لندن رايح راجع.. التأمين الصحى

- حوبا، حوبا

- ها، مالك فيه إيه؟

- بنوتتك سخنة شوية

- آه عارفة

- إيه هو اللى آه عارفة.. يا بت بلاش برود.. هو دة اللى اتعلمتوه فى بلاد التلج

- اطلعى من دماغى بقى.. إديتها دوا للسخونية وشوية وهاتلاقيها باردة

- يا بنتى قومى نوديها للدكتور.. مش شايفها مفرفرة إزاى!!

- دكتووور؟ قلبك أبيض.. الساعة دلوقتى 7 بالليل وكله بيقفل هنا الساعة 5.. وغير كدة لازم تكونى حاجزة ميعاد.. وماينفعش أى دكتور لازم الدكتور اللى إحنا مسجلين معاه.. ولو افترضنا إنى عايزة أحجز طوارىء.. يبقى لازم اتصل بيهم 9 صباحا

- لا والله؟ يعنى لازم الناس تعيا ما بين 9ص و5ظ؟ صح كدة؟ وليه ماينفعش أى دكتور وخلاص؟

- هو دة النظام.. علشان تبع التأمين الصحى.. لكن لو ناوية تكعى بقى روحى يا حياتى عند أى دكتور وإدفعى الفيزيتا.. وبعدين إتعالجى من حسرتك على اللى دفعتيه بعد كدة

- وبالنسبة للناس اللى بتعيا بعد مواعيد العمل الرسمية؟ إيه مصيرهم؟

- عليكى وعلى الوحدة الصحية.. قصدى على المستشفى اللى تبع الحكومة برضه.. ياخدوا بياناتك وتقعدى شوية.. وبعدها ممرضة تشوفك تشتكيلها همك وتقوليلها إيه اللى تاعبك.. ولازم شوية أمينة رزق ويوسف وهبى علشان تتقنى الدور.. لأن فى الطبيعى لو الممرضة شايفة إنك بتدلعى وإن الموضوع مش مستدعى مجيتك.. هتقولك خدى الدوا الفلانى أو الأفضل إنك تشوفى الدكتور بتاعك.. وإنها بتقول لك كدة لمصلحتك علشان توفر وقتك.. بدل ما تقعدى معاهم تلات ساعات انتظار.. وفى الآخر الدكتور يقول لك نفس الكلام

- تلات إيه؟؟؟؟؟ لييييييه؟ بتاع إيه يعنى؟

- شفتى إزاى بوفر عليكى حرقة الدم علشان أنا حونينة.. وبحكيلك على السيناريو اللى هيحصل لو روحتى تقوليلهم البنت سخنة يا حرام.. بوفر عليكى إنك تشوفي الأحداث لايف

- لأ بجد؟ كل دة انتظار؟ ده العيان يفطس يا بنتى رسمى.. قال وإحنا اللى بنتريق على مصر والطب فيها.. ده إحنا على كدة فى نعمة

- أصل لندن فيها نقص دكاترة.. والحياة عندهم هنا أولويات.. يعنى مثلا لو العيان جه بعربية الإسعاف.. يبقى دة أولوية عن اللى جى على رجله.. وبما إن برضه اللى بييجوا بعربية الإسعاف كتير فبيتصنفوا برضه.. حسب ما الممرضة بتشوف الحالة ومين يشوفه الدكتور قبل التانى..

المشكلة بقى إن ساعات بيحرقوا الدم وعليهم برود يا لهوى عجب.. لأنهم طبعا بيمر عليهم حالات وحالات.. فمش بيصعب عليهم حد.. ممكن تكونى تعبانة بجد لكن هما شايفينك بتدلعى..

- طب ماشى لو افترضنا التلات ساعات دول للكبار أهو ممكن يستحملوا لكــــن ...

- لأ لأ هى هى، الصغيرين نفس الشيستم.. تلات ساعات برضه وأولويات..

يا مؤمنة مرة كانت البنت حرارتها عالية وعندها إمساك.. وكنت أول مرة أشوفها تعبانة كدة.. وديتها المستشفى، الهانم الممرضة قالت لى معندهاش حاجة دول شوية برد وحرام تستنى تلات ساعات.. روحت واديتها أدوية برد.. لكن كانت برضه الحرارة مش بتنزل وكمان بتخترف وإمساك بقى بالعشر أيام.. وديتها تانى كنت شاكة إن عندها التهاب فى اللوز.. وقعدت يا أختى التلات ساعات زى الشاطرة.. وفى الآخر قابلت الدكتور ف إدانى ربع قزازة آنتي- بيوتك..

- هههههه، ربع؟؟ وليه جه على نفسه كدة؟ طب ما روحتيش من الأول الأجزاخانة وريحتى نفسك ليه؟

- علشان يا ستى ممنوع صرف أنتي-بيوتك للأطفال بدون روشتة

- ممم، دة أنا تعبت من سماع الحكاية بس.. إيه المعاملة دى يا ناس!!

- روتين يا أمى، روتين حتى النخاع.. طب أضحكك بقى.. إنتى عارفة لو مثلا فى حاجة تاعباكى وحولك الدكتور على متخصص.. ممكن جدا يدوكى الميعاد بعد شهرين ولا تلاتة

- هااااااا؟؟؟؟؟

- آه والله، شايفين إن حالتك ممكن تستحمل شهرين عقبال ما يشوفوكى.. هههههههههه

- أنا والله لسه مش قادرة أستوعب اللى إنتى بتقوليه ده.. بس ده الطبيعى يعنى؟ يعنى مفيش معاملة أحسن من كدة؟ يعنى .....

- ماتهنجيش ماتهنجيش، بصى أنا بحب فيهم إهتمامهم بالمريض لما يكون بين إيدهم.. النظافة برضه سواء الشخصية أو نضافة المكان حاجة تتحسب لهم.. ومش بيملوا إنهم يسمعوكى ويتكلموا معاكى.. ولو فيه حاجة فى إيديهم يعملوها مش بيتأخروا

- لكن دة برضه مايشفعلهمش

- آهو مفيش حاجة كاملة، ساعات بيجى منهم وبيكونوا أحسن كتير من غيرهم وساعات بيكونوا عايزين الضرب.. عادى بقى اتعودنا

- طب وعلى كدة بقى بيعرفوا يشخصوا الحالة كويس؟

- (إبتسامة صفرا) والله يعنى ..... فى الحقيقة ....

- لأ متهزريش دول ظلمهم اللى طلعهم دكاترة لو بجد هتحبطينى بإجابتك

- أنا من وجهة نظرى الشخصية إن دكاترة مصر قرود عنهم.. وبنظرة واحدة بيعرفوا عندك إيه.. بغض النظر عن الإهمال والحوادث الغريبة اللى بنسمعها من عمايل كتير منهم يوميا..

لكن الدكاترة هنا بقى فيه منهم زى الدكتورة بتاعتنا كدة نادرا ما تكشف عليكى.. تسمع شكوتك وتكتب لك على العلاج وشكرا

- ههههه، لالالا بجد؟ بجد؟ مش بيكشفوا كمان؟

- آه والله يا بنتى، سيبك إنتى.. المهم الاهتمام والنضافة.. ههههه

- بقولك إيه أنا داخلة أنام.. لحسن أعصابى تعبت منك إنتى وطب لندن بتاعك دة

رحاب المليحي