مواقف عيالية

- انا زهقانة عايزة اخرج

- وانا كمان

- طب روحى كدة قولى لمامى اننا عايزين نخرج

- مامى، مامى، مامى

- ها؟

- انا اتخنقت

- اتـــ ايه ساعدتك؟

- اتخقنت يا مامى

- ازاى يعنى؟ انتى فاهمة اساسا معنى الكلمة؟

- اتخنقت زورى وجعنى

- ولما هو وجعك بترغى كتير ليه؟

- هو احنا مش هنخرج؟

- لا ما انتى مريضة بقى ومخنوقة..

- يا مامى .......

- امشى من قداااااامى

**********

- ياللا عشان تناموا

- بس انا مش عايزة انام دلوقتى يا مامى

- بكرة عندك مدرسة ياختى وبتقرفينى عشان اصحيكى الصبح

- بس يا مامى .........

- يااااااااااااالا انتى لسه هتبس_بسيلى

- اصل انا مش مستريحة

- وايه بقى اللى مش مريح حضرتك ؟

- لما بنام مش بلاقينى مستريحة

- !!!! تصبحى ع خير

- طب ممكن انام ف سرير اختى؟

- لا مش ممكن

- اصلى مش مستريحة ف سريرى

- جررررررررررررررررر

**********

- خلصتوا اكل؟

- للللللسه

- هو احنا هنلعب! ياللا بقى خلونا نخلص

- مامى، انا عايزة اكل تانى

- مفيش وقت اخلصى عشان نلحق ننزل

- بس انا لسه جعانة، حطيلى حبة صغيرين

- يا بنتى ارحمى اهلى بقى، ياللا هنتأخر

- جعانة يا مامى بقى

- ياللا وهبقى احطلك فرخة ف ساندويتش، ااااااااخلصى

******

- اهىء، اهىء

- نعم؟ العياط المرة دى ليه؟ حكم احنا نايمين صاحيين بنعيط، يا نكدية هانم

- عاااااااا

- هتقولى في ايه؟ وللا اسيبك تخبطى راسك ف الحيط؟

- مش عايزة اروح التمرين

- ليه بقى ان شاء الله؟

- مش بحبه يا مامى

- استنى لحد اخر السنة وبعدين نقرر نكمل فيه ولا لأ

- مامى بليز ادينى فرصة

- اديكى ايه يا حيلتها؟

- فرصة ماروحش

- الا هو انتى بتجيبى الكلام الغريب المريب ده منين؟!

- ........... اهىء

رحاب المليحي