Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, January 14, 2009

يوميات أم مثالية

مامى، أنا بحبك
- طيب
- قوليلى وأنا كمان
- وأنا كمان
- مامى، أنا تعبانة
- طيب
- قوليلى سلامتك
- سلامتك
- مامى، أنا خلصت أكلى كله
- طيب
- قوليلى بالهنا والشفا
- بالهنا والشفا
- مامى، أنا بسمع الكلام
- طيب
- قوليلى انتى شاطرة
- انتى شاطرة
- مامى، ......
- خلاص بقى خلصنا
*************************
- مامى، جومى تعبانة أوى
- بُكرة تخف
- طيب مش هتوديها للدكتور؟
- لأ، مش مستاهله.. ده دور برد عادى
- مامى، كنتى فين؟
- عند الدكتور
- ليه مش قلتى مش مستاهلة
- ما انا مش عارفة أنام من كتر عياط جومى وكُحتها.. فقلت أوديها للدكتور يكتبلها على حاجة تنيمنى
- مامى، وهو احنا هنخرج وجومى تعبانة كدة؟
- اه، عندك مانع!! خلاص زهقت من قعدت البيت.. وهى مش عايزة تخف
- مامى، إلا هو ايه اللى نكس جومى زيادة؟؟ مش برضه لما خرجنا لحد بليل فى البرد؟؟
- يمكن؟؟؟ مش واخدة بالى.. ما هى كدة كدة عيانة.. وان شاءالله دور برد ويعدى
***********************
- مامى، عايزة أكتب
- ما تكتبى هو انا مسكاكى!!
- مامى، ما انتى لازم تعلمينى أكتب ازاى علشان انا لسه صُغنانة
- هو يعنى اللى اتعلموا اخدوا ايه!!
- مامى، اكتب (واحد)
- ما انتى بقالك سنة مش بتكتبى غير (واحد)
- مامى، طب اكتب ايه؟
- اكتبى اللى انتى عايزاه.. انا معنديش مرارة
- مامى، كتبت (توو)
- دى اسمها شخبطة..
- مامى، طب اكتب إيه؟
- اسألى جدتك.. وسبينى آكل
********************
- مامى، عااااااااااااااااااااااااا
- فى إيه؟؟ فاتحة الجاعورة ليه؟
- مامى، جومى اخدت لعبتى
- وإيه يعنى؟؟ ما انتى كمان مش بتهنيها على لعبها
- مامى، مليش دعوة أنا عايزة لعبتى.. هى هتكسرها
- خلاص خدى لعبتك.. وانا هجيبلها لعبة جديدة وانتى لأ
- مامى، عااااااااااااااااااااااااااا
- فى إيه تانى؟
- مامى، تجبيلى أنا كمان لعبة جديدة.. وانا هسيبلها لعبتى
- إن شاءالله
- مامى، خلاص هتجبيلى أنا وجومى لعب جديدة؟
- العبوا مع بعض يا حبيبتى.. واطلعوا من دماغى
********************
- مامى، متضربنيش
- لأ هضربك وأكسرك كمان.. علشان تبطلى قلة أدب
- مامى، خلاص هبطل، متضربنييش
- هتقولى ايه؟
- مامى، سورى
- ولما اقولك حاجة تقولى ايه؟
- مامى، حاضر
- طيب يلا روحى لمى لعبك وحطيها فى مكانها
- مامى، نوووووووووو
- طيب انا هوريكى بقى تقولى (نو) إزاى
- مامى، متضربنيش.. هلم لعبى
- يلا بسرعة.. وكملى أكلك
- مامى، نوووووووووووو
*******************
- مامى، جومى بتضربنى
- ما إنتى اللى بتعلميها الغلط وترجعى تشتكى
- مامى، قوليلها كده غلط
- كده غلط يا جومى.. متضربيش أختك
- مامى، جومى ضربتنى تانى
- خلاص هعملك ايه يعنى!!
- قوليلها متضربنيش يا إما هضربها
- على الله تمدى ايدك عليها أنا اللى هضربك
- مامى، جومى مش عايزانى اقعد جانبها
- ما عندك المكان واسع.. اقعدى فى أى حتة
- مامى، لأ انا عايزة اقعد جانبها
- جومى قعدى أختك جانبك.. دى أختك حبيبتك
- مامى، جومى مش عايزانى العب معاها
- لعبيها معاكى يا جومى.. دى أختك حبيبتك
- مامى، جومى ...........
- بــــــس خــــــــلاص... مش عايزة اعرف.. ده انتوا عيال مُملة
**********************
- مامى، عايزة آروح معاكى
- لأ
- مامى، خُدينى معاكى
- هاتقعدى ساكتة وتسمعى الكلام؟
- مامى، اه
- لما نشوف
- مامى، أنا زهقت عايزة ارواح
- انا مش قلت لك تقعدى ساكتة وتسمعى الكلام
- مامى، عايزة ارواح.. خلاص مش عايزة أجى معاكى
- ما إنتى جيتى خلاص.. اقعدى ساكتة بدل ما أهزقك
- مامى، هاتيلى حاجة حلوة
- مش هاجيب حاجة.. واقعدى ساكتة أحسنلك
- مامى، عايزة ماية
- لما نرواح
- مامى، عايزة ادخل الحمام
- حاضر
- مامى، أنا جعانة عايزة أكل
- تصدقى أنا اللى غلطانة انى أخدتك معاية.. مش هاخدك معاية فى حتة تانى
- مامى، طيب، بس يلا عايزة ارواح
- أوووووووووووف
*********************
- مامى، هو احنا هنا فين؟
- عند واحدة صاحبتى
- مامى، هى جومى راحت فين؟
- نايمة جوة فى أودة صاحبتى
- مامى، أنا عايزة العب باللعب دى
- استأذنى صاحبتى
- مامى، لأ، استأذنيها انتى
- خلاص العبى
- مامى، هو احنا خلاص هنرواح؟
- اه يلا بينا
- مامى، هو انتى مش ناسية حاجة؟
- لأ، ليه؟ معاية الموبيل والمفاتيح، أه جومى صحيح، كويس انك فكرتينى
********************
- مامى، انتى بتعملى ايه؟
- بتفرج على التلفزيون
- مامى، ليه؟
- علشان اريح أعصابى منك شوية
- مامى، انتى رايحة فين؟
- داخلة الحمام
- مامى، ليه؟
- معلش بقى ظروفى جت كدة
- مامى، انتى بتعملى الأكل؟
- اه
- مامى، ليه؟
- علشان نتغدى
- مامى، انتى بتكلمى مين؟
- واحدة صاحبتى
- مامى، بتقوليلها ايه؟
- وانتى مالك يا رخمة
- مامى، هى جومى نامت ليه؟
- نامت زى ما انتى بتنامى
- مامى، أنا هدخل الحمام
- ليه؟ هتعملى إيه؟
*********************


رحاب المليحى :)


21 comments:

Hamlet said...

جامدة قوى يا حوبة
ام مثالية فعلا ....
الموضوع مكتوب حلو
بأسلوب جميل ويشد
يمكن عشان طبيعي
كلمة مامى فى بداية كل جملة اديتنى احساس بالملل خلانى اتعاطف معاكي
أرتيكال جميل
أنا أول واحد علقت خلى بالك
تسلم الأيادى

Anonymous said...

mamy w roushy w joumy will get killed on my hand for this....hehehehehe
bs hlwa."

Nouran

Fanta said...

hehehhee
things to look forward to :D

nice article
7aram 3alaiki elli bete3meleeh fel 3eyal dah :P

Anonymous said...

kan Allah fel 3oon :D

Amira

Anonymous said...

Good article


Dr Adel Megahd

Anonymous said...

Noooo comment :)
I will comment when you publish the second copy with Gommy :)

Ahmed Shehata

Anonymous said...

جامده جدا يا رحوبه بجد، طريقتك في الكتابه حسستني اني قاعده معاكم في البيت ، ربنا يخليهملك ويقويكي عليهم

Anonymous said...

couldn't stop laughing as it is typical U and ur kids. It was very funny and light.

Asmaa

Anonymous said...

مثاليه بجد
هي بنتك كده فعلا ولا انت مزاوداها؟
كويس انك لسه متجننتيش
بس حلوة
المهم ربنا يباركلك فيهم ويهديهم

دينا

Anonymous said...

:)))))))))))))))))))))))))))))))))
Enas

Anonymous said...

rabena y2aweeky ya mama re7ab.......... bas mamy mamy enty katba da leh.........:):):):) lol

Noha Abd El Fatah

Anonymous said...

agmal 7aga enek 3erefty te7'aly el kora2 tata3ataf ma3aky. Ahhhh law ye3rafo.
gogo

انا من أكون ؟! said...

مافيش أحلي من شقاوة الأطفال .. ربنا يخليهملك
تحياتي :)

Anonymous said...

جميلة جدا
محمد البرماوى

Anonymous said...

حلوةاليوميات دى.. فكرتها جميلة
أيمن خطاب

Anonymous said...

جميله جدا يا رحاب ، بس نفسى اعرف مامى دى ، ما جالهاش انهيار عصبى لحد دلوقتى ازاى !!!! مع خالص شكرى وتقديرى
أحمد الشيخ

Anonymous said...

Basma Bahaa
بجد يا رحاب العسولات دول بناااتك يا خلااااصى ربنا يخليهملك!!:)))

Anonymous said...

حد يطول يبقى معاه قمرتين كده فى البيت يعملوله افلام ومسلسلات وبرامج
سارة

Anonymous said...

Basma Eloufy
ههههههههههههههههههههه ربنا يكون ف عونها ده وجع دماغ مش هتستحمله غير ام بتحب بنتها

Anonymous said...

فعلا ام مثالية
الله يكون فى العون
عندى نفس العينة
اربع عينات
ومن اجيال مختلفة... See More
.............فين طريق الباب او البحر المهم الواحد يهج
أميمة

Anonymous said...

Marwa Marouf
هههههههههههه جامدة

جداااااااااااااااااا والله