الأروبه نقمه ولا نعمه؟

** أختلف مفهوم كلمة (أروبة) ما بين الناس.. فى ناس شايفها انها حاجة مش حلوة وناس شايفاها ميزة

هطرح الفكرتين من خلال حوار بنتين

·        أ : بُحكم أن أهلى متوفين وعايشه لوحدى كان لازم عليا انى اعمل كل حاجة بنفسى.. ماستناش حد يعمل لى.. محدش فاضى لحد حتى لو عيلتى.. بطبيعة الحال كل واحد عنده مشغله ومسئولياته وبيته وعياله.. بس ف نفس الوقت لما حد يقولى يا أروبه بتضايق بحس انها مش كلمه حلوة.. بحسها اللى هو اه ما انتى دايسه ف كل مكان وتعرفى تجيبي أرار الحاجة

·        ب: انا بقى عكسك انا شايفه انى لو كنت كدة كنت هبقى مبسوطه.. فكرة انك ماتبقيش محتاجة لحد ولا متعشمه ف حد ولا تذلى نفسك لحد عشان يعملك حاجة انتى مش عارفه تعمليها لنفسك دى نعمه كبيرة جدا.. وزى ما قولتى محدش فاضى لحد.. انا بقى بحس كتير انى مبعرفش اتصرف.. بحس احيانا بالسذاجه والعبط وانى كتير لازم اعتمد ع حد يتصرف بالنيابه عني ويفكر لى ف حل

·        أ: بس يعني مش أتحسد ع الحاجة الوحيده اللى انا فالحه فيها مش اسلوب يعني.. مابقاش بحاول اساعد الناس ولو حد طلب حاجة منى أقوله يعمل ايه.. وف الاخر يتقالى لا برافو عليكي طلعتي أروبه.. ايه الأروبه اللى فيها يعني؟ أنى بساعدك؟ أنى بُحكم انى عايشه بطولى بعرف اتصرف، ف بقولك تعمل ايه؟ يعني اسكت ابطل اساعد الناس ؟؟

·        ب: انتى ليه مأفورة؟ ليه واخداها بحساسيه؟ يكفيكي فخرا إن محدش بيلجأ لك وتخذليه.. يكفيكي فخرا ان الناس يوم ما يتزنقوا عارفين هيسألوا مين ومتاكدين ان المعلومات اللى هتديهالهم.. وانك حتى لو متعرفيش هتسألي مش هتقولى معرفش وتنفضى.. دى ميزة مش موجوده عند ناس كتير.. كله بقى بيقول يالا نفسى محدش فايق يساعد حد.. ده الناس تبقى عارفه المعلومه وتخليها لنفسها وماترضاش تساعد بيها غيرها.. يسموكى اروبه يسموكى عفريته المهم النتيجه مش المُسمى

·        أ: الحمدلله ده فضل ونعمه من رب العالمين بس انا مش قوية زى ما انا مبينه.. كتير من جوايا بكون ضعيفه ومحتاجه اللى يشد من اذري بس مبقولش.. ساعات بحتاج الإيد الحنينه اللى تطبطب عليا وتسمعني حتى لو انا عارفه هعمل ايه بس محتاجه احس ان في حد مهتم بيا  زى ما انا بعمل مع الناس.. ما انا ف الاول والاخر حتى لو أروبه أنا بنى أدمه ونفسى ف حد يراعينى ف وقت شدتى حتى لو مابينتش ده

·        ب: طبعا، كلنا ف الأخر مهما كنا بنبان أقوياء ف بتيجي علينا أوقات ضعف كتير بنحتاج اللى يحتوينا.. بس برضه هرجع واقولك العشم وحش.. الأفضل انك ماتستنيش حاجة من حد.. جه لوحده وحس بيكي خير وبركه ماجاش أديكي عارفه طريقك وعارفه هتتصرفى ازاى وهتعملى ايه وليكي الله اللى تدعيله وتشتكي له همك..

رحاب المليــــحي 

حالتك النفسيه

الحاله النفسيه لها عامل كبير اوي وبتأثر تأثير كبير علينا سواء بالآيجاب أو بالسلب

يعني لو كنت مبسوط هتشوف كل حاجة حلوة وهتحس ناس كتير وحشاك ولك مزاج ترغي وتهزر للصبح

بعكس لو كنت متضايق هتبقى مش طايق نفسك ولا طايق حد يجي جانبك ولا يهزر معاك وأي كلمه مهما كانت هايفه هتقفش عليها

زى لما تبقى عارف ان بكرة صيام هتصحى نفسيا متأقلم انك مش هتاكل مدي اشارات لدماغك انك صايم..

عكس لو صاحي عارف ان النهاردة العيد هتلاقي نفسك واقع من الجوع ونفسك مفتوحه للأكل

حالتنا النفسيه هى اللي بتتحكم فينا بشكل أو بأخر واللي المخ عارفه هو اللي العين بتشوفه حتى لو مش صح..

يعني لو داخل تعمل عمليه وحد جربها ونقلك تجربته دى وكانت كلها أوجاع..
حتى لو العمليه سهله هتبقى داخل ف دماغك انك هتشوف الويل.. وقبل حتى ما تتشك بالإبره هتبقى بتنط من مكانك خايف ومأفور..
ده عشان انت مأقلم نفسك انها صعبه وانك هتتوجع ع حسب ما سمعت وع حسب ما مخك استوعب

لو حد كلمك كتير عن واحد صاحبه قد ايه هو بنى ادم كويس ومحترم والناس كلها بتحبه.. يوم ما تقابله هتلاقي نفسك حابه من قبل ما تعرفه من كتر كلام صاحبك عليه.. حكمت عليه انه كويس؛
والعكس صحيح

مدى اقتناعك بالحاجة وتأثر حالتك النفسيه بها هو اللي بيحركك دايما

رحاب المليـــحي

الكلمه الحلوة بتفرق

لما يبقى حولينا ناس بتحبنا وبتحاول تبسطنا ولو بحاجات بسيطه واحنا مبنفكرش حتى نقولهم شكرا؛ يبقى ده مايرضيش ربنا

لما تلاقي اللي يسمعك ف عز حزنك ويشاركك ويحاول يساعدك ولو حتى بالكلام مش بالفعل وماتقدروش؛ يبقى حرام عليك

لما حد متتوقعوش ف مناسبه تخصك يجيب لك هديه أو يفتكرك ولو بكلمة حلوة وانت ماتردهاش؛ يبقى خسارة فيك

لما حد ف عز همومه يفرح لفرحك من قلبه ويرمي ورا ضهره أحزانه عشان مايضيكش ويوم ما يحتاج لك يلاقيك مشغول عنه؛ يبقى ماتستهلوش

لما يكون ف حياتك حد كل افعاله معاك حلوة ويوم ما يغلط ف حقك سواء قاصد أو لأ تعاتبه وتجرحه وتنسى ان رصيده عندك يسمح؛ يبقى خسارة فيك

احنا بطبيعة الحال لما بنتعود ع حاجة وتبقى موجودة ف حياتنا دايما بننسى انها نعمه وممكن تزول ف لحظة.. 

بننسى ان اللي مفرحنا ومقدرنا.. ممكن نصحى الصبح مانلقيهوش موجود معانا ف الدنيا

بننسى ان اللي بيعمل معانا مواقف جدعنه كتير ويوم ما يغلط ونمسك ف الغلط ونسيب الحلو هيبطل يعمل اى حاجة كويسه تاني 

قدر اللي قدامك حس بحب الناس ليك.. قول للي بيعمل حاجة حلوة انه بيعمل حاجة حلوة.. ماتتخيلش رد فعله وسعادته بكلامك هتبقى عامله ازاي.. 

احنا ف وسط زحمة الحياة نسينا ان الكلمه الحلوة صدقه وان اللي حولينا محتاجينها عشان نشد من أزرهم ونخليهم يكملوا صعوبات وضغوط الحياه

ماتستهونش بالكلمه الحلوة.. انت متعرفش تأثيرها الايجابي ع اللي قدامك هتبقى عامله ازاي..

 احيانا بتكون بارقة أمل بمقام رساله ليهم من عند ربنا بيقولهم انتوا ماشين صح كملوا الطريق للاخر

طلع الحلو اللي جواك للي يستاهله قبل ما يفوت الاوان 

رحاب المليــــحي

* كل لقطه ف حياتنا وراها قصه

** الحياة ايه غير شوية صور فوق بعضها**

احيانا بنقول الجمله دى من باب التهريج.. بس احنا لو فكرنا فيها هنلاقيها حقيقه فعلا وهنلاقي ان كل صورة ف البوم حياتنا وراها قصه

يعني لما نكون ف خروجه مع الأصحاب أو سفرية ونتصور.. نلاقي الصورة بتشع بهجه وفرحه وانبساط وايجابيه غير عاديه

بعدها بفترة لو اتفرجنا ع صورنا هنلاقينا بدون ما نحس بنبتسم.. بنفتكر اللحظة اللي وقف عندها الزمن واخدنا فيها اللقطه دى وقد ايه كنا مبسوطين ساعتها

لكن فيه صور تانيه لما بنشوفها بتفكرنا بناس راحت من حياتنا وسابت لنا بس اللقطه اللي توجع قلوبنا وتخلينا بدون ما نحس ندمع من وجع الفراق

وفيه نوع تاني من الصور بتكون عبارة عن طاقه سلبيه وبنحاول نخرجها عن طريق لقطه تبين عكس اللي جوانا..

يعني نبقى من جوانا مكسورين ومخنوقين بس نتصور واحنا بنمثل الانبساط.. يمكن ده يخرجنا من المود اللي احنا فيه ولو خروج وقتي

لكل صورة الف معنى.. متحسدوش الناس ع صورهم وهما بيضحكوا.. ومتحكمش عليه انه مقضيها وحياته كلها سعاده وفرح.. ممكن يكون اتعس واحد ف الدنيا ومعندوش غير شوية صور يعيش ع ذكراهم 

رحاب المليحي

ويبقى الأب أحب للبنت من الزوج

ف ايام المدرسه كنت بستنى بابا وهو جى بليل من الشغل وجايب لي معاه كيس مليان حاجات حلوة شيكولاتات ع مصاصات.. واقعد اذاكر وانا بمزمز فيهم

واستناه ف البلكونه كل يوم جمعه وهو راجع من الصلاه وجايب لي معاه ميكي عدد الاسبوع والمفاجأه لما الاقيه داخل عليا بمجلد ميكي

ولحد ما بقيت ف الجامعه كان برضه يعدي ع بتاع الجرايد ويجبهالي ويقولي يا حبيبتي بقيت اتكسف اجيبها مابقاش عندنا اطفال..

وف كل عيد ميلاد اشترط عليه يجيب لي دهب وف سنة من السنين جاب لي طقم دهب كامل قالي جيبنا الشبكه فاضل العريس.. كان ردي عليه ان العرسان بتيجي وتروح المهم النفس
وكنت كل ما اطلب منه حاجه يتعصب ويشتكى لمامتى ان طالباتي مابتخلص.. وبعدها الاقيه جايب لي اللي انا عايزاه
وماما تقولي اهو انا مش باخد غير العصبيه وف الاخر تاخدي اللي انتى عايزاه
كنت دايما شايفه نفسي دلوعة بابا وع الحجر وطلباتي أوامر

أما بقى بعد الجواز ف لنا هنا وقفه..

وقت الشبكه قالي معلش هتبقى حاجة صغيرة دلؤقتي لكن بعد كدة هجيب لك حاجة اكبر.. بقالي 12 سنة متجوزة ماشفتش دهب تاني..

قعد يقولي كل ويك اند هسافرك مكان جديد هنلف العالم.. لو خرجنا من البيت ف الويك اند بالعيال طبعا، يبقى كتر خير الدنيا

لما اشترى حاجة جديدة وأسأله عن رأيه فيها يسألني الأول دى بفلوسي ولا فلوسك؟
لو قلت بفلوسي تبقى حلوة وتحفه وتجنن ومش فارق معاه يعرف سعرها

كل عيد ميلاد لازم احذر واتوعد انه لو نسيه وماجبش هدية هيتنكد عليه.. والأضمن انى بختار هديتي بنفسي بدل ما يجيب لي حاجة مش ع ذوقي

أما عيد الجواز ف دى حاجة مش معترف بيها ف قاموسه اساسا لو افتكره يبقى خير وبركه

كل واحدة بتحلم تتجوز واحد زى ابوها يدلعها وتبقى بالنسباله الدنيا وما فيها.. بس حتى لو لاقيته المشاكل والمسئوليات وضغوط الحياه بتخليه غصبا عنه بينسى التفاصيل الصغيره اللي بتفرحها.. لأنه طول الوقت بيلف ف ساقيه

حتى هى كمان المسئوليات بتكبرها ومابتبقاش اي حاجة بتفرحها زى زمان..

س الأكيد ان لو ابوها دخل عليها بكيس الحاجات الحلوة ومجلد ميكي هتطير من السعاده

رحاب المليــــحي

مش بيحصل؟

تبقى قاعد ف حالك كدة تلاقى حد جه ع بالك فجأه بدون مقدمات.. مش شرط حد قريب منك ممكن يكون واحد بتتكعبل دايما فيهم ع الفيس بوك مثلا ف يجي ع بالك انك بقالك كتير ماشفتش له أى بوستات.. شوية وتلاقيه قام عاملك لايك ولا كومنت.. مش بتحصل؟

يجي حد ع بالك تفتكر انك بقالك فترة ماسألتش عليه، ف تبعت له ماسدج تلاقيه بيقولك كنت لسه والله ع بالى  بفكر ابعت لك بس انت سبقت.. مش بتحصل؟

وانت قاعد ع النت تشوف صورة لحد علاقتك بيه سطحيه بس بتعزه من ابتسامته أو صوره أو كلامه حتى.. ف تلاقى نفسك بتدعي له ف سرك.. ف تستغرب، وتبعت له ماسدج تحكي له اللى حصل معاك.. ف يتبسط جدا ويقولك تصدق انى كنت ف ضيقه ومحتاج دعاء الناس، أو تصدق انى كنت مخنوق ومش عارف انا ماشي صح ولا لأ، ف انت رساله من ربنا بيطبطب بيها عليا ويطمنى انى ماشي صح.. مش بتحصل؟

تتكعبل ف بوست أوصورة لحد صغير توفى بطريقة توجع القلب تتخنق وتتضايق جدا برغم انك متعرفهوش اصلا.. تدخل ع الاكونت بتاعه وتقرا كلامه وتلاقيه حد حبوب وجميل يصعب عليك إنه توفى صغير كده وممكن تقعد تعيط وتدعي له وتنام وانت زعلان عليه.. مش بتحصل؟

تبقى قاعد ف مسجد مثلا وتشوف صورة حد من أصحابك أو معارفك ف وش اللى قدامك.. تشوفها لمدة ثواني.. ف تدعي له ف صلاتك.. وبعدها وشه يختفى ويرجع الوش الخاص بالشخص اللى قاعد قدمك.. هتتأكد ساعتها إن ربنا رايد إنك تدعي لصديقك ده عشان محتاج دُعاك.. مش بتحصل؟

وانت بتعمل حاجة يجي ع بالك حد من صحابك ف اليوم الفُلاني لما كان معاك وبتعملوا نفس الحاجة ف تلاقى نفسك تلقائيا بتضحك.. وتقوم باعت له تفكرهُ بالموقف وتقوله إنه وحشك وعايز تشوفه.. ممكن تلاقيه كان موده وحش بس لما افتكر معاك الموقف ضحك من قلبه وفك.. مش بتحصل؟

لما تحس إنك نفسك تقول لحد كلمه حلوة أو تدعي له دعوه صادقة من قلبك اعمل كدة وماتترددش ومتفكرش مرتين.. متعرفش ممكن يكون ف اللحظة دى بيفكر ف إيه أو متضايق أو نفسه ف حد يطلعه من اللى هو فيه..  

ومش هتتخيل ردة فعله والانبساط اللى هيكون فيه وده هينعكس عليك.. وهتلاقى انتوا الاتنين بتشعوا ايجابيه من غير ما تحسوا.. مش بتحصل؟

رحاب المليـــحي

شات الموبيل

شرط اى موبيل جديد حابين نشتريه انه يكون سريع ع النت وبينزل عليه الواتس اب والفايبر

وده عشان حياتنا انحصرت ف الشات.. بقينا بننسى الكلام من كتر ما احنا مشغلين ايدينا بالساعات ع الكيبورد.. بنفرح ونزعل ونواسى ونطبطب ونعزى ونبارك بكومنتات ليس إلا

حتى لما بنثور ونغضب بيكون  ع النت.. نقعد نهري ونزعق وممكن نشتم واحنا مستخبين ورا شاشه.. تخلص الهوجه ونهدى ننسى وندور ع حاجة جديدة نشغل نفسنا بيها

بقينا حاصرين نفسنا ف العالم الافتراضى، مشاعرنا نفسها بقينا نعبر عنها من خلال شاشة وزراير..

حتى مع أصحابنا بقينا نتحجج اننا مابنحبش الرغي ف التليفونات ولما نتكلم مش بنلاقى كلام نقولوه.. طب نرجع بالزمن ورا كدة لسنين كتير.. يا ترى كنا بنتواصل معاهم ازاى؟ وبنقابلهم ونخرج ازاى؟ لو فعلا مالناش ف الرغى.. ورأيي الشخصي ان ده هروب من اننا نتعب نفسنا ونفتح بوقنا ونتكلم ونرجع صلة الرحم والتراحم ونرجع التواصل الاجتماعى بحق وحقيقي زى زمان

طب ما احنا بنروح اشغالنا ونتكلم مع ده ونشوف مصالح ده ونضحك ونهزر ونتخانق.. اشمعنى يعنى وقت ما يبقى مطلوب مننا نعمل واجب لحد من اصحابنا أو اهلنا نبعت له ع الفيس ولا الواتس ومعلش اصلى مش قادر اتكلم هبقى اكلمك بعدين ونتقابل.. وبعدين ده احيانا كتير مابيجيش أو ممكن يجي متأخر ف بيكون ماسخ.. أصل أى حاجة بتيجي متأخر بتكون مسخت ومابقاش ليها لزوم

اتقوقعنا ع نفسنا ونرجع نشتكي لما يجي لنا اكتئاب من الوحدة مهو احنا اللى بنعمل ف نفسنا كدة..

بنحسها مثلا لما يكون مننا حد مشهور ع الفيس وعندك أصدقاء بالألفين واحد.. ولما تيجي تعمل ايفنت تلاقى ال2000 بيقولولك جايين ووراك يا معلم..

 وتبقى متفشخر كدة وسعيد بلمة الناس وحبهم ليك وان اهو ده يثبت انه مش عالم افتراضى ولا حاجة واهو الناس هيتجي تفرح لى وتساندنى.. وتفاجأ يوم الايفنت بإن كل الناس طلعت لهم ظروف ولا جم ولا اعتذروا.. وتصفصف ع 20 واحد بالكتير اللى جم الايفنت وممكن جدا يكونوا فاضين مش لاقين حاجة يعملوها ف جم مش دعما ليك ولا حاجة

عايزين نحاول نرجع تجمعتنا ونجمع الناس حولينا بجد ف خروجه ولا اجتماع عائلي نسمع رغيهم وضحكتهم الصافيه اللى طالعه من القلب.. مش مجرد ايموشن ع الشات وممكن جدا مانكنش حتى ابتسمنا لما بعتناه مجرد بس بنجامل اللى قال حاجة المفروض تضحك

رحاب المليــــــحي

كله محصل بعضه

(( اصلها باكيدج بحلوها ومرها))

دى الجملة اللى دايما بقولها لما حد بيسألنى مصر ولا لندن؟ لندن ولا مصر؟

هى فعلا باكيدج ماينفعش تاخد حلوها وتسيب مُرها سواء كانت مصر او لندن
ولإن الطبيعى والمنطقى ان الممنوع مرغوب وان اللى مش ف ايدك دايما عايزه..

فـــ مهما نقول عن الغربة هيجى اللى يقولك اهى اى بلد واطفش من المخروبة دى.. اهى العيشة ف جهنم اهون من العيشة ف مصر.. اخد الفرصة بس وتف ع وشي لو اشتكيت
ومهما حلفت له وأكدت له انك اكيد هتف ع وشه مابيصدقش عشان اللى ايده ف الميه

ولو حسينا بالحنين واكلنا وكتبنا كلمتين لمصر تلاقى التلقيح نازل يرف..
طب ياختى ماتيجى تعيشى فيها واسافر انا بدالك..
تعالى ياختى جربي الغُلب اللى احنا فيه وبعدها شوفى هتستحملى ولا لأ..

ده احنا متغربين جوه بلدنا.. ما انتى طبعا ع قلبك مراوح قاعده بره وبتتفرجى ع اللى بيحصل ف بلدك يو تيوب ومش فارق معاكى وبتاكلى ف اته محلولة
( إلا بالمناسبه هى ايه الاته المحلولة؟)

ولو غلطت وشيرت حاجة سلبيه عن مصر.. تلاقى اللى طلع يقولك انتى عميلة وعايزة تسوئي صورة بلدك مش بتبينى فيها غير مساوئها.. ما انتى لو قلبك عليها كنتى تبينى محاسنها بس..

طب يا عم محاسن هى متسيط لها لوحدها والنعمة مش انا اللى هزود ده..

ممكن يكون فيه بلاد أسوأ مننا كتير بس بفضل الفيس وتويتر كل العالم بيعرف أخبارنا وفضايحنا وهما عاملين يمصمصوا ف شفايفهم ويتمئلسوا ع البلد واهل البلد.. وبلادهم وهما شخصيا أسوأ من انهم يتكلموا عننا كده..

لكن احنا اللى بنعمل ف نفسنا كده وبنديهم الفرصة بفضل الشير العظيم اللى مابيهونش علينا اننا نقرا موضوع لوحدنا لازم نشيره ونفضح نفسنا عشان نقعد نهرى يومين ف حاجة.. اومال نقعد ساكتين كده من غير ما نهرى ف حاجة، ينفع برضه؟

لو جينا للغربة، مانكرش ان فيها مميزات ومانكرش انك ممكن تعيش عيشة نضيفه.. بس قدام كدة بتخسر حاجات تانية..

زى انك بتشتغل عند ناس انت دايما بالنسبالهم درجة تانية.. زى انك مش هتحوش عشان فيه ضرايب وفيه ايجار وفيه وفيه هيقطموا ضهرك مش زى ما انت متخيل بكاوى ومش عارف توديها فين ياحرام

زى ان لو مالكش حد ف البلد او متعرفتش ع الناس يسألوا عليك وتسأل عليهم بدون مصالح شخصيه.. يوم ما هتقع مش هتلاقى اللى يوقف جانبك.. لو تعبت مش هتلاقى اللى يسأل عنك..

زى انك بتفتقد حضن اهلك وناسك ودفء الحياة جوة بلدك

خوفك من اى تليفون دولي ليكون فيه خبر وحش بوفاة لحد من حبايبك واقاريبك..

زى ان لو مش معاك فلوس تنزل مصر اجازة لسنين او ورقك مش سليم ف البلد هتقضيها مع اهلك انترنت وبس..
هتقضيها فُرجة ع صور اخواتك وهما بيتجوزوا وولادهم بيكبروا قدام عينيك صور بس وانت مش وسطهم..

وحتى لو تقدر تنزل ممكن ف لحظة يجي لك خبر وفاة حد منهم وانت مش جانبه وانت ماوددعتوش قبل ما يمشى ويغيب عن الدنيا ولا قادر انك تحضر عزاه سواء بسبب ظروفك اوغلو اسعار التذاكر بيمنعوك

ولو ليك اصحاب ف غربتك عشان تخرج ولا تروح مكان هما هما نفس الناس ونفس الاشكال مش هتتغير.. اللى هتخرج معاهم النهاردة هما اللى هتخرج معاهم الاسبوع اللى جى.. ما انت معندكش حرية الاختيار..

مهو هما مش كتير للدرجة عشان كل يوم تنقى حد تخرج معاه.. ولو ماقبلتهمش هتفضل لوحدك وبرضه مش كلهم اصحابك اوى ومش كلهم بترتاح لهم بس دول اللى بيسموهم اصدقاء الغربة ومالكش اختيار تانى بدل ما تتجنن وتكلم الحيطان

وبالنسبة لاماكن الخروج لو ف بلد اوروبى ف انت اعتمادك الاول والاخير ع الجو.. لازم تشوف الجو ع النت عامل ازاى قبل ما تفكر تلم اصحابك وتخرجوا عشان معظم الوقت بيكون برد ومطر

وعن الاماكن اللى هتروحوها مش هتبقى كتير ومع الوقت والسنين هتزهق ومش هتبقى عارف تروح فين تغير جو.. وفى اماكن بتبقى غالية بزيادة وخصوصا لو متجوز وعندك اطفال بتبقى مصاريف مالهاش لازمه

اما عن العلاج الفظيع المُريع ابو بلاش اللى ف اوروبا ف ده هتكلم عنه ف موضوع تانى لوحده.. عشان كل المسلسلات بتاعة هنروح نعمل check up ف لندن دى بتفقع لى مرارتى بصراحه

كل نفس بفلوس وكل نفس ف غربتنا له تمن.. ماتنخدعوش بالمظاهر وبالصور وبالضحكة اللى احنا دايما فيها رافعين شعار اضحك عشان الصورة تتطلع حلوة..

وع فكرة كمان، مش كل الاماكن واو زى ما بتشوفوها ف الصور.. احنا بس اللى بقينا خبرة ف اختيار زاوية التصوير .. كتير بتكون الزاوية دى بس اللى حلوة وباقى المكان تقليدى ممل عادى جدا

بتتكسر جواك حاجات كتير وبيكون تمنها غربتك.. بس هرجع واقول هى باكيدج بحلوها ومُرها.. لازم ترضى بيها لحين اشعار آخر..

كتير هتفقد الامل وهتحس انك داير ف ساقيه وهتحس بالسواد بيحيط بيك من كل اتجاه سواء ف غربتك او ف بلدك
حاول تتخلص من الشعور ده وتعمل اى حاجة بتحبها اللى بيها تعملك ريفريش لمودك وتكسر بيها روتين حياتك النمطى وترجعك لساقية الحياة من جديد وانت فريش

الحياة صعبة مش بمبي وكل واحد فيه اللى مكفيه.. جوة ولا بره انت اللى بإيدك تنكد ع نفسك وانت اللى بإيدك تسعد نفسك قول يارب وسيبها ع الله

رحاب المليحي

حيرة

دخلت أوضتها وإتأكدت انها قفلت عليها الباب كويس بعد ما وهمت مامتها انها تعبانة وعايزة تنام..

بس هى فى الحقيقة كانت محتاجة تقعد شوية مع نفسها.. محتاجة تفكر وتعيد حساباتها عشان تقدر تستوعب اللى بيحصل حوليها

قفلت نور أوضتها وقعدت على سريرها، حضنت دبدوبها.. أحب دبدوب ليها وسط كل دبادبيها.. عشان (هو) اللى جايبوهلها ف عيد ميلادها

بصت لدبدوبها وابتسمت.. ريحت ضهرها على المخدة وبصت ف السقف وبدأت وكأنها بتشوف شريط ذكريات جميل 

أول يوم شافته فيه، كان لسه داخل شلتها جديد وهى وافقة عمالة تهزر وتألش مع أصحابها مش واخدة بالها منه خالص.. لحد ما صديقة لها عرفتهم على بعض

كان انسان هادى بطبعه، خجول، وبرغم انه عكسها فى حاجات كتير لكن كان دمه خفيف ويدخل القلب بسرعة

مع الوقت بقوا أصحاب قريبين من بعض.. أول ما تبقى مخنوقة ومتضايقة تتصل بيه تحكى له.. وأول ما يقع فى مشكلة يقابلها عشان يتناقشوا بصوت عالى ازاى يحل المشكلة

اتعرفوا وسط أصحابهم انهم بقوا (انتيم) جامدين قوى.. ولإنهم عكس بعض فى حاجات كتير ف ده ساعدهم إنهم يكملوا بعض ويبقوا حاجة واحدة

ومن كتر ما هما بقوا على طول ما بعض وأسرارهم مع بعض.. ناس كتير كانت بتقولهم انهم بقوا شبه بعض.. ملامحهم بقيت متقربة إلى حد كبير.. وده كان بيسعدهم جدا

وصلوا لقمة احساسهم ببعض.. يعنى لو هى زعلانة وبتعيط ولسه مابعتتلوش تقوله.. يلاقى هو حاجة جواه تقوله كلمها كدة أسأل عليها

ولما هو يبقى فيه حاجة مفرحاه ولسه عايز يعملها مفاجأة ويسعدها زى ما هو مبسوط.. يلاقيها داخلة عليه ببوكيه ورد عاجبها وطقت فى دماغها تجيبه

كانت أحلى أيام مقضينها سوى.. مكملين فيها بعض..  وحبهم لبعض ماكنش له مسمى.. يعنى لا يندرج تحت حب زواج ولا حب أخوة ولا حب صداقة.. كان حب كدة جديد من نوعه مالوش مسمى لكن جميل ومعانيه أجمل واشمل

فجأة كدة حاله اتغير واتبدل وبقى غريب معاها وبيتعصب بسرعة.. ولما تسأله عن سبب تغييره وانها مش متعودة انه يخبى عليها.. يطلع لها كل مرة بحجة شكل.. تعبان، زهقان، مالوش مزاج

بس حسيت إنه بدأ يغير عليها من أصحابهم.. لكن مش عايز يبين ده.. بس هى فاهماه كويس قوى.. ده الكتالوج بتاعه معها.. بس برضه كانت بتقنع نفسها انه غيرة صداقة عادية ومشروعة

لكن هى ماكنتش كدة.. هو فجأة لقى نفسه مش قادر يتخيلها مع حد تانى غيره.. وانه بقى عايزها له لوحده وصرحها انه عايز يرتبط بيها رسمى

تنحت من المفاجأة، هو بالنسبة لها كان أى حاجة جميلة إلا إنه يكون جوزها.. مش قادرة تشوفه زوج وأب لولادها..

مش عشان هو وحش، لأ خالص، ده شخص جميل وفيه مميزات كتير وأى واحدة تتمناه.. 

بس عمرها ما شفته غير صديق وعزيز وأخ فقط لاغير

ماعجبوش الكلام وطلب منها انها تفكر وترد عليه.. ولحد ما تفكر وتقرر مش هيكلمها ولا يقابلها عشان ميأثرش على قرارها

تخيلت انه اى كلام وهيروح لحاله وانها أول ما تتصل بيه مش هيقدر يقاوم انه يرد عليها.. لكن فوجئت ان الايام بتعدى وهو لا بيرد ولا بيتصل بيها

حسيت انه بيضغط على اعصابها عشان توافق.. لكن ابدا هو عارفها كويس هى مابتجيش بلوى الدراع.. بعتت له ماسدج تشرح له مرة واتنين مشاعرها ناحيته وانها مش قادرة تشوفه كزوج..

 ماكنش بيرد على رسايلها وكان عنده أمل انها فى الاخر هيوصلها احساسه وتقتنع

لكن ماكنش فيه فايدة.. كل واحد مُصر على موقفه.. 

طب اخرتها ايه؟ وايه الحل؟ 

هل يقطعوا مع بعض وكل واحد يروح لحاله وينسوا كل مشاعر الصداقة الجميلة اللى كانت بينهم؟

ولا هى تخضع وترضى وتحاول تشوفه كزوج؟ 

رحاب المليحي

أأا

* فيس بوك سيزونس

بعض الناس بقى من طموحاتها ان الفريندز عندها ع الفيس يوصلوا للألاف.. والسب سكريب يكونوا بالميات برضه

تتفشخر كدة ف نفسك وتحس ان كلامك وبوستاتك بقوا حاجة مهمة

خصوصا انه كل ما تنزل ببوست تلاقى 50 لايك و20 شير و100 كومنت

ولا بقى لما تنزل بصورة لنفسك.. تبقى اللى ماجبتلوش ولادة
واو تحفة وتجنن ومز وايه القمر ده يا معلم

وف المناسبات بقى،
العيد الكبير، تبقى ووله متغرقة بالخرفان

وف العيد الصغير، فلوس هنا وهناك

وف عيد ميلاده، الاف من بوستات التهنئة

ويبقى الفيس بدل ما كان عالمك الافتراضى..
بقى هو عالمك الواقعى.. اللى ماتقدرش تعيش من غيره،

حتى لما تخرج تفتحه من موبيلك عشان تقدر ترد ع كمية النوتيفيكشن الهولامية اللى بتجيلك.. سواء ف السياسة أو ف الألش أو عموما

ما انت عبده المهم بقى.. اللى الناس لازم تعدى ع بروفيلك يوميا..
أو هكذا تعتقد

طب لما تختفى فجأة.....
حد هيسأل؟ حد هيهتم؟ حد خد باله اصلا؟
ممممممم

ممكن من الاف دول، اتنين أو تلاتة هما بس اللى يسألوا..
يإما فعلا مهتمين بيك فعلا
يإما فيه مصلحة من وراك ف بيدوروا عليك

نو كومنت

رحاب المليحي

اللى اختشوا ماتوا

تبقى بتعمل حاجات كتير قوى لأصحابك.. وانت مش مستنى من ورا ده حاجة

لكن احيانا لما تركز ف مواقفهم معاك تلاقى عدم تقدير 

- تسأل عليهم ع طول.. ولما تغيب.. محدش يسأل

- ولما تعاتب تلاقي مية حجة وحجة

كل ما تعجبك حاجة.. تفكر فيهم واللي تجيبه لنفسك.. تجيبهالهم، حتى إن كانت حاجة بسيطة

- وبرغم انك مش مستنى منهم حاجة.. لكن حتى مجرد التفكير فيك ف حاجة ممكن تبسطك.. مابيحصلش.. لإنك مش ف الدماغ اصلا

- لما يقصروا ف حقك.. تحاول تدورلهم ع كذا مبرر.. عشان ماتخدش ع خاطرك منهم

- ويوم ما انت بدون قصد تقصر ف حقهم.. تلاقي كرباك لسانهم نازل عليك مابيرحمش.. ويفتكرولك بقي القديم قبل الجديد

ويوم ما تقرر تعاملهم زى ما بيعاملوك.. 

* حاجة من اتنين:

يا مش هيفرق معاهم

يا برضه هيعاتبوك ع التغيير اللى بدون أى مبرر

مهو صحيح اللى اختشوا ماتوا

الله يرحمهم بقى

رحاب المليحي