( أنا نفسى
اتكلم وافضفض مع حد معرفهوش.. بس اهم حاجة انى مش عايزة اهانة وتجريح ف التعليقات)
أنا ف العشرينات، شخصية اتمتع
بالجمال والروح الطيبة المرحة الحمدلله.. اتجوزت جواز تقليدى من حوالى سنتين ونص
تعيسة جدا ف جوازى.. من أوله
اهانة وضرب وسوء معاملة وشك مُطلق..
وده لإن من وجهة نظر جوزى المصون ان الزوجة
لازم تطيع جوزها ف كل حاجة وماتقولش غير حاضر ونعم..
وهو بقى شايفنى انى مستفزة ف
ردودى وافعالى عشان كدة بيضربنى
حتى ف المعاشرة الزوجية بتعرض
للاغتصاب.. هو مش شايف انى احيانا بكون رفضاه وببكى وبتألم.. متخيل انى كدة سعيدة
معاه
ولما اشتكيت لأهلى من افعاله..
اتعصبوا عليه وطلبوا منه انه مايعملنيش كدة ونصحونى انى امشى حالى بقى عشان ماخسرش
بيتى وجوازى.. استمريت معاه تحت ضغط اهلى والمجتمع وحاولت اغير منه لكن للاسف
ماكنش فيه فايدة
ولكن هو مابطلش اهانة وضرب فيا..
بالعكس ده بقى حبسنى ف البيت ليل نهار.. مابيخرجنيش لوحدى غير ف الشديد الأوى..
وهو اساسا طول اليوم برة البيت وسايبنى لوحدى
بدأت ادخل ع النت واتعرف ع شباب..
وبرغم انى انسانة محترمة جدا وبخاف ربنا..
لكن بكل مرارة واسف وقعت ف الخيانة
العاطفية..
بقي من السهل قوى انهم يحسوا
بضعفى ويبدأوا ف كلام الغزل والاعجاب واللى بسمع عكسه تماما من جوزى..
ومع الوقت
بدأت اضعف وانجذب للموضوع ده بشكل مش طبيعى برغم انى ماكنتش كدة قبل الجواز
بقيت حاسه انى سهله بدرجه انا مش متحملاها.. ولا قادره حتى
اسيطر على مشاعرى زى زمان
لا منى قادره اشبع عواطفى مع جوزى.. ولا منى قادره احمى مشاعرى من اى متطفل عليها
وطلبت الطلاق اكتر من مرة وصممت عليه.. وللاسف فى كل مرة بفشل فشل ذريع تحت ضغط الاهل وخصوصا ان عندى اولاد
وكتير بحاول ابعد عن النت والتزم بالصلاة
وقراءة القرأن ..
ولكن شوية ومابقدرش وارجع تانى للنت وابعد تانى عن ربنا
انا بدعى ربنا انه يقدرنى انى ماقعش تحت اى اغراء عاطفى..
لكن ايه الحل ؟
ايه الحل فى مجتمع بيرفض فكرة الطلاق ومصلحة بيت فيه اولاد.. اهم من اى حاجة تانية
مفيش اى تقدير للناحية العاطفية والمعاملة الطيبة للمرأة
هل الجواز هو انى اعيش علشان ولادى بس؟
مش من حقى اعيش حياة طبيعيه زى اى حد فالدنيا ؟
طب ازاى اقدر اسيطر على عواطفى اللى محتاجه جدا اشبعها وانا فالسن ده؟!!
اللى هو اى بنت فالدنيا
بتكون مشتاقة لكلمة حلوة.. واحساس احتواء من رجل يكمل معاها حياتها لكن انا مش
لاقيه ده
ايه الحل؟
رحاب المليحي
17 comments:
Asmaa Afify
ربنا يعينها على طاعته ويهديلها جوزها ويحفظها من شياطشن الانس والجن
Mona Omar
مسكينة
No Comment ... ana lo Maknhaa a5od 3yali w ahraab mn al beet w m3rfsh 7ad makani
هند
Ragaa Mostafa
فيه اختراع اسمه الخلع
Samah Abdou
دة حال ستات كثييير للاسف .. عايشين عشان يكبروا الولاد و ما يتسموش مطلقة وعشان يهربوا من نظرة المجتمع اللي ما بترحمش في وسط انكار تام لمشاعر المرأة و احتياجتها و بفتكر هنا العبارة الشهيرة " هي واكلة شاربة هتحتاج ايه اكثر من كدة "....
Ramy Elalfy
الموضوع صعب طبعا
بس انا في نظري هي محتاجه تكون قويه وترفض الوضع اللي هي فيه ده عن طريق الطلاق او الخلع وفي كل الاحوال هي هاتكون مرتاحه
Marwa El Etriby
وجع , ربنا معاها
Aziza Galal
ربنا يقويكى ويقوى ايمانك ويصبرك يااااارب
Toksee Do
طالما جوزك بالهمجية والغباء ده ،، لازم تتطلقي وتتجوزي حد بيحبك ويربي ولادك
بصي انا عارفة انه صعب.. بس الراجل مبيبقاش محتاج مجرد واحدة عايشة معاه يتجوزها وخلاص.. حاوملى تلعبى اكتر من دور فحياته عشان الملل والمشاكل دا, يعنى مفيش مشكلة تحاولى تبقى صديقته حتى لو هيشتكيلك منك انتى ويطلع فيكي العبر كانه بيحكى لحد غيرك.. دايما فكرى نفسك وفكريه ان كلامكوا دا عشان تلاقوا حل وتخللوا حياتكوا احسن مش عشان كل واحد يعمل مشكلة على كلام التانى وميكملش الحوار.. خللى هدفك انكوا توصلوا للمشاكل وتلاقولها حل وربنا يوفقكوا يارب
Sayed El Keblawy
مش قادر اتعاطف معاكى مهما كان سوء معاملة جوزك ليكى دا عمره ما هيكون مبرر للخيانة لربنا ولجوزك وعيالك واهلك
اما الحل يا ترفعى قضية طلاق او قضية خلع من ورا اهلك وتحطيهم قدام الامر الواقع او تصبرى وتحاولى تصلحى منه بالنقاش والمعاملة الطيبة وصدقينى الراجل بسهولة جدا تقدرى تكسبى قلبى مهما كان شخض قاسى وسئ
Marwa Aref
لا هى مش مش عارفه تطلق هى بتخضع لضغط اهلها وتوافق على الرجوع لكن لو اصرت هى على الطلاق محدش حيرجعها بالعافيه ... المشكله فيها هى .. هى اللى لازم يكون اصرارها اكتر من كده على تغيير حياتها
Ahmed El Desouky
من الآخر كده موضوع مينفعش الطلاق علشان ولادك والكلام ده عمره ما بيحل مشكلة،
هي بتقول أن اهلها هم كمان ضاغطين عليها علشان تكمل معاه ورافضين موضوع الطلاق
معلش لا ولا دها ولا اهلها هينفعوها لما تقع في الغلط أو تخون جوزها،
المشكلة أنها مع الوقت ومع زيادة المعاملة السيئة من جوزها ليها ممكن الشيطان يلعب في دماغها ويصورلها موضوع الخيانة ده كإنتقام لنفسها من جوزها، وانها كل ما تخونه كل ما تقلل من رجولته وتآخد حقها، وهي في الواقع هتكون بتضيع نفسها وحياتها وحياة ولادها.
الحل أنها تصمم على الطلاق حتى لو أهلها رفضوا، تضغط عليهم، ممكن الانسان يستمر مع انسان في خلاف بينهم علشان أولادهم، لكن لو الخلاف ده بسيط، لكن في أوقات بتكون الحياة مستحيلة
هي تصمم على الطلاق وتقنع اهلها أن الحياة بينهم خلاص بقت مستحيلة وتخليهم يقفوا في صفها ويضغطوا عليه علشان يطلقها.
الكلام ده لو فعلاً الحياة معاه مستحيلة وهي حاولت تصلح العلاقة بينهم كتير وتكلمه بالراحة وتقوله أن ردودها دي مش بتقصد منها استفزازه ولكن هي عايزة تشاركه الرأي ومتبقاش مجرد حاجة ملهاش قيمة، لازم تحاول تخليه يلين برضه، ولما تستنفذ كل محاولاتها، وقتها تصمم عل ىالطلاق.
وده ميمنعش ولا يديها مبرر للي هي بتعمله، معاملة جوزها السيئة ليها مش مبرر انها تخونه أو تروح تسمح لناس غريبة تتغزل فيها وهي عارفة غرضهم من الكلام ده.
ولازم تحط في دماغها أنها طول ما بتعمل حاجة غلط وبتستمر فيها عمر ربنا ما هيقف جنبها علشان الموضوع يتحل، بالعكس ممكن يتعقد أكتر.
Shahenda Salem
صبره عشان أولادك !!؟؟ هل انتي شايفه ان أولادك هيكونو طبعيين مع الي بيشفو في معملت زوجك ( بابا هم ) ليكي
مستحيل .. انتي كده مضغوطة وأكيد ده لو مش مقصر علي علاقتك بأولادك ( الي المفروض مستحمله عشنهم) دلوقتي هيقصر بعد كده حرام عليكم أنتو الاتنين يا يراعي ربنا فيكي يا تثبتي علي قرار الزواج .
Heba Emam
تفتكري ربنا حلل الطلاق ليه؟؟ بالرغم من انه ابغض الحلال..
علشان عندما تستحيل العشرة بين الزوجين ... يكون الطلاق حلا
و انا شايفه انك تهددي جوزك بانك طالبه الطلاق لو متغيرش في كذا و كذا و كذا.. و شوفي نفسك برضو ممكن تكوني مقصرة في امور اكيد مش حتحكيها عن نغسك.. و اطلبي منو الحوار بدلا من الضرب و الاهانه..
و ان لم يستجب .. احمي اولادك من وحش زي دا ممكن يهينك اماهم فتصغري في عنيهم و ممكن يعملهم عقد نفسيه .. ربنا يحميكم و يحفظكم و ييسرلك الخير..
و اتقي الله في زوجك برضو و انتي على زمتو.. و اتقي الله في نفسك و اةلادك اذا اصبحتي مش على ذمتو..و ثقي ان من يتق الله يجعل له مخرجا.
Moussa M. El-Bermawy
تحاول تخف من ردود افعالها اللى جوزها بيقول انها سبب فى تصرفاته تجاهها. وتشوف كبير عيلة يكلمة ويضغط عليه يحاول يغبر تصرفاتة. انا مبرجحش الطلاق فى اغلب الاحوال لازم يكون فى حل وبالنسبة لموضوع النت لازم بأى شكل تبعد عنه عالاقل عشان متخسرش نفسها
تحاول تخف من ردود افعالها اللى جوزها بيقول انها سبب فى تصرفاته تجاهها. وتشوف كبير عيلة يكلمة ويضغط عليه يحاول يغبر تصرفاتة. انا مبرجحش الطلاق فى اغلب الاحوال لازم يكون فى حل وبالنسبة لموضوع النت لازم بأى شكل تبعد عنه عالاقل عشان متخسرش نفسها
برماوى
Post a Comment