Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, December 28, 2010

خد فلوسى وعيشنى

لندن بتقف ع قدم وساق وقت الكريسمس والنيو يير.. بيستعدوا لليوم ده تقريبا من اخر شهر اكتوبر.. بيعرفوا يخلوك تشترى ازاى.. بطريقة العرض الوهمية اللى بيعملوها.. مش بس ف اللبس.. لأ كمان ف الفسح..

ف مثلا فى الهايد بارك بتتقلب رأسا ع عقب من جنينة لمدينة ملاهى.. فيها من كل شكل ولون.. مش بس العاب للكبار والاطفال.. لأ كمان سيرك عالمى.. وتزحلق ع الجليد.. ده غير الأكلات وحاجات تانية كتير.. ده كفاية التصميمات والأضواء.. بتكون عايز تتصور فى كل مكان فيها من روعة التصميمات.. بجد بيخلوك تدفع وانت مبسوط ومستمتع كمان بوقتك.. عندهم دماغ تجارية مبتكرة ارفع لهم القبعة عليها..

الكريسمس عندهم إن الناس تهادى بعض.. يعنى لك أن تتخيل لو البنى ادم الواحد يعرف مثلا عشرين شخص مابين افراد عائلة واصحاب.. ملزوم إنه يشترى عشرين هدية عشان المفروض إنه هيجيلوه زيهم..

حتى فى مجال العمل.. بيكونوا حاطين أسماء العاملين فى ورق.. وكل شخص يختار ورقة.. وهو وحظه، يطلع له شخص لازم يجبله هديه

طبعا الحالة الإقتصادية بتنتعش ف الفترة دى انتعاش فظيع مريع.. أى مكان فيه محلات ماتشوفش الأرض من كتر البنى ادمين اللى ماشين عليها.. وكل ما الكريسمس يقرب كل ما الزحمة تزيد فى المحلات..

يوم الكريسمس 25ديسمبر، مش بيكون فيه مواصلات نهائى.. البلد كلها أجازة.. يعنى لو مفيش عربية يبقى ماتتحركش من مكانك.. وسيلة المواصلات الوحيدة اللى بتكون متوفرة هى التاكسيات.. وبرغم ان اسعارها نار من غير حاجة لكن عشان ده بقى السيزون بتاعهم.. بتكون اسعارهم الضعف وده أمر مُسلم بيه..

لكن بقى لو عايز تسافر طيران فده جنان رسمى.. يعنى لو افترضنا ان سعر التذكرة ف العادى ب300 استرلينى ف الوقت ده بتكون ب 1000 وانت طالع.. الف ايه؟ الف استرلينى

بعد يوم 25.. بترجع البلد تشتغل نوعا ما.. وبيبدأ بقى السيل.. فيه محل بيفتح اول يوم سيل الساعة 5 الفجر.. الناس بتكون واقفة طوابير من قبلها مستنية بس باب المحل يفتح ومتعرفش تحط رجلك جواه

وفيه سُياح بتيجى الفترة دى بالذات.. عشان معروف ان سيل اخر السنة فى لندن هو أحسن سيل فى السنة كلها واحسن تخفيضات

المحلات بتكون هتنفجر من كتر الناس.. ده عشان تقف فى طابور الدفع.. فى محلات معينة بتقف بالميت ساعة ونص بس عشان تدفع

تلاقى الناس تقعد تلم تلم اى حاجة قدامها بجنان كدة.. وبعدين تقعد تربع وتريح على الأرض.. وتبدأ تفرز بقى فى الغلة اللى لموها قبل ما يجي وقت الحساب

أما وقت النيو يير والبارات والحركات دى.. برضه تذكرة الدخول بتكون أضعاف السعر الأساسى ف الايام العادية.. وده لازم تكون حاجز قبلها بشهر عشان تلاقى مكان..

ناس بتحب تعيش اللحظة بطولها وعرضها وارتفاعها كمان..

بعد المناسبات دى كلها ما تخلص.. البلد بتهدى وتبقى هس هس.. الناس من شغلها للبيت ومن البيت للشغل.. خلاص بقى كله خلص فلوسه على الهدايا والشوبينج والاحتفال براس السنة.. يادوب يلحقوا يعملوا غيرهم ويحوشوا شوية لحد السنة اللى بعدها

هى الحياة ايه غير شوية شوبينج وخروجات وحاجات فوق بعضها

وكل سنة جديدة يارب تبقى عليكم سعيدة

رحاب المليحي

17 comments:

Anonymous said...

حلوه قوي الخواطر دي يا رحاب خلتيني احس اني سافرت وعشت معاكي مود الاجازه والسيل
سنه سعيده عليكي وعلي كل اهل بيتك يارب
علا

Anonymous said...

Mo'men Sa'ad
لا حلوة قوي
بس حكاية السياح اللي بيجوا مخصصوص عشان الوقت في الوفت دا عشان السيل , بتفكرني بالفلاحين قبل العيد بشوية " مش بنزل من بنتنا أساساً . ولا حكاية الناس اللي بتلم أي حاجة وتشوف الغلة بتاعتهم دي تحفة
" شكلك من الناس دي " تدخلي معاكي بن...اتك يالا يا ولاد انتشروا " لموا اللي يقدركوا عليه ربنا " مش كدا ؟
Happy New Year :)

Anonymous said...

Muhammad Fattouh
الاول تسلم ايدك بس شوفى تصرفات الانجليز ايه لازم يجيبو لبعض هديا تهادو تحابو و احنا مش بنعمل كده بيحبو يعيشو كل لحظه فى مكنها اعمل لدنياك كانك تعيش ابد الدهر و احنا مش بنعمل كده احنا عندنا نقص ثقافات

Anonymous said...

Lovee Story
كل سنه وانتى طيبه وكل الناس بخير وسعاده دائماً يارب .

Anonymous said...

Silver Man Mahmoud
جميلة
طب انا بقه منتظر الهدايا ترف عليه اهو
لما نشوف كام هديه هتيجى ليه
غير اصلا انا ميلادى 1/1/ـ

Anonymous said...

مروة الزراع
"الله ةةةةةةةة انا احب الهيصة والهرس والحركات والحبشتكنات دى انا لو عندكم كنت بعت هدومى وقضيتها معاهم على رايك هو الحياة اية غير حبة هيصة وفسح وخروجات وتنطيط وجنان :))"

Anonymous said...

Basma Abdelbaset
عارفة إيه أكتر حاجة بتغظينى فى الشعب بتاعنا أنه شعب نكدى أه والله
بيخاف يفرح حتى لما تجيله الفرحة بيخاف يعيشها ويقولك خير اللهم أجعله خير أنا حاسس أنه فيه حاجة هتحصل
بغض النظر عن المصاريف الكتير والكلام ده
بس الواحد ممكن فعلا يتفسح يخرج يشترى ...يعيش حياتة ما هو كفاية الشغل وقرفه والهموم اللى الناس عايشة فيها

يعنى عندكم بيشتغلوا بجد ولما يحبوا يهيصوا بيهيصوا بجد كل حاجة بيعملوها بجد ناس عايزة تفرح

مش النكد اللى عندنا

Anonymous said...

Elmotmreda Heba
نفس اللى بيحصل هنا بالظبط يا حوووبا ..بس بالانجليزى ..
ههههه ..
موضوع رائع ..

Anonymous said...

Basma Bahaa
وانتى بألف خير يا حوبا
ماصل هيعملوا ايه بالفلوس غير انهم يسافروا ويعملوا شوبينج؟
هيحوشوا عشان لو عييوا مثلا يصرفوا على علاجهم؟ ماهم متأمن عليهم والدوله مكفوله برعايتهم من كله:D

Anonymous said...

Saad Ali Saad
للاسف احنا ممكن نقلدهم فى التبذير والاسراف...ولا نقلدهم فى الاستفادة من التنظيم والترويج والهتمام بكافة التفاصيل...ياريت نقلدهم فى الاشياء الجيدة...

Anonymous said...

Elgawaz sneno
بحترم الناس اللى بتعرف تستمتع بحياتها الحلو فى الاجانب انهم بيعرفوا يعملوا حاجات كتير صح تسلم اديكى انتى سردك للكرسماس هايل و كل سنه و انتى طيبه"

Anonymous said...

Amr Aly
اجمل حاجة فيهم ان وقت العمل والجد للعمل وفقط
ووقت الترفيه والفرح والتلية لكدا وفقط

بيعرفوا يعيشوا حياتهم كويس جدا

...مش زينا بنخلص الحزن بالفرح مش بنعرف نفصل بينهم

Anonymous said...

Green Apple
الله ايه الجو اللى يفتح النفس دا ههههههههههههه على رأى مروة الواحد يبيع هدومه بس نظأططلنا شويه...وبعدين هى ناقصه كماان سياح.... الا هما بيقولوا عليهم سياااح برضو زينا كدا هههههههه كل سنه وانتى طيبه يا حوبه يا عسل ^_^

Anonymous said...

كل سنة و حضرتك طيبه ، مقال جعلنا نحب لندن في الكريسمس
محمد عبد الخالق

Anonymous said...

Fatma Alzihery
ياسلام على الملندنين الى بيعرفوا يفرتكوا فلوسهم بفكر بعد كلامك دا اخد طيارتى واجى ارغلس عليكم فى النيو يير بما ان الكرسمس عدى كدا من غير لا احم فيعنى لازم اكشنات ..
كل سنه وانتى طيبه يا حوبا وسنه جميله يارب عليكم والقطتين الصغننين

Anonymous said...

Nancy Safwat
gamd awe ana gaea 3andk bokra

Anonymous said...

Mohamed metwalye:)
حياة جميله عشتها في وصفاتك اخيرا زرت لندن .. من زمان نفسي ازورها والبس الايس كاب و اكل الايس كريم ال بيسخن الطاقه جوايا ويخليني اجري ع التلج واتزحلق بحرية بعد عناء يوم عناءه مكلل بورد و جوه نظيف نفسي اطبع ورقه كبيرة فيها اسامي صحابي و كل ال بحبهم اخواتي و اولاد زمايلي في الشغل .. واهدي كل واحد كل حاجه هو محتاجها نفسي اجيب ساعه اديدس لريمووووز اول ما تنجح في الثانوي اهديهالها وتكون لونها Pink زي ما بتحب ترفع صور ساعة احلامها ع الفيس و كرافات انيق لماجد و بدله تركي و نضاره بولس لمحمد عماد و شادي و .. مش عارف ايه الهديه ال ممكن اسعد بيها امي .. دايما بتقولي هديتي نجاحك .. وعشان مش عارف اسعدها بالامنية دي مش هعرف اجيبلها اغلي من كدا غير يارب بنجاحي نفسي اشتغل عشان اجيب شوكليت و بلالين و اتزحلق ع التلج مش بحب الفلوس .. بس هنا بندفعها عشان مجبرين بيها نعيش خدوها خدوها كلها بس سيبونا نعيش حياه جميله :))"