رجعينا صغيرين

- هو

وانا صغير كنت بحب ابص ف مراية الدنيا اللى لسه جاية

اشوفنى كبير مسئول عن البيت زى بابا
بحلق دقنى زى عمى
بسوق عربيتى زى جارنا
بشرب سجاير واخبيها تحت السرير زى اخويا الكبير
قوى زى جدو
اعرف بنات كتير زى اخويا التانى الصايع

افضل احلم واحلم واحلم
امتى الايام هتعدى بقى وابقى كبير كدة زيهم !!
امتى اقدر اعمل كل اللى نفسى فيه من غير كدة كُخ، كدة عيب !!
******

-- هى

وانا صغنانة كنت ابص ف مراية الدنيا اللى لسه جاية
اشوفنى ست البيت زى مامتى
بعمل شعرى عند الكوافير والبس كعب زى اختى العايئة
عندى موبيل مايبطلش رن زى بنت خالتى
واحب واتحب زى جارتى
البس ع الموضة.. واحط ماكيب زى خالتو
اخرج مع صحباتى لوحدنا زى اختى الكبيرة

افضل احلم واحلم واحلم
امتى الايام تعدى وابقى كبيرة وستيل كدة زيهم !!
امتى اقدر اعمل اللى نفسى فيه من غير كدة عيب، مايصحش !!

*****

-- هو وهى
-- هى وهو


كانت احلامنا صغيرة.. بس كنا شايفنها اكبر واعلى نقطة ممكن يوصل لها تفكيرنا

- شربت سجاير
- لبست كعب

ركبت عربية
- صاحبت ولاد

وبعدين؟

كبرت احلامنا وكبرنا معاها

- عايزين نشتغل
- عايزين نتجوز
- عايزين شقة
- عايزين دخلنا يكون بالالاف
- عايزين نسافر نلف العالم
- عايزين حد يحبنا بجد
- عايزين نعيش ف مستوى اعلى من مستوانا
- عايزين يبقى عندنا اطفال
- عايزين نهج من البلد
- عايزين مدير مايتحكمش فينا
- عايزين نعرف ناس ولاد ناس مش ....
.
.
.

وتستمر الأحلام
ونفضل نبص لمراية الحياة
وتكتر طلباتنا
.
.
.

ومفيش حاجة بترضينا ولا بتعجبنا
دايما الممنوع مرغوب
ودايما اللى مش ف ايدينا عايزينوا
.
.
.

نفتكر ايام زمان
ونقول يارتنا فضلنا صغيرين
كانت لعبة جديدة تفرحنا
ونكتة تضحكنا


لا فارق معانا حاجة
ولا شايلين هم لحاجة

ونرجع نبص لمرايتنا
بس المرة دى مراية الذكريات
ونقولها:

ما ترجعينا زى ما كنا

رجعينا نحلم ببكرة لكن من غير ما نعيشوا

رجعينا لقلوبنا الصافية وعقولنا الطاهرة

رجعينا صغيرين

رحاب المليحي

ابنى بقى انجليزى مش مصرى

بحبه قوى، لو طلب عمرى كله مش هستخسره فيه
ما انا اصلى ماليش غيره ف حياتى وكمان ف غربتى
اى حاجة بيطلبها بعملهاله، اى حاجة نفسه فيها بجبهاله
حتى لو معيش فلوس، حتى لو كان عندى اولوليات تانية اهم، تتأجل عشانه

اه، نسيت اعرفكم بيا وبيه

انا سيدة مصرية اتجوزت من واحد مصرى.. وسافرت عيشت معاه بره
يادوب ماكملتش كام سنة وحصلت مشاكل كتير مع جوزى، هو مصرى ومسلم اه لكن ع الورق بس.. كل حياته لا تمط للاسلام بصلة

حاولت اصمد واكمل معاه عشان اربى ابنى الوحيد اللى خلفته منه.. لكن المشاكل كبرت وبقيت اصعب من انى استحمل

انفصلت من حوالى 3 سنين.. ومن وقتها وانا ف مشاكل وقضايا ومحاكم معاه
حاولت ارمى ورا ضهرى واعيش عشان اربى ابنى الوحيد
حاولت ادفن حزنى جوايا عشان خاطر ابنى الصغير مايحسش بأى حاجة.. وكمان عشان مايطلعش فى بيت فيه امراض نفسية

اول كام سنة فى عُمر ابنى، كان زى البلسم، كله براءة
علمته اننا نتعامل كأصحاب مش أم وابنها.. كان يرجع من المدرسة يحكيلى كل حاجة حصلت

وعشان احنا عايشين ف بلد اوروبية، ف كان لازم اتكلم معاه ف كلام مش سنه خالص.. بس عشان اوعيه وافهمه ان مش كل حاجة بيشوفها بتحصل قدام عينيه تبقى صح
كنت بالنسبة له كل حاجة، علمته حاجات كتير جميلة ف سنه الصغير.. منها الصلاة وقراءة القرأن

لكن السنة دى بعد ما كمل 7 سنين.. بدأت احس باختلاف، مابقاش يجي يتكلم معاية زى الاول خالص، مابقاش يحكى لى ع حاجة.. واحيانا كمان بيكون عايز يروح يشتكينى لمُدرسة الفصل بتاعته لو ضايقته

بقى عنيف، يضرب، ويشتم، ويقل ادبه حتى عليا انا امه
بعد ما اخرجه واصرف كل اللى فى جيبى عشان اشوفه مبسوط.. اخر اليوم لما يطلب حاجة تانية واقوله لا خلاص فلوسى خلصت.. يشتمنى ويضربنى قدام الناس
وطبعا قوانين البلد هنا مفيش تعدى على الاطفال، ف محدش بيقوله انت ازاى بتعمل كدة مع امك؟ محدش بيقوله لأ على حاجة

حتى ف المدرسة فيه اطفال كتير كدة شابهه، بيضربوا بعض ويشتموا بعض.. شتايم انا نفسى مافهمهاش

وبعدين تيجى المدرسة تشتكيلى منه، يعنى اكيد هو متعلم من المدرسة كل الحاجات دى منبع الفساد كله مش الدراسة

يبقى انا المفروض اعمل ايه؟؟؟ ده طول اليوم ف المدرسة
وكل شوية شكوى شكل، دى وصلت لحد السرقة، ابنى انا بقى بيسرق
وياريتها حاجات عليها القيمة، بيسرق حاجات قمة ف التفاهة، اكيد شاف حد بيعمل كدة ف بيقلد من باب التقليد وخلاص..

ولما أسأله انت بتشوف ماما بتعمل كدة؟ يرد ببرود يقولى: لأ، بس انا عايز اكتشف
لا وقدام ده كله بيتكسف من البنات.. لو بنت قدامه وشه يحمر ويبص فى الارض.. ومايحبش حتى يلعب معاهم.. اهو الحمدلله لسه فيه حاجة عدله

انا فعلا مش عارفة اعمل معاه ايه.. ولو اخدته ونزلت بيه مصر.. البلد مش مستقرة خالص الايام دى.. وانا مش هقدر على مصاريفه هناك.. كمان انا بدرس هنا ولسه فاضلى سنتين على الاقل.. عايزة اخلصهم الاول وانزل قبل ما اخلاقه تسوء عن كدة
مش عارفة والله هيعمل فيا ايه اكتر من كدة، قدام كل اللى بعملهوله يقولى انا مش بحبك وانا مايهمنيش حاجة ويضربنى ويشتمنى وهو كله على بعضه 7 سنين

فكرت حتى اتجوز لكن كل اللى قابلتهم مش مُريحين.. يإما معُهمش ورق وعايزنى اعملهم الباسبور الاوروبى

انا فعلا تعبت وكلمت ابوه يجي ياخده.. ابوه شايل ايده تماما عنه لا مصاريف ولا حتى بيشوفه كتير.. بس هو نفسه ياخده شوية

لكن المشكلة ان ابوه لا بيضرب ولا بيزعق وعنده الحياة سهلة قوى.. وانا متأكدة ان ابنى هيحب الحياة معاه اكتر.. عشان هيقوله مش مهم تذاكر.. مش مهم اى حاجة.. اعمل اللى انت عايزه

ده مبسوط جدا انه هيروح عند ابوه.. برغم ان من ساعة ما اتولد لحد دلوقتى ماسبنيش يوم

يمكن مايرجعليش تانى.. يمكن يحب عيشة ابوه اكتر.. مش عارفة بس انا فعلا تعبت ومش لاقية حل

رحاب المليحي