لندن رايح راجع.. الإعلام وتأثيره

- إيه دة هو إنتم كان عندكم ضيوف يا حوبا؟ أسيبكم ساعة وأنام أى حد كدة يدخل البيت.. ناس غريبة والله

- هههه، آسفين على الإزعاج سعادتك حضرتك.. بس ماكانش فيه ضيوف.. دة عمو بتاع تراخيص التليفزيونات

- عمو مين يا اختى؟

- أقعدى أقعدى آحكيلك.. حاكم إنتى بتاخدى وقت علشان تستوعبى.. وأنا رجلى هتورم من الواقفة لحد ما أفهمك

- إيه دة؟ إيه دة؟ طلعى عليا أوشاعات بقى.. ما علينا.. أفهم بقى مين عمو دة؟

- أفهمك، فيه قانون كدة لتيف ظريف يقول لك لما تشترى التلفزيون لازم تدفعى حق فرجة.. ولو معملتيش كدة فيها غرامة ممكن توصل لألف جنية استرلينى

- اللى هما كام دول بالمصرى؟

- تمان الاف جند

- يا لهووووى، إوعى تكونوا مش دافعين وعمو جه يقفشكم؟

- هههه، لأ دافعين ماتقلقيش.. هو كان بس بيتأكد

- طب سؤالين بقى بينقحوا عليا.. الأول: هما بيعرفوا منين إن الشخص دافع وللا لأ؟

- فيه طريقتين.. الأولى إنك لما بتشترى تلفزيون من محل.. المحل بيبلغهم وبالتالى هما بيبعتوا يقولوا إنه لازم يتدفع مبلغ شهريا.. وفيه طريقة تانية انهم عندهم عربيات فيها أجهزة معينة دى بقى اللى بتقفش البيت اللى فيه تلفزيون.. وبيقدروا يتأكدوا إذا كانت الشقة دى بتدفع وللا لأ..

- وليه لازم الدفع؟ دة انتوا يا بنتى فاضل تدفعوا ع النفس الزيادة اللى هتتنفسوه

- آااااااه اسكتى، لازم الدفع علشان الفلوس دى بتروح لقنوات البى بى سى اللى معتمدة عليها.. علشان مفيش فيهم اعلانات خالص.. وبيقدموا دايما نبض الشارع سواء برامج وثائقية أو تحريات اللى بتحصل أول بأول

- اممم، فكرة حلوة برضه.. سؤال تالت: هو الإعلام هنا له قيمته؟ مؤثر يعنى؟

- طبعاااااا، علشان هو إعلام محايد وفيه مصداقية.. وممكن بسببه يتم تحقيق أو تتغير فيها الحكومة

- واااو، طيب ويا ترى الجرايد بنفس قوة التلفزيون؟

- آه طبعا، يعنى مثلا كانت الحكومة بتدفع مصاريف لمجلس الشعب.. يعنى تدفع للعضو فلوس انتقالات أو ممكن تساعده فى شراء بيت.. اكتشفوا بقى إن فى ناس منهم بيستغلوا الفلوس دى لحاجات شخصية بحتة.. مين بقى اللى فضح الموضوع دة؟ الجرايد.. قامت الدنيا طبعا.. الحكومة وقفت الفلوس اللى كانت بتدفعها.. وفيه تلاتة من مجلس الوزراء استقالوا.. ولحد دلوقتى بيحققوا في الموضوع من تلات وللا اربع شهور

- وعلى كدة الجرايد غالية بقى؟ بما إنكم بتدفعوا علشان تتفرجوا على التلفزيون

- لأ خالص، بعشرين قرش.. وكمان فيه جرايد بتتوزع ببلاش فى الشارع.. ودى بتكون فيها أخبار خفيفة وجزء من الأحداث اليومية مش الخبر بالتفصيل يعنى

- وعلى كدة بقى بيتكلموا كويس عن الإسلام؟

- آه، بيظهروه بصورة كويسة.. بتكون فيه برامج عن الإسلام والمسلمين.. وكمان فى رمضان بيعرفوا الناس بيه كل سنة وبمعاده.. وبرضه ف الحج نفس النظام

- حوباااااا، هو أنا ينفع مارجعش مصر؟

رحاب المليحي