فلاش باك

صحيت من نومها كسلانه عايزة تنام تاني.. بس لانها عارفه ان وراها مشواير لازم تعملها ف قامت من سريرها تجر رجل وتأخر التانيه

بصيت ف مرايتها.. لأول وهله كانت الدنيا مزغلله والصورة ف عينيها مش ثابته.. بس بعد ثواني ثبتت الصورة وبدل ما تشوف نفسها وهى لسه صاحيه.. شافت نفسها وهى لسه متجوزة جديد من سنين وسنين.. 

شافت عمرها اللي عدى.. شافت حياتها اللي اختلفت كتير من ساعة ما كانت ف بيت ابوها.. 

كانت هى اللي ع الحجر.. تتطق ف دماغها حاجة تعملها بدون التفكير ف عواقبها.. 

افتكرت دلع ابوها لها وطلباتها اللي كانت مجابه مع تحفظ امها ع تصرفات ابوها ودلعه فيها لكن ابوها ماكنش يهمه غير سعادة بنته.. 

شافت يوم كتب كتابها لما كان صوت ابوها مش طالع ف الميكروفون وهو بيعيد الكلام ورا المأذون.. برغم ان ف الطبيعي ابوها صوته عالي جدا ف هزاره وجده

شافت حزنه ف عينيه وهو بيودعها يوم سفرها لجوزها وبيوصيها وصايا الاب لبنته.. وهروبه من النظر لعينيها الباكيه عشان مايبكيش

شافت يوم ما عرفت انها حامل وهى ف غربتها ومعهاش حد يفهمها يعني ايه امومه.. 

ولما ولدت وماكنتش فاهمه يعني ايه ترضع بنتها وتلاقيها لسه بتعيط وان ده معناه انها لسه جعانه واخر ما تغلب وتتعب من كتر زن بنتها تقعد تعيط جانبها

شافت ازاى ف غربتها اخدت السلم من اوله.. تتنقل من شقه لشقه من مكان ضيق لمكان اضيق.. لجيران محشيشين.. لتيجي تطلع السلم شايله بنتها تتكعبل ف واحد مرمي ع الارض اوفر دوز

شافت ايام ومرمطه مفيش واحده كانت مدلعه ف بيت ابوها ترضى تعيشها.. لكن مع دعاء امها لها بالصبر وتحمل المسئوليه قدرت تعدى صعاب كتير ..

شافت فرحتها لما بترجع بلدها وتقابل اصحابها اللي معاها من قبل جوازها وقد ايه بتضحك معاهم من قلبها.. بيوقف معاهم الزمن وترجع البنوته الدلوعه اللي ماكنتش شايله مسئولية حاجة.. 

قدام مرايتها حسيت قد ايه فات من عمرها كتير.. بحلوه ومره.. بخيره وشره.. 

مش زعلانه ع امبارح اصله مهما كان صعب وعلم فيها بس اكيد اتعلمت منه وعلمت فيه..

يمكن المسئوليه والغربه اخدوا منها كتير بس برضه ادوها ايجابيات ممكن تهون عليها 

خايفه من بكرة شايفاه علامة استفهام كبيره.. لكن بتدعي من قلبها يهون اللي جي زى ما هون اللي فات

لا في حاجة مضمونه ولا الحياة وردي ع طول الخط.. اصلها باكيدج مينفعش تاخد منها اللي يعجبك وترمي الباقي

فاقت ع رنة تليفونها انها تأخرت ع مشاويرها.. رمت حمولها ع الله ونزلت وزى ما الحياة هتوديها هتروح.. اصل رب هنا رب هناك

رحاب المليــــحي