Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Saturday, December 18, 2010

ست شمعات

يوم 24-12-2004

جت روشى للدنيا.. كان نفس اليوم اللى الدكاترة قالولى إنى هاولد فيه.. بس ماقالوليش الساعة كام تحديدا هاتيجى..

اليوم ده هو ليلة الكريسمس فى لندن.. يعنى لا فى مواصلات ولا فى أى حاجة توصلنى المستشفى.. يوم ساقع كدة..

وأنا ماكنش بقالى متغربة غير شهور.. لأ وكمان ابوها كان فى مصر وقتها لظروف خارجة عن إرادته.. وانا كنت قاعدة عند واحدة صاحبتنا.. وماكنتش مقتنعة اساسا إنى هاولد فى نفس اليوم اللى قالولى عليه..

المهم حصل وروشى هل هلالها يوم الكريسمس.. وأنا لا كنت فاهمة يعنى إيه أطفال ولا يعنى إيه أمومة.. جابوهالى بدمها بعد الولادة لافنها فى فوطة.. قرفت طبعا وفاضلت إنهم يحموها الأول.. مش معنى إنها بنتى هتطلعه عليا من أولها بقى

روشان يعنى (اكتمال القمر).. تقريبا أخدت على الأسم ده تريقة من طوب الأرض.. وخُفاف الظل اللى قالولى ماكنتى سمتيها قمر أحسن.. ولا بدل روشانا تسميها روتانا.. قد إيه من كتر سعادتى بكلامهم كنت بطلع دخان من ودانى..

بدأت الأمومة والطفولة.. يمكن الأمهات بس اللى هاتحس بكلامى.. إنك فى بداية معرفتك بالأمومة بتكونى لا تمثلى غير بقرة حلوب.. بالإضافة لعدم وجود أى حياة إجتماعية بالمرة..

وأسئلة وعلامات استفهام لا تنهتى.. هو ايه يا ترى سبب العياط؟ بطنك واجعكى؟ جعانة؟ يا ترى عايزة تغيرى البامبرز؟ نشوف كدة.. لأ فلة.. طيب زهقانة اعملك فقرة ترفيهية.. اييييييه بخا، إيه دمى تقيل؟ طيب أولع فى نفسى طيب؟؟؟؟؟؟

وفى الآخر تعببببببببببببببببببببببببببت، فى مرة كنت على شعرة بقى.. روحت ماسكها مطوحها على السرير.. كانت تقريبا شهرين مثلا.. هبطت سالمة الحمدلله قبل ما ترشق فى الحيطة..

مانكرش إن روشان شافت بصراحة ايام بيضا معاية.. ما انا كنت بتعلم فيها الأمومة بقى.. بالإضافة إنى متغربة ولوحدى ومش فاهمة حاجة ولا عارفة أعمل إيه.. عاملتها حقل تجارب..

ف مرة كنت هانساها عند ناس أصحابنا وأمشى.. كانت نايمة ومش قدام عينى.. نسيتها هو أنا مخى دفتر!!

لما قررت أفطمها.. كانت عمالة تعيط طول الليل وماكنتش عارفة انام.. حطيتها فى العربية بتاعتها ودخلتها المطبخ تعيط براحتها وقفلت عليها الباب.. بس برضه صوتها كان واصلنى ومعرفتش أنام

وقت ما كانت بتزحف كانت ساعات بتصحى بدرى.. وانا لسه عايزة انام.. كنت اطلعها الصالة وسط لعبها.. وعقبال ما تجيلى الأوضة أكون لحقت نمت لى ساعة.. اهو احسن من مفيش

وهى عندها سنتين.. كنا فى رمضان بنفطر عند واحدة صاحبتنا.. وبطبيعة البيوت هنا انك تدخل من باب الشقة تتطلع سلم على الشقة نفسها.. روشى كانت بتلعب ناحية ترابزين السلم واحنا بنفطر.. صاحبتنا كانت مغطية جزء من الترابزين بفوطة عشان كان فيه مساحة منه فاضية.. وروشى عمالة ترجع لورا.. وانا مش قلقانة لإنها كانت بعيد عن السلم نفسه.. لكن فجأااااااااه مالقناش روشى.. وقعت 3 متر نزلت على أول سلمة.. كان يوم تاريخي لا يُنسى ف حياتى.. عناية ربنا الإلهية هى بس اللى حفظت على البنت يومها الحمدلله.. اتسحرت يومها فى المستشفى وعياط هيستيرى لمدة 3 ايام ..

من بعدها بقيت لو حصل حاجة.. آخرى اتخض كدة لمدة لحظة وانا قاعدة مكانى ماتحركش..

يعنى مثلا مرة كنا بنلعب بولينج.. كانت واقفة ورا واحد صاحبنا وهو جى يلعب.. وهو بقى مركز وبعزم ما فيه بيرجع ايده بالكورة لورا. اااااااااى.. راشقت فى راسها.. عملت لها كورة بولينج صغنانة أخديتها معاها وهى مروحة.. ساعتها كنت بشرب بيبسى وهى منهارة صريخ.. قلت لها تاخدى بق؟؟ رفضت، مش عارفة ليه!!!

بعد ما خفت كنا فى حفلة والأرض باركيه.. أبوها ماخدش باله أخدها مقص اتكومت على الأرض.. وكلاكيت تانى مرة كورة جديدة بألوان الطيف فى نفس المكان فى راسها.. ههههه واوا.. روحت مصورها.. أهو برضه تذكار.. بس مارضيتش تضحك عشان الصورة تتطلع حلوة..

روشان دلوقتى تحسها أنسة كدة.. رافعة شعار يا تقنعنى يا تقنعنى يا هعكنن عليك وعلى اللى يتشددلك.. وللا اكسنت العربى اللى بقى متدلع مدى على فرانكو بس فى الكلام بقى مش الكتابة..

أنا عارفة إنى هشوف ايام بيضا.. قبل ما اتجوز ماما قالت لى: ربنا يرزقك ببنات مه اصله داين تدان.. لما حملت فى روشى.. قالت لى: أنا مسمحاكى خلاص.. قلت لها: كدة ومسمحانى؟؟ أمال لو ماكنتيش سمحتينى كان هيحصل فيا إييييييه؟

وتعدى الأيام والسنين.. وروشى كمان كام يوم تتطفى شمعتها الستة.. ست سنين أمومة وطفولة.. ست سنين ما بين شد وإرخى.. ست سنين ما بين اعلمها الصح من الغلط.. وما بين اعمل عبيط انا تعبت. اعمل نفسك مش واخد بالك ..

بس فى النهاية الحمدلله على كل شىء.. اهى ميزة برضة الواحد بيخلص ذنوبه فى الدنيا أول بأول..

كل سنة وانتى طيبة يا روشى يا مروووووشى


الأم المثالية: حوبا الأروبة



37 comments:

Anonymous said...

Nadine Youssef
هههههههههههههههههههههههههه
ربنا يخليهالكوا و يخليكوا ليها

بس ع فكره انتى مامى عسوله خالص
انا اخوات عيالهم روشوهم معنى الكلمه لو غابوا عن عنيهم لثانيه يفضلوا يلفوا و يجروا ححولين نفسهم
...عندهم حق لو اختفوا ثانيه يبقوا بيمعلوا كارثه
صحيح كل سنه و هى طيبه
و انتى كمان طيبه و عسولهSee more

Anonymous said...

كل سنه وانتى ام جميله
كل سنه و روشى ماليه عليكى البيت سعاده هى و جومى
عقبال يارب ما تقوليلها الكلام ده و هى عروسه
و تقوليه لاولادها
و تحكى ذكرياتك مع جومى ليه يوم فرحها و تقوليه لاولادها
ربنا يسعدك انتى و باباهم و روشى و جومى

محمد حسن

Anonymous said...

أول حاجة كل سنة وانتي طيبة يا روشي
اما انتي بقي فربنا بيخلص لوحده أهو
اما انتي بقي تعاااااااااااااااااااااالي
انتي كاتبة في الآخر انك ام مثالية
ازاي يعني افهمها دي
..." فى مرة كنت على شعرة بقى.. روحت ماسكها مطوحها على السرير.. كانت تقريبا شهرين مثلا.. هبطت سالمة الحمدلله قبل ما ترشق فى الحيطة "
ساعتها كنت بشرب بيبسى وهى منهارة صريخ.. قلت لها تاخدى بق؟؟ رفضت، مش عارفة ليه!!!
بس دلوقتي
انا مع روشي ف اللي عاوزة تعمله
رافعة شعار يا تقنعنى يا تقنعنى يا هعكنن عليك وعلى اللى يتشددلك..
كلنا ورائك يا روشان
ويا انتي يا مامي في قلب البيت

أحيكي يا حوبا علي الست شمعات دول
وربنا يكون في عونك يا روشي انتي وجومي
مؤمن سعد

Anonymous said...

مروة الزارع
ههههههههههههههههه عسل يا حوبا
والله بتفكرينى بنفسى
انا كمان يا ما اتعلمت فى يوسف
وخصوصا انى ساكنة بعيد عن اهلى فى منفى من منافى القاهرة الجديدة لوحدى ومكنتش بلاقى حد يعلمنى حاجة
كان محمود بيجى يلاقى يوسف عمال يعيط وانا قاعدة بعيط جمبة هههههههه...هه ماهو مكنش عاوز يسكت وانا زهقت وتعبت ومش عارفة انام :)
احكيلك موقف تحفة
مرة يوسف فضل 4 ايام مدوقنيش طعم النوم خااااااااااااااااااااااااااالص لما عملنا لة عملية الطهارة وكان عمرة ايام لدرجة انى هيست وكنت ضايعة اية كانى عاملة دماغ اخر حلاوة
ويدوبك داخلة انام ساعة الباشا عيط عياط صريخ قومت صحيت ومن التهييس اللى انا فية اتهيالى ان يوسف دة كان توأم واسمهم يوسف برضة ههههههههههه ولاقيت واحد فى السرير بتاعة وفضلت ادور على يوسف التانى فى كل حتة فى الشقة هههههههههه اة والله وبصحى محمود وبقولة الحق مش لاقية يوسف التانى ههههههههه كللهم مسكينها عليا ذلة لحد دلوقتى

ولسة ياما هشوف يا اختى :((((((((((
انتى خلصتى ونفدتى بجلدكSee more

Anonymous said...

Marim Esamy
فكرتينى بالذى مضي مع انه مامضاش اوى يعنى هو لسه عنده سنتين ومطلع عفاريتى بردو :)) ربنا يخلهالك هيا وجومى ويفرحك بيهم ... قريب عشان نخلص

Anonymous said...

Noha Abdel Fattah Khalil
كل سنه وهيه طيبه الاول، بس انتى طمنتيني اخر حاجه على موضوع الامومه ده، ربنا يريح قلبك يا حوبا ههههههههههههههه

Anonymous said...

ربنا يخليهالكم ويخليكم ليه
كل سنه وهي طيبه وعقبال يارب مليون سنه
خدي بالك منهم ياحوبا وشكلهم طالعين زيك هههههههه
لماضه لماضه يعني
ربنا يباركلك فيهم يارب ويحفظهم من كل شر
رامى

Anonymous said...

هههههههههههه حلوة اوي الحكاية والرواية
وعجبني جدا العنوان وشدني

كل سنة وهي طيبة يارب وعقبال لما تشوفيها عروسة ان شاء الله
يباركلك فيها ويحفظهالك من كل سوء ويبعد عنها ولاد الحرام
...
هاتي اتنين جنيه بقى :D :D
احمد ممدوح

Anonymous said...

Mohamed El Bermawy
كل اللى قريته طبيعى جدا مع الامهات وعيالهم لكن اللى مستغرب له هو جملة الام المثالية : حوبا

Anonymous said...

Hala Ali
كل سنة وبنوتك طيبة
:)

Anonymous said...

Silver Man Mahmoud ههههههههههههههههههههههههههههههههههههه
لاتعليق
كل سنة وهي طيبة
وعقبال مانحضر فرحها قريب ان شاء الله

Anonymous said...

Roba Mohammed
كل سنة وانتى طيبة يا روشا ويا رب عقبال ما أشوفك بنوته كبيييييييرة وجميلة وبعدين أم مثالية كدة بالضبط زى مامى اللى دمها زى العسل وأسلوبها شدنى جدا ..مش عارفة انتى كنتى فين من زمان يا حوبا بتطلعى كل اللى جوانا كأمهات ..من النهاردة اسمحيلى أعتبرك العقل الباطن بتاعى ههههههه تحياتى ليكى يا قمر ولبنوتاتك العسلات

Anonymous said...

محمد حامد
ان شاء الله تفرحي بيها يا رب وهي في الكوشة مع الواد ( تميم ) !!

Anonymous said...

Adel Am
Happy Birthday

Anonymous said...

Neihad Elewa
yakhwatiiiii rbna ykhalihaleeeek yarb wtakhod hya balha mnk lma tkbr ♥

Anonymous said...

Sally ElFouly
Gamda awy ya 7ubaaaa....beye3gebny feeky el sara7a we enek betekteby everything you feel and have felt. 3agbanyyyyyyyyyyyyyyyyyy

Anonymous said...

Mohamed Shouman
كل سنة وأنتي طيبة يا روشي

حوبا ربنا يخليهوملك ويقرفوكي أكتر وأكتر,وأهه كله بثوابه

Anonymous said...

Rabab Adel Megahed
happy birthday...

Anonymous said...

Taghreed Moustafa
happy bithday roshyyyyyyyyyyyyyyyyyyyyyyyyyyyyyy

Anonymous said...

Amira S. Abdel-Aziz
Enty keda 2ala2teeni 3ala mosta2balha ba3d kol el7'abtat di :D
A very happy birthday to her w3o2bal matshofeeha 3aroosa :)

Anonymous said...

Nora Galal
كل سنة و انتى طيبة يا روشي و عقبال كل سنة ان شاء الله في حضن ماما و بابا :)

Anonymous said...

Shahenda Salem
lessa 7asel embar7 m3aia eny makontesh 3arfa haia bt3aiat laaaaaah , msh m7taga 2ooolek ,fedelt basalha we haia maf7oma mn el 3eiat ,we kan na2es sh3ra we ha3iat ... bs el ektashafto enaha sektet we 3ady , ana b2 mazelt 3aiza a3aieet .

Anonymous said...

Mostafa Ali
ميزة ان فيه انترنت بتكتبي فيه مذكراتك هو ان لما روشي تخلف ويحصلها إلي بيحصلك/ هتعرف بيجرا لها ليه كده؟

Anonymous said...

"مثاليه جداااااااااااااااااااااا"
أحمد عرفة

Anonymous said...

Saja Rizq
يالهوي يابنتي كل ده حصل فيكي ولسه ساكته وعلي فكره يا حوبا بنتك اللي بتخلص في سيئاتها باللي بتعمليه فيها ده :))))))))) ربنا يخليهالك

Anonymous said...

اولا اسمها جميل ومعناه اجمل وكل سنة وروشان طيبة وعقبال 10000 سنة
ثانيا بصراحة بعد اللي انتي عملتيه فيها ده انتي بجد ام مثالية حوبا اخر 99 حاجه
ahmed vitch

Anonymous said...

Basma wrote "
كل سنه وهيا طيبة وعقبال مليووووووووون سنة تعرفى انا برضة نفسى يبقى عندى بنات ولكن المشكلة فى حاجة أنتى دماغ يابنتى انا لايمكن يجيلى قلب انام وفيه عيل عمال يتنطط برة ومش عارفة بيعمل ايه تخيلى بقى لو ابنى ولا بنتى ده انا هدخل المورستان رسمى"

Anonymous said...

Sarah El-eskafy
كل سنة وهى طيبة
وربنا ع المفترى

كويس انك مسيتى بمنطقى بتاع الذنوب اللى بتخلص اول باول دى
بس ليه ما قلتيش ان قلتلك ان روشان من الروشة الى بتعملهالك
:D

Anonymous said...

مؤمن النجار
هههههههههههههه ربنا يسعدك يا حوبا ويخليلك بنتك
مواقف جميلة وصعبة احيانا لكن بروحك الجميلة خلتيها تعدى بشكل جميل ربنا يعزك
وكل سنة وروشان طيبة وبخير
ملاحظة ( اسمها جميل جدا )

Anonymous said...

Ganga Hoba
ههههههههههههههههههههههههههههههههههههههههههههههههههههههههههههههههههههههههههه
علي فكره تحفه اوووووووووي بجد بس انا فعلا لو مكانك يالهوي انا هتخض واصوت في مكاني واي حد تاني يجري اصل انا في المواقف دي بقف اتفرج واصوت وانا متكلبشه او اقول اي حاج...ه محدش يفهمها غير اللي شايف المصيبه
بصي بجد حاسه بيكي اصل انا قرايبي كنت مربياهم علي ايديا بس بردوا متعه معاكي لعبه طبيبعيه هههههههه وبتكبر كمان

Anonymous said...

Amr Aly
النوت دي بالذات حسيت انك بتكتبيها با احساس مختلف تماما عن اي نوت كتبتيها
احساس بالفرح والسعادة والفخر والحب الجراف اللي ملوش حدود ونفسك توصليه لاي حد بيقرا
احساس بلحظات صعبة ولحظات جميلة مرت عليكي السنين القليلة اللي فاتوا بس اتعلمتي كتير ...اوي منهم اللحظات دي بتخاطبك من جوة احساسك ووجدانك

مفيش احساس اجمل من انك تشوفي حتة منك من جواكي كانت حتة لحمة صغيرة اد كف الإيد بتكبر يوم عن يوم وبتتكلم وصوتها يعلى وتصرخ وتضحك وتنكد عليكي وتفكرحك وتضحكك وتنرفزك وكل الاحاسيس ديلحد متشوفيه الحاجةالصغيرة دي اصبحت بنوتة جميلة اوي صاحبة مسئولية او راجل كبير وراه هموم

اكيد حاجات وصفها ممتع جدا ما بالك المرور بيها عامل ازاي

Anonymous said...

Yomna Taher "ههههههههههههههههههههههههههههههههههههجميلة جدا يا رحاب ايه الجمال ده انا مستمتعه بالحكايه كبيها بسرعه عشان نتابع الحكايه هههههههههههه ربنا يباركلك فيها يا رب و يحميها و تشوفيها احلى عروسه فى الدنيا زى القمر زى مامتها يا رب امورة اوى ما شاء الله :)"

Anonymous said...

Basma Bahaa
ههههههههههههههههههههههه والله ماعارفه مين فيكوا اللى يصعب عليا..داهية ليكون ماما وبابا لما قالولى احنا اتعلمنا فيكى كان قصدهم ان حصل فيا كل دا:(((((!!!!!

كل سنة وهى طيبة ويارب يخليكوا لبعض دايما يا اجمل ام مثالية:))

Anonymous said...

Mostafa Ali
عقبال ميت سنة و تتربى فى عزك
و يباركلك فيها

Anonymous said...

Nancy
"happy birthday la roshe wrabna estor 3leana shakle ale b3mlo fe al nas he6l3 3lea"

Anonymous said...

Asmaa Hegazy
بجد انت مالكيش حل
ام مثالية من العيار الثقيل
: ))
كل سنه وروشى طيبة

Anonymous said...

Samar
"7elw awi el article da ya 7oba :) gebteli ta2assor gamed wallahi :) kol sana w heya tayyeba w 3o2bal meet sana tetalla3 feehom 3enek heya w jumi xx"