Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, September 21, 2010

اللى يعيش ياما يشوف


"طول ما احنا ماشين بنقابل مواقف كوميدية فى طريقنا سواء بتحصل لنا أو لغيرنا.. فيه منه اللى بيعلق معانا وماننسهوش"

فى العمارة: بووووووووووووووم

- خير يا محمد؟ إيه الضرب والزعيق اللى عندكم ده؟

- ههههههههههههههههه

- مالك يا محمد اتهبلت ع كبر وللا ايه؟

- أصل ماما كانت بتصحينى.. وأنا لسه بقى بفتح عينى ومش شايف قصادى.. بصيت شوفتها منعكشة ونور الشارع عاكس على شعرها.. لأول وهلة تخيلتها عفريتة.. ماحستش بنفسى غير وأنا بديها بالبوكس فى وشها دخلتها جوة الدولاب

****************

فى العيادة: هاجر بتزعق ومحروق دمها على الآخر

- مالك يا هاجر صوتك جايب آخر السلم ليه؟

- اللى بيحصل ده تهريج.. واخدة ميعاد النهاردة مع الدكتور آجى يقولولى مسافر

- الممرضة: حضرتك أصل .....

- إنتى لسه هتقوليلى أصل وفصل مش قادرين تكلفوا نفسكم وتتصلوا بيا.. وأنا وقتى يضيع.. والشوارع زحمة وجاية مش طايقة نفسى عشان كمان تكملوا عليا وتقولولى الدكتور مسافر

- الممرضة: أنا معنديش خبر إنك حاجزة النهاردة.. طب معلش هاستأذن حضرتك تبصى فى الكارت تتأكدى إن الميعاد النهاردة

- كمان؟ على اساس إنى مجنونة وبخرف وساعدتك مش واثقة فى كلامى.. طب يا ستى حاضر.. هوريكى عشان أحط الكارت فى عينك .. وادى ال................

- هاجر هاجر... مالك؟

- ها، ......... الميعاد طلع الأسبوع اللى جاى

*****************

فى كوداك: أنا بقى اللى بزعق داخلة نافشة ريشى عليهم

- لو الصور متطلعتش بنفس جودة الفرع التانى.. مش هتشوفوا منى لا ابيض ولا اسود

- حضرتك ماتقلقيش كل الفروع بطلع نفس الجودة

- لأ مش نفسها.. بص الفرق ما بين الصور..

- إن شاء الله تطلع عند حسن ظنك.. ممكن الميمورى كارد؟

- اتفضل

- دى شكلها غريب كدة ليه؟

- لازم تبقى شكلها غريب عشان من بلاد برة مش من مصر

- لأ مالهاش علاقة حضرتك.. كلهم عادة بيكونوا نفس الحجم عشان تدخل فى الكمبيوتر

- إنت هتكدبنى ولا ايه؟ بقولك دى من لندن اكيد الشكل لازم يبقى مختلف

- احم.... حضرتك دى البطارية مش الميمورى

*************

فى الشغل: أحمد بيحب يعمل مقالب فى أصحابه

- أحمد، أحمد، أحمد

- هااااااا لخص بعمل تشات مش فاضى

- هههه، طب ادينى نمرة الأوفيس بوى

- ليه؟

- ايه هو اللى ليه؟ عايزه يجبلى شاى

- 11

- الو: البوفيه؟ عايز شاى معلقة سكر واحدة.. اقفل الاقي الشاى بيغلى على مكتبى

- رئيس مجلس الإدارة داخل بكوبية الشاى: الشاى أهو، أنا نسيت أقولك إنهم رقونى من البوفية لرئيس مجلس الإدارة.. رقم البوفية 12 مش 11

*************

فى الشغل: لما الواحد مايكونش مركز.. حافظ مش فاهم

- مصطفى: مش هتصدقى عملت إيه النهاردة ف الشغل الصبح؟

- قول قول اشجينى

- إنتى عارفة إنى بروح بهدوم كاجوال وأغير هناك فى المكتب قبل ما حد يجي والبس البدلة.. روحت النهاردة بقى والحمدلله إن المكتب كان فاضى.. روحت قالع الكاجوال.. ومش عارف إيه اللى خلانى افتكرت نفسى ف البيت مش فى الشغل.. مالبستش البدلة.. روحت أقعد على مكتبى بالداخلى.. بس حسيت إن الكرسى سااااقع.. بصيت لقتنى مش لابس حاجة

************

فى كتب كتاب: برضه حافظ مش فاهم

- المصور لواحدة من المعازيم: هو ده أبو العروسة؟

- لأ

- طيب هو فين عشان يتصور معاها؟

- أه حالا هدورلك عليه

*وقف المصور مستنى بقى

- ها لاقتيه؟

- اه

- فينه؟

- هو متوفى

- نعم؟ متوفى؟ أمال انتى بتدورى على مين؟

**********

فى المدرسة: وما أحلى الصياعة والبلطجة اللى حتما ولابد بتيجى على دماغ صاحبها ف الآخر

- محمد: أنا اتفصلت أسبوع

- ليييييييه؟ عملت مصيبة إيه المرة دى؟

- ده أنا حتى المرة دى مظلوم والله.. كنت داخل الفصل بعد الفسحة وأتأخرت على الحصة وكانت حصة فرنساوى.. لقيت الباب مقفول.. افتكرت العيال صحابى عاملين فيا مقلب.. روحت رازع الباب فتحه.. كان فى واحد واقف ورا الباب.. بقى هو والحيطة واحد

- يا نهارك اسوووووود وبعدين؟

- فقال ايه جاى يزعق لى ويتخانق معاية.. روحت ماسكه متخانق معاه كنت فاكره طالب معانا لسه جديد.. معرفتش إنه مدرس الفرنساوى غير وانا فى إيدى ورقة الفصل

************

وراء الكواليس: مختار معد برنامج وبيحب قوى يبوظ الحلقات

- مختار للمذيعة فى الأير بيس: هبة لو سمعانى صرحى شعرك

- تنفذ هبة

- لأ شكلك عملتيها بالصدفة.. طب لو سمعانى حطى إيدك ف مناخيرك

- هههههههههههه

- هبة هبة..... صرصار صرصار ع هدومك..

- عاااااااااااااااااااااااااااااااااااااااااا


رحاب المليحي

21 comments:

Anonymous said...

oooool bgd gamda awi bta3et elmemory card de ya r7ab w elkorsy ely tala3 sa2e3
Riham Tarik

Anonymous said...

Loved it ya 7uba
Sally

Anonymous said...

7la 7aga we7nabenetkallem b seqa wba3den netla3 fel a7'er.............3'altane

kollohom a7la men ba3d
Amira

Anonymous said...

I liked it so much
Asmaa

Anonymous said...

جامد قوي الكلام دة .. صباحكم بيضحك
احمد مختار

Anonymous said...

la ya basha ana 22dar, bas begad 3agabetny 2wy
NOha

Anonymous said...

جامدة جدا
عجبني معد البرامج
اعرف واحد نسخة منه
مصطفى فتحى

Anonymous said...

gamda ya rehab 2na 23t 2dhk 2dhk ,3mr 2ly 2nty 2tgnenty w nam tany
Rody

Anonymous said...

gamda awe kolo bs t7fa awe bta3t al shae
Nancy

Anonymous said...

ههههههههههههههه
جميلة اووووووي يا رحوووبة
شرباتات يا إخوااتي ..
سلوى ابو عرب

Anonymous said...

ههههههه
حلووووه بتاعة المصوراتي دي
مواقف غريبه و تلقائيه مش مصطنعه
و دايماً بنقابلها

...كُنت فـ إعدادي بقلد شخصيات
معينه فـ الفصل و من قصري
كُنت بطلع فوق الدسك علشان كُله يشوفني
و فـ مره طلبت معــايا أقلــد مُدرس الرياضيات
بتاعنا
و المستر ده بالذات أنا بالنسبه له
الطالبه المُطيعه المُجتهده الهاااااديه جداً
إللي نادراً جداً تسمع لها صوت فـ الفصل
ميعرفش الخيبه
و فـ لحظه إندماج تاااااامـ فـ تقليده
ألمح بالصدفه رااااااس طالعه من بابا
الفصل و مُبتسمه و بتقول : سااااااااميه!!

جاتلي شهقه زي بتاعت المُلوخيه
هييييييييئ
إحم
" يانهاري مش فايت "
و دخلت أقعدت فـ مكاني زي الدزمه
و المستر أرش ملحتي
الغريب فـ كده إن زمايلي فـ الفصل
هما كمان مُندمجين معايا و لإـ
نفس ذات الوقت شايفين المستر و هو
واقف ع البابا

بتتكرر المواقف و لسه
إللي يعيش ياما يشوف
سامية مصطفى

Anonymous said...

حلوة قوي يا حوبا والله
مؤمن

Anonymous said...

ايه التفاؤل اللى انتى فيه ده
سارة

Anonymous said...

ههههه تعرفى ان الموقف بتاع البوفيه ده حصل حقيقى فى الشركة عندى
مها

Anonymous said...

ههههههههههههههههههههه...........كلهم اجمل من بعض وطريقة سردك جميله جدا ...شكلى لقيت منافس جدير باإحترام ....سورى...منافسه.
مازن

Anonymous said...

هههههههههههههههههههههههه مسخرررررررررة ... عجبنى جدا موقف الولد اللى افتكر امه عفريت ، و بتاع كوداك فضيحة فضيحة يعنى هههههههههههههه ، و بتاع المدير و البوفيه جاااااااامد جداااااااااااا ... و بتاع مختار يجننننننننن

حلو اوى انك تحتفظى فى " الم... يمورى" بتاعتك بمواقف بسيطة زى دى ، لانها على بساطتها هى اللى بتعمل لحياتنا شكل و طعم و احساس ، اكيد لو الحياة مفيهاش مواقف من دى و لو ذاكرتنا مبتفتكرش المواقف دى كان هيبقى الحال الى حد كبير جدا سئ ..... حلو يا حوبا اوى ، استمري فى دة دايمااااااااااااااااا

سارة نورى

Anonymous said...

رائعة جدا
فى الجزء الخاص بحصة الفرنساوى
كان من الافضل عدم التنبيه على انه اتأخر فى الفسحة وان الحصة حصة فرنساوى حتى تكون المفاجأة غير متوقعة
صلاح

Anonymous said...

كلهم احلى من بعض
امانى

Anonymous said...

بجد مواقف جميلة لانها مش مصطنعة

انا المواقف اللي مش انساها في حياتي في فرح خالتي كان عندي بدلة لسه جديدة ومشوفتهاش وجاهزة عاللبس قالولي ادخل خد البدلة جاهزة عالسرير جوة ودخلت لقيت بدلة أخدتها ولبست ونزلت روحت مع اصحابي وروحت الفرح متأخر ...وكان لسه ايامها الموبيلات مش منتشرةاوي ولما روحت الفرح لقيت الفرح كله بايظ وأول ما شافوني مسكوا فيا اكنهم مسكوا حرامي واتضح ان البدلة بدلة خالي اللي هو وكيل العروسة وخالي مش عارف يلبس ايه لانه مش في بيته واتقابلنا في الشارع والعروسة مش جات عشان لازم اخوها يكون وكيلها وفي الاخر اتقابلنا في الشارع وكان لازم نغير هدومنا في الشارع عشان المأذون والدنيا كلها جوة
وقلعنا احنا الاتنين في الشارع وتحت الشجرة ادام جنينة الاسماك وكل واحد معدي يشك في امرنا وكان أحد الخبثاء في نفس الوقت نزل يستدعي مصور الفيديو لأمر هام عشان يصورهSee more
عمرو على

Anonymous said...

جميل جداااااااااااااا
رامى

Anonymous said...

عندك حق يا رحاب ..اللى يعيش ياما يشوف معلش اتاخرت فى الرد مكنتش موجود ..لكن يسعدنى دايما انك بخير ..ربنا يوفقك دايما يــــارب .
محمد عبد الدايم