Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, December 16, 2010

مامى، عايزة شجرة


- مامى

- هااااااا ؟؟

- عندنا ف المدرسة شجرة

- اهلا وسهلا

- إيه يا مامى!! اهلا وسهلا دى؟؟ بقولك عندنا شجرة

- طيب اروح أسقيهالكم يعنى ولا اعمل ايه!!!

- شجرة كريسمس يا ماااااامى

- اااااااااه، كريسمس.. مش تقولى كدة يا روشى.. طيب

- هو احنا ليه مش هنجيب واحدة؟

- عشان الكريسمس ده مش .....

- مااااااااااااااااامى، حلوة الشجرة دى اللى انتى اشترتيها

- شجرة إيه بس يا جومى، ده ورد يا حبيبتى

- ورررررد، اااااااه، حلو الورد اللى فى الشجرة

- مفيش شجرة يا بنتى خاااالص، ده ورد بس

- ها، يا مامى، قوليلى ليه بابا مش هيجبلنا شجرة كريسمس؟

- هو أنا مش قلت لك؟

- لأ يا مامى اتكلمتى مع جومى وماردتيش عليا

- كنت بقولك إننا الكريسمس ده مش بتاعنا عشان احنا مسلمين

- ............

- يعنى كل أصحابك اللى بيتكلموا عربى دول مسلمين معندهمش شجرة

- اااه ليه بقى؟

- عشان هما زيك مسلمين.. لكن الميسات بتوعك اللى بيتكلموا انجليزى دول ممكن يكون عندهم شجرة أو بيحتفلوا بيه عشان هما مش مسلمين ومش بيصلوا زينا ومش بيصوموا زينا

- ماااااااااااااااااامى، أنا معاية شجرة

- يقطع الشجر وسنينه.. معاكى فين يا جومى؟

- أهو

- ده كارت يا حبيبتى وإنتى رسمة عليه شجرة الكريسمس

- طيب بصى، أهو

- Dear Santa, Can you bring me a gift? Jumanna

- يا ولاد ...... الناس الطيبين.. ده انتوا بتشبطوا العيال بقى!!!

- هو بيقول اييييييه؟

- مين ده يا جومى؟

- فى الورقة بيقول ايه؟

- اسمها مكتوب ايه فى الكارت؟

- مامى

- نعم يا روشى

- أنا لازم اجيب هدية للميس

- ليه ياختى؟

- عشان أصحابى جابولها هدية

- مش هما جابولها.. كفاية عليها كدة.. هى هتتطمع بقى ولا ايه؟

- بس يا مامى أنا عايزة اجيبلها زى اصحابى

- هو أنا مش لسه بقول إننا مش بنحتفل بالكريسمس.. احنا عندنا العيد الصغير اللى هو بعد رمضان والعيد الكبير اللى بتلبسى فيه لبس جديد

- طب ما احنا عملنا حفلة الكريسمس فى المدرسة.. وأنا روحت وغنيت فيه.. وإنتى مازعقتيش!!

- احتفلى براحتك بيه فى المدرسة لكن فى البيت لأ.. وبعدين ما المدرسة فى العيد بتعملكم احتفال صغير بالعيد.. واللى مش مسملين بيحتفلوا برضه معاكى.. صح؟

- اه، بس أنا ع.......

- باااااااااااااااااااااابى

- اهلا، اهلا، جوووومى

- بناتك عايزين شجرة كريسمس

- أمهم اسمها لوولا

- طب سانتا مش هيجي يُغزنى بهدية.. مثلا ورقة بمية استرلينى وأنا نايمة أوخ؟

- يُغززززك؟ أوعدك يا حياتى أول ما يخترعوا ورقة بمية هبقى أخليه يُغزك بيها

- كددددة، طييييب، ياللا يا بنات على بابى.. بابى هيجبلكم شجرة وهدايا.. استلقى وعدك بقى من الزن والنكد اللى هتشوفه

- هيييييييييييييييييييييييييييييييييييييييييييييييه

رحاب المليـــــــحي

17 comments:

Anonymous said...

Basma Abdelbaset
نأخذ من كل قبيلة شجرة

Anonymous said...

Sarah El-eskafy ههههههههههههههههههههههههههههههههه
قابلى يختى
الخلفة واللى بيخلفوها

Anonymous said...

الكريسماس وقبليه الهالوين وغير بس طريقه السرد جميلة يمكن لانه واقعى ربنا يحفظ اولادك ويخليهملك
مؤمن النجار

Anonymous said...

و النبي انتو بكلكعوا الدنيا يعني ما كل المحلات في مصر دلوقتي فيها شجر كريسماس ، انا عارف الإحساس بتاعك ان انتي عايزة روشي تكون منتمية لثقافتها بس الخبر المؤسف ان انتي قاعدة تكلمي روشي في لندن عن العيد الصغير و العيد ال...كبير

و بتقوليلها ان احنا مش لازم نحتفل بالكريسماس

بس المفاجأة ان احنا بنحتفل بالكريسمس

و مصر كلها مستنيه بابا نويل ....عادي

انها العولمة .. القوي بيفرض ثقافته

بس مش معني كده انه هيقدر يلغي ثقافة الضعيف

ده غير إن القوي هييجي عليه يوم و يضعف

و بعدين ممكن نعتبر ان طقوس الكريسماس و الفالانتين و الهالوين
هي طقوس تجارية علشان محلات اللعب تشتغل

و بالتالي الموضوع مش واخد اوي الطابع الديني

خلي روشي تروش

i wish u a merry Christmas and happy new year :)
احمد حامد

Anonymous said...

Ramy Elalfy
ربنا يحميهم يارب ويقويكي عليهم
وعلي المدرسه بتاعتهم اللي عماله تاخد في هدايا

Anonymous said...

هههههههههههههه
ربنا يخليهوملك احسن حاجه انك زحلقتيهم ع بابى
بس فعلا دى مشكلة
ان الاطفال بيتربوا فى المدرسه ع انهم زيهم زيهم
و دا غلط
...بس لو بصتلها من ناحيه تانيه ان كدا ميخلوش الاولاد يحسوا انهم مختلفين او فى تفرقه
بس الدماغ الى بتبوظ دى ايه حلها؟؟؟؟؟
الاقناع؟
اقناع ايه فى السن دا؟
زعيق؟
مش حل
بجد؟ايه الحل؟؟
نادين

Anonymous said...

مروة الزارع
طب والنبى خلى بابى يجيب لى فرع شجرة حتى معاهم
انا طول عمرى نفسى فى واحدة والله
:))

Anonymous said...

رائعه كعادتك يا رحاب
اهتمامك بالاحتفاظ على هويتك و على ثقافتك و توعية البنات بطبيعة ثقافتنا و عاداتنا و تقاليدنا
شئ مجهد جدا خصوصا مع الاطفال المتواجدين فى بيئات ثقافيه غير بيئتهم الاصليه
اسلوبك رائع فعلا فى العرض و الايحاء و الاشارة و المفهوم
ب...س ارجوكى بطلى عصبيه شويهSee more
محمد حسن

Anonymous said...

مش انا قولت رحاب يا جماعه نسمه نسمه نسمه بس عايز اقولك حاجه ربنا يخلهملك و يخدو حق الناس منك :P
تسلم ايدك يا رحاب
محمد فتوح

Anonymous said...

ماشاء الله كويس انك تعرفيهم الاعياد اللى مفروض نحتفل بيها والاعياد اللى مش مفروض نحتفل بيها فى ناس دلوقتى بقوا يحتفلوا باى عيد والسلام عيد حب ماشى عيد الكريسميس ميضرش وهكذا
ربنا يحفظلك بناتك وتعلميهم كمان وكمان
هبة فاورق

Anonymous said...

Ahmad Mokhtar
ههههههههههه
جامدة جدا

green apple said...

ههههههههههههههههههه مفيش احلى من المدارس الحكومى على الاقل اخرهم معايا خمسين جنيه مصاريف الكتب ومصروف كل يوم جنيه قشطه كدا لا هدايا بقى ولا جفتات ووجع دماااغ هههههههههه ربنا يقويكى على الغربه يا حووووووبه

Anonymous said...

Gehan Diab ‎
:)you know what? she is a child...she won't even understand what you are saying...don't make her feel like a stranger in her class.. Christmass essence is about forgiveness and love and no one should be left out during christmas...teach her but do not isolate her, teach her el Eid, teach her Christmas, teach her even Hanuka (for Jewish) open her horizon. This is what I think

Anonymous said...

هيجيبو الدلع ده منين
هما لو كانو شافو مامتهم متدلعه ازاى و هيا صغيره محدش كان استغرب
ربنا يخليهملك يا رب و يباركلك فيهم
احمد فاروق

Anonymous said...

Silver Man Mahmoud
جميلة جدا

Anonymous said...

Amr Aly
انا كل اللي لفت نظري المدرسة اللي العيال كلها جابتلها هدايا الكلاس فيه كام عيل وهي جالها كام هدية

افتكرت دلوقتي لما كنا صغيرين كان كل واحد بيجيب هدية للميس مش عارف ليه وعلى ايه ؟؟؟؟
طريقة السرد تحفة

Anonymous said...

Nancy
"gamda gdan homa alrgala mest-hlosh 3'er kda"