** ربنا انعم علينا بنعمة النسيان
دى حقيقة فعلا
بس مش اى حاجة بتتنسى
يعنى هتقولى فاكر اكلت ايه من يومين؟ فاكر دخلت الحمام كام مرة من اسبوع؟
كل دى حاجات هايفة وتافهة طبيعى جدا تقع من الذاكرة
لإن الذاكرة من باب أولى تهتم بحاجات أكبر من كدة وتشيلها ف الميمورى
بدليل إنك ممكن تكون فاكر ايام كتير ومواقف اكتر من طفولتك.. طفولتك اللى مر عليها اكتر من 15 سنة مثلا.. يعنى اه ماتفتكرش اكلت ايه من يومين، لكن تفتكر وبالتفصيل مواقف حصلت ليك من سنين
واحنا ماشين ف الدنيا دى بنقابل فيها مواقف ياما.. فيه منها اللى بيسعدنا وفيه منها اللى بيقطعنا.. وفيه منها اللى بيريحنا.. وفيه منها اللى بيبكينا
احيانا لا إراديا تلاقى نفسك محيت من ذاكرتك المواقف اللى انت مش عايز تفتكرها.. سواء بقى تناسيتها أو نسيتها فعليا
كتير بتكون عايز ترمى ورا ضهرك عشان المركب تمشى.. وعشان تقدر تكمل، مهو لسه الطريق طويل
ف لو انت من الشخصيات اللى مش بتعرف تنسى بسهولة.. يبقى جرب الأوبشن التانى انك تتناسى
بس من اعراض اوبشن التناسى الجانبية..
انك مع اول موقف أو صورة أو كلام شبيه لموقفك المُتناسى.. ف لحظة هتلاقيك شيلت التُراب وسرحت ف ذكرياتك القديمة وقلت: ده انا كنت فاكر نفسى نسيت.. أتارينى بستعبط
تنسى أو تتناسى مش دى المشكلة
المهم انك تتعلم من أخطاءك
الضربة اللى ماتموتش تقوي
واللى اتلسع ف الشوربة.. ينفخ ف الايس كريم
رحاب المليحي
4 comments:
Asr Shahien
جميل جدا ربنا يكرمك على الكلام الجمييل دة
Hend Hamdy
انا غالبا بتناسى و دايما اتحط فى موقف يفكرنى و ينكد عليا
Adel Seleem
النسيان ده اصعب شيء فى الدنيا اصعب من الموت من وجهة نظرى
فعـــــــــــــــــــــــــــــــلا
بنفتكر وساعات بنضحك وكتير بنبكي . وأكتر بنغضب ونتجهم علي اقرب شخص نقابله
وتكشيرة تظهر علي الوجه طول اليوم بسبب ذكري ما عكننت علينا حياتنا
والمطلوب اننا ننسي
بس احيانا المواجهة ( مواجهة الذكري المؤلمة ) بتكون أفضل من النسيان
لأنك لو نسيت مسيرك تفتكر
أما لو واجهت بكل شجاعة مشاكلك هاتتغلب عليها
اذا حاولت تنسي , يبقي هاتفضل كل شوية تفتكر للأبد
أما لو حاولت تفتكر وتواجه الالم , صدقوني هايتنسي للأبد
محمد بريك
Post a Comment