حدوتة جوه حدوتة

يا ماما، يا ماما

انا جبت قصة من المدرسة.. قريتها قبل كدة بس بحبها.. تعالى احكيهالك

- الحدوتة بتقول: كان فيه مرة بنوتة اخدت حتة تورتة من التلاجة من ورا مامتها.. جت مامتها سألتها هى وأخوتها مين اللى أخد حتة التورتة؟

- ردت البنوتة وقالت: أنا يا ماما اللى أخدتها.. ابتسمت مامتها وقالت لها: انا مبسوطة انك قلتى الحقيقة وماكذبتيش، بس بعد كدة لازم تستأذنى الأول

- وللا ايه يا محمد؟

- محمد كان مش مركز معاهم وماسك كتاب بيقرا فيه حدوتة بيحبها

- الحدوتة بتقول: كان فيه حرامى بيحب يسرق قوى مع انه مش محتاج.. وفى يوم قرر واحد صاحبه يعلمه درس ماينسهوش.. قاله ع مكان ممكن يلاقى فيه فلوس كتير.. وفعلا راح الحرامى المكان ده.. دخل بشويش ف الضلمة واول ما حط ايده ع الفلوس.. المكان كله اتملى نور والبوليس قبض عليه ودخل السجن.. لما دخل السجن كان معاه كتاب بيحب يقراه

- حدوته بتقول: كان فيه واحدة وواحد بيحبوا بعض.. بس اللى كانت بتحبه ماكنش معاه فلوس يتجوزها.. وسنة ورا سنة والعمر بيجرى، قررت انها تضحى بيه مع أول عريس يتقدم يدفع أكتر.. واتجوزت فعلا أول عريس اتقدملها.. وضحيت بحبها وسعادتها وكسبت الفلوس.. وخلفت ولد كانت كل طلباته أوامر.. وكل حاجة بالنسباله تيجى بالفلوس وماكنش بيحب التعليم.. بس مامته قعدته ف يوم تقرا له كتاب كانت بتحبه قوى

- قصته بتقول: كان فيه فلاح كسلان، مش عايز من الدنيا غير انه ياكل وينام.. مراته ياما قالت له لازم تشتغل عشان انت وراك مسئولية وبيت وأسرة.. يقولها: ويعنى اللى اشتغلوا اخدوا ايه؟ ولو كترت مراته ف الكلام يضربها ويقولها: اومال انا مخلف عيال زى الورد ليه؟ عشان هما اللى ينزلوا يشتغلوا.. تقوله: مش حرام عليك دول لسه صغيرين.. وواجبنا اننا نعلمهم ونكبرهم لحد ما يقفوا ع رجليهم.. يقولها: يا شيخة! لما يتمرمطوا ف الشوارع الحياة هتعلمهم ويبقوا رجالة

- وف يوم نزل عيل من عياله يشوف اكل عيشه زى كل يوم عشان يرجع يحط الفلوس ف حجر ابوه اللى كل همه ياكل وينام ويقعد ع القهوة..

- كان ماشى سرحان زعلان ان أبوه أجبره يسيب المدرسة عشان يشتغل عند ميكانيكى مفترى يضربه علقه كل يوم.. ماشى مش دريان جت عربية بأقصى سرعة خبطيته راح ف ساعتها

- أبوه لما عرف الخبر ماصدقش وفضل مشلول لساعات طويلة من الصدمة.. وعرف ان مراته كان عندها حق.. وانه غلطان انه رمى عياله وهما صغيرين ف الشوارع هى اللى تربيهم.. وكان ندمان ندم شديد.. بس بعد ايه؟

- ولما راح القرافه يقرا لإبنه الفاتحة ويطلب منه يسامحه.. لاقى بنت صغيرة هدومها مقطعة بس بتعرف تقرا وماسكة قصة صغيرة على قدها فيها حدوتة بتحبها

- الحدوتة بتقول: كان فيه بنوتة صغيرة بتروح كل يوم المدرسة لابسة هدوم نضيفة وعندها ماما وبابا بيحبوها.. وكل يوم تيجى لمامتها مبسوطة ومعها قصة جديدة من المدرسة ويقروها سوا

وتستمر الحياة وتستمر قصصها وحواديتها التى لا تنتهى.. وكل ما هنعيش هتقرا وهنعرف اكتر

قصص نحبها ونتعلم منها وقصص نكرها ونتجنبها وقصص تعلم فينا

رحاب المليحي