Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, July 26, 2009

أنا فين؟! الحلقة الثانية

- يا محمددددددددد

- إيه، فى إيه يا ملك بتصرخى ليه؟

- هااااه، هو أنا فين؟؟ انتِ مين؟

- أنا مين؟؟ أنا رنا صاحبتك يا ملك.. انتِ فى المستشفى

- فييييين؟؟ اهههههههههه.. هو أنا موجوعة كده ليه؟؟

- لأ، حاجة بسيطة خالص.. انتى بتولدى يا حبيبتى

- بــــــ إيه؟؟ اهههههههه

- واء واء واء

- هو ده ولد ولا بنت؟؟؟

- بنوتة زى القمر.. يلا خديها فى حضنك

- لأ، إيه ده؟ دى كلها دم.. خليهم يحموها الأول

- أهو يا ستى حموها خديها أكليها بقى

- كده على طول، طيب أفوق شوية من الصدمة.. هو فين محمد؟؟

- محمد فى مصر

- مصر؟؟ وأنا هنا لوحدى!! وبولد لوحدى فى بلد غريبة!! إيه الهنا اللى انا فيه ده

- معلش متزعليش أنا معاكِ أهو.. وهو زمانهُ وصل وجى على هنا

- لأ، وعلى إيه مستعجل ميخليه لحد ما أدخلهاله الجامعة.......

- ملوكتى حمد لله على السلامة

- شكرا، شفت الولادة سهلة إزاى.. سيبتنى حامل جت لقيت البنت نايمة جنبى

- احمم، معلش كان غصبا عنى.. يلا علشان نروح

**************

- إيه ده؟ مش احنا كنا قاعدين فى استوديو فلات؟

- واضح إن الحالة جاتلك تانى.. ما احنا عزلنا من اسبوعين يا حبيبتى.. إيه رأيك بقى في الشقة؟

- مممم، أحلى كتير طبعا.. يكفى ان كل حاجة فيها مستقلة بذاتها.. الحمام لوحده والمطبخ لوحده.... إيه ده الله دى فيها جنينة صغيرة كمان

- على فكرة إنتِ إديتى نفس رد الفعل ده من اسبوعين.. قصدى طيب الحمد لله إنها عجبتك

- واء واء واء

- يووووووه ما تسكت الزنانة دى بقى عايزة انام

- لأ، تنامى إيه يا حبيبتى انتِ لازم تغيرلها وتأكليها

- أأكلها تانى؟؟ ما انا لسه مأكلها من ساعتين

- ساعتين؟؟ ما هى معندهاش غير يوم فلازم تاكل كل شوية

- لأ،لأ احنا متفقناش على كده.. انت هتسمى الكائن ده إيه؟

- نسميها، مممم، نسميها يارا

- طيب زى الشاطر كده روح غيِر ليارا.. علشان أنا معرفش أغيرلها إزاى

- أنا؟؟؟

- واء واء واء

- سكتها بقى أنا صدعتتتتتتتتتت

*************

- ملك، ملك، اصحى يا حبيبتى يارا جعانة وبتعيط

- هه، وإيه الجديد يعنى!! ما هى ماوراهاش حاجة غير إنها تعيط وتاكل وتنام

- ما هى صغيرة يا حبيبتى ودى طبيعة أى طفل

- طيب، طيب مش عايزة مواعظ.. حطاها فى عربيتها وقعدها فى المطبخ شوية يمكن تزهق وتنام

- حاضر

************

- يارا، انتِ كبرتِ دلوقتى بقى عندك ست شهور بحالهم.. أنا نازلة عندى مشوار وبابا زمانه جاي.. إوعى تعملى شقاوة يا بنوتة.. ماشى؟

- ...........

- ماشى يا يارا، بابا مش هيتأخر كلها نص ساعة ويوصل.. العبى فى لعبك ومتتحركيش من مكانك

***********

- يارا حبيبتى بابا معاكى متعيطيش.. ماما زمانها جاية، جاية بعد شوية.........

- هالو عليكوا

- مالك شكلك متضايقة؟

- مفيش أنا كويسة

- ده انتِ المفروض تكونِ مبسوطة بقالك تلات ساعات بره.. وسايبة البيت يضرب يقلب.. فى أكتر من كده انبساط!!

- إهىء إهىء إهىء

- فى إيه يا حبيبتى؟ مالك؟

- ماما وبابا وحشونى قوى وأصحابى كمان.. نفسى ارجع مصر بقى.. كل حاجة فيها وحشتنى.. الناس بتحسدنى على العيشة اللى أنا عايشاها.. محدش عارف قد إيه الغربة دى حاجة صعبة قوى قوى.. وماحدش يحس بمُرها غير اللى عاش فيها وجربها

- ياااااه يا ملك.. ده انتِ شايلة جبل جواكِ.. ليه مش بتيجى تتكلمى معايا؟ أنا شايفك طول اليوم قاعدة مع أصحابك على النت.. كنت فاكر انك مبسوطة فسايبك براحتك

- ما أنا بقالى سنة على الحال ده.. حياتى كلها على الإنترنت بشوف عليه كل اللى بحبهم.. هى دى الوسيلة الوحيدة اللى أوصل لهم بيها.... بس عارف أنا خايفة من إيه؟

- من إيه يا حبيبتى؟

- خايفة اصحى فى يوم على خبر إن حد من الناس اللى بعزهم فى مصر مات

- أنا مش هقدر أطمنك على بكره.. لأن بكره محدش يعرفه غير اللى خلقنا.. ولكن أنا بحاول أسعدك على قد ما أقدر.. علشان مقدر تضحيتك إنك سيبتى كل اللى بتحبيهم وجيتى تعيشى معايا فى بلد ماتعرفيش فيها حد غيرى

- يلا هو كاس وداير على كل اللى بيتغربوا.. وهو ده التمن اللى لازم هندفعه وهنفضل ندفعه على طول.. وعلى سيرة النت أنا هدخل اشوف إيميلاتى

- مش هتأكلى يارا الأول؟

- آه هاتها....... ياااااادى الشعاع ده.. طيب أأكل يارا الأول.. استنـــــــــــــــى

رحاب المليــــــــــحي

8 comments:

Anonymous said...

في الصميم ياحوبا بس دلوقتي صار كل حاجه على النت
ريم فايز

Anonymous said...

ده شعورك بالغربة والضيق من كل شىء حواليكى

ماما

Anonymous said...

nice one
Ahmed Hamdy

Anonymous said...

حلوه انا عجبانى الفكره اوى يا رحاب
نسمة عبد الفتاح

Anonymous said...

معناها واضح

يا ترى يارا ترمز لمين؟ :)

حلوة يا حوبا فكرتها جديدة

هاجر

Anonymous said...

واضح انها مش هتفوق من الغيبوبه دي ابدا ...احنا عايشين فيها اهو بقالنا 5 سنين ويا عالم ايه الي هيحصلنا تاني
دينا

Anonymous said...

first one was better, but good one
Ahmed Shehata

Anonymous said...

و الله دى لو حماتى كان زمانى اطلقت
اعوز بالله من غضب الله