يـــــارب

يارب يارب يارب

يارب فك كرب مصر والمصريين

يارب اضرب الظالمين بالظالمين

يارب وقف مصر على رجليها من تانى

يارب ارحم شبابنا واحفظهم واحميهم

يارب هون وصبر ع كل بيت فيه شهيد

كفاية بقى وجع قلب

كفاية قتل

كفاية دم

كفاية مصابين

كفاية حرق

كفاية بلطجية

كفـــــــــــــــاية

رحاب المليحي

نعمة النسيان

** ربنا انعم علينا بنعمة النسيان

دى حقيقة فعلا

بس مش اى حاجة بتتنسى

يعنى هتقولى فاكر اكلت ايه من يومين؟ فاكر دخلت الحمام كام مرة من اسبوع؟

كل دى حاجات هايفة وتافهة طبيعى جدا تقع من الذاكرة

لإن الذاكرة من باب أولى تهتم بحاجات أكبر من كدة وتشيلها ف الميمورى

بدليل إنك ممكن تكون فاكر ايام كتير ومواقف اكتر من طفولتك.. طفولتك اللى مر عليها اكتر من 15 سنة مثلا.. يعنى اه ماتفتكرش اكلت ايه من يومين، لكن تفتكر وبالتفصيل مواقف حصلت ليك من سنين

واحنا ماشين ف الدنيا دى بنقابل فيها مواقف ياما.. فيه منها اللى بيسعدنا وفيه منها اللى بيقطعنا.. وفيه منها اللى بيريحنا.. وفيه منها اللى بيبكينا

احيانا لا إراديا تلاقى نفسك محيت من ذاكرتك المواقف اللى انت مش عايز تفتكرها.. سواء بقى تناسيتها أو نسيتها فعليا

كتير بتكون عايز ترمى ورا ضهرك عشان المركب تمشى.. وعشان تقدر تكمل، مهو لسه الطريق طويل

ف لو انت من الشخصيات اللى مش بتعرف تنسى بسهولة.. يبقى جرب الأوبشن التانى انك تتناسى

بس من اعراض اوبشن التناسى الجانبية..

انك مع اول موقف أو صورة أو كلام شبيه لموقفك المُتناسى.. ف لحظة هتلاقيك شيلت التُراب وسرحت ف ذكرياتك القديمة وقلت: ده انا كنت فاكر نفسى نسيت.. أتارينى بستعبط

تنسى أو تتناسى مش دى المشكلة

المهم انك تتعلم من أخطاءك

الضربة اللى ماتموتش تقوي

واللى اتلسع ف الشوربة.. ينفخ ف الايس كريم

رحاب المليحي

المظاهر مش كل حاجة

زمان كدة كان يقولك:

اعرف الشخص اللى قدامك من جزمته.. يعنى لو لقيت جزمته مش نضيفة يبقى هو مش قد كدة..

بس لو كانت متلمعة بقى وع سنجة عشرة.. ولو كمان لايقة مع هدومه يبقى هو مية مية

الكلام ده بقى عكس مثل تانى دايما بنردده

تعرف الشخص ده؟ اه اعرفه.. عشرته؟ لأ.. يبقى متعرفوش

مهو اصل مينفعش ابدا ابدا ناخد بالمظاهر..

جزمة ايه دى اللى هنعرف بيها البنى ادم اللى قدامنا؟

للاسف المظاهر بقيت هى السائدة ودايما خداعة

تلاقى واحد قدامك مستحمى وفارق شعره من النص ولابس ومتأنتك وع سنجة عشرة.. لكن يفتح بُقه بس ويتكلم.. تبقى عايز تديله باللى ف .......

وواحد تانى غلبان وعلى قده جدا.. بس لو اتكلمت معاه تلاقيه مثقف جدا واحيانا حتى مش بتعرف تجاريه من علمه وثقافته الواسعة

وواحد تالت حافظ مش فاهم.. كل كلامه قال الله وقال الرسول.. لكن كل أفعاله عكس كلامه تماما

وبعيدا عن كل ده

فيه حاجات تانية المظاهر بتلعب فيها دور كبير

زى انك تكون متفرتك حزن من جواك.. بس قدام الناس تهييس وتبين انك عادى ومبسوط.. وتقول يعنى هى الناس ناقصة؟ مهو كل واحد فيه اللى مكفيه.. خلينى اوهم نفسى انى مبسوط يمكن تقلب جد ومودى يتعدل

وزى انك تلاقى واحد عايش حياته بالطول والعرض.. تحسده وتتمنى انك تكون زيه.. بس انت مش عارف ايه سر اللى بيعمله ده؟ مهو ممكن يكون مثلا مريض وبيحاول يغطى على ده بإنه يوهم نفسه إنه سعيد.. يمكن يكون ربنا مش كاتب له مثلا ان يكون له طفل من صلبه.. ف بيحاول يوهم نفسه انه مش ناقصه حاجه

ويمكن ويمكن ويمكن

وقيس ع كدة حاجات تانية كتير

بلاش نتوهم بالمظاهر

المظاهر مش كل حاجة

رحاب المليحي

حالة وفاة

تعرف!

احيانا (حالات الوفاة) بتكون عامل ايجابى لناس تانية

بمعنى انها بتلم شمل ناس كتيرة، عيلة واصحاب واحفاد واقاريب بقالهم زمان ماتقبلوش

يمكن كمان بتجبر ناس متخاصمين إنهم يتقابلوا ويسلموا على بعض بُحكم الموقف.. واحيانا يرجعوا اصحاب تانى..

ويكون اللى جمعهم (عزاء)

رحاب المليحي

انت بقى مع انهى رأى فيهم؟

اختلفت الأراء ما بين الناس اللى مع (تاج) الفيس بوك

والناس اللى ضد (تاج) الفيس بوك

وبما اننا ناس سمتها الديمقراطية .. عشان كدة دايما نسمع للرأى الأخر ونعمل برضه اللى فى دماغنا ف الآخر

الرأى الأولانى يقولك**

لما اشير صورة واعملك فيها تاج.. ده معناه انى بقدرك وانى بعتبرك واحد من اصحابى على الفيس.. ويهمنى أسمع رأيك فى الكلام اللى انا كتبه

ف مايصحش يعنى انك تشيل نفسك من التاج وتتسحب كدة وتخرج من بره بره..

ابسط الايمان يا اخى اعمل لايك واطلع، حتى لو ماقريتش اللى مكتوب

لكن بقى لو عايز تقدرنى علق على اللى مكتوب..

وياااااه بقى لو شيرته كمان.. يبقى كدة انت تمام قوى وصاحب صاحبى

الرأى التانى يقولك**

ده انا بسب والعن كل يوم ف الناس اللى بتعملى تاج عمال على بطال دول

تلاقى حد معرفوش اصلا وعاملى تاج ف صورة هبلة يقولى صباح الخير عليكم

طب اقوله ايه ده؟؟ اهو قفلنى قبل ما يومى يبدأ

ال ويقولك بيقدرنى.. هو انت تعرفنى اصلا يا عم انت عشان اقدرك ولا تقدرنى؟

واتنفخ بقى أنا نوتيفيكشن ع الفيس وعلى الميل وع الموبيل كمان لو موصله بالفيس

ليه يعنى؟ لا يهمنى كلامك ولا كلام الناس اللى هتعلق ع صورته الخُزعبلية

وبعدين مرة فى التانية لاقتنى بشيل نفسى من التاج ولا مش بعلق.. خلاص خف نفسك بقى وبطل تزهقنى بتاجاتك

سبنى كدة منى لنفسى بمزاجى الاقى البوست بتاعك ع الهوم عندى.. لو شدنى هدخل اقراه لوحدى من غير ما تنبهنى بالعافيه لوجوده

عالم غريبة مريبة

** انت بقى مع انهى رأى فيهم؟؟؟

رحاب المليحي

لما

** واحنا صغيرين كنا بنحلم باليوم اللى نكبر فيه
ولما كبرنا أيقنا الحقيقة المُره
إن حزننا على لعبنا المكسورة وفقدانا لحاجتنا الغالية علينا
أفضل بكتير من
حزننا على قلوبنا المكسورة وفقدانا لشخص غالى علينا**

- لما تلاقى طفل مهما كانت صلته بشخص وحبه وتعلقه بيه.. وفجأة يبطل الطفل يسأل عن الشخص ده ومن غير سبب.. اعرف ان الشخص ده مابقاش موجود ف الدنيا

- لما تلاقى قطة ماشية تشمشم حولين سرير صاحبها المريض.. اعرف انها بتشم ريحة الموت اللى قربت

- لما تلاقى شخص يحلم قبل وفاته بأربعين يوم ان الموتى جايين ياخدوه معاهم.. صدقهُ، ف أجله فعلا قرب

- لما تزور مريض وفجأة ولمدة ثوانى تشوف وشه بشكل حد تانى عزيز عليك متوفى.. اعرف ان نهايته قربت

رحاب المليحي