مامى، عايزة شجرة

- مامى

- هااااااا ؟؟

- عندنا ف المدرسة شجرة

- اهلا وسهلا

- إيه يا مامى!! اهلا وسهلا دى؟؟ بقولك عندنا شجرة

- طيب اروح أسقيهالكم يعنى ولا اعمل ايه!!!

- شجرة كريسمس يا ماااااامى

- اااااااااه، كريسمس.. مش تقولى كدة يا روشى.. طيب

- هو احنا ليه مش هنجيب واحدة؟

- عشان الكريسمس ده مش .....

- مااااااااااااااااامى، حلوة الشجرة دى اللى انتى اشترتيها

- شجرة إيه بس يا جومى، ده ورد يا حبيبتى

- ورررررد، اااااااه، حلو الورد اللى فى الشجرة

- مفيش شجرة يا بنتى خاااالص، ده ورد بس

- ها، يا مامى، قوليلى ليه بابا مش هيجبلنا شجرة كريسمس؟

- هو أنا مش قلت لك؟

- لأ يا مامى اتكلمتى مع جومى وماردتيش عليا

- كنت بقولك إننا الكريسمس ده مش بتاعنا عشان احنا مسلمين

- ............

- يعنى كل أصحابك اللى بيتكلموا عربى دول مسلمين معندهمش شجرة

- اااه ليه بقى؟

- عشان هما زيك مسلمين.. لكن الميسات بتوعك اللى بيتكلموا انجليزى دول ممكن يكون عندهم شجرة أو بيحتفلوا بيه عشان هما مش مسلمين ومش بيصلوا زينا ومش بيصوموا زينا

- ماااااااااااااااااامى، أنا معاية شجرة

- يقطع الشجر وسنينه.. معاكى فين يا جومى؟

- أهو

- ده كارت يا حبيبتى وإنتى رسمة عليه شجرة الكريسمس

- طيب بصى، أهو

- Dear Santa, Can you bring me a gift? Jumanna

- يا ولاد ...... الناس الطيبين.. ده انتوا بتشبطوا العيال بقى!!!

- هو بيقول اييييييه؟

- مين ده يا جومى؟

- فى الورقة بيقول ايه؟

- اسمها مكتوب ايه فى الكارت؟

- مامى

- نعم يا روشى

- أنا لازم اجيب هدية للميس

- ليه ياختى؟

- عشان أصحابى جابولها هدية

- مش هما جابولها.. كفاية عليها كدة.. هى هتتطمع بقى ولا ايه؟

- بس يا مامى أنا عايزة اجيبلها زى اصحابى

- هو أنا مش لسه بقول إننا مش بنحتفل بالكريسمس.. احنا عندنا العيد الصغير اللى هو بعد رمضان والعيد الكبير اللى بتلبسى فيه لبس جديد

- طب ما احنا عملنا حفلة الكريسمس فى المدرسة.. وأنا روحت وغنيت فيه.. وإنتى مازعقتيش!!

- احتفلى براحتك بيه فى المدرسة لكن فى البيت لأ.. وبعدين ما المدرسة فى العيد بتعملكم احتفال صغير بالعيد.. واللى مش مسملين بيحتفلوا برضه معاكى.. صح؟

- اه، بس أنا ع.......

- باااااااااااااااااااااابى

- اهلا، اهلا، جوووومى

- بناتك عايزين شجرة كريسمس

- أمهم اسمها لوولا

- طب سانتا مش هيجي يُغزنى بهدية.. مثلا ورقة بمية استرلينى وأنا نايمة أوخ؟

- يُغززززك؟ أوعدك يا حياتى أول ما يخترعوا ورقة بمية هبقى أخليه يُغزك بيها

- كددددة، طييييب، ياللا يا بنات على بابى.. بابى هيجبلكم شجرة وهدايا.. استلقى وعدك بقى من الزن والنكد اللى هتشوفه

- هيييييييييييييييييييييييييييييييييييييييييييييييه

رحاب المليـــــــحي

يوميات زوجة مثالية جدا

صحى (متولى) على سينفونية بيت هوفين والبيت اللى جانبه، اللى دايما بتصحيه من أحلها نومه.. وكان خلاااااااص هياخدها على حمارتة البيضا العرجة ويطير بها من سحنة مراتة و..........

- هاه؟ إيه ده؟؟ هو ده كان حلم؟؟ كويس إنى ماهلفطش فى الكلام وأنا نايم.. لحسن حرمى المصون ما هتصدق وتفتح لى محضر.. كنت بتحلم بمين؟؟ ومين أذن لك تحلم من اساسه؟ و...........

- شششش خررررررر ششششش خررررررر

- اوووووف، هو أنا مكتوب عليا كل يوم أصحى على السيمفونية العاشرة لبيت هوفين دى (شخير مراتى)؟؟.. حسبى لاتشفطينى.. ممكن أحطلك فردة الشبشب قدام بقك.. أهو تبقى مصلحة مع سحبك للأوكسجين اللى فى الأوضة تسحبيه بالمرة..

- هاااااااااوم، انت صحيت؟ ايه فى ايه؟ مالك بتبحلق فيا كدة ليه؟ شكلك ناوى تقول شكل للبيع على الصبح؟

- يافتاح يا عليم، هو أنا جيت جانبك يا حياتى!! أصلك كنتى واحشانى.. ف كنت بتفرج على الملاك وهو نايم

- ها!!!! اه، معلش ياروحى فهمتك غلط، إلا هو الدور على مين يعمل الفطار النهاردة؟

- (هو إنتى صحية كدة همك على كرشك!!!) أنا يا روح روحى من جوة.. بس ممكن تحضرى لى الحمام الأول أخد شاور وأفوق.. عشان أقدر أمخمخلك فى فطار روعة

- اووووف، (كل حاجة على دماغى.. إيه مودة حضرى الحمام دى اللى الرجالة خدوها من الأفلام الأبيض والأسود.. أنا مش فاهمة ياخواتى والله.. أهو هو ده اللى بناخده من الأفلام اللى بتبوظ عقول رجلتنا.. اوووف)... اتفضل يا حبيبى الحمام جاهز

- تسلميلى........ يح ووووووووع... اوف.. يييييييييييح... لالالالالا.. عااااااااااا

- مالك يا متولى يا حبيبى عامل زى الفرخة المسلوقة كدة ليه؟

- زى؟؟ ده أنا كان فاضل تجبيلى بصلة وتعملى عليا الشربة.. حراااااااااااااااااااام عليكى

- احم، إيه ده؟ هى المية كانت سخنة للدرجة دى!!! اوووووو، سورى يا قلبى ماخدتش بالى.. دى كانت مظبوطة وحياتك عندى.. بس اكيد فوقتك وعمرتلك الطاسة.. أنا هدخل أشيك على إيميلى واشوف صحابى على الفيس بوك لحد ما تعمل أحلى فطار يا أوحى

- ( مش فاهم ستات إيه دول؟ هو أنا يعنى عشان بحبها (إلا حد ما).. وبحاول أريحها.. يبقى خلاص بقى تسوق فيها!!! ماسمعتش المثل اللى بيقول: (إن كان حبيبك عسل.. ماتخدش الطبق وتبيعه).. الأكل جاهز يا قطتى، يا بطتى

· (وبعد ما مسحت الأطباق كلها)

- امممم، يعنى مش بطال.. ماستمختش قوى.. الأكل ماكنش معمول بمزاج.. الفول ناقص ملح.. والسوسيس مع البيض إختراع فاشل.. مفيش احسن من نفسى أنا فى الأكل

- نعم ياااااااختى؟ نعم يا حيلتها؟؟؟ ده أنا هاخد الأطباق أحطها فى المطبقية على طول.. مش محتاج إنى أغسلهم

- ياااااااااااااااااااااااي، بيئة، إيه جايباك من ورا ال COW.. أمك؟

- اشمعنى؟

- كانت بتتوحم فيك على ملاية لف!!!!

- لأ وانتى الصدقة خلفتنى ورمتنى جنب جامع.. وشمرت ودعيت عليا.. إلهى تتجوز واحدة تطلع عينيك وعين اللى يتشددلك

- امممم، خلاص خلاص، ما علينا، تسلم إيدك يا أوزتى

- (ناس ماتجيش غير ... )

- بتقول حاجة يا متولى؟

- لأ يا روحى، أنا بس مبسوط إن الأكل نال إعجاب السيادة

- إيدك على اللى فى جيبك بقى.. عايزة أنزل أعمل شوبينج

- نعم؟

- إيه ماسمعتش؟ عايزة أنزل اعمل شوبينج

- أنهى شوبينج فيهم؟

- لألأ، أوعى تفهمنى غلط.. أكل طبعا.. هو أنا بحط حاجة فى جيبى ابدا يا روحى.. مهو كله علشانك.. عشان صحتك.. عشان تتخن كدة وتربرب

- اسكتتتتى، هو انا مقولتلكيش.. أنا قررت اعمل رجيم.. أصلى حاسس إنى حامل فى توأم..

- يا رااااااااجل؟ اممممم، طيب هات برضه فلوس لزوم أكل الدايت.. تصدق ده بيكون أغلى من الأكل العادى.. ياللا بس كله يهون عشان التوأم

- حسبى الله ونعمة الوكيل.. الواحد مش بيعرف ياخد معاكى لا حق ولا باطل

- هاهاهاها، ميرسى

- أنا هلبس وانزل بقى يا حبيبى.. ياللا عشان ماتتأخرش على شغلك

- شغـــ ..... يا لهوووووووووووى الساعة بقيت 9 وانا لسه بالبيجامة، ده المدير هيعلقنى، ده أنا اللى معاية مفتاح مكتبة النهاردة.. إلهى ..............

- إنت لسه هتدعى عليا!! إخلص بقى وقوم .. ماتخنقنيش، صدعتنى، لوك لوك لوك لوك

· (بليل لما رجع الحبيب المصون من شغله متفرتك من التعب)

- انتى نمتى بدرى كدة ليه؟ الساعة لسه ماجتش 10!!!

- هاااااا، هااااااااااوم، تعبانة يا متولى تعبانة.. يعنى مصحينى عشان تسألنى نمت بدرى ليه؟ ماينفعش تأجل السؤال لبكرة؟

- مش مهم الإجابة، المهم إنى جعااااااااااااااااااان.. ماكلتش حاجة من ساعة ما نزلت الصبح

- جعان؟ لأ إحنا ماتفقناش على كدة؟ هو الغدا كان على مين النهاردة؟

- نعم ياختى؟ انتى مش عاملة اكل!!!!!!

- أصل، أصل، أنا رجعت من الشوبينج بعيد عنك رجلى متكسرة بقى مش قادرة أحطها على الارض.. روحت حاطاهم فى مية وملح.. وقلت اتسلى وأنا قاعدة.. أحط مانوكير.. بص إيه رأيك؟ بذمتك مش لونه تحفة؟ صح؟

- مانوكير؟ هو ده كان تبع شوبينج الدايت برضه؟

- دايت؟؟ ااااااه، والله انت دمك شربااااااات يا حبيبى

- آه ف إيه بقى؟ ما تردى عليا!!!!

- بص هتلاقى فى المطبخ علبة تونة.. أنا ضربت تلاتة وسيبتلك واحدة تتعشى بيها..

- تصبح على خير بقى عشان الحق الحلم من اوله

- ..............

· (اكيد متولى يإما هيجيلوه جلطة، يإما هيموت ناقص عمر.. بس ماتنكروش إنها مثالية قوى جدا فحت ردم)

رحاب المليحي

إتغطى ونام

- انت بتحلم وإنت نايم؟

- لأ، هو أنا فاضى؟ مه يا أركز فى النوم يا فى الحلم

- خالص خالص؟؟ ده إنت عجيب والله

- وإيه العجيب في كدة؟ أنا بنام زى الفسيخة.. يمكن أكون بحلم.. لكن بصحى مش فاكر حاجة.. أو يمكن عشان بتغطى كويس وأنا نايم.. هههههه

- اممم، أنا بقى بحلم كتير

- عادى يعنى، وإيه اللى بتتطلع بيه من الأحلام ديه؟

- ساعات بتكون أحلام بسلى بيها نفسى وأنا نايم.. يعنى مالهاش أى فايدة.. مجرد أحداث من هنا على أحداث من هناك.. لكن ما تتفسرش ولا لها قيمة

- إيه ده؟ إيه ده؟ هو إنت بتهتم قوى كدة بالأحلام لدرجة التفسير!!!!! واااااو

- أيوة طبعا، في احلام كتير بنحلمها تستاهل التفسير.. لإنها كتير بتتحقق زى ما هى أو شبها

- زى إيه بقى يا أبو العريف؟

- يعنى مثلا مرة حلمت إن جدتى ووالدتى بيعيطوا وزعلانين قوى.. سألتهم هو مين مات؟ قالولى تفتكر مين؟ وصحيت على التليفون من أخويا بيقولى البقاء لله فى جدك

- اييييييييييييييييييييه؟؟؟ لأ انت بتهرج!! طب إيه تانى؟

- فى أحلام مش بتكون مباشرة.. لكن برضه لها معنى.. وفى أحلام بتكون عكسية.. ف أهم حاجة إن اللى يفسرها يكون فعلا بيفهم فى تفسير الأحلام.. مش بيفتى والسلام

- لألأ، براحة عليا أنا مش قدك.. يعنى إيه عكسية؟

- يعنى لما تحلم إنك بتعيط قوى يبقى ده هيبقى فرج مش نكد.. لما تحلم مثلا إنك خلفت بنت.. بيكون معناه رزق كبير عشان البنت رزق.. برضه لما تحلم إنك هتموت ده ساعات بيكون معناه إن عندك مشكلة وهاتتحل

- إيه تانى؟

- خلع الضرس ده بقى معناه إن حد هيموت من أقاريبك.. لو مثلا لبست جزمة جديدة.. تبقى داخل على حياة جديدة.. فى حاجات كتير قوى ماقدرش أحصرهالك فى قعدة

- اممممم، هو أنا اينعم مش بفتكر أحلام.. لكن فى حاجة تانية بتحصلى غريبة

- إيه هى؟

- ساعات لما بيحصل قدامى موقف.. بحس إنى شفت نفس الموقف ده قبل كدة.. وكأنه بيتكرر تانى.. لكن عمرى ما بفتكر هو هينتهى على إيه

- دى حاجة بتحصل لناس كتير.. أنا برضه فى مواقف بشوفها بحس إنى ممكن أكون حلمت بيها قبل كدة بنفس تفاصيلها.. أو زى ما انت بتقول إنها حصلت قدامى قبل كدة.. وبرضه بحاول أعصر دماغى عشان أفتكر هاينتهى على إيه.. بس ولا الهوا

- والله؟ طمنتنى، كنت فاكر العيب فيا

- هههه، بما إنك مش بتحلم وإنت نايم.. جربت تغمض عينيك وتحلم وإنت صاحى؟

- كتيييييييييييير، لما بيكون نفسى فى حاجة ومهما بسعى مش عارف أوصلها.. بغمض عيني وبحلم إنى وصلت للى أنا عايزه.. واتخيل واعمل سيناريو وحوار.. مه أنا عايش اللحظة بقى.. حد قدى

- ههههه، على رأيك، هو يعنى حتى الأحلام مش هنقدر عليها كمان!!!

- مه ده اللى ناقص بقى.. عشان يبقى السواد من كله.. ده احنا لما بنحب ننفس عن روحنا شوية بنحلم الحلم ونصدقه ونعيش فيه ونكبره.. يمكن فى يوم من الأيام نقدر نحققه

- صح، بس إبقى اتغطى كويس وانت نايم برضه

رحاب المليحي

العيد فى لندن

- العيد خلاص على الأبواب، كل سنة وانتى طيبة

- فعلا؟ احنا هنا لا بنحس لا بعيد ولا بفرحة

** بغض النظر إن العيد فرحة.. بس فعلا فى البلاد الأوروبية بتفتقد لذة الإحساس بالعيد..

العيد بالنسبة لنا (صلاة العيد) وبس.. لو ماصلتش العيد يبقى هاتحسه يوم زى أى يوم تانى فى السنة..

(الجامع الكبير) فى لندن، وهو معروف بالإسم ده عشان هو تقريبا من أكبر الجوامع فى لندن واسمه Regents Park Mosque

مسموح له فى العيد بس إن التكبيرات تكون فى السماعات الخارجية للجامع.. بحيث إنك تكون سامع التكبيرات وانت فى الشارع.. ودى فعلا أكتر حاجة تحسسك بالسعادة وانت رايح تصلى وتنسيك للحظة إنك فى بلد أجنبى..

البوليس فى اليوم ده بيكون موجود داير ما يدور الجامع.. مش عشان أى حاجة غير إنه يظبط حركة المرور.. بحيث إن الناس تمشى على الرصيف مثلا ماتنزلش الشارع.. وبيكونوا متعاونين ومسالمين لأقصى درجة

صلاة العيد بتتصلى فى لندن (أربع مرات).. من بعد الضحى وحتى قبل صلاة الظهر.. عشان الناس كلها تقدر حسب ظروف أشغالها تحضر الصلاة.. لإن ايام العيد طبعا مش أجازة فى بلد غير مسلمة.. ف بالتالى بيحاولوا يراعوا ظروف الناس كلها.. فتبدأ صلاة العيد من 7 صباحا وآخر صلاة بتكون على 11ص..

الجميل فى الموضوع إن الجوامع بتكون شاغرة بالمصلين فى الأربع صلوات.. وهذا إن دل فإنه يدل على كثرة عدد المسلمين فى لندن.. فالإحصائيات تؤكد إن الإسلام هو تانى ديانة فى انجلترا

أما بالنسبة للمدارس.. فالمدرسة اللى فيها أعداد كبيرة من المسلمين.. بيسمحوا للأطفال إنها ماتروحش أول يوم العيد.. بيقدروا إنهم عايزين يعيدوا وبيحترموا ده كويس..

المدرسة بتكون مفتوحة فى اليوم ده عادى جدا لغير المسلمين.. وعلى آخر ايام العيد بتعمل المدرسة حفلة صغيرة بمناسبة العيد.. وطبعا بيشارك فيها الطفل المسلم وغير المسلم..

أما بالنسبة للتجمعات.. فدى بقى بتكون حسب الظروف.. يعنى لو مجموعة من العائلات كان عندهم أجازة فى اليوم ده.. أو أخدوه أجازة مخصوص عشان يعيدوا بيتجمعوا فى بيت حد منهم بعد صلاة العيد..

أما بقية أيام العيد فأعتقد إنها بترجع للروتين العادى.. وكل واحد بيشوف مصالحه وحياته من تانى.. مكتفيا بإن ربنا كرمه وحس بالعيد أول يوم وخلاص

اما بقى لو جينا للحاجة المهمة جدا وهى خروف العيد.. فده أوبشن مش موجود هنا.. يعنى مينفعش تشترى وتدبح.. ولو أتوجد الموضوع ده ممكن يبقى برة لندن..

كل اللى تقدر عليه يا إما تروح عادى لمحل البقالة وتشترى لحمة عادى جدا زى ما بتعمل طول السنة وتتطبخها براحتك.. أو بتتفق مع محل عربى تدفع له حق خروف مثلا وهو يظبطلك كل حاجة ويديك على الجاهز، على الأكل على طول..

وبكدة طبعا بتفتقد جدا إنك تشوف الدبح.. وبتفتقد أكتر الثواب اللى بتاخده من دم الخروف اثناء الدبح

بس بما إن العيد فرحة يبقى لازم أو على الأقل نحاول نفرح.. حتى لو ماكناش حاسين بأى عيد من أى نوع

وكل سنة وانتم طيبين

رحاب المليحي