احم، احم

** دايما كدة عرق العصبية ينئح علينا لو اتكلمنا مع حد واستغبى

ننفش ريشنا ونقوله: لا لا بقولك ايييييييه؟ مش ناقص غبائك ع المسا.. بطل اللى بتشربه ده

وتلاقيك بعدها بدقيقة تقوله: هى نضارتى فين؟

يقولك: نعم؟

تقوله: ايه هتستغبى ف دى كمان السؤال صعب قوى كدة؟ اوووووف

يقولك: احم، اصل تضارتك ع عينيك.. ايه مش شايف

********

** تلاقى مامتك متعصبة بقى قوى وانت لسه مفعوص صغير

المفروض ماطلعتش من البيضا ومش فاهم حاجة

- يا مامى يا مامى

- عايز ايه؟

- هو انتى ليه بترمى هدومى ف الزبالة يا مامى؟!!!!

- ليه ان شاء الله شايفنى مجنونة عشان اعمل كدة!!!

تبص ف الزبالة تلاقيها رميت هدوم الواد فعلا ف الزبالة.. وكيس الشيبسى الفاضى حطيته ف الغسيل، احم

*******

يجي صاحبك يلاقيك بتلعن سنفسيل الكمبيوتر

- مالك يا عم؟

- الكمبيوتر مش راضى يشتغل.. انا قرفت بقى منه، اووووف

- خلاص اعمله حصالة

- جررررر، انت هتتريق! اقولك، اطلع بره مش عايز حد يزورنى النهاردة.. هنام بدرى

- هههههههههه، طب انا خارج.. بس ما تنساش بقى تحط فيشة الكمبيوتر ف الكمبيوتر اصله فاصل شحن

- احم

رحاب المليحي

ارجع يا زمن

**لقد كبرنا يا أمي واصبح لنا اصدقاء.......... يموتون**

بقينا ف زمن نتمنى فيه اننا نرجع فلاش باك عُمرنا كله.. ونرجع اطفال من جديد
كلمة حلوة تراضينا ولعبة صغيرة تسعدنا

بقينا نتمنى ننام مانصحاش

بقينا نتمنى نكون مُغيبين مش فاهمين ايه اللى بيحصل حولينا

تتمنى تعيش ف عالمك الخاص.. تبقى فيه الآمر الناهى.. يبقى مالوش غير ريس واحد هو انت.. يبقى مالوش غير مفتاح واحد ويكون معاك انت

بقينا نتمنى نعيش ف زمن غير الزمن أو ف كوكب تانى

صعب صح؟ خيال علمى مش كدة؟

طب ابسط تقدير بقى، نعيش ف الدنيا لا لينا عزيز ولا صاحب ولا حد يهمنا أمره ولا حد يعز علينا فراقه، عشان مانتوجعش ومايتفطرش قلبنا بدل المرة مية مرة كل يوم

بس برضه ده صعب ولو حصل تبقى مش حياة
مهى الدنيا من غير ناس ماتداس

طب ايه؟

مضطرين نعيشها لحظة بلحظة ونبقى واعين لكل اللى بيحصل حولينا
ونبقى مخنوقين ومبقوقين وموجوعين

بس لازم يبقى عندنا يقين تام ان ربنا قادر يحلها من عنده
ونفضل ندعى ونقول يــــــارب
ويبقى الأمل ♥

رحاب المليحي

يـــــارب

يارب يارب يارب

يارب فك كرب مصر والمصريين

يارب اضرب الظالمين بالظالمين

يارب وقف مصر على رجليها من تانى

يارب ارحم شبابنا واحفظهم واحميهم

يارب هون وصبر ع كل بيت فيه شهيد

كفاية بقى وجع قلب

كفاية قتل

كفاية دم

كفاية مصابين

كفاية حرق

كفاية بلطجية

كفـــــــــــــــاية

رحاب المليحي

نعمة النسيان

** ربنا انعم علينا بنعمة النسيان

دى حقيقة فعلا

بس مش اى حاجة بتتنسى

يعنى هتقولى فاكر اكلت ايه من يومين؟ فاكر دخلت الحمام كام مرة من اسبوع؟

كل دى حاجات هايفة وتافهة طبيعى جدا تقع من الذاكرة

لإن الذاكرة من باب أولى تهتم بحاجات أكبر من كدة وتشيلها ف الميمورى

بدليل إنك ممكن تكون فاكر ايام كتير ومواقف اكتر من طفولتك.. طفولتك اللى مر عليها اكتر من 15 سنة مثلا.. يعنى اه ماتفتكرش اكلت ايه من يومين، لكن تفتكر وبالتفصيل مواقف حصلت ليك من سنين

واحنا ماشين ف الدنيا دى بنقابل فيها مواقف ياما.. فيه منها اللى بيسعدنا وفيه منها اللى بيقطعنا.. وفيه منها اللى بيريحنا.. وفيه منها اللى بيبكينا

احيانا لا إراديا تلاقى نفسك محيت من ذاكرتك المواقف اللى انت مش عايز تفتكرها.. سواء بقى تناسيتها أو نسيتها فعليا

كتير بتكون عايز ترمى ورا ضهرك عشان المركب تمشى.. وعشان تقدر تكمل، مهو لسه الطريق طويل

ف لو انت من الشخصيات اللى مش بتعرف تنسى بسهولة.. يبقى جرب الأوبشن التانى انك تتناسى

بس من اعراض اوبشن التناسى الجانبية..

انك مع اول موقف أو صورة أو كلام شبيه لموقفك المُتناسى.. ف لحظة هتلاقيك شيلت التُراب وسرحت ف ذكرياتك القديمة وقلت: ده انا كنت فاكر نفسى نسيت.. أتارينى بستعبط

تنسى أو تتناسى مش دى المشكلة

المهم انك تتعلم من أخطاءك

الضربة اللى ماتموتش تقوي

واللى اتلسع ف الشوربة.. ينفخ ف الايس كريم

رحاب المليحي