إن كيدهن عظيم

أنا بنت من أسرة متوسطة، كل راس مالها إنها ربتنا كويس.. وبرغم ان عيلة والدى غنية جدا إلا إن والدى متوسط الحال

كان نفسى اعمل حاجة لأهلى اخليهم يفخروا بيا، وأثبت لنفسى وليهم إن الفلوس مش كل حاجة

ذاكرت كويس قوى ف ثانوية عامة وربنا كرمنى وجيبت 99% ودخلت صيدلة وفرحت قلب أهلي بيا

ولما بقيت ف تالتة صيدلة،

 اتقدم لى واحد قريبى.. لكن والدى ماكنش موافق عشان هو خريج تجارة وانا صيدلة.. فمعناه ان شهادته أقل منى 

حاولت اقنع والدى بارتباطنا.. ف عشان يخلص من الموضوع ده ولو مؤقتا، طلب منى تأجيله لحد بعد تخرجى.. وفضلت انا وقريبى مرتبطين لكن مش رسمى سنتين لحد تخرجى

بعدها جالنا قريبى واتقدم لى رسمى.. ولكن والدى رفضه تماما وحصلت خلافات ما بينهم كتير.. وبرغم انى وقفت ف صف قريبى وحاولت أصفى ما بينهم لكن والدى رفض الصُلح والموضوع اتقفل

وبعدها بكام شهر فوجئت بماسدج منه على الفيس بيقولى فيها انى لازم اكون اول حد يعرف ان خطوبته الاسبوع الجى.. وانه هيرتبط بواحدها لا بيحبها ولا يعرفها لمجرد ارضاء اهله..

ولإن اللى مارضهوش لنفسى مارضهوش لبنات الناس.. قطعت علاقتى بيه نهائيا

وفجأة بعدها ظهر ف حياتى شخص تانى.. أى بنت تتمناه..  دكتور، وسيم، ابن ناس

وحبيته، وتأكدت وقتها ان حبى لقريبى ماكنش حب.. كان مجرد تعلق بأول واحد قالى بحبك

وبحكم وجودى انا والدكتور ف شغل واحد.. ف كنا بنتقابل كتير وهو كان عارف انى بحبه..

وكان معانا زميلة ف الشغل، الأول كنت بعزها وبرتاحلها.. لكن لما هى حسيت ان ممكن يكون بينى انا والدكتور حاجة

فوجئت بيها جاية تقولى انها كانت ع علاقة بيه.. بس اهله رفضوا ارتباطهم رسمى عشان هى مطلقة

وفضلت مترصدلنا بالنظرات والافعال، وراحت وقعت ما بينى وبينه وقالت له كلام ماحصلش اساسا.. وفضل الحال ع كدة

وانا وهو كانت علاقتنا شغل بس، لكن حبى له جوايا انا بس..  لحد ما جالى يوم واعترف لى بحبه.. وارتباطنا ببعض، واتفقنا اننا هنفاتح اهلاينا عشان نحوله الى ارتباط رسمى

لكن بعدها هو انشغل ف تجهيز عيادته ف قل الاتصال والمقابلات قلت ما بينا

وزميلتنا ف الشغل لاقيتها بتقولى انه خرج مع واحدة تانية..

 لما اتصلت بيه اتاكد، قالى انه فعلا معاها عشان بيخلصوا شغل سوا.. طبعا ماصدقتوش

طلبت منه يقطع علاقته بيا، رفض، وقالى ع البنت اللى ماشى معها دى كلام وحش جدا عنها وعن سُمعتها.. وانه معندوش استعداد يخسرنى انا.. لكن هيقطع علاقته بيها هى نهائى

وبعدها توفيت جدتى اللى كان بالنسبة لى زى امى وقريبة من قلبى جدا

ومالقتوش للاسف وقف جانبى.. 

ولما اتصلت زميلتنا تعزينى، لاقيتها بتحكى لى انه ع طول مع البنت التانية.. ومش مشغول ف عيادته ولا حاجة، وانهم بيتقابلوا كتير.. 

وانه يوم ما اتصل يعزينى كان مع التانية ف السينما ف نفس الوقت

اتحرق دمى من كلامها.. كلمته أواجه بكلام زميلتنا، مأنكرش

وتانى طلبت منه يقطع علاقته بيا نهائى ، الاول رفض لكن بعد شوية وافق

وقطعت معاه فعلا، الغريبة انى كنت حاسة انى عاملة زى الأم اللى بترمى ابنها لكن خايفة عليه ليضيع أو يُقع

 كنت مستنيه انه هيتصل بيا تانى، ندمان ويعتذر واسامحه لكن للاسف ده ماحصلش

وعرفت انه لسه مع البنت دى، 

ولجبروت البنت بقيت تتصور معاه وتبعت لى الصور عشان تحرقنى اكتر 

بعدها قررت انى اركز ف شغلى وانساه..  قدرت مع الوقت اتنساه لكن مقدرتش انسى الوجع اللى ساببهولى الحب ده..

ماقدرتش انسى الخيانة والألم، خصوصا لما تيجى من أقرب الناس.. وفقدت الثقة بكل الرجالة

لكنى واثقة ف ربنا انه هيعوضنى خير ف يوم من الايام

رحاب الملـــيحي