إتغطى ونام

- انت بتحلم وإنت نايم؟

- لأ، هو أنا فاضى؟ مه يا أركز فى النوم يا فى الحلم

- خالص خالص؟؟ ده إنت عجيب والله

- وإيه العجيب في كدة؟ أنا بنام زى الفسيخة.. يمكن أكون بحلم.. لكن بصحى مش فاكر حاجة.. أو يمكن عشان بتغطى كويس وأنا نايم.. هههههه

- اممم، أنا بقى بحلم كتير

- عادى يعنى، وإيه اللى بتتطلع بيه من الأحلام ديه؟

- ساعات بتكون أحلام بسلى بيها نفسى وأنا نايم.. يعنى مالهاش أى فايدة.. مجرد أحداث من هنا على أحداث من هناك.. لكن ما تتفسرش ولا لها قيمة

- إيه ده؟ إيه ده؟ هو إنت بتهتم قوى كدة بالأحلام لدرجة التفسير!!!!! واااااو

- أيوة طبعا، في احلام كتير بنحلمها تستاهل التفسير.. لإنها كتير بتتحقق زى ما هى أو شبها

- زى إيه بقى يا أبو العريف؟

- يعنى مثلا مرة حلمت إن جدتى ووالدتى بيعيطوا وزعلانين قوى.. سألتهم هو مين مات؟ قالولى تفتكر مين؟ وصحيت على التليفون من أخويا بيقولى البقاء لله فى جدك

- اييييييييييييييييييييه؟؟؟ لأ انت بتهرج!! طب إيه تانى؟

- فى أحلام مش بتكون مباشرة.. لكن برضه لها معنى.. وفى أحلام بتكون عكسية.. ف أهم حاجة إن اللى يفسرها يكون فعلا بيفهم فى تفسير الأحلام.. مش بيفتى والسلام

- لألأ، براحة عليا أنا مش قدك.. يعنى إيه عكسية؟

- يعنى لما تحلم إنك بتعيط قوى يبقى ده هيبقى فرج مش نكد.. لما تحلم مثلا إنك خلفت بنت.. بيكون معناه رزق كبير عشان البنت رزق.. برضه لما تحلم إنك هتموت ده ساعات بيكون معناه إن عندك مشكلة وهاتتحل

- إيه تانى؟

- خلع الضرس ده بقى معناه إن حد هيموت من أقاريبك.. لو مثلا لبست جزمة جديدة.. تبقى داخل على حياة جديدة.. فى حاجات كتير قوى ماقدرش أحصرهالك فى قعدة

- اممممم، هو أنا اينعم مش بفتكر أحلام.. لكن فى حاجة تانية بتحصلى غريبة

- إيه هى؟

- ساعات لما بيحصل قدامى موقف.. بحس إنى شفت نفس الموقف ده قبل كدة.. وكأنه بيتكرر تانى.. لكن عمرى ما بفتكر هو هينتهى على إيه

- دى حاجة بتحصل لناس كتير.. أنا برضه فى مواقف بشوفها بحس إنى ممكن أكون حلمت بيها قبل كدة بنفس تفاصيلها.. أو زى ما انت بتقول إنها حصلت قدامى قبل كدة.. وبرضه بحاول أعصر دماغى عشان أفتكر هاينتهى على إيه.. بس ولا الهوا

- والله؟ طمنتنى، كنت فاكر العيب فيا

- هههه، بما إنك مش بتحلم وإنت نايم.. جربت تغمض عينيك وتحلم وإنت صاحى؟

- كتيييييييييييير، لما بيكون نفسى فى حاجة ومهما بسعى مش عارف أوصلها.. بغمض عيني وبحلم إنى وصلت للى أنا عايزه.. واتخيل واعمل سيناريو وحوار.. مه أنا عايش اللحظة بقى.. حد قدى

- ههههه، على رأيك، هو يعنى حتى الأحلام مش هنقدر عليها كمان!!!

- مه ده اللى ناقص بقى.. عشان يبقى السواد من كله.. ده احنا لما بنحب ننفس عن روحنا شوية بنحلم الحلم ونصدقه ونعيش فيه ونكبره.. يمكن فى يوم من الأيام نقدر نحققه

- صح، بس إبقى اتغطى كويس وانت نايم برضه

رحاب المليحي

العيد فى لندن

- العيد خلاص على الأبواب، كل سنة وانتى طيبة

- فعلا؟ احنا هنا لا بنحس لا بعيد ولا بفرحة

** بغض النظر إن العيد فرحة.. بس فعلا فى البلاد الأوروبية بتفتقد لذة الإحساس بالعيد..

العيد بالنسبة لنا (صلاة العيد) وبس.. لو ماصلتش العيد يبقى هاتحسه يوم زى أى يوم تانى فى السنة..

(الجامع الكبير) فى لندن، وهو معروف بالإسم ده عشان هو تقريبا من أكبر الجوامع فى لندن واسمه Regents Park Mosque

مسموح له فى العيد بس إن التكبيرات تكون فى السماعات الخارجية للجامع.. بحيث إنك تكون سامع التكبيرات وانت فى الشارع.. ودى فعلا أكتر حاجة تحسسك بالسعادة وانت رايح تصلى وتنسيك للحظة إنك فى بلد أجنبى..

البوليس فى اليوم ده بيكون موجود داير ما يدور الجامع.. مش عشان أى حاجة غير إنه يظبط حركة المرور.. بحيث إن الناس تمشى على الرصيف مثلا ماتنزلش الشارع.. وبيكونوا متعاونين ومسالمين لأقصى درجة

صلاة العيد بتتصلى فى لندن (أربع مرات).. من بعد الضحى وحتى قبل صلاة الظهر.. عشان الناس كلها تقدر حسب ظروف أشغالها تحضر الصلاة.. لإن ايام العيد طبعا مش أجازة فى بلد غير مسلمة.. ف بالتالى بيحاولوا يراعوا ظروف الناس كلها.. فتبدأ صلاة العيد من 7 صباحا وآخر صلاة بتكون على 11ص..

الجميل فى الموضوع إن الجوامع بتكون شاغرة بالمصلين فى الأربع صلوات.. وهذا إن دل فإنه يدل على كثرة عدد المسلمين فى لندن.. فالإحصائيات تؤكد إن الإسلام هو تانى ديانة فى انجلترا

أما بالنسبة للمدارس.. فالمدرسة اللى فيها أعداد كبيرة من المسلمين.. بيسمحوا للأطفال إنها ماتروحش أول يوم العيد.. بيقدروا إنهم عايزين يعيدوا وبيحترموا ده كويس..

المدرسة بتكون مفتوحة فى اليوم ده عادى جدا لغير المسلمين.. وعلى آخر ايام العيد بتعمل المدرسة حفلة صغيرة بمناسبة العيد.. وطبعا بيشارك فيها الطفل المسلم وغير المسلم..

أما بالنسبة للتجمعات.. فدى بقى بتكون حسب الظروف.. يعنى لو مجموعة من العائلات كان عندهم أجازة فى اليوم ده.. أو أخدوه أجازة مخصوص عشان يعيدوا بيتجمعوا فى بيت حد منهم بعد صلاة العيد..

أما بقية أيام العيد فأعتقد إنها بترجع للروتين العادى.. وكل واحد بيشوف مصالحه وحياته من تانى.. مكتفيا بإن ربنا كرمه وحس بالعيد أول يوم وخلاص

اما بقى لو جينا للحاجة المهمة جدا وهى خروف العيد.. فده أوبشن مش موجود هنا.. يعنى مينفعش تشترى وتدبح.. ولو أتوجد الموضوع ده ممكن يبقى برة لندن..

كل اللى تقدر عليه يا إما تروح عادى لمحل البقالة وتشترى لحمة عادى جدا زى ما بتعمل طول السنة وتتطبخها براحتك.. أو بتتفق مع محل عربى تدفع له حق خروف مثلا وهو يظبطلك كل حاجة ويديك على الجاهز، على الأكل على طول..

وبكدة طبعا بتفتقد جدا إنك تشوف الدبح.. وبتفتقد أكتر الثواب اللى بتاخده من دم الخروف اثناء الدبح

بس بما إن العيد فرحة يبقى لازم أو على الأقل نحاول نفرح.. حتى لو ماكناش حاسين بأى عيد من أى نوع

وكل سنة وانتم طيبين

رحاب المليحي