العين فلقت الحجر

دارى ع شمعتك تقيد

كنا دايما زمان بنسمع المثل ده
ساعات كنا بنعمل بيه بس لحد ما الموضوع يكمل وبعدين ننشر الخبر..
واحيانا تانية ماكناش بنقدر نصبر وننشر الخبر من قبل حتى ما يحصل
تلاقى الناس خايفة عليك وتقولك: (انت ايييييه! مش بتتبل ف بقك فولة؟ يا عم دارى ع شمعتك... عشان الحسد)

لكن احنا كان لينا وجهة نظر تانية، وهى إننا فرحانين وعيونا بتلمع من الفرحة.. ف مش عايزين نكتم فرحتنا..

كمان عايزين الناس اللى حولينا تشاركنا فرحتنا.. لإن لما بنشوف فرحتهم ف عينيهم لحاجة تخصنا احنا مش هما، ده بينعكس علينا ويخلينا طايرين من ع الأرض طير
حاسين بمدى حبهم ومعزتهم لينا.. مقدرين فرحتهم بينا اللى احيانا ممكن توصل لدموع الفرحة

ده كان زماااااااااااااااااان***

دلوقتى بقى تحس ان كل الناس بتتصنت ع كل الناس.. عشان يشوفوا يا ترى ايه اللى عند ده مش عند ده!!

يا ترى ايه اللى فيه ايدك مش عنده، ف يرشقك العين المتينة ويقول ف عقله:( ياااااا بختك)..

لكن ف وشه الابتسامة تكون من هنا لهنا مع الجززز ع الاسنان
ويقولك من تحت ضرسه: (يا حبيبببببى مبروووووووووك، انت مش متخيل فرحنلك قد ايييييه)

وف سره يقول: (ياريتنى كنت انا مش انت يا بعيد، هو انا ناقص ايد ولا رجل عشان ماوصلش للى انت وصلت له؟!)

- الكحكة ف ايد اليتيم (كتير) بتكون عجبه


ولما تقول: (ده انا حصلى وجرالى مصايب قد كدة.. بس ياللا الحمدلله)..

يقول: (اااااه خايف من الحسد، بيبعد عنه العين.. ليه يعنى؟ هنحسده ولا هنحسده!! حكم)

بس يبوصلك وتحس الدمعة هتفر من عينيه ويقولك: (معلش اهى اخدت الشر وراحت، المهم الصحة، هتعمل غيرها اكيد. بس انت متزعلش نفسك)

ومن جواه تلاقى قلبه بينط يفط لحد ودانه.. فرحان انه شايفك متكدر وحزين
______________

ليه بقينا وحشين قوى كدة؟
ليه مابقناش شايفين غير نفسنا وبس؟
ليه محدش بيفرح لحد وكله بيضرب ويخزوق كله؟
ليه؟

رحاب المليحي