Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, March 21, 2010

مثالية على حق



مش عارفة ليه لحد دلوقتى ماخدتش نوبل الأم المثالية؟ يمكن علشان لسه ماخترعوش حاجة كدة للأم.. احتمال برضه.. أصل أنا أجدر وأنسب واحدة يتقال عليها مثالية بشدة وبعنف..
إنتم شكلكم فاكرينى بتريق... أبدا نهائى.. علشان تتأكدوا بنفسكم تعالوا معايا نقضى يوم عندى فى البيت وإنتم تشوفوا بنفسكم .. بس اقفوا ورا الكواليس قصدى ورا الباب.. واتفرجوا على يوم فى حياة أحسن أم مثالية فى الدنيا بل فى العالم..

تررررررن تررررررررن
- ها، اوووف انت بترن ليه دلوقتى يا مزعج.. صحتنى من نص الحلم.. دة انا كنت خلاااااص.... يوووووووه اوووووف... ياللا استعنا على الشقا بالله..
- يوووووما، يللا اصحى علشان تروحى المدرسة.. انتى يا بنت قومى ماتعمليش نايمة
- هاووووم، طيب هقوم بالراحة هى الدنيا هتطير
- انتى كمان بتردى عليا؟؟ قومى ياللا بدل ما انكد عليكى على الصبح
- اوف، كل يوم مدرسة كل يوم مدرسة.. خلاص تعبت.. إيه التعذيب دة؟
- تا..... إيه؟ تعذيب؟ ده على أى اساس يعنى؟ على اساس انك بتروحى تسيئلهم المكان وللا من كتر الواجبات اللى انتى مش ملاحقة عليها وبتعمليها
- (ما انا مش هخلص بقى اقوم اغسل وشى احسن)
- سمعينى صوتك كدة.. بتقولى حاجة؟
- صباح الخير يا مامتى
- وانتى من اهله يا اختى قومى إخلصى
- إهىء إهىء، هاااتى بقى هااااتى
- يادى النيلة وآدى أختك كالعادة بتحلم ان حد بيرخم عليها وهى اساسا ترخم على بلد
- هاها، سيبيهالى أنا هصحيها يا مامى؟؟
- لأ وعلى إيه هى أختك الصغيرة أينعم بس هتقوم تشوطك.. إنجزى انتى والبسى وأنا هصحيها
- (كل حاجة لأ، لأ، نفسى مرة اسمعك بتقولى على حاجة آه... أمهات غريبة مريبة)
- لوكا هتصحى وللا إيه؟
- اييييييه؟ انااااام، عايزة انااااام
- طيب اريح برضه وفرتى صداع الصبح وتلاقيكى اساسا مش دريانة بتقولى إيه
- مامى، بابى بينده عليكي
- ها، هنبدأ بقى الطلبات اللى مش بتخلص..... أفندم؟
- هى فانلة لوكا بتعمل إيه عندى فى درج فانلاتى؟
- عادى يعنى غلطة مطبعية
- ماشى بلاش دى.. هو مش لون القميص ده كان ابيض قبل ما يتحط فى الغسيل.. يا سبحان الله تحول لونه من الابيض للبمبى إزاى؟
- شوفت لا سحر ولا شعوذة.. وبعدين يا سيدى اعتبر نفسك اشتريت قميص جديد.. ده أنا حتى بخدمك كدة.. ناس غريبة مش بتقدر أى حاجة خالص
- .............
- عاااا عاااااا
- يا فتاح يا عليم، إيه يا لوكا صاحية تطلعى علينا زرابينك ليه؟
- عايزة اروح معاكى
- تروحى معايا فين؟
- المدرسة مع أختك
- أختك انتى؟!!
- آه، أختك إنتى مامى
- آه اختك إنتى.. اللى هى يووما يعنى؟
- آه يووما
- لأ اقعدى فى البيت لحد ما آجى علشان الجو برد
- ياللا يا يووما هانم خلصتى لبس؟
- إيييييه، بالبس، ماتقوليلش، ماتسألنيش، هالبس لوحدى
- بنت؟ إنتى بتتكلمى كدة إزاى؟ إحترمى نفسك بدل ما اديكى على وشك.. يللا علشان تتسرحى
- ...... اى اى يا ماااااما، بالرااااحة ماتعمليش جامد
- (أهو لما أحب اطلع غلى بهدوء ومن غير ما انطق أسرحلهم شعرهم بغل).. فين الجامد ده!! ده أنا حتى باسرح بالراحة قووووووى
****************************
- ها يا يووما عملتى إيه فى المدرسة النهاردة؟
- شفتى يا مامى اللى حصل.. My Friend النهاردة....
- مين ياختى؟
- My Friend يا مامى
- آه اوك، ماله؟
- قال للميس إن باباه دخله فى الفريزر وقفل عليه.. ومامته طلعته كان بقى فروزن على الآخر.. ويا حرام كان بردان خالص خالص.. ومامته اقعدت تنشفه بالسشوار
- لا والله؟؟ وبعدين؟
- فصعب على الميس كتير وقالت للمديرة.. واتصلوا بمامته علشان تيجى يشوفوا كلامه صح وللا لأ.. عارفة بقى يا مامى لو طلع فعلا كلامه صح هيعملوا إيه فى مامته؟
- اييييييه؟
- هو أنا مافهمتش قوى.. بس متهيألى هيزعلوها يعنى زى ما زعلت her son
- ممممم، أنا بقول مترميش ودنك للكلام العبيط ده لحسن يهفك دماغك تخترعى قصة كدة فى المدرسة وتعمليلنا مشاكل
- (يارييييت، تصدقى فكرة).... أنا؟؟؟؟؟ لأ طبعا يا مامتى ده أنا بحبك.. هتدينى تشوكلت؟
- آه طبعا يا حبيبتى، عندك العلبة كلها خدى اللى نفسك فيه
********************************
- أنا جعانة
- طيب يا لوكا، شايفانى واقفة العب؟ ما أنا بعمل الأكل آهو
- إنتى بتعملى ايه؟
- أووووف، على الأسئلة اللى مش بتخلص.. بقطع البصل يعنى شايفانى بانيل إيه؟
- يا مامى هو انتى بتقطعى البصل فى الزبالة ليه؟ هو فيه كخ؟
- زباااا ......!!!!! (إيه اللى أنا بعمله ده صحيح؟!!) هااا، آه آه يا حبيبتى كان فيه كخ
- الأكل جاهز وللا لسه؟ أنا واقع من الجوع
- خدامتك آمنة... حاضر خمس دقايق بس
- مامى مش لاقية القلم بتاعى عندى هوم وورك
- حررررررام عليكم بقى، ارحمونى شوية.. دورى عليه ما إنتى مهملة وبتضيعى حاجتك
- مامى أنا فى الحمام تعالى بسرعة
- بسسسسسسسسس بقى كفاااااية، هو أنا هعمل إيه ولا إيه؟ إرحمونى بقى
- بالراحة على البنت.. هى عملت إيه يعنى؟
- ماهو طبعا، ما انت طول اليوم بره ولما بتيجى بتتفرج على التلفزيون.. ولا كأنك موجود اساسا
- قصدك إيه يعنى؟ زيى زى قلتى!!!!!!!
- حاجة زى كدة
- .............
- يللا الأكل جاهز
- هييييه هناكل
- هيييييه
- ده على أساس يعنى إنى مجوعاكم على طوول!!!!
- إيه دة يا حبيبتى!!!!! هو ليه الثوم عايم فوق الملوخية؟؟؟
- ممم، تقريبا نسيت أحمره
- .............
- عادى يعنى، هو أنا دماغى فيا من طلبات عيالك اللى مش بتخلص
- (خلاااص، سد، سد)... هو أنا قلت حاجة.. ما أنا باكل أهو وأنا ساكت
- حساك يعنى متضرر
- إطلاااااااقا، يعنى هيجي مثلا أكتر من اليوم اللى كنتى بتجربى تعملى مكرونة بالباشيمل وقررتى ماتحطيش لحمة فيها لحسن تطلع وحشة وتترمى
- ...... هاهاها ده كان زمان يا حبيبى
- (قال يعنى فيه تغيير!!).. طبعا طبعا يا حياتى، وللا فاكرة لما مكنتيش عارفة اللحمة من الفراخ.. حتى بعد ما طبختيها وكلتيها كمان.. بتقوليلى حلوة قوى اللحمة البيضا دى
- إيه ده فيه إيه؟؟؟ هو إنت قلبك أسود كدة ليه؟؟ ما قلنا كان زمان بقى
- (قال زمان قال) آه طبعا يا حبيبتى، دى إنتى حتى بقيتى بريمو دلوقتى.. مش كدة وللا إيه يا بنات؟
- ..............
*********************
- مامى مامى مامى مامى
- اييييييييييييييييييييييه
- عايزة العب ويي
- لوكا إنتى كلك على بعضك تلات سنين ولا بتعرفى تلعبى ولا تعملى، بتلاوشى بس
- مامى، لوكا (سريي) وأنا (سيكس) صح؟
- آه صح
- أنا اكبر منك يا لوكا.. لالالالالا
- لاااااااأ، إنتى وحشة
- آااااااى، مامى لوكا عضتنى، عااااااا
- إنتى وهى على أوضتكم.. يالاااااا
- لأ أنا مش هروح بقى هاه
- انتى عارفة انا هعمل فيكى إيه يا لووكا؟!!
- اه هتضربينى ومش هتدينى حاجة حلوة.. صح؟
- عااااااااااااااا.. يللااااااااا على أوضتك يا لوووووكا.. واقولى سورى ليووما
- لأ مش هقول.. أنا حوه وجميلة..يووما وحشة ونوتى
- مفيش ويي النهاردة.. وامشى يللا على أوضتك
- (يووووووه.. وإنتى كمان يا مامى نوتى بقى ها)... سورى مامى سورى خلاص.. يووما حوه وجميلة وأنا بحبها
- إيه ده؟؟؟ إيه ده؟؟؟ هو الكرسى ملزق كدة ليه؟ والحيطة كمان؟ إيييييه ده؟ الموكيييييييت؟؟
- دى لووكا يا مامى، طلعت فوق الكرسى وأخدت حاجة كدة لزق من عند بابى وقعدت تلعب بيه.. وأنا قلت لها كدة غلط بس مش سمعت الكلام
- آه يا مامى ده أنا كنت بلعب بيه.. إيه رأيك؟ حلو؟
- حلووووووووو؟ حراااااااااااااااااااااااااااام عليكم.. والله حرررررررام
- فى إيه صوتك جايب آخر الدنيا ليه؟؟ حرام عليكى نفسك واللى بتعمليه فى البنات
- اسكت خاااالص، الهانم بنتك أخدت الفازلين ودارت بيه فى الشقة كلها تنشر إبداعاتها
- كدة يا لوكا؟ كدة غلط يا حبيبتى.. يللا قولى لمامى سورى
- هو ده اللى ربنا قدرك عليه!!!!!!!! ارحمنى يااااااارب
- اهدى بس وكله هيبقى كويس
- أنا داخلة أناااااااااااام.... أنا خلاااااص تعبت.. وهيجرالى حاجة منكم... ياللا على السرير انتوا الاتنين ياللاااااااااا
- مش عاااااايزين ننااااام..... عاااااااا
- على أوضتك منك ليها.. يللاااااا كفاية قوى عليا كدة النهاردة
- (آه يا صداعى يانى آه.. أديكوا شفتوا بنفسكم اللى بيحصل فيا.. جنان رسمى.. وده يوم من سبع أيام.. بس مش بذمتكم أنا ملاك ونسمة كمان؟؟ وهما كللللللهم وحشين)

رحاب المليحي

12 comments:

Anonymous said...

you have to calm yourself a little le2en simply kol elatfal beye3melo masayeb aswad men keda :)

take it easy on urself le2en enti fe3lan keda (ba3d elshar) momken yegralek 7aga

ommaaaaaaaaaaal law 7aketlek konna bene3mel eeh fi mama we7ma kona (mashaAllah) 4 weheyya a3da beena lewa7daha le2en baba kan mesafer webyeegi fel agazat bas :D
Amira

Anonymous said...

لو فعلا دى تصرفاتك فعلا
يبقى البنات لازم يعملو اكتر من كده
ده كله اوامر
ده حتى اللعب من فوق بمعنى اوامر...
كده مينفعش
محمد حسن

Anonymous said...

hhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhh ento kolko s3ebto 3alya!!!
Basma Bahaa

Anonymous said...

يا رحاب يا قمرى أنتى مش مستنية جايزة نوبل لان ربنا جزاءه باللى أشرف وأقدس منها و هى الجنة
ربنا يخليهوملك يا رحاب و تفرحى بيهم
الشيماء

Anonymous said...

ههههههههههههههههههههههههههههههههه
لالالا بصراحه تستاهلي بجد
هبة نظمى

Anonymous said...

"ma3lesh ya hoba.. rabena ma3aky.. w meen 3aref yemken fe yom men el ayam ta7'dy el gayza"
gogo

Anonymous said...

"rbna ykon fe 3onk bs t5yale ya Rehab 2nk 3ndk waladen msh benten konty 7t3mle 2eh ? Hah???"
Rody

Anonymous said...

يا رب يخليهم ليكى ولوالدهم ، ويخليكوا ليهم ، كل البيوت كده يا استاذه/رحاب ، ولو نرجع بالذاكره نعرف اننا كنا بنعمل كده برضه ، وهى دى سنة الحياه ، ولذتها وروعتها"
أحمد الشيخ

Anonymous said...

"مجرد راى بسيط للعبد لله : انا شايف ان المفروض البنات هما اللى ياخدوا جائزة الاولاد المثاليين والله"
برماوى

Anonymous said...

"ياعينى عليهم هما بصراحه هههههه"
مريم

Anonymous said...

"ento klokom me7tagen t2do yuom as a week end fee alex or el fayuom...anty takhdy gayzet nofel mesh nobel :D :P "
Mohamed Shoman

IMSA said...

لا الأم المثالية بجد ، لكن في ايه :
في الأوامر مثلا ...
في عدم إتقان الأكل :) .
حتى اللعب بالأمر ..
بصراحة المفروض ياخدوا الأطفال المثاليين .
ربنا يخليهم لك أستاذة رحاب .
ويكون في عونهم .