عيلة فيرجن 2011

- حبيبى

- ها؟

- ما تيجى نعيش خمسة رومانسية

- رومانسية؟ معناها إيه الكلمة دى؟؟ دى بطلت من زمان

- بطلت؟ بص انا هافهمك.. انا هقولك شايف القمر يا روحى.. تقولى انتى قمرى ودنيتى يا روح روحى يا قلبى

- ماشى اتفقنا.. ياللا قولى

- بص يا حبيبى القمر منور ف السما ازاى.. شايفه؟؟

- ...........

- حبيبى؟؟؟ انت سامعنى؟؟؟

- هه؟ هو انا المفروض ارد اقول ايه؟ لألأ مش قادر أفكر قبل ما تأكلينى.. طبخ لنا ايه النهاردة يا حبيبتى؟؟

- هو انت ايه؟ فى دود فى كرشك!! اجيبلك فار ياكل الدود ده! انت مش لسه طافح من ساعتين؟؟؟؟

- طا.....؟ من شايف القمر لطافح؟؟؟ ايه معندكيش وسط؟؟؟

- لأ عندى رز وكوسة

*************************

- انت يا عم انت.. اصحى هتتأخر على الشغل

- هاااااااوم، فى حد ف الدنيا يصحى حد كدة؟ مفيش اصحى يا حبيبى.. اصحى يا حياتى

- يوووووه، مه انت لو تبطل فرجة على افلام ابيض واسود كتير هتبقى كويس.. صدقنى والله.. جرب انت بس

- ولا لو عملت ايه اكنى بالظبط بنفخ فى إربة مقطوعة.. خمسة بس واقوم.. هش بقى

- طب بص هقولك ع خبر يفوقك على طووووووول

- ها؟ اشجينى

- بنتك بوظت لك الأى فون.. نياهاهاهاها

- نعمممممممممممممم ياختى؟

- مش قلت لك هافوقك بسرعة.. هو وقع منها ف الكريم شانتيه.. ف البنت قالت تلحق نفسها راحت غسلته فــــ ...........

- اييييييييييييييييييييييييييييييييييييه؟ غسلته؟

- اه مهى كانت عايزة تفرحك بقى وتخليهولك فُلة.. بس باين عليه كدة باظ.. شكله ماحبش الكريم شانتيه

- اطلعى بررررررررررررررررررررررررررررررررررررررة

*******************************

- انتى يا بنت

- نعم مامى؟

- روحى ادخلى الحمام

- ليه مامى؟ هو انا هاعمل على روحى؟

- وانا ايش عرفنى يعنى.. يخرب بيت الاستفزاز

- طيب استنى لما اخلص أكل

- طيب كلى بإيدك اليمين

- حاضر

- يا بنتى اليمين مش الشمال

- هى دى اليمين؟

- اه كلى بيها بقى

- ماشى

- برضه بتاكلى بالشماااااااااااااااال

*********************

- مامى، مامى.. تعالى بصى بابى جابلك ايه؟

- ياما جاب الغراب لأمه.. جاب إيه يا حبيبتى؟

- جابلك ورد.. على فكرة يا مامى كان فيه ورد أغلى من كدة.. بس بابى قرر يسترخص

- يسترخص؟

- ايوة يا مامى.. بابى بيقول انك مش بتاعة ورد

- لا والله؟ امممم، وقالك ايه بقى تانى؟

- قالى يا مامى يا حبيبتى انه لو اداكى عشرة جنيه فى ايدك هتفرحى بيهم اكتر من شوية ورد يتحطوا ديكور

- يا حبيبتتتتتتى، طيب روحى بقى ناديلى على أبوكى حالاااااااااااااااا

***********************

- الو، ايه يا بنى فينك؟

- ......

- والله كلمتك كتير

- ........

- يابنى بص على موبيلك.. اتصلت مرتين الصبح ومرة كمان امبارح

- (تفتح الزوجة الخط من الناحية التانية): كداب على فكرة ماتصلش بيك خالص

- يا بنتى والله كلمته.. تصدقى انتى فتنة فى البيت

- مه انا بتدرب اهو عشان بعد كدة أوسع نشاطى

- الو، الو، شفتى الواد قفل وسابنا نكلم بعض

***************************

- عايزة أكل حاجة حلوة

- مه انا عندك أهو فى أحلى من كدة حلاوة؟؟

- هأ، ودى أصرفها من أنهى سوق سودا دى!! بقولك حاجة حلوة.. ياللا انزل هات لى تورتة

- هو انتى مش عايزة تخسى.. مش كويسة التورتة على صحتك

- لأ النهاردة يوم الفري

- اكيد المحل قفل

- لأ لسه هيقفل كمان ساعة.. إخلص بقى

- مفيش بنزين فى العربية

- يوووووووووه، بص التورتة 12 قطعة.. انا عشان نفسى ماتموعش هاكل 10 واسيبلك 2.. قشطة؟

- !!!!!! قشطة؟ ايه قاعدة مع صحابك على القهوة!!!!

- طيب ياللا متتأخرش بقى.. مستنية التورتة

*********************

- مامى، هو انا شعرى مبلول ليه؟

- عشان بتستحمى..

- مامى، انا خلصت الشامبو فى المية

- ليييييييييييييييييييييييه؟

- كنت عايزة اعمل بابلز

- مامى، انتى بتعمليلى شعرى ليه؟

- عشان يبقى شكلك حلو

- مادام انتى اللى بتعمليه تبقى انتى كرافير، صح مامى؟

- كرافير؟؟؟ الصبر من عندك يارب

- مامى، هو ليه كل يوم كل يوم بتجيبى أختى من المدرسة

- يعنى أسيبها وأسيبك هناك وارتاح من قرفكم انتم الجوز

****************************

- إيه رأيك نجيب بوتجاز غاز بدل الكهربا؟

- موافقة جدا، عشان كرهت الكهربا.. اساسا ازاى يبقى اسمه بوتجاز وشغال بالكهربا؟ وبعدين مش تتأكد الأول ان الماسورة اللى جوه دى غاز

- يعنى هتتطلع ايه مثلا!!! اكيد غاز طبعا

(بعد اسبوع)

- اخيرا جيبنا البوتجاز.. مبروك عليكى

- ما تدخل تشغله الأول.. لما أشوفه شغال بعينى الاول ابقى أفرح

(بعد ما دخل)

- مش كنتى تفرحيلك شوية

- ليه فى ايه؟

- احمم، اصلها طلعت ماسورة مية

******************************

- بابى جه... بابى جه.. هيييييييييييه

- ازيكوا يا حبايبى

- بابى، بابى

- نعم يا حبيبتى؟

- عندى واوا

- من ايه؟

- وقعت فى الحضانة واتعورت

- طيب ممكن تدينى فرصة أغير هدومى

- بابى، بابى

- ها انتى كمان خير؟

- بص كدة

- خيييير؟

- عضيت لسانى.. بيوجع

- سلامتك، هو انتوا لازم كدة تستنونى بالأخبار الهايلة دى على الباب.. لما ادخل اشوف بقى كبيرتكم كمان ايه اللى واجعها

- اى يانى انا اه

- ايييييوة، ادينى، خير يا حبيبتى؟

- ضهرى واجعنى قوى يا حبيبى

- باين عليا دخلت المستشفى بالغلط وللا ايه!!!!

رحاب المليـــــــحي

يوميات زوجة على المعاش

*يجلس الزوج فى استجمام يشرب قهوته، ويقرأ الجريدة.. تشعر الزوجة بملل بعد أن اصبحت ع المعاش.. ولا يوجد لديها ما تفعله غير (المناكفة) فى زوجها.. ف تدخل عليه وقد قررت تعكر عليه صفاء يومه..

- مفيش فلوس فى البيت.. هات فلوس

- نعم؟ هو انا مش كنت لسه مديكى مصروف البيت من اسبوع فات؟

- الدنيا بتغلى.. الأسعار بقيت نار.. اعمل ايه انا طيب؟

* يكشر الزوج عن انيابه.. يترك قهوته ويستكمل قراءة بقرف.. ولكن لم تكتفى الزوجة بتعكير مزاجه فحسب

- على فكرة انا مش لاقية مفاتيح البيت

- يعنى ايه مش لاقيها؟ ما تدورى عليها كويس

- دورت فى كل حتة.. حتى الزبالة دورت فيها.. يمكن اكون نسيتها فى باب الشقة؟؟ ويكون جه واحد اخدهم.. ويطلع علينا بليل يموتنا ويسرقنا!!!!!!

- يعنى انا اعمل ايه دلوقتى؟

- لازم تجيب نجار يغير كالون الباب.. عايزنا نموت يعنى وللا نموت!!!

- اوووووووووف

* يأتى الزوج بالنجار والكالون ويدفع من جيبه 450 جنيها لإستهتار زوجته

* تدخل بعدها الزوجة المطبخ لتجد مفاتيحها امام عيناها

******************************

• قررت الزوجة الخروج صباحا.. بحثت عن مفاتيح السيارة مرارا وتكرارا فلم تجدها.. حاولت مجددا قبل أن تضع نفسها أمام المدفع وتضطر للإتصال بزوجها فى عمله.. ولكن باءت كل محولاتها بالفشل

- الو، ازيك يا حبيبى.. انا قلت اتصل اطمن عليك.. انت كويس؟

- هاااا، خير؟؟؟ مش بطمن للمقدمات دى

- هو انت اخدت مفاتيح العربية وانت نازل؟

- اوعى تقولى انك مش لاقيهم؟

- ها؟؟ لأ خالص.. انا قلت قبل ما اتعب نفسى وادور أسألك الأول

- بيقولوا ان الموز بيقوى الذاكرة وانتى بتاكلى اتنين كيلو يوميا..

- احم، انت هاتعد عليا وللا ايه؟؟ الله واكبر

• بعدها لقيت الزوجة المفاتيح قدامها فى الشنطة.. لكن لما جت تدور العربية لقيت البطارية نايمة.. وكانت فرصتها

- حبيبى هو انت نسيت نور العربية مفتوح؟

- انا؟؟؟ لأ طبعا استحالة.. انا انسى؟ انتى بتهرجى شكلك

- امممم، امال انا ليه لقيت البطارية نايمة؟

- نايمة؟ اممممم، يبقى يمكن اكون نسيت المرة دى.. عادى يعنى ما انا بنى ادم ممكن انسى

- مش انت برضه بتاكل موز أكتر منى؟ إيه مش بيأثر ليه مع الذاكرة يا حبيبى!!!!!

***********************************

• على الغدا الزوجة حزينة والزوج منهمك فى الأكل

- أنا جالى اكتئاب من قعدة البيت

- مطلوب منى إيه يعنى؟

- عايزة العب يوجا

- الكفتة طعمها حلو

- بس لقيت ساعة اليوجا ب80 ج

- لأ كتير.. هى الطحينة خفيفة ليه؟

- روحت بقى مركز تانى بيعمل حاجات كتير منها اليوجا.. وكله ب 350ج

- طيب كويس.. عايز اشرب

- لأ مش كويس، اصله بعد الضهر وانا مش بحب اخرج بليل

- خلاص العبى ف البيت.. فين الفاكهة؟

- لأ بكسل.. بس انا روحت بقى النادى لقيت سعرهم ممتاز

- جميل قوى

- لأ مش جميل.. انا مكسوفة ابقى كبيرة كدة وسط شباب

- اصبغى شعرك وانتى تصغرى

- هتفرق يعنى؟ انا محجبة

- انا داخل انام تصبحى على خير

رحاب المليـــــحي

ليه؟ وعشان ايه؟

- هابى نيو يير يا ساندرا.. كل سنة وانتى طيبة

- وانتى طيبة يا مى.. انا بحبك قوى على فكرة.. انتى أجدع صاحبة ليا

- وانا كمان بحبك.. بس ايه اللى فكرك يعنى دلوقتى؟؟ مش واخدة عليكى ذوق كدة!

- يا بت، هو انتى على طول كدة لسانك متبرى منك.. انا مبسوطة عشان انتى على طول فاكرانى فى أعيادى

- يعنى انتى يا ساندرا اللى بتنسينى فى عيدى؟!!! ده انتى حتى فى رمضان.. مش بترضى تاكلى قدامى وانا صايمة

- طبعا، لازم أخد بالى من حاجة زى كدة.. حرام، ده انتى بتكونى جعانه، واقعة.. أجى أنا بقى أكمل عليكى.. ده انا حتى ابقى مفترية

- هههههه، لأ حونينة.. هتروحى فين النهاردة؟

- هروح الكنيسة مع بابا وماما بليل

- ياللا يا عم هاتزوغى اهو من المذاكرة

- ااااه، فرصة بلاش حقد بقى.. انتى هاتعملى ايه؟

- ولا حاجة، هاقعد فى البيت اذاكر شوية.. وبعدين اتفرج على الحفلة اللى هايجبوها فى التلفزيون

- امممم، طيب ماتنسيش بقى يا مى عيد ميلادى كمان يومين

- انسى؟ انتى بتهزرى شكلك!! هو انا يا بنتى بفتكر تاريخ عيد ميلاد حد غيرك انتى

- وجبتيلى إيه بقى يا ترى يا هل ترى السنة دى؟

- ايه الناس دى؟ هو انا لازم كل سنة اجيبلك هدية!! يا بنتى انا أكبر هدية حصلت لك فى حياتك

- ايوة طبعا يا مى يا حياتشى.. بس زيادة الخير خيرين

- هههههه، ماشى يا ساندرا هانم.. جيبتلك أحلى خاتم دهب.. يارب بس يعجبك

- دهب؟؟؟؟ بجد؟؟ وااااااااااو.. بس جيبتى فلوسه منين؟ ده اكيد غالى

- كنت بحوش مصروفى لحد ما تقلت جيبى كدة وروحت اشتريته ع طول.. انتى بجد يا ساندرا متعرفيش انتى إيه بالنسبة لى.. انتى أقرب صاحبة ليا.. اقرب ليا من أخواتى كمان..

- اقول انا ايه بس بعد الكلام الحلو ده!! بجد خلتينى أدمع.. عجبك كدة؟

*(أخدوا بعض بالحضن.. وكل واحد روح على بيته)

*******************

بووووووووووووووووووووووووووووووووم

- إهىء، إهىء، إهىء

- ساندرااااااااا، الحمدلله إنك بخير.. أنا مش عارفة أقولك إيه.. أنا كنت زى المجنونة لما عرفت بالإنفجار اللى حصل قدام الكنيسة عندكم.. أنا .....

- ابعدى عنى

- ....!!!! أنا عذراكى ومقدرة الحالة اللى إنتى فيها.. بس .....

- بقولك اااااااابعدى عنى.. انتوا السبب، انتوا السبب

- !!!!!! احنا مين يا ساندرا؟؟؟

- انتم المسلمين.. ايه مش عارفة ولا هاتستعبطى؟

- مسلمين؟ هى بقت كدة؟ من امتى يا ساندرا بنتكلم فى مسلمين ومسيحين؟ من امتى بنفكر ديانتك إيه ودينتى إيه؟

- بابا قال لى إنكوا انتوا اللى عملتوا فينا كدة.. إنتو اللى عايزين تكسروا فرحتنا يوم عيدنا.. إنتوا اللى قاصدين تخلصوا مننا.. عشان اعداد المسلمين تزيد وتزيد، واحنا نموت ونموت.. وانكم لحد يوم الدين هاتفضلوا تكرهونا وتفضلوا نفسكم علينا

- ياااااااااااااااااااه، وانتى صدقتيه بسهولة كدة؟؟ طيب ماقلتيلوش ليه إن أنا وانتى أعز أصحاب وعمرنا ما حسينا بفرق ما بينا.. ماقلتيلوش ليه اننا بناكل من طبق واحد؟؟ ماقلتيلوش ليه إن وقت الأذان انتى اللى بتستعجلينى عشان أقوم أصلى؟؟ مافكرتيهوش ليه إن دمى أنا المسلمة بيجرى فى عروقك انتى المسيحية، يوم ما تعبتى قوى وكنتى محتاجة دم.. كنت انا اول واحدة نايمة جانبك ف السرير التانى بتبرعلك بدمى.. ليه وقتها ماعترضش؟ ليه ماقلش ده دم مسلم فاسد مايدخلش جسم بنتى؟؟ ليه وقتها مامتك عيطت وأخدتنى فى حضنها.. وقالت لى لو كان ليها أخت ماكنتش هاتعمل أكتر من اللى انتى عملتيه؟

- صح، انتى عندك حق يا مى.. احنا طول عمرنا أصحاب.. وعُمر ما حاجة فرقت ما بينا.. ليه الكل بيحاول يفرق ما بينا.. ليه بيحاولوا يوقعوا ما بينا؟؟

- يا ساندرا المشكلة مش مشكلة ساندرا ومى.. دى مشكلة بلد بحالها.. بلد بتولع فى بعض.. بياخدوا بالظاهر ويسيبوا الإيد الخفية المتحكمة فى كل الخيوط.. واللى بتتفرج من مكان خفى وتضحك وتتريق على الناس اللى مش فى وعيها.. واللى عاملين يولعوا فى بعض

- فعلا يا مى الناس فى عز غضبها مش بتفكر بتستسلم لغضبها والامها.. وتزود الجراح وتحرق وتولع.. يعنى هو ده اللى هايهديهم؟؟ ولا بكدة يعنى اخدوا تارهم؟ بالعكس دول كدة هيولعهوا اكتر.. بلا وعى وبلا فهم.. واللى عملوا كدة بس هم اللى مبسطوين باللى بيحصل.. هما اللى عايزين يشوفوا البلد ولعة وبتولع وهاتولع اكتر واكتر

- والموضوع بالمنظر ده عمره ما هيخلص.. طول ما الغضب عمينا.. طول ما احنا تفكيرنا سطحي وغضبنا هو اللى بيوجهنا

- عندك حق يا مى ده إرهاب مالوش بقى علاقة بمسلم ومسيحي.. ده لا له ملة ولا دين.. ده شيطان ماشى على رجلين

- وأكيد كمان الحكومة هاتلبس التهمة لشوية ناس غلابة عشان تهدى الرأى العام.. ويهدى الموضوع ويتنسى زى كل مرة.. حسبى الله ونعمة الوكيل على كل ظالم ومفترى.. وربنا يستر من اللى جى.. وربنا يستر عليكى يا مصر يا أم الدنيا..

رحاب المليـــــــحي



هابى نيو يير

مش هقعد افكر وارصد واحصد واقول يا ترى ايه الحلو اللى حصل لى السنة دى!! ويا ترى يا هل ترى ايه الوحش اللى حصل لى!! لإن بما إننا بنفتكر الوحش اكتر من الحلو.. ف اللى هيعلق فى دماغنا اكيد هو الوحش.. وهنتناسى الحلو حتى لو كان اكتر من الوحش.. مش عشان احنا نكدين بعد الشر علينا من فيروس النكد اللى طافح على الناس كلها ده.. لكن عشان بنخاف نفرح.. لو فرحنا النهاردة بيكون زى المُسكن المؤقت.. اهو يوم تغيير كدة ويروح لحاله.. لكن لازم ولابد تانى يوم نرجع بقى لقواعدنا.. ونغنى بكرة النكد بكرة..

بس قبل ما السنة تنتهى أحب أقول

هـ: هابى نيو يير يا شباب يا بناتيت يا حلوين

ا: اندم وازعل على حاجات بتروح غصبا عنى.. بس برضه بفهم واستوعب حاجات اكتر

ب: بحبكم كلكم.. ويارب يجعلها سنة سعيدة على الجميع.. على الأطفال قبل الكُبار.. على الشيوخ قبل الشباب

ى: ياما هنشوف وياما هنتعلم من كل لحظة وكل ثانية بتمر علينا

ن: نيو يير اتمنى إنها تكون أحسن من اللى قبلها.. أو على الأقل تبقى حلوها أكتر من مُرها

ي: يخلص يوم 31 ديسمبر ننوى ونوعد اننا هنبدأ من جديد.. ومش هانشيل حديد بس هنبقى جديد فى جديد

و: وكل آخر سنة نقعد نفكر يا ترى انجزنا ايه السنة دى؟ ويا ترى اتعلمنا منها ايه؟

ي: يعدى يوم شهر سنة.. ونرجع نبدأ من جديد ونوعد إن اللى فات مات والسنة دى بقى هتبقى غير كل سنة

ي: يارب فى 2011 كل واحد نفسه فى حاجة خير له، تتحقق له.. ومانزعلش ابدا على اللى فات من عمرنا من غير ما نحقق فيه حاجة

ر: رايحين، جايين، طالعين، نازلين.. هى دى سُنة الحياة.. بس التغيير لازم يجي من جوانا ونبقى مؤمنين بيه، وقتها هنعمل كتير

وهابى نيو يير

:)

رحاب المليـــــحي

خد فلوسى وعيشنى

لندن بتقف ع قدم وساق وقت الكريسمس والنيو يير.. بيستعدوا لليوم ده تقريبا من اخر شهر اكتوبر.. بيعرفوا يخلوك تشترى ازاى.. بطريقة العرض الوهمية اللى بيعملوها.. مش بس ف اللبس.. لأ كمان ف الفسح..

ف مثلا فى الهايد بارك بتتقلب رأسا ع عقب من جنينة لمدينة ملاهى.. فيها من كل شكل ولون.. مش بس العاب للكبار والاطفال.. لأ كمان سيرك عالمى.. وتزحلق ع الجليد.. ده غير الأكلات وحاجات تانية كتير.. ده كفاية التصميمات والأضواء.. بتكون عايز تتصور فى كل مكان فيها من روعة التصميمات.. بجد بيخلوك تدفع وانت مبسوط ومستمتع كمان بوقتك.. عندهم دماغ تجارية مبتكرة ارفع لهم القبعة عليها..

الكريسمس عندهم إن الناس تهادى بعض.. يعنى لك أن تتخيل لو البنى ادم الواحد يعرف مثلا عشرين شخص مابين افراد عائلة واصحاب.. ملزوم إنه يشترى عشرين هدية عشان المفروض إنه هيجيلوه زيهم..

حتى فى مجال العمل.. بيكونوا حاطين أسماء العاملين فى ورق.. وكل شخص يختار ورقة.. وهو وحظه، يطلع له شخص لازم يجبله هديه

طبعا الحالة الإقتصادية بتنتعش ف الفترة دى انتعاش فظيع مريع.. أى مكان فيه محلات ماتشوفش الأرض من كتر البنى ادمين اللى ماشين عليها.. وكل ما الكريسمس يقرب كل ما الزحمة تزيد فى المحلات..

يوم الكريسمس 25ديسمبر، مش بيكون فيه مواصلات نهائى.. البلد كلها أجازة.. يعنى لو مفيش عربية يبقى ماتتحركش من مكانك.. وسيلة المواصلات الوحيدة اللى بتكون متوفرة هى التاكسيات.. وبرغم ان اسعارها نار من غير حاجة لكن عشان ده بقى السيزون بتاعهم.. بتكون اسعارهم الضعف وده أمر مُسلم بيه..

لكن بقى لو عايز تسافر طيران فده جنان رسمى.. يعنى لو افترضنا ان سعر التذكرة ف العادى ب300 استرلينى ف الوقت ده بتكون ب 1000 وانت طالع.. الف ايه؟ الف استرلينى

بعد يوم 25.. بترجع البلد تشتغل نوعا ما.. وبيبدأ بقى السيل.. فيه محل بيفتح اول يوم سيل الساعة 5 الفجر.. الناس بتكون واقفة طوابير من قبلها مستنية بس باب المحل يفتح ومتعرفش تحط رجلك جواه

وفيه سُياح بتيجى الفترة دى بالذات.. عشان معروف ان سيل اخر السنة فى لندن هو أحسن سيل فى السنة كلها واحسن تخفيضات

المحلات بتكون هتنفجر من كتر الناس.. ده عشان تقف فى طابور الدفع.. فى محلات معينة بتقف بالميت ساعة ونص بس عشان تدفع

تلاقى الناس تقعد تلم تلم اى حاجة قدامها بجنان كدة.. وبعدين تقعد تربع وتريح على الأرض.. وتبدأ تفرز بقى فى الغلة اللى لموها قبل ما يجي وقت الحساب

أما وقت النيو يير والبارات والحركات دى.. برضه تذكرة الدخول بتكون أضعاف السعر الأساسى ف الايام العادية.. وده لازم تكون حاجز قبلها بشهر عشان تلاقى مكان..

ناس بتحب تعيش اللحظة بطولها وعرضها وارتفاعها كمان..

بعد المناسبات دى كلها ما تخلص.. البلد بتهدى وتبقى هس هس.. الناس من شغلها للبيت ومن البيت للشغل.. خلاص بقى كله خلص فلوسه على الهدايا والشوبينج والاحتفال براس السنة.. يادوب يلحقوا يعملوا غيرهم ويحوشوا شوية لحد السنة اللى بعدها

هى الحياة ايه غير شوية شوبينج وخروجات وحاجات فوق بعضها

وكل سنة جديدة يارب تبقى عليكم سعيدة

رحاب المليحي