![](https://blogger.googleusercontent.com/img/b/R29vZ2xl/AVvXsEh5oDtqqFcq9Ab1uE8PO4LKENIlz1AM5DtrAIKXwdrZPRkIGwC_fBRuWfkYVAPm3amF48cywOv_QF3PnDvIMAKbIyf1Wt1R5T9SVs2H59cvqFrNtbj-19t6DvuI7P4PYUdr11DK/s320/sweet-dreams-5.gif)
- لأ، هو أنا فاضى؟ مه يا أركز فى النوم يا فى الحلم
- خالص خالص؟؟ ده إنت عجيب والله
- وإيه العجيب في كدة؟ أنا بنام زى الفسيخة.. يمكن أكون بحلم.. لكن بصحى مش فاكر حاجة.. أو يمكن عشان بتغطى كويس وأنا نايم.. هههههه
- اممم، أنا بقى بحلم كتير
- عادى يعنى، وإيه اللى بتتطلع بيه من الأحلام ديه؟
- ساعات بتكون أحلام بسلى بيها نفسى وأنا نايم.. يعنى مالهاش أى فايدة.. مجرد أحداث من هنا على أحداث من هناك.. لكن ما تتفسرش ولا لها قيمة
- إيه ده؟ إيه ده؟ هو إنت بتهتم قوى كدة بالأحلام لدرجة التفسير!!!!! واااااو
- أيوة طبعا، في احلام كتير بنحلمها تستاهل التفسير.. لإنها كتير بتتحقق زى ما هى أو شبها
- زى إيه بقى يا أبو العريف؟
- يعنى مثلا مرة حلمت إن جدتى ووالدتى بيعيطوا وزعلانين قوى.. سألتهم هو مين مات؟ قالولى تفتكر مين؟ وصحيت على التليفون من أخويا بيقولى البقاء لله فى جدك
- اييييييييييييييييييييه؟؟؟ لأ انت بتهرج!! طب إيه تانى؟
- فى أحلام مش بتكون مباشرة.. لكن برضه لها معنى.. وفى أحلام بتكون عكسية.. ف أهم حاجة إن اللى يفسرها يكون فعلا بيفهم فى تفسير الأحلام.. مش بيفتى والسلام
- لألأ، براحة عليا أنا مش قدك.. يعنى إيه عكسية؟
- يعنى لما تحلم إنك بتعيط قوى يبقى ده هيبقى فرج مش نكد.. لما تحلم مثلا إنك خلفت بنت.. بيكون معناه رزق كبير عشان البنت رزق.. برضه لما تحلم إنك هتموت ده ساعات بيكون معناه إن عندك مشكلة وهاتتحل
- إيه تانى؟
- خلع الضرس ده بقى معناه إن حد هيموت من أقاريبك.. لو مثلا لبست جزمة جديدة.. تبقى داخل على حياة جديدة.. فى حاجات كتير قوى ماقدرش أحصرهالك فى قعدة
- اممممم، هو أنا اينعم مش بفتكر أحلام.. لكن فى حاجة تانية بتحصلى غريبة
- إيه هى؟
- ساعات لما بيحصل قدامى موقف.. بحس إنى شفت نفس الموقف ده قبل كدة.. وكأنه بيتكرر تانى.. لكن عمرى ما بفتكر هو هينتهى على إيه
- دى حاجة بتحصل لناس كتير.. أنا برضه فى مواقف بشوفها بحس إنى ممكن أكون حلمت بيها قبل كدة بنفس تفاصيلها.. أو زى ما انت بتقول إنها حصلت قدامى قبل كدة.. وبرضه بحاول أعصر دماغى عشان أفتكر هاينتهى على إيه.. بس ولا الهوا
- والله؟ طمنتنى، كنت فاكر العيب فيا
- هههه، بما إنك مش بتحلم وإنت نايم.. جربت تغمض عينيك وتحلم وإنت صاحى؟
- كتيييييييييييير، لما بيكون نفسى فى حاجة ومهما بسعى مش عارف أوصلها.. بغمض عيني وبحلم إنى وصلت للى أنا عايزه.. واتخيل واعمل سيناريو وحوار.. مه أنا عايش اللحظة بقى.. حد قدى
- ههههه، على رأيك، هو يعنى حتى الأحلام مش هنقدر عليها كمان!!!
- مه ده اللى ناقص بقى.. عشان يبقى السواد من كله.. ده احنا لما بنحب ننفس عن روحنا شوية بنحلم الحلم ونصدقه ونعيش فيه ونكبره.. يمكن فى يوم من الأيام نقدر نحققه
- صح، بس إبقى اتغطى كويس وانت نايم برضه
رحاب المليحي
20 comments:
Mo'men Sa'ad
تسلمي يا حوبا
"helw et3'tta fel a5err de :D"
SoŁŁŸ
تسلم ايدك يا رحاب
محمد فتوح
Basma Abdelbaset
الآحلام دى عااااااالم
تانى لوحده
Ganga Hoba
انا وانا صغيره كنت بقعد اتخيل احداث هاتيجي بعد كتييييير اوووووووي وفي منها احقق وفي منها لا
حلوة اويي يا رحاب.. كأنك بتقري كل افكارنا وحاسة باللي بنشوفه.. :)
Siham Soufi
ana ba2a 7atghata kewayes ...... asl fe a7lam keteera 3ayzaha tet7a2a2...........:D
Sarah El-eskafy
يارب احلم بجزمة
جديدة:(
Marim Esamy
انا كمان ساعات بحس ان الموقف ده اتكرر قبل كده وبتبقي حاجه تحير
اما عن الاحلام الى بتتحقق فانا برده حلمت ان حد مات واحنا بنغطيه ولما صحيت لقيت مرات خالى الله يرحمها ماتت
رائع يا رحاب تسلمي ياقمرايه
Omaima Ezz Eldeen
حتى الحلم يا رحاب استكتروه علينا
لذيذة
:)
Nancy Safwat
gamd gdan bs ana mb7lmsh ana kman shkl al3eb fea
Basma
ههههههههههههه حلوة اوى النوت دى يا حوبا انا بتحصل معايا برضه انى الاقى نفسى فحاجة عيشتها كلها قبل كدا بكل تفاصيلها! احلم ببيت عمرى مادخلته اصلا! وافتكر لما ادخل البيت دا والحوار اللى فى البيت دا فى الحلم يحصل..أخرااابى ببقى هتجنن:D"
Amira S. Abdel-Aziz
الأحلام دي أجمل نعمة في الدنيا - في المنام أو اليقظة :)
Shahenda
"Gamila awiiii ya 7oba , we ana motafeka m3aky f3lan ,we dh 3an tagroba wenty nafsek 3aserteha m3aia fe 7elm mody el mamtek fasareto ..."
El Shaymaa K
عشان عندى ارق بقالى فترة فالأحلام عندى متقطعة
بس أنا اوقات الأحلام بيكون ليها مغزى عندى و بتخض لما الاقى منها بيتحقق
Mohamed Abd El Daym
جميله النوت يا حوبا وفعلا بتحصل بس انا بقالى كتير محلمتش يمكن عشان الشغل بيهد الواحد وبيبقى عاوز يلحق ينام فميش وقت للاحلام :) تسلمى .
Sara Ibrahim Abusenna
إحلم صاحي
وإحلم نايم إحلم وفي كلتا الحالتين
لازم نحلم ........الحلم اول درجات التحقيق
للاخت sara ibrahim
ايوة الحلم اول خطوات التحقيق فعلا ..بس الكلام ده للانسان المجتهد مش التافه و الكسلان و اللى فاكر نفسه مشغول و مش فاضى و هو اصلا صايع و مش لاقى حاجة يعملها
كلمات جميله يا رحاب ، وفعلا كلنا بنتعرض كثيرا لما ورد فى كلماتك ، وطبعا هناك الحلم والرؤيه، وكثيرا ما نرى الرؤيه ثم نراها تتحقق على ارض الواقع..... بارك الله فيكى وحفظكى ورعاكى ... آمين
Post a Comment