يا ما جاب الغراب لأمه

- بس يا واااااد، اوعى تتشئلطى من فوق التلاجة يا بت.. انت ياااااض انزل من فوق النجافة.. جننتوووووونى

- يووووووووه، ايه يا ولية صوتك جايب لأخر الشارع.. نفسى مرة ارجع البيت الاقيكى كدة (كايوت)

- كا.... إيه يا خويا؟ هو انت تخرج لى طول اليوم ترجع لى لسانك مقلوب.. يقطع القهوة على الديش اللى فى القهوة اللى أكلك دماغك ده.. يابااااااى

- يا ولية ماتغيريش الموضوع ادخلش عليكى كدة مرة الاقيكى مسرحة شعرك اللى ضارباه ف الخلاط ده ع طول عامل زى القط لما تحطى ديله ف الكهربا وشعره يقف.. الاقكيش صوتك بعد الشر عليه واطى.. او حتى عمل لى ميفاجأة

- هىء، ياما جاب الغراب لأمه يا عينيا.. ميفاجأة ايه يا حيلتها؟

- ممممم، يعنى مثلا مثلا تلفي لى قرطاس كدة وتخلى العيال يلونوه احمر واخضر شفتشى وتحطي لى فيه يجى مية لحلوح كدة

- نعم نعم، انا اللى احطلك فيه!! يا إئيحة يا تلئيحة، مش كفاية انى عاملة زى التلاجة اللى شغالة 24س مابتفصلش، ده انا عاملة زى الثور اللى داير ف الساقية.. ع ابوكوا كلكوا

- خلاص خلاص يا عم الثور، ايييه قصدى يا ام العيال.. ده انا كنت بقول مثلا.. هو الحلم حُرم ولا يكنش حُرم؟

- عالم واطية معندهاش حاجة من الاحمر ده ابدا

- بتقولى حاجة يا ام العيال؟

- مابقولش، عايزشى انت حاجة يا ديك البرابر؟

- الحقى الواد هيدخل الغسالة ويقفل عليه

- ياللا اهو يشيل الجلخ اللى عليه من لعبهُ ف الشوارع ليل نهار

- انا جعان، عندك ايه يتاكل؟

- عندى سم فيران ينفع؟

- لأ، خليه للحلو

- يا مرارتى انا ياما، هو انت ايه؟ مابتشبعش انت وعيالك طلبات؟ هى الواحدة مننا ماينفعش ترمى جتتها ساعة زمن كدة.. وتنزلوا كلكوا من ع ودانها وماسمعش لحد فيكوا صوت! صعبة دى؟ صعبة؟

- ايه يعنى نحط نفسنا ع الهزاز ولا نعمل ايه؟ ماتقولى كلام يُعقل يا ولية، أُمال انا متجوزك ليه؟

- لااااااا يا عينيا ده انت لو متجوز شغالة فوووول اوبشن جاهزة من مجامعيه كان زمان كل حتة فيها سليمة بس مستقلة بذاتها.. كان زمانها رجعت التوكيل وملاقوش منها فايدة ف قلبوها قطع غيار.. ايييييييييييييييه مفيش احساس؟ مفيش رحمة؟

- فيه بولبويف فى التلاجة ولا العيال قضوا عليه؟ ما انا عارفهم طالعين طفسين زى...... حماتى

- ايه قلت حاجة؟ حد جاب سيرة أمى باين؟

- لا خالص، ده انا بقول طالعين أكيلة يعنى زيي

- ع العموم مفيش حاجة تتطفحوها دلوقتى، لسه هنزل اعمل شيبينج

- تعملى ايه يا ام العيال؟

- شششــــيبينج يعنى اتسول، قصدى اتسوق

- هو انتى بتقعدى ع القهوة من ورايا ولا ايه يا ولية؟ عرفتى الكلمة ال الآفرنجة دى منين؟

- لا يا خويا دول من الهوانم سُكان العُمارة، هو انا فاضية للقهوة والكلام الفاضى ده، انا ست (فيزى).. ست عاملة، يعنى مشغولة ع طول

- فيزى؟؟ لااااا ده انتى حالتك مايتسكتش عليا بتاتا

- انا هروح اشرب لى كوبية تى فى الفيفتى ع القهوة لحد ما تجهزى الاكل ياختى

- بدل ما انت كدة زى قلتك تعال ساعدنى.. على الاقل قطع لى البصل اللى بيعمينى ده وانا مش ناقصاه

- لا لا البصل بيخلينى اعيط.. وانا راجل مايصحش انى اعيط

- لا ما انت مش واخد بالك الدموع دى مفيدة للعينين، اه ونبى ياخويا.. انا سمعت ده ديك النهار ف الراديو

- إن كان كدة ماشى، اهو الواحد يترحم شوية من لسانك اللى عامل زى المبرد شغال عمال ع بطال

- ايوة كدة يا ابو العيال، ورايا ع المطبخ، هع

رحاب المليحي