ليه الطفل جوه مختلف عن طفل بره؟

دايما بنقول ان ولادنا بيتولدوا أذكياء بس مع الوقت بيتحولوا ونسبة ذكاءهم بتقل
من رأيي ده يرجع لكمية الوجبات الهولاميه اللى بيخدوها ف المدراس اللى بتكرهم حتى انهم 

يروحوا المدرسه

يعنى انا اللى افتكره عن المدرسه الشنطه التقيله اللى بتقطم الضهر ولازم كل يوم بليل اقعد اراجع جدول السبع حصص اللى هيكون عندى تانى يوم عشان مانساش الكتاب بتاع المادة لحسن المُدرس يطين عشتي

وقبل الامتحانات لازم احفظ حاجات قد كدة.. مجرد أصُم مش مهم أفهم.. المهم انى ادخل الامتحان أصب كل اللى حفظته ع ورقة الاسئله عشان اجيب درجة كويسه ف الاخر

حتى ف الجامعه برغم انها كانت عملية مش نظريه بس كانت جامعه خاصه.. كانوا احيانا بيدونا قبل الامتحان حاجات نحفظها عشان نسمعها ف ورقة الاسئله.. ونتيجة الدكتور متطلعش زى وشه ف الاخر

لكن أول ما نخرج من الامتحان ولا بنكون فاكرين أي حاجة من اللى ذكرناه.. بنرميه ورا ضهرنا ونحاول 

نعمله ديليت من دماغنا استعدادا لصم المادة اللى بعدها

وف الاخر يقولك ارمي بقى كل اللى اتعلمته ورا ضهرك عشان الحياة العمليه مختلفه تماما عن اللى انت ذاكرته طول سنين دراستك.. ما طبيعى نكره المدرسه ع التعليم ع اللى عايز يتعلم

ف دول اوروبا بقى بيعتمدوا ع الفهم مش الحفظ.. بيركزوا كمان ع منطقة الابداع اللى جوه كل طفل.. بيشوفوا هو موهوب ف ايه وينموا الموهبه أو يلفتوا نظر الأهل لموهبة ابنهم عشان يشتغلوا عليها

شنطة المدرسة مفيهاش غير كراسه وكتاب وقلم.. القرايه عندهم شىء اساسي من قبل حتى ما يتعلموا يقروا.. من اول ما يدخلوا حضانه لازم كل يوم يروحوا البيت معاهم كتاب والاب أو الام يقروه معاهم ويمضوا ف الكراسه بتاريخ اليوم انهم قروا مع طفلهم الكتاب الفلاني..

مع الوقت بيحب الطفل القرايه.. ولما يكبروا شوية المدرسة بتاخد كل فصل المكتبه يقعدوا فيها حصه كامله ويقروا اللى هما عايزينوا.. وبعدين يستعيروا كتاب ويحافظوا عليه لحد ما يرجعوه تانى المكتبه

الواجب بياخدوه بس يوم الجمعه عشان يعملوه ف الويك اند سبت واحد.. احيانا بيكون عن معلومات عامه لازم يعملوا سيرش ع جوجل عشان يعرفوها ويكتبوها كحل للواجب

اما عن الامتحانات ف بتكون بس لمعرفة مستوي الطالب مش فكرة نجاح وسقوط ومفيش ان اللى يسقط ميطلعش السنة اللى بعدها..

جوه الفصل مقسيمنهم مجموعات.. كل مجموعه ع حسب مستوي الطفل الفكرى.. يعنى الشُطار ف مجموعه مع بعض.. اللى اقل ف نسبة الاستيعاب ف مجموعه تانيه

والامتحان يحددوا بيه مستوى الطفل ف اللى مثلا مستواه بقى أعلى من الاول ينقلوه ع المجموعه اللى أحسن من اللى كان فيها وهكذا..

بيحببوا الاطفال ف المدرسة، بيعملولهم رحلات علميه ورحلات ترفيهيه بتكون بمبالغ رمزيه واحيانا ببلاش..

وساعات بياخدوا الطلبه ف الجنينه اللى جنب المدرسه وكل واحد معاه ورقه وقلم يحاول يرسم اللى هو شايفه ف الجنينه ويكلموهم اكتر عن الطبيعه

بعد اليوم الدراسي بيكون فيه club مدته ساعه الا ربع ف الطبيخ أو كرة سلة أو خياطه.. والطفل اللى clubحابب حاجه منهم بيدفع مبلغ رمزى ويدخل ف ال 

اللى عاجبه

بيخلوهم يعملوا حاجات بإيديهم كمسابقه واللى يكسب له هديه.. يعنى زى مثلا يوم لمشاهير الكرتون يلبسوا الشخصيه اللى يحبوها بس يعملوها من بواقى الحاجات اللى ف البيت عندهم مش يشتروا الهدوم جاهزه

فيه حفلات زى حفلة الكريسمس اللى يغني واللى يمثل واللى يعزف وبيدربوهم فترة طويله ع دورهم عشان ف يوم الحفلة الاهالى كلها تروح تتفرج وتفتخر بوقفة ولادها ع المسرح

ف نهاية كل تيرم بيقابلوا الاهالى كل أهل طفل لوحده ومُدرس الفصل بيشرح لأهل الطفل مستواه كان فين وبقى فين وعايزه يوصل لفين.. ولو فيه أى ملحوظات الاهل حابين يقولوها للمُدرس بيسمعهم بصدر رحب حتى لو نقض عشان ف النهاية المهم هو مصلحة الطفل

متهيألي كدة عرفنا ليه طفل بره مختلف عن طفل جوة.. ومالهاش علاقه بكونه طفل مصرى أو أوروبي ليها علاقة بالبلد نفسها وتفكيرها ومناهجها..

رحاب المليــــحي

ثقافة شعب

لما كنت عايشه ف مصر كنت واخده ع احوالها وأوضاعها ومش 

بستغربها ف حاجة

بس لما خرجت من الصندوق وسافرت بره وتعاملت مع الاجانب ورجعت مصر تاني اجازة.. بقيت بفكر بطريقه مختلفه وبشوف الحاجات اللي كنت واخده عليها عادى انها ﻷ مش عادى ولازم إنى أنقضها

ف مثلا ف ثقافة الطابور..
احنا ف مصر منعرفش يعني ايه نقف ف طابور بنظام وكلنا هنوصل ف الاخر من غير ما نزنق ع بعض ونتخانق

ف لندن خروجاتهم واستمتعهم بيومهم بيبدأ من وقفة الطابور.. يعني لو ف انتظار ترابيزة تفضى ف مطعم حابين ياكلوا فيه.. بيقفوا ف الطابور يتكلموا ويهزروا لحد ما يجي دورهم من غير تأفف وعصبيه

لما بروح أى مصلحه حكومية ف مصر اخلص أى ورقة ولو عبيطه.. بيطلع عيني من المكتب ده للمكتب ده..
واكتبي طلب ولازم يمضي عليه فلان وعلان..

وﻷ؛ لازم تروحي الأول المبنى الفلانى ف منطقه تانيه خالص تمضي عليه وبعدين ترجع لنا تانى.. الخ الخ

ف لندن انت ممكن من مكتب البريد تخلص مصالح كتير اوى.. زى انك تقدم ع باسبور.. تخلص ورق عربيتك.. تغيير فلوس.. تدفع فواتير.. تستفسر عن اى حاجة وهما يدلوك

وكله بيخلص براحه ومن نفس المكان ومن غير ما يشتتوك

دايما ف الاماكن الحكومية بياخدوا وقت طويل ممكن ساعات لحد ما يشوفوا طلباتك.. عشان بيكون قدامك عدد كبير وكل واحد بكلمه وطلب.. ف تلاقيهم دايما كاتبين يافطه ان العصبيه مش هتجيب لك حقك بل بالعكس هتضيعه

عكس مصر ف وقت الزحمه تلاقي اللي صوته بيعلى وشكله هيعمل مشاكل أو يعرف حد مهم يهدوه ويدخلوه هو قبل بقية الناس اللى واقفه
وغيره وغيره

نفسي شعبنا يغير من ثقافته.. هو ده السلاح اللي ممكن نتطور بيه 

ونتقدم كشعب وكبلد

رحاب المليــــحي

طب لندن

كنت دايما ف الأفلام بسمع كلمة: أنا رايح اعمل check up  ف لندن

كنت بسرح بخيالى كده واقول يا سلام دى شكلها الجنه بعينها.. وده دايما طبع اللى إيديه ف المايه..

بس لما روحت لندن وعشت فيها 12 سنة.. استوعبت ان الكلام ده كله هجص..

وان أقل كلمه تتقال: (ربنا ما يحوجنا لطب لندن)

طبعا محدش هيصدقنى بكلام نظري.. ف خلينا مانرغيش وننزل بأمثله عمليه لحالات تبع التأمين الصحي

مثلا: دكتور واحد بس بتسجل معاه ويُسمى الGP، انت وعيلتك طبعا.. وده عادة بتختاره بُناءا على إنه جنب بيتك أو إن حد رشحهولك

مواعيد العمل للدكتور بتكون من 9ص لــ 5م لازم تكون حاجز معاه من قبل كده.. لو حصلت حاجة طارئه ف نفس اليوم الصبح مثلا وحد من الاولاد تعب.. لازم يتعب ما بين 9ص لحد 9.30ص

ده الوقت اللى بياخدوا فيه حالات مستعجله مش حاجزة من قبل كده.. بعد كدة بقى يقولك احجز تانى يوم أو روح المستشفى

لما تروح للGP  ولو حالتك  مش تخصصه بيحولك ع مُتخصص.. لو لقى الموضوع مش حرج أوي وهما دايما شايفين اننا بنتدلع وزى الفل..

 فـــ عقبال بقى ما يبعت حالتك للمستشفى والمستشفى تبعت لك جواب بالميعاد إذ تُفاجأ إن الميعاد لسه بعد 3 شهور..

 أما لو روحت المستشفى منك لنفسك كدة من غير ما يكون دكتور محولك بتدخل ع

( قسم الطوارىء).. الوقت اللى متوقع إنك تقضيه ف قسم الطوارىء مش أقل من 3 ساعات للكبار أو الأطفال..

 لو الحاله مستعجله اوى ممكن يدخلوها على طول.. وتبقى مستعجله من وجهة نظرهم هما مش انت..

يعنى لو انت شايف ان ابنك سخن مولع أو بيتقطع قدامك، بس هما مش شايفين ان الموضوع مستاهل.. هتقعد ال3 ساعات لحد ما تمر بكل المراحل براحه وبهدوء ولحد ما تعرف ابنك بيتشكى من ايه ويدولوه دواء

لان فيه أدويه كتير منها الإنتبيوتك للكبار أو للأطفال ممنوع صرفها ف الاجزاخانات بدون روشته من الدكتور

واحيانا كمان مبيعرفوش يشخصوا الحاله، ف يقولولك احنا هنحجز لك ميعاد ف يوم تانى تعال ونشوفك لو حسيت انك بقيت كويس قبلها ماتجيش.. وهرجع واقول الكلام ده ينطبق ع الكبار والاطفال.. لو طوعتهم ومشيت يبقى خير وبركه وأهو ارتاحوا منك عشان فيه كتير غيرك منتطرين الكشف عليهم..

احيانا بقى كمان بيشخصوا غلط ويلبسوك ف حيطه ويمشوا ف سكه تانيه خالص غير سكة العلاج اللى المفروض يمشوا فيها.. لحد ما حالتك تتدهور وتكتشف انك لازم ترفع عليهم قضيه وعمرهم ما هيطلعوا نفسهم غلطانين..

 وساعات كمان بيعملوا عمليات غلط ويقولوا لك عشان نرجع نعملها تانى مش مضمون نسبة نجاحها ف خلاص كدة..

وقدامى اشخاص لما نزلوا مصر، الدكاتره ماكنوش مصدقين انهم كانوا بيتعالجوا ف لندن من التشخيص الغلط والعمليات اللى اتعملت غلط..

ف زى ما بيقولوا اللى ميعرفش يقول عدس.. والأمثله كتير

 رحاب المليــــحي 

بوليس اه.. زعل مراتى لا

مصرى شُغلته يشترى عربيات ويعرضها للبيع على الانترنت.. جاله واحد انجليزى وعاجبته العربية وقرر يشتريها

وفعلا اشتراها ودفع تمنها ومضي العقد..

اتصل بعدها بمراته عشان يفرحها انه جابلها العربية اللى اختارتها من ع النت
فوجأ بيها بتقوله يرجع العربية.. لإن عاجبتها عربية تانية ع النت

ف رجع للبياع يقوله: معلش انا عايز ارجع لك العربية تانى لحسن مراتى مش عايزاها.. ولو رجعت البيت بالعربية، ده هيسبب لى مشكلة مع مراتى

البياع (المصرى) قاله: لا ماينفعش، انت اشتريتها ومضيت العقد

الاجنبى قاله: خلاص انا هبلغ البوليس

البياع قاله: جو اون

جه البوليس فعلا.. البوليس كان فاكر ان العربية مثلا مسروقة او فيها مشكلة.. وإن المشترى اكتشف ده وعايز يرجعها

لكن البياع (المصرى) شرح الحكاية للبوليس

ف البوليس سأل الاجنبى: هل العربية فيها حاجة غلط؟ مش انت جربتها؟ ومضيت العقد؟

يبقى كدة خلاص مفيش غلط ع البياع.. وانت دلوقتى صاحب العربية.. اما موضوع مراتك.. ف ده تروح البيت بقى، وتحل مشكلتك مع مراتك

المشترى قاله: طيب ممكن ادفع غرامة وارجع العربية؟
البياع وافق وقاله: ادفع

بس لما المشترى رجع كلم مراته ياخد الأذن بدفع الغرامة عشان يرجع العربية بناءا ع طلبها
رفضت الزوجة دفع الغرامة وقالت له: خلاص هاتها مش مشكلة
*******

** شوفتوا الرجالة الاجانب مُطيعين ازاى؟ يوصلوا الموضوع للبوليس خوفا من زعل زوجاتهم

رحاب المليحي

كاش ماشين

ف سنة من السنين (ف لندن)

كان فيه كاش ماشين تبع بنك
HSBC

تيجى تسحب منها مبلغ تديك ضعفه..

بمعنى تسحب 10 تديك 20

تسحب 20 تديك 40

ف بقى كل الناس بتتصل بكل الناس عشان يجوا يسحبوا من الماكينة دى وياخدوا ضعف المبلغ المطلوب

لحد بقى لما البنك اكتشف الغلطة.. ووقف سحب الفلوس قبل ما يتخرب بيته

يا خوسارة ماكنتش ايامها ف لوندن :(

رحاب المليحي

صلاة العيد فى لندن

العيد فى (لندن)
بيحب المسلمين يصلوا فى (الجامع الكبير)
Central Mosque
وهو من اكبر الجوامع فى انجلترا

وبيكون زحمة جدا.. لإنه اكتر جامع بتحس فيه بالعيد.. خصوصا ان التكبيرات فى العيد بس بيكون مسموح انها تبقى فى الميكروفونات اللى ع الشارع

ف وانت جى من بعيد تبقى سامع التكبيرات واكنك فى بلدك مش فى لندن

دايما فى طريقك للجامع يقابلك الناس المتطوعة اللى بتجمع فلوس وكل واحد لغرض مختلف عن التانى.. ولك مطلق الحرية ان تدفع أو لأ

كمان بيقابلك شحاتين شرق اوروبا اللى ده بيكون الموسم بتاعهم ووشوشهم محفوظة كل عيد تلاقيهم عند الجامع

كمان من الحاجات اللى تلفت النظر وجود الشرطة بشكل مكثف وقت صلاة العيد.. مش لأى سبب غير انهم بيحاولوا يقللوا من زحمة المرور ف وقت الصلاة

خصوصا ان صلاة العيد بتتصلى (اربع مرات).. عشان زى ما قلت الجامع الكبير بيكون شديد الزحام.. ف لو صلاة واحدة مش هتكفى كل الناس

خطبة العيد بتكون باللغتين العربى والانجليزى..

وبعد الصلاة، وزى ما بيحصل ف بلدنا تبدأ الأمهات ف تقديم الحلوى للأطفال

وتنتهى صلاة العيد.. وتقريبا ف الغربة العيد بالنسبة لنا هو صلاة العيد.. بعدها مش بنحس بحاجة :)

رحاب المليحي

الشحاتين فى لندن

فى لوندن والبلاد المتقدمة

تلاقى واحد كدة قاعد ف الشارع ومعاه كلب.. وده ما يُسمى بالــــ
Homeless
اللى هما الشحاتين يعنى بالبلدى واللى مالهمش مأوى

تلاقيه قاعد يشرب سجاير وخمرة وحاطيتطلك قدامه طبق عشان تحط له فيه فلوس
وجود الكلب معاه بيكون احيانا عشان يستعطف الناس اكتر
_________
الخنيق فى الأمر إن فيه كتير منهم بتعولهم الحكومة.. بمعنى إنها بتديهم زى مصروف اسبوعى او شهرى.. لكن مش بتديهم بيت
_______

أما الشىء الإيجابى

إنه فى شهر اكتوبر من كل سنة.. تقوم المدارس بحملة لدعم هؤلاء الشحاتين.. عن طريق تشجيع الطلاب انهم يشتروا مُعلبات لهؤلاء الجعانين
وبعد تجميع المعلبات من طلاب المدرسة كلها.. يتجمع الطلاب وأولياء الأمور فى ساعة من صباح اليوم
ويقوم كل فصل بشرح معنى المجاعات فى صورة حوار بين الطلاب وبعدها
وايضا يتخلالها بعض الاغانى المعبرة عن هذا الفقير الغلبان
وف نهاية الاحتفال يأتى متطوع من ال
Charity

ليوسع مفهوم واداراك الطفل لمعنى كلمة
Homeless

وينهى كلامه بإنه مش معنى إنه شخص بلا مأوى يبقى بنى ادم وحش.. ولكن الظروف هى اللى اضطرته لكدة
_________

رحاب المليحي

فتاوى لندنية

- لو سمحت، حضرتك

- صدق الله العظيم.. نعم؟

- هو حضرتك بتتكلم عربى؟

- مش شايفنى بقرأ قرأن بالعربى!! مش محتاجة ذكاء يعنى حضرتك

- معلش انا اسف، اصلى لسه جى لندن جديد ولسه مش مستوعب الدنيا ماشية ازاى؟

- مش مستوعب ماشى، لكن مش بتشوف كمان، احم، لا مؤاخذة القافية تحكم، نورت لندن

- مقبولة منك يا سيدى، انا بس كنت رايح اصلى الجمعة ف كنت عايز أتأكد هلحق الصلاة ولا لأ؟

- (يبص ف ساعته) مهو حسب انت رايح تصليها فى انهى جامع؟

- ازاى يعنى؟

- يعنى لو الجامع الكبير، يبقى يا دوب هتروح ع الصلاة بالظبط لكن مش هتلحق الخطبة.. لكن لو اى جامع تانى من الصغيرين يبقى براحتك بقى.. عشان بيصلوا مرتين

- مرتين؟ مرتين ازاى يعنى؟

- يعنى بيصلوا الجمعة مرتين.. عشان بيكون فيه ضغط ع الجوامع الصغيرة

- حلو الاختراع ده.. طيب بالنسبة بقى لصلاة العيد؟

- لا صلاة العيد بتتعاد اربع مرات بس ف الجامع الكبير

- اربع ايه؟ يعنى بتقعدوا اربع ايام العيد تصلوا وللا ايه، يعنى حضرتك؟

- اه، لا واضح انه مش موضوع انك مش بتشوف بس، وشكل القعدة هطول.. بص يا سيدى الجامع الكبير ده اكتر جامع المسلمين بيحسوا بصلاة العيد فيه.. عشان بيكون زحمة قوى والتكبيرات بتكون فى الميكروفونات برة.. وبرغم حجمه الكبير لكن مش بيستوعب كميات المسلمين المتوافدين عليه ف صلاة العيد.. عشان كدة بتتكرر الصلاة اربع مرات ورا بعض.. تقريبا كل نص ساعة صلاة.. ف الناس كلها تقدر تروح تصلى

- امممم، وكدة ينفع يعنى؟ يعنى تتحسب لك صلاة؟

- ايوة طبعا، دى فتاوى الشيوخ بتوعنا هنا وكله متفق عليها

- طب دلوقتى انا جى هنا سنة، ولسه مش عارف اظبط مواعيد صلاتى ممكن اصلى قصر لحد ما اقدر اظبط حالى؟

- ممكن تصلى قصر السنة كلها لحد ما ترجع بلدك وبيتك

- نعم؟

- طالما مش ف بلدك ولا قاعد ف مكان حاسس انه بيتك.. يبقى مهما قعدت هنا سنين ممكن تصلي كله قصر لحد ما ترجع بيتك وبلدك

- طب السكن اللى انا فيه دلوقتى مفيش جانبه محلات حلال.. اقضيها بقى فول وتونة وابقى نباتى وللا اعمل ايه ف سنتى دى؟

- لا خالص، بص لو مش باستطاعتك انك تروح مكان تشترى منه لحم وفراخ حلال يبقى هات من اللى جانبك

- طب هو يعنى ايه مفهوم الحلال؟

- يعنى مدبوح ع الطريقة الاسلامية

- كان واحد صاحبى بيحكى لى انه جانبه محلين واحد حلال والتانى لأ، والمحل الحلال مغلى اسعاره قوى عشان مفيش غيره ف المنطقة

- يبقى يُحلل لصاحبك انه يشترى من المحل التانى، طالما المحل الحلال بيستغل ان مفيش غيره ف المنطقة ومغلى اسعاره، ف لو صاحبك مش ف مقدوره يشترى الغالى يبقى يشترى من المحل التانى

- اممممممم، طيب معلش سؤال كمان

- اتفضل

- الشغل اللى لاقته مع الاسف بيقدم خمرة وخنزير.. وبرغم انى قدمت ف حاجات تانية كتير، لكن هو ده اللى اتوفقت فيه.. اعمل ايه؟ اكمل وللا استقيل؟

- لو مالكش مورد رزق تانى، يبقى تكمل فيه لكن لازم تدور ع غيره.. ماتسوقش فيها يعنى وتقول هما اللى قالولى

- اخر سؤال بقى، اخر سؤال وافرج عنك.. انا يوميا لازم اصحى قبل الفجر عشان شغلى، وانت عارف العشاء بتأذن ع 11 والفجر بيأذن ع 3.. ف مش بقدر استنى للفجر، ف بصليها قضى وده مضايقنى

- لأ، طالما كدة، يبقى تجمع المغرب والعشاء وتنام.. مادام ظروف شغلك بتحتم عليك الصحيان من الفجرية ومش بتقدر تسهر للعشاء

- هو انت متأكد ان دى فتاوى صحيحة مش فتى؟؟؟ ولا دى فتاوى ع الطريقة اللندنية وصفة تيك اواى؟ نظام خليك فريش انت ف رحلة!!!

- هههه، لا يا عم مش بفتى ولا حاجة وروح أسأل الشيوخ بنفسك

- إلا صحيح، انا باخد بالى ان فيه بنات صغيرين محجبات فى لندن بس احيانا بيكون الحجاب ع لبس نص كوم؟ ده برضه عادى تبع الفتاوى النص كوم اللى انت هارينى بيها من الصبح ولا ايه؟

- هنا فى لندن بيحبزوا ان البنت تتحجب من صغرها، عشان انت عارف انها بلد الحرية كل حاجة فيها مباحة.. ف بتحاول الأهالى انها تخلى الحجاب الزى الطبيعى للطفلة من صغرها.. وواحدة واحدة تتعود ع انه جزء من لبسها مش حاجة غريبة.. عشان مايبقاش فيه تشدد قوى، بيخلوا البنت تغطى راسها الأول.. وبعدين الموضوع يجي براحة.. لكن لو ادينها مطلق الحرية ف لبس الحجاب من عدمه وكانت مثلا وصلت سن المراهقة ف بلد زى دى.. طبعا هترفض وتقولك حجاب ايه ومالبس زى صحباتى ليه؟

- اهاااا، تصدق دى الحاجة الوحيدة اللى مقتنع بيها ف الكلام الكتير اللى انت قلته، هى دى بس اللى استمخيت منها

- ماشى يا سيدى، فرصة سعيدة، ياريت ماتتكررش

- لأ رايح فين، هات نمرة تليفونك بقى لحسن شكلى هحتاجك كتير، ع موبيلات بقى يا صديكى اللندنى

رحاب المليحي

خد فلوسى وعيشنى

لندن بتقف ع قدم وساق وقت الكريسمس والنيو يير.. بيستعدوا لليوم ده تقريبا من اخر شهر اكتوبر.. بيعرفوا يخلوك تشترى ازاى.. بطريقة العرض الوهمية اللى بيعملوها.. مش بس ف اللبس.. لأ كمان ف الفسح..

ف مثلا فى الهايد بارك بتتقلب رأسا ع عقب من جنينة لمدينة ملاهى.. فيها من كل شكل ولون.. مش بس العاب للكبار والاطفال.. لأ كمان سيرك عالمى.. وتزحلق ع الجليد.. ده غير الأكلات وحاجات تانية كتير.. ده كفاية التصميمات والأضواء.. بتكون عايز تتصور فى كل مكان فيها من روعة التصميمات.. بجد بيخلوك تدفع وانت مبسوط ومستمتع كمان بوقتك.. عندهم دماغ تجارية مبتكرة ارفع لهم القبعة عليها..

الكريسمس عندهم إن الناس تهادى بعض.. يعنى لك أن تتخيل لو البنى ادم الواحد يعرف مثلا عشرين شخص مابين افراد عائلة واصحاب.. ملزوم إنه يشترى عشرين هدية عشان المفروض إنه هيجيلوه زيهم..

حتى فى مجال العمل.. بيكونوا حاطين أسماء العاملين فى ورق.. وكل شخص يختار ورقة.. وهو وحظه، يطلع له شخص لازم يجبله هديه

طبعا الحالة الإقتصادية بتنتعش ف الفترة دى انتعاش فظيع مريع.. أى مكان فيه محلات ماتشوفش الأرض من كتر البنى ادمين اللى ماشين عليها.. وكل ما الكريسمس يقرب كل ما الزحمة تزيد فى المحلات..

يوم الكريسمس 25ديسمبر، مش بيكون فيه مواصلات نهائى.. البلد كلها أجازة.. يعنى لو مفيش عربية يبقى ماتتحركش من مكانك.. وسيلة المواصلات الوحيدة اللى بتكون متوفرة هى التاكسيات.. وبرغم ان اسعارها نار من غير حاجة لكن عشان ده بقى السيزون بتاعهم.. بتكون اسعارهم الضعف وده أمر مُسلم بيه..

لكن بقى لو عايز تسافر طيران فده جنان رسمى.. يعنى لو افترضنا ان سعر التذكرة ف العادى ب300 استرلينى ف الوقت ده بتكون ب 1000 وانت طالع.. الف ايه؟ الف استرلينى

بعد يوم 25.. بترجع البلد تشتغل نوعا ما.. وبيبدأ بقى السيل.. فيه محل بيفتح اول يوم سيل الساعة 5 الفجر.. الناس بتكون واقفة طوابير من قبلها مستنية بس باب المحل يفتح ومتعرفش تحط رجلك جواه

وفيه سُياح بتيجى الفترة دى بالذات.. عشان معروف ان سيل اخر السنة فى لندن هو أحسن سيل فى السنة كلها واحسن تخفيضات

المحلات بتكون هتنفجر من كتر الناس.. ده عشان تقف فى طابور الدفع.. فى محلات معينة بتقف بالميت ساعة ونص بس عشان تدفع

تلاقى الناس تقعد تلم تلم اى حاجة قدامها بجنان كدة.. وبعدين تقعد تربع وتريح على الأرض.. وتبدأ تفرز بقى فى الغلة اللى لموها قبل ما يجي وقت الحساب

أما وقت النيو يير والبارات والحركات دى.. برضه تذكرة الدخول بتكون أضعاف السعر الأساسى ف الايام العادية.. وده لازم تكون حاجز قبلها بشهر عشان تلاقى مكان..

ناس بتحب تعيش اللحظة بطولها وعرضها وارتفاعها كمان..

بعد المناسبات دى كلها ما تخلص.. البلد بتهدى وتبقى هس هس.. الناس من شغلها للبيت ومن البيت للشغل.. خلاص بقى كله خلص فلوسه على الهدايا والشوبينج والاحتفال براس السنة.. يادوب يلحقوا يعملوا غيرهم ويحوشوا شوية لحد السنة اللى بعدها

هى الحياة ايه غير شوية شوبينج وخروجات وحاجات فوق بعضها

وكل سنة جديدة يارب تبقى عليكم سعيدة

رحاب المليحي