ملكة انجلترا

تحتفل ملكة انجلترا الأسبوع اللى جاى بمرور 60 عاما ع حكمها

البلد كلها أجازة رسمية من 2 يونيو وحتى 5 يونيو من ضمنهم الويك اند (سبت واحد)

- يوم الجمعة الجاية الأطفال ف المدارس مش هيلبسوا اليونيفورم.. ولكن مطلوب منهم يلبسوا (ابيض واحمر وازرق)

- يوم السبت هتحضر الملكة سباق خيل.. واللى عايز يحضر السباق من عامة الشعب ده مُتاح ولكن بتذاكر للدخول

- يوم الأحد الاحتفال الكبير.. وده هيكون مُنقسم لجزئين

- الأول: الاف القوارب هتكون موجودة ف النهر ويسيروا معا وع رأسهم القارب اللى هتكون فيه الملكة

- التانى: الاحتفال هيكون فيه جنينة كبيرة فى لندن، هيعرضوا فيها ازياء وفن وسينما وموسيقى وتصميمات ومواد غذائية اللى كانت موجودة من 60 سنة.. وده هيكون ع شاشات كبيرة جوه الجنينة

رحاب المليحي

حلقة السمك ف لوندن

لو نفسك هفتك ع أكلة سمك فى لندن بسعر حونين

يبقى اصحى من الفجرية وروح ع أكبر حلقة سمك ف انجلترا

Billingsgate Fish market

هتلاقي فيه كل حاجة ليها علاقة بالأسماك.. الماركت ده بيفتح يوميا من 4 الفجر ولحد 8 ونص الصبح بس

بيفتح الفجر عشان كل محلات الأسماك بتشترى منه كميات كبيرة.. ودايما اسعاره أقل كتير من اسعار السوق العادى

بس لا فيه فصال ولا تقوله نضف لى السمك.. تشترى وتعيش بقى مع نفسك..

كل حاجة قدامك فريش ولسه صاحية بتلعب :)

رحاب المليحي

شوبينج اون لاين

فيه موقعين مشهورين قوى ف بلاد الفرنجة تشترى اون لاين من عليهم

الأول: eBay.com
______

الموقع ده بيبيع من الإبرة للصاروخ.. أى حاجة وكل حاجة تلاقيها عليه
فيه منها الجديد وفى منها المستخدم


طريقة التعامل عليه عبارة عن (بيدينج) أو مزاد

بمعنى انك لو عايز تبيع (لاب توب) مستعمل عليه
بتخلى السعر يبدأ من الصفر.. وتحدد كام يوم هيتعمل فيه المزاد.. وتحدد كمان الساعة اللى هينتهى فيها المزاد

ف تبدأ الناس تدخل تزود ف السعر.. وعادة بيستنوا لاخر لحظة ويزودوا.. بحيث انه مايكنش غالى قوى ف الاخر

يعنى لو متحدد 3 ايام وينتهى المزاد عليه الساعة 6 م
تبدأ بقى الناس تزود السعر من 6 الا ربع لحد 6 بالدقيقة

ويقفل المزاد واخر واحد زود السعر هو اللى مبروك عليه اشتراه

احيانا بقى صاحب اللاب توب يلاقى وقت المزاد قرب يخلص.. والسعر اللى وصل له اللاب مش عاجبه.. يُزق اصحابه انهم يدخلوا يزودوا السعر شوية
بس لو انتهى المزاد ولبسه حد من صحابه يبقى (فلوسه حلال) بقى واشترى حاجته تانى

وقتها بيتعمل زى فيلم كدة، انه اللى وقع عليه المزاد يقول لا خلاص مش عايزه
وصاحب اللاب توب يقول اوك ويبدأ يزايد عليه من جديد

بس لو حصل الموضوع ده كذا مرة من نفس الاشخاص.. بتبان انها لعبة وبيقفلولهم حسابهم ع الموقع شوية.. لا يبيع ولا يشترى كنوع من شد الودان

اما لو المزاد عدى ع خير وسلام.. لازم يبعتلك الفلوس الاول قبل ما تبعت له اللاب،
ولو ماعجبكش اللاب بتتطلب منه فلوسك.. وترجع له حاجته ويا ضار مادخلك شر

لكن لو لعب معاك الدنيئة ومارضاش.. بتبعت بقى للموقع نفسه وهو اللى بيتعامل
*************

التانى: gumtree
________

برضه الموقع ده بيكون عليه كل حاجة.. حتى العربيات وفرص العمل تلاقيهم عارضينها عليه


بس طريقة الشراء بتكون انك تشوف الحاجة وصورتها سواء جديدة او مستخدمة.. والشراء بيكون مش ع النت.. لأ، لازم تروح مكان ما هى موجودة تاخدها

وصاحبها بيكون سايب نمرة تليفونه او ايميله.. تتواصلوا بقى مع بعض.. وتتفقوا ع ميعاد تتقابلوا.. طبعا مع مبدأ اللى سبق اكل النبأ
بمعنى لو واحد راح دقيقة قبلك وعاجبته الحاجة يبقى بخ خلاص مش من نصيبك

اما لو لاقيتها وعجبتك بس حسيت انها غالية تتناقش مع صاحبها انكوا تنزلوا ف سعرها.. لو اتفقتوا انتوا الاتنين يبقى مبروك ع الشارى والبايع

رحاب المليحي

هو فيه حياء عند الغرب؟؟؟

نيجى للأدب والتربية والحياء،

ويا ترى هل هما موجودين عند الغرب وللا لأ!!

اممممممم

- لما تبقى المجلات اللى موجودة ف السوبر ماركت قدام الاطفال غلافها ستات عريانة

- لما يبقى شرب السجاير من سن 16 سنة وشرب الكحل من 18

- لما يبقى اتنين لسه ف ابتدائى طالعين من المدرسة ماشين يبوسوا بعض

- لما يبقى ف حمام خلع الملابس للمركز الرياضى، العادى ان كله بيقلع قدام بعض، وعادى بالنسبة للاطفال ان البنت تقلع قدام الولد وهما وافقين يضحكوا ويتكلموا

- لما يبقى طفل ف الحضانة داخل حمام المدرسة، يدخل عليه طفل تانى يطلب منه انه يقلع

- لما يُحكى أن أصغر طفل ف بريطانيا سنه 13 سنة، صاحبته 15 سنة، حامل منه.. البوليس يحقق فى الوقعه عشان سببين،

اولهم انهم يثبتوا انه والد الجنين عشان ماكنش أول علاقة ف حياة البنت،

وتانيهم انهم لسه اطفال ع الحوارات دى

- نيجى بقى للتربية والأدب... عندهم التهزيق ممنوع، الضرب ممنوع، الزعيق ممنوع، ليه؟ عشان دى قوانين البلد.. ف لازم الكل يكبر ويترعرع ع كدة

اخرهم يوقفوا ولادهم ف (النوتى كورنر) أو يحرموهم من حاجة بيحبوها وشكرا

قانون: ماتربنيش شكرا ****

رحاب المليحي

نظرة الغرب لثورة مصر ايه؟

بعد ثورة يناير كل الناس ف مصر كانت بتسأل وتتسأل يا ترى ايه رأى الغرب فينا دلوقتى؟ يا ترى ايه نظرتهم لينا دلوقتى؟

قبل ما اقول كلامهم بعد الثورة هقول فكرة بعضهم قبل الثورة

- فيه منهم ماكنش يعرف مصر فين ع الخريطة اشاسا.. تقوله بقى
Egypt
تقوله
Cairo

حمار بديل وعلامات استفهام وتعجب تملى وشه

- ومنهم اللى كان متخيل ان مصر دى مش اكتر من بنى ادمين راجعيين، لا يمتوا للثقافة بصلة، كل مصرى منا بيركن الجمل بتاعه تحت بيته..

- اما الحجاب ف متخلينوه كله عبارة عن نقاب.. وان الزى الرسمى للمحجبات هو الاسود، وماينفعش ان مسلمة تلبس الوان تانية..
ودى غلطة الاعلام اللى كانت دايما بتوصلهم الصورة دى عن مصر

زى بالظبط (القناة الاولى) بتاعتنا

ما علينا

- ايام الثورة كانوا قد ايه فخورين بينا بزيادة، الصفحات الاولى لجرايدهم ومجلاتهم واخبارهم ف التلفزيون كانت تحتل اخبار الثورة المصرية.. وقد ايه انه شعب اجبر العالم كله انه يحترموا..

- وان فكرتهم دايما كانت ان المصرى بيمشى ورا اللى مشغله مالوش حق الاعتراض، بعد اللى شافوه وقاروه ده خلاهم يفتحوا بوقهم مهنجيين مش مصدقين

- عرفوا وقتها انهم كانوا غلطانين،وكنت تشوف الفخر بينا ف عينيهم، كنت تشوف قد ايه هما شاغوفين يسألوا ويعرفوا اكتر عن الثورة وشباب الثورة

- يوم التنحى شارع العرب
Edgware Road
كان قايم ع رجل، الكلاكسات عندنا ممنوعة منعا باتا.. لكن يومها سابوا المصريين تعبر بكل الطرق عن فرحتهم.. بس المهم انهم مايعطلوش المرور

- تانى يوم التنحى كانوا معانا بيحتفلوا معانا.. فرحانين بينا كأنهم مصريين.. تشوف الفرحة مالية قلوبهم وعيونهم.. تمشى وسطهم فخور ورافع راسك انك مصرى
وكانوا بيستأذنوا انهم يتصوروا مع كل مصرى

- وحتى الان مازالت اخبارنا تحتل العنوانين الاولى لصفحاتهم.. وبالرغم ان المصريين بيقولوا ان مصر بتتفضح قدام العالم باللى بيحصل فيها

لكن الاجانب مدركين ان احنا مش شعب همج، وان احنا مش بلطجية، وان احنا مش عايزين ولا غاوين نموت ونتصاب، وان كله بسبب الحكومة مش بسبب الشعب

- ولحد دلوقتى بنعمل مظاهرات قدام السفارة المصرية، واحيانا بيكونوا معانا يسندونا مقتنعين باللى بنعملوا وفخورين بيه

** مهما حصل هنفضل نقول ارفع راسك فوق انت مصرى

ومهما كاميرات العالم نقلت صورة الهمج والبلطجة اللى بيحصل، لكن الغرب عارف الحقيقة وعارف ان الشعب عايز الصلاح مش عايز الخراب

الدور والباقى بقى ع اللى جوه البلد، المصريين اللى لسه مش فاهمين
_______________

ومعلومة بقى
الصورة المُصحبة لكلامى انتشرت بعد يوم التنحى ع كل صفحات الانترنت والفيدوهات بشكل غريب

وهى صورة (بنتى) يوم التنحى.. صورتهالها البى بى سى فى لندن :)

حوبا الأروبة

الجنانين ف لندن

أول حاجة تلفت نظرك ف البلد، جنانيها التى لا تعد ولا تحصى.. مفيش منطقة مش بيكون فيها جنينة.. والجنانين بتكون على مستوى وكبيرة

- لندن مفيهاش نوادى.. كل الأنشطة بتكون جوه الجنينة.. وطبعا الدخول لأى من الجنانين بيكون ببلاش.. وكل لعب الاطفال مُتاحة للكل.. لكن الأنشطة بتكون بفلوس

- كمان بعض الجنانين بيكون فيها (بدالات) بيأجروها للناس ف الصيف، ده غير وجود البط والحمام اللى بيكون ماشى جانبك عند منطقة البحيرة

- يعنى مثلا الأنشطة زى ملاعب كرة يد، كرة قدم، كريكيت، تراك للمشى.. الخ

- بالنسبة (للأيروبيكس) ف بيكون فيه مكان مخصص جوه الجنينة فيه كل الالعاب الرياضية.. لكن كمان لو عايز تتدرب مع مدرب مخصوص.. بيتم الاتفاق مع مدرب عن طريق الجنينة وكله بتمنه.. أو تجيب حد من طرفك يدربك

- كمان الأمهات اللى بتكون لسه ولده، بيعملولهم ساعة او اتنين ف اليوم يلعبوا فيها رياضة (ايروبيكس) بإصطحاب الاطفال الرضع معاهم.. لإنقاص وزنهم.. وده برضه بالإتفاق مع الجنينة والمدربة

- المدراس بتاخد طُلبها ف الجنينة اللى جنب المدرسة يلعبوا رياضة، وف اخر السنة بتُقام مسابقات ما بين المدارس وبعضها ف الجنينة

بالنسبة للتلاميذ اللى سنهم صغير، بياخدوهم برضه الجنينة، يتكلموا معاهم عن الطبيعة ويخلوهم يرسموا المناظر الطبيعية اللى شايفنها قدامهم


- فيه جنينة اسمها (الهايد بارك)، يوم الأحد بس من كل اسبوع بتتواجد الناس عشان تتكلم ف أى حاجة بتعجبها او بتكرها، يُسمى المكان بـــ
Speech Corner
يعنى ممكن تتكلم عن الاسلام وتذم ديانة تانية، أو تذم ف الملكة.. الخ
وبيتجمع الناس حولين الشخص اللى عايزين يسمعوله ويتم مناقشات مع بين جميع الأطرف بكل احترام

رحاب المليحي

ازاى تاخد شقة من الحكومة ف لندن؟؟؟؟

بعيدا عن الطرق الشرعية انك تاخد شقة من الحكومة وهما يدفعولك تمنها الشهرى بالكامل او انك تدفع معاهم جزء.. وده بيقدروه حسب اولويتك وحقوقك وحسب مرتبك

فيه بقى طريقة غير شرعية (العرب) اخترعوها وبعدها انتشرت

ان الزوجة تروح تثبت حالة عند الدكتور المعالج لها ان جوزها بيضربها وان نفسيتها تعبانة وده مأثر ع نفسية اطفالها

بعدها تتطلع ع القسم بعد ما تكون اخدت شهادة من الدكتور المعالج بحالتها النفسية المتدمرة..
وللمرة التانية تثبت حالة ف القسم، وتقولهم انها خلاااااص مش عايزة ومش قادرة تعيش مع جوزها

بعد ما يحقق البوليس ف الأمر، ياخدوا عليه تعهد بعدم التعرض لمراته

بعدها حاجة من اتنين:
يإما يطلعوا الزوج من الشقة ويدوها للزوجة، وهو يشوفوله حاجة اصغر
يإما يسبولوه الشقة ويجبولها هى واحدة تانية

بتفرق بقى من حالة للتانية

بس لو حصل واتقفشوا ياللا السلامة :)

لكن اللعبة دى اتعرفت من فترة طويلة عند الحكومة ومابقتش ينفع تتعمل بالساهل

رحاب المليحي

قصر ملكة انجلترا... باكينجهام بالاس

يحتوى القصر ع 775 غرفة

منهم 19 غرفة رئيسية لمقابلة الملوك والرؤساء
و 52 غرفة للعيلة الملكية وغرف للضيوف
و 188 غرفة للعاملين بالقصر

و78 حمام :)
و92 مكتب
وسينما
وحمام سباحة

وكمان فيه مكتب بريد وقسم شرطة

حوالى 400 موظف بيشتغلوا ف القصر

منهم الطباخين، السباكين، عمال النظافة، الخادمين، البساتنين، السائقين، كهربائيين

والأهم من كل دول اتنين بياخدوا بالهم من 300 ساعة حائط، انهم شغالين بالثانية والدقيقة

رحاب المليحي

الرقص الشرقى ف لندن

الرقص الشرقى فى لندن هواية واحتراف قبل ما يكون مصدر لأكل العيش
وبيعامل باحترام وله شعبية كبيرة..

تتراوح أجور الراقصات من 60 إلى 80 جنيه استرلينى فى ال40 دقيقة.. وأجورهم بتكون حسب مدى احترافهم

وفيه مدارس لتعليم الرقص الشرقى فى لندن وبيروحها كل البنات والسيدات من مختلف الأعمار ولحد ستين سنة.. ومن أشهر المدراس الموجودة: مدرسة حسام رمزى (مصرى الجنسية).. كمان فيه مدرسة شفيق إبراهيم (مصرى )

شفيق إبراهيم بيعمل حفلات كبيرة الغرض منها شهرة الراقصات اللى لسه فى بداية طريقهم.. بيكون هو ستار الحفلة والناس بتيجى علشان تشوف رقصهُ سواء بالعصا أو التنورة.. إلخ
وبعده يقدم بقية الراقصات بيكون عددهم حوالى 10 راقصات ومش بيدفع لهم أجر.. يكفى إنه هيكون سبب فى شهرتهم

كمان يُقام ف لندن حفلة الكونجرس، وهو عبارة عن مكان بيختاروا فيه حوالى 1000 راقصة محترفة من جميع أنحاء العالم.. الغرض منه إن الراقصات المشهورات يقمن بتدريب الراقصات المستجدات أو أى هاوية

فمن تريد التدرب تقوم بدفع 200 جنيه استرلينى ثمن التذكرة لدخول الكونجرس..

يُقام التدريب يوم السبت والأحد لمدة 3 ساعات من كل يوم .. وتختار الهاوية أو الراقصة الجديدة من تريد من المحترفات لتقوم بتدريبها.. وده بيكون مفيد للجدد فى إنهم بيشوفوا أنواع كتير من الرقص المختلف من جميع أنحاء البلاد

رحاب المليــــحي