سألتنى : وانت ازيك كدة؟
قلت لها: كويس
قالت لى: طب وكدة؟
قلت لها: هنهزر بقى!
قالت لى: هو الواحد ميعرفش يهزهز مع جوزو شويتين
قلت لها: لأ عندى كرشة نفس ومش ناقصك ياختى
قالت لى: يعنى اشترى واحد بالكهربا اهزهز معاه مثلا؟
قلت لها: لألألألأ، وع ايه المصاريف؟ هزرى ياختى هزرى
قالت لى: طب هات اللى عليك
قلت لها: اللى هو؟ الحديدة؟ اصل ده اللى فاضل معاية
قالت لى: هنستعبط بقى!! اطلع بمصروف البيت
قلت لها: مصروف ايه يا روح ..!!!!! انتى مش لسه مقلبانى امبارح؟
قالت لى بثقة: امبارح مش كان الجمعة؟ يعنى نهاية الاسبوع.. والنهاردة بداية اسبوع جديد، انكر بقى انكر؟
قلت لها: هاشمر وادعى عليكى ساعة فجرية.. ياااااا ظالمة
قالت لى: مااااايُحكمشى، الحق عليا عايزة اعملك ميفاجأة واجيبلك هدية الفلانطين
قلت لها: فلا .... ايه ؟ طينة تنزل ع دماغك يا بعيدة، تمحيلك ملامح وشك اللى كلها جاية حتة واحدة دى.. ويطلع ايه فلانطين ده؟
قالت لى: انت بتشتمنى؟ وانا اللى عايزة انجرك.. يقطعك يا بعيد.. فقرى من يومك
قلت لها: امشى، امشى شوفى الواد اللى بيعيط ده، امشى جاتك ماشيه ف رُكبك
قالت لى: يارب ما توعى تصرف الكام لحلوح اللى معاك يا بخيل يا جلده
جريت وراها وحلفت ما انا سايبها غير وانا مكسر ع دماغها (قُلة) حُبنا.. ويبقى انا اللى هديتها الأول بحمار دمها اللى هينزل يُشر من دماغها واهو تبقى احتفلت برضك
رحاب المليحي
