل واحد روح على بيته)

*******************

بووووووووووووووووووووووووووووووووم

- إهىء، إهىء، إهىء

- ساندرااااااااا، الحمدلله إنك بخير.. أنا مش عارفة أقولك إيه.. أنا كنت زى المجنونة لما عرفت بالإنفجار اللى حصل قدام الكنيسة عندكم.. أنا .....

- ابعدى عنى

- ....!!!! أنا عذراكى ومقدرة الحالة اللى إنتى فيها.. بس .....

- بقولك اااااااابعدى عنى.. انتوا السبب، انتوا السبب

- !!!!!! احنا مين يا ساندرا؟؟؟

- انتم المسلمين.. ايه مش عارفة ولا هاتستعبطى؟

- مسلمين؟ هى بقت كدة؟ من امتى يا ساندرا بنتكلم فى مسلمين ومسيحين؟ من امتى بنفكر ديانتك إيه ودينتى إيه؟

- بابا قال لى إنكوا انتوا اللى عملتوا فينا كدة.. إنتو اللى عايزين تكسروا فرحتنا يوم عيدنا.. إنتوا اللى قاصدين تخلصوا مننا.. عشان اعداد المسلمين تزيد وتزيد، واحنا نموت ونموت.. وانكم لحد يوم الدين هاتفضلوا تكرهونا وتفضلوا نفسكم علينا

- ياااااااااااااااااااه، وانتى صدقتيه بسهولة كدة؟؟ طيب ماقلتيلوش ليه إن أنا وانتى أعز أصحاب وعمرنا ما حسينا بفرق ما بينا.. ماقلتيلوش ليه اننا بناكل من طبق واحد؟؟ ماقلتيلوش ليه إن وقت الأذان انتى اللى بتستعجلينى عشان أقوم أصلى؟؟ مافكرتيهوش ليه إن دمى أنا المسلمة بيجرى فى عروقك انتى المسيحية، يوم ما تعبتى قوى وكنتى محتاجة دم.. كنت انا اول واحدة نايمة جانبك ف السرير التانى بتبرعلك بدمى.. ليه وقتها ماعترضش؟ ليه ماقلش ده دم مسلم فاسد مايدخلش جسم بنتى؟؟ ليه وقتها مامتك عيطت وأخدتنى فى حضنها.. وقالت لى لو كان ليها أخت ماكنتش هاتعمل أكتر من اللى انتى عملتيه؟

- صح، انتى عندك حق يا مى.. احنا طول عمرنا أصحاب.. وعُمر ما حاجة فرقت ما بينا.. ليه الكل بيحاول يفرق ما بينا.. ليه بيحاولوا يوقعوا ما بينا؟؟

- يا ساندرا المشكلة مش مشكلة ساندرا ومى.. دى مشكلة بلد بحالها.. بلد بتولع فى بعض.. بياخدوا بالظاهر ويسيبوا الإيد الخفية المتحكمة فى كل الخيوط.. واللى بتتفرج من مكان خفى وتضحك وتتريق على الناس اللى مش فى وعيها.. واللى عاملين يولعوا فى بعض

- فعلا يا مى الناس فى عز غضبها مش بتفكر بتستسلم لغضبها والامها.. وتزود الجراح وتحرق وتولع.. يعنى هو ده اللى هايهديهم؟؟ ولا بكدة يعنى اخدوا تارهم؟ بالعكس دول كدة هيولعهوا اكتر.. بلا وعى وبلا فهم.. واللى عملوا كدة بس هم اللى مبسطوين باللى بيحصل.. هما اللى عايزين يشوفوا البلد ولعة وبتولع وهاتولع اكتر واكتر

- والموضوع بالمنظر ده عمره ما هيخلص.. طول ما الغضب عمينا.. طول ما احنا تفكيرنا سطحي وغضبنا هو اللى بيوجهنا

- عندك حق يا مى ده إرهاب مالوش بقى علاقة بمسلم ومسيحي.. ده لا له ملة ولا دين.. ده شيطان ماشى على رجلين

- وأكيد كمان الحكومة هاتلبس التهمة لشوية ناس غلابة عشان تهدى الرأى العام.. ويهدى الموضوع ويتنسى زى كل مرة.. حسبى الله ونعمة الوكيل على كل ظالم ومفترى.. وربنا يستر من اللى جى.. وربنا يستر عليكى يا مصر يا أم الدنيا..


رحاب المليـــــــحي




20 comments:

Anonymous said...

Sayed Shapan
فعلا يارحاب عندك حق جدا
وبجد القصهجميله اوى
وده الشعور اللى المفروض يكون موجود بينا
ربنا يستر على مصرنا وتعدنى المحنه دى بسلام

Anonymous said...

Art DiseNo
بجد قلبى حزين ع اللى حصل
وربنا يسترها
كلنا عايشين اخوات بيجعنا وطن وبلد واحد
حسبى الله ونعم الوكيل

Anonymous said...

هو دة اللي مخوفني
الناس فى عز غضبها مش بتفكر بتستسلم لغضبها والامها.. وتزود الجراح وتحرق وتولع

الخوف من نوعية الناس دي
مع إن الموضوع باين أوي إنة معمول علشان يضرب البلد دي مسلميها بمسيحييها
...إنما الناس و هي غضبانة بتغمض عينيها عن الحاجات الواضحة
ربنا يستر

امير المليجي

Anonymous said...

Neihad Elewa ‎
7lwa awi ya hoba tr2tek we oslobek bgd masha2 allah rbna ykhliki lena wtktblna dyman dyman

.....bgd ana 7azena 3ala eli by7sal ana mtrbya fe mdrsa rahebat we 3mry ma7aset be mashakl wla 7aga dol hma eli 3lmoni we rabooni we khaloni afham 7agat kter w elknesa kanet gwa el mdrsa we kona bn7b ndkhl ntfrg 3leha w3mrhm maz32o wla alolna laaa2 we kano 7nynen 3lina awi y3ny zy ay moderet mdrsa w zy ay modaresa moslma 3mrna ma7asena b fr2 bgd :(:(:(:( bgd alby wag3ny awi leh keda el3mlia bgd msh na2sa khales :S:S

Anonymous said...

Nadine
"الله معنا فى الايام الى جيه دى ربنا يستر علينا"

Anonymous said...

Muhammad Fattouh
"
تسلم ايدك يا رحاب بس الحمد لله معظم المسيحين عرفو ان المصرى المسلم اللى بجد واقف جنبهم من اول ما كانو فى المستشفى لحد ما نزلو معاهم انهرده فى شبرا و فى اسكندريه رجله و ستات مجبات ومنقبات قالو عاش الهلال مع الصليب"

Anonymous said...

‎Ibn Hosny"
الله الله .. ع الحواار الراائع ، حواار منطقي جداً.. .

وفعلاً مصر مش هتكوون نااضجة والفتنة " الناائمة " تختفي من حيااتنا غير لما العقوول إللي فيها تتغير أو علي الأقل تتبني فكرياً من جديد.. والبُنا ده مش هيتم علي أكمل وجه غير لمّا " أبو سااندرا " وإخواانه داخل وخاارج الكنيسة يمتنعوا عن تهييج عقول أبناائهم في أي حاادث وتصويره علي إنه صرااع وجود بين " مسلمي مصر ومسيحييها "!!. . وفقكِ الله أختِ .. نوت أكثر من راائع :)."

Anonymous said...

قرروا أن يجعلو يوم الميلاد .. يوم للوفاة . وأن يجعلوا مكان العبادة قبر مخضب بالدماء

أثاروا الفزع وذبحوا الأمان فوق مذبح الكراهية .. قرروا أن يفرقوا الأيادي

ويجعلونا هذا مسلم وهذا مسيحي .. وأن يمحوا كلمة مصري من قاموس الحروف
...
ولكني أتمنى أن أرى وجوههم الأن .. وهي تعتليها الحسرة .. ويلعب على أجفانهم ذل الهزيمة

فهاهم المصريون كما كانوا دائماً.. تلك اليد الواحدة التى لا تستطيع نار الفتن الحمقاء ان تقطع روابطها
هذا مينا وبجواره أمين .. ومحمود يربت على كتف ممدوح

تلك مريم وخديجة .. و هذه فاطمة تواسي دمع مارجريت

لم ينجحوا بسوء حظهم فيما كانوا يخططوا له

ونحمد الله على نصرنا هذا .. ونسأله أن يضع أرواح الشهداء بالجنة فهذا هو النصر الأعظم

نوت هايله يا حوبااا وطريقه مميزه فى السرد دمتى مبدعه

green apple

Anonymous said...

فعلا القصه جميله وحسيتها لان عندي اصحاب مخلصين جدا مسيحيين وفعلا نظراتهم لينا دلوقتي بقت كلها كره
علا مصطفي

Anonymous said...

Salah Khallaf
اتصلت بالامس بصديق مسيحى وحسيت من كلامه بنفس شعور ساندرا
بس عذرته
وعلى استعداد للدفاع عن اى مصرى مسلم كان او مسيحى ضد غدر الارهاب

Anonymous said...

Mona Soliman
Ana 7atetha 3al wall beta3ty. Yemken el nas tefham ba2a

Anonymous said...

Rody Alaa El Din ‎
7lwa 2wy ya rehab

Anonymous said...

Mira Mahgoub
Bravoooooo. Gamda awe. El moshkela eno 7ta el mota3alemeen beyfakato keda dlwaty :-(

Anonymous said...

Ramez Henry
kalam kwayes .. bas ma7adesh etaham el Good Muslims 3ala fekra .. bas el majority is thinking in an opposite direction of urs ..

Anonymous said...

Ramy Elalfy
هاقول ايه بس
بجد اسلوب رائع ياحوبا وطبيعي 100% وفعلا ده حاصل بين كل مسلم ومسيحي في مصر
برافو ياحوبا

Anonymous said...

Ahmed Mamdouh
"تسلم ايدك يا حوبا دي حقيقة والله"

Anonymous said...

Mo'men "
طبعاً يا حوبا مش رأيي اللي هيضيف جديد لأنه أكيد معروف بس انا زعلان منك مش أي حاجة بين مي وساندرا تتقال إفرضي حاجة سر ؟؟"

Hoba EL Arouba said...

القصة جميلة قوى يا رحاب وساندرا ومى جمعهم الحب الى ربط بين كل المسلمين والمسيحيين من زمان وربنا يعدى المحنة على خير
طنط بطة

Anonymous said...

Nancy
"da s7 gedan ana a3.lb as7abe ms7en wsa3t ale 7asl ana atmnt 3alehm whma bgad m3mlonesh w7sh bl bl3ks alole a7na mtshakren 3la so2lk w7na 3rfen an a7na a5wat"

Anonymous said...

حادث مؤلمـ
وجعنا كُلنا
و يمكن إللي حصل ده
سبب خلانا ناخد بالنا من بعض
أكتر
...
و ياريت بقي يعرفوا إن إللي
داخل بنا خارج و مفيش شئ
هيقدر يفرقنا عن بعض
و علي رأي المثل
ياداخل بين البصله وقشرتها ماينوبك إلا .....
و معلش إحنا بنتكلمـ :D

وسلمـت يداكـِ ياحوووبه
قُلتِ المُفيد :)
سامية