انتمة اه، انتمة لأ

لما تسأل حد ايه رأيك ف الأنتمة ما بين الولد والبنت؟ بتؤمن بيها ولا لأ؟
أول رد تلقائى ومن غير تفكير تلاقيه بيسألك:
أنتمة ارتباط ولا صداقة؟!

هى الأنتمة بقيت تُعبر عن (الارتباط) من امتى؟
ماكنتش على ايامى الكلام ده
ما علينا

هتلاقى نوعين من التفكير لا يمتوا لبعض بصلة

التفكير الأول** ( رأى آيا منهم: ولد أو بنت)

- اه طبعا مؤمن بيها جدا.. لازم يكون ف حياتى صديقة وتكون غير كل بقية البنات اللى فى حياتى.. ماكدبش عليك احيانا ممكن الصداقة تقلب بحب وف الاخر ممكن نخسر بعض خالص

- لكن ده مش قانون متعارف عليه يعنى.. كتير جدا الصداقة بتستمر.. وبالعكس ممكن البنت تكون أقرب لى من انتيمى الولد

- احيانا بتفهمنى من غير ما اتكلم.. وبنكون فعلا اخوات واصدقاء وبنخاف على بعض.. اخوات بمعنى الكلمة مش مجرد عنوان لحاجات بتحصل غلط بينا

- بتكون صداقة مبنية ع الاحترام والتفاهم.. حتى الغيرة فيها مسموحة.. لإنها غيرة معزة وخوف ع الطرف التانى.. مش غيرة خنقة وحب، وارتباط، وجواز، وكوشة.. ومانجيلكش ف حاجة وحشة يا معلم

- بتكون أنتمة تحمل مشاعر جميلة لطرفين بيكملوا بعض.. لكن مش عايزين من ورا معزتهم لبعض لا مصلحة ولا ارتباط

- اسرارهم مع بعض.. ومصايبهم كمان مع بعض

- بس احيانا لما كل طرف منهم بيرتبط رسمى. تلاقى الخطيب أو الخطيبة بيغيروا من كونهم (انتيم)

- العريس يقول: مارضاش يكون لمراتى انتيم.. ع اساس انى كيس جوافة يعنى؟

- والعروسة تقول: طالما انا دخلت حياتك يبقى محتاج انتيمة ف ايه؟ متهيألى انا أولى بأسرارك.. ولا ناوى تحكيلها بقى حاجات مش هتحكيهالى؟ ولا يكونش ناوى تشتكيلها منى لما اضايقك؟ هاااااااه ؟

- هما عيلة ف بعضيهم بقى ودى مشاكلهم يحلوها مع بعض.. بلا وجع دماغ
**************

التفكير التانى** (رأى الولد أو البنت)

- انتمة؟ انتمة؟

- هو فيه انتمة ما بين ولد والبنت؟ تفى من بقك

- دى كلها افتكاسات ابدوعها الشباب عشان يحللوا اللى بيعملوه

- طبعا حرام.. يعنى ايه يكون ليا انتيم ولد؟ مالهم البنات يعنى؟ خلصوا ولا خلصوا؟

- احنا اتولدنا وكبرنا على العيب والحرام.. ومفيش حاجة اصلا اسمها صداقة ما بين الولد والبنت.. ده فُجر

- ده لو ولد طلب منى كشكول المحاضرات بتكسف وبقول يا ارض ابلعينى.. ما عنده ياختى صحابه الصيع.. وانا مالى كان من بقية اهلى.. اللى اختشوا ماتوا صحيح

- لا لا لا، انتمة؟ يا حوستى... انتى عايزة اهلى يقطعونى حتت ولا ايه؟

- اللى يكتب عليا رسمى هو ده اللى يبقى جوزى وصديقى وانتيمى.. غير كدة يبقى لا يجي جانبى ولا لسانه يجى ع لسانى

- حتى زمالة الشغل الواحد.. لازم تبقى محسورة على صباح الخير يا جارى انت ف حالك وانا ف حالى.. وكبيرنا كلام ف الشغل.. لكن مرقعة البنات بتاعة اليومين دول بقى بحجة انهم زمايل ف الشغل.. دى قلة ادب وقلة تربية..

- اهالينا ربونا ع ان ده حرام.. يبقى ده حرام ومايصحش من غير تفكير

- ال انتمة ال؟

رحاب المليحي