- مالك يا حوبا؟ شكلك متضايق كدة ليه؟
- واحد صاحبنا اتقبض عليه
- ليييييييه؟
- علشان كان كاسر فيزا
- كاسر فيزا؟ ودى كاسرها ازاى؟ ماينفعش تتلزق؟؟؟ نياهاها، بهرج بهرج.. إلا هو يعنى إيه كاسرها؟
- يعنى يا خفيفة إقامته خلصت وفضل قاعد هنا مرجعش مصر
- طب والبوليس عرف إزاى؟
- هو بقاله هنا خمس سنين ماشى جنب الحيط.. بس مطلع باسبور مزور كدة اهو ينفعه فى اليوم الأسود
- هاهاهاها، ماشى جنب الحيط ومطلع باسبور مزور.. لأ حلوة.. وبعدين؟
- وبعدين طقت فى نافوخه يفتح حساب فى البنك من كام يوم.. قال هو وحظه.. ولما راح هناك الموظفة أخدت الباسبور منه علشان تتأكد إنه سليم طبعا عرفت اللى فيها.. وهمته إنها بتكمل الإجراءات عادى جدا لحد ما جه البوليس
- ياااااه، موقف صعب فعلا قوى.. وبعدين عملوا معاه إيه؟
- راحوا طبعا فتشوا بيته وهيسجنوه تلات شهور وبعدين يرحلوه على مصر
- والتذكرة على مين؟
- هو دة بس اللى همك!!!! على حسابهم هما طبعا
- وهل يا ترى المعاملة هنا فى السجون زى المعاملة فى مصر؟
- لأ نهائى.. هنا بقى بيتعاملوا معاملة كويسة وياكلوا أكل كويس ويتفرجوا على التلفزيون ويلعبوا بلياردوا كمان
- نعم يا اختى؟
- آه والله.. إنتى فاكرانى بهرج؟
- يعنى مفيش إهانة من أى نوع؟؟
- على ما أسمع إنه لأ.. بس أوعدك أول ما أتحبس هكتبلك مذاكراتى من ورا قضبان لندن
- طب وفين العقاب بقى؟
- العقاب بس إنه محبوس.. هما كمان لغوا الاعدام ف بقى الحبس مدى الحياة
- لا والله؟ طب ومتضايقة ليه بقى؟
- متضايقة علشان هينزل مصر غصب عنه وبفضيحة مش بمزاجه.. إحساس وحش قوى بجد يا جوجو.. ربنا ما يحكم على حد
- آه فعلا على رأيك.. ربنا معاه.. بس متعرفيش يمكن ده أحسن له إنه يرجع بلده ويقعد وسط عيلته ويبدأ من جديد هناك
- ممكن برضه، ربنا معاه
- ياللا ياللا قومى نشم شوية هوا.. أنا ما صدقت الجو حلو النهاردة والشمس طالعة
*****************************
- هى إيه العربية الأبيض فى برتقانى دى اللى مشغلة نور زى بتاع السارينة؟ دى الإسعاف؟
- لأ ال AA
- نعم؟
- لما عربيتك بتعطل فى أى مكان وبتكونى مشتركة مع الAA.. بتكلميهم وييجولك.. لو العطل سهل بيصلحوهالك وانتى واقفة.. لو لأ ... بيقطروهالك لحد بيتك أو مكان ما إنتى عايزاه ويمشوا..
- لا والله؟؟ حلوة دى
- آه طبعا.. بتوفر عليكى بهدلة كتير
****************
- إيييييييه الصوت ده؟ هاتطرش منه
- دى عربية البوليس
- صوتها عالى قوى.. بس يا ما شاء الله برغم إن الدنيا واقفة إلا إن الطريق فجأة فضى وكل العربيات أخدت جنب
- آه ماهو هو كدة أول ما سارينة الإسعاف أو البوليس أو المطافى تشتغل لازم كله يحاسب.. لو الطريق مش سالك بيمشوا عكس الإتجاه.. علشان المفروض مسافة ما تطلبى أي حد منهم أول ما تقفلى السماعة تلاقيهم عندك
- يا شيخة؟ ده إحنا فى مصر لو ردوا عليكى أساسا ممكن ييجوا تانى يوم مثلا..
- أعوذ بالله.. هى الناس فى مصر بتموت من شوية من اللى بتشوفه والله
- لأ وساعات بيكونوا مشغلين السارينة كدة من غير سبب
- تصدقى بقى ودى حاجة بحترمها فيهم جدا.. زى ما انتى سامعة كدة السارينة مزعجة جدا.. هو بس بيشغلها علشان الناس توسع له الطريق.. لكن لو الطريق فاضى بيروح طافيها على طول علشان الإزعاج
- والله ناس بتفهم.. طيب وإزاى بقى بيتعاملوا مع الحادثة؟
- إنتى عارفة إن ساعات واحدة كبيرة فى السن مثلا تتصل بالبوليس علشان حاجة عبيطة.. لكن لازم يروحلها ويحل لها مشكلتها اللى هى شايفاها مش عبيطة زى إنها مش عارفة تفتح التلفزيون
- لأ دة بجد وللا بتهرجى؟
- دة على ما سمعت
- يا مرارتى أنا يانى يا جوجو
- بس عموما يعنى هما فظاع بياخدوا وقت بالعبيط فى أى حدثة.. يعنى مثلا لو حصلت حادثة فى مكان ما فى الشارع.. تلاقى تلات اربع عربيات بوليس طايرين على مكان الحادثة.. ويقفلوا مكان الحادثة بشريط كدة علشان محدش غيرهم يدخل.. وحتى لو دة فى وسط طريق سير عربيات.. عادى جدا يوقف الطريق أو يمشى ببطىء.. بكرههم قوى فى الموضوع دة.. لازم البحث والتدقيق فى كل حاجة وتاخد زى ما تاخد
- اممممم، هى لندن طبعا فيها إسعاف طائر؟
- آه طبعا مش عايزة سؤال؟
- إيه بقى؟ ها؟ إيه؟
- هههه، لما بيكون مثلا واحد عامل حادثة وحالته خطيرة وعايز صيانة كاملة.. بتيجى طيارة الإسعاف تاخده.. والطيارة طبعا مجهزة بكل الحركات والمركات اللى بيها يلصموا المصاب لحد المستشفى
- طب وبتنزل الطيارة فين يعنى؟
- بتنزل فى الشارع عادى بس لازم يكون الشارع واسع علشان تقدر تنزل
- إهىء إهىء
- مالك يا حياتى؟ مرارتك اتفقعت خلاص يا جوجو؟
- أنا خلااااااص عايزة أروح لأمى.. تشعبت منك إنتى ولوندن تشعبت تشعبت
12 comments:
Muhammad Fattouh
يا حوبا كفايه كده
الناس ها تولع فى نفسها
وحتي لو كان معاه واحد بيموت يا عمر .. السواق (الناصح) بيمشي قدّام عربية الإسعاف أو وراها عشان المفروض يعني إن الناس بتوسع لها .. فيقدروا يمشوا بسرعة .. م الآخر يعني (عربية الإسعاف شغلتها فى مصر إنها تعمل دوشة بالسرينة).. بدليل ان حتي عسكرى المرور -لأن الظابط طبعا مش هيعّرض نفسه للحر الشديد ودوشة الكلاكسات- المهم يعني كنت باقول ان العسكرى بيطنّش مش بيسأل فيها لمّا الاشارة تكون واقفة - وهي دايما واقفة- باعتبار إن عددنا كبير ومحتاجين نقّل شوية وطظ ف اللى بيموت جوة عربية الاسعاف.
khaled santrafyesh
Aya Arafa
لسة عندي امل اننا نلاقي مصر
كده و أحسن
ياااااااااااااااااااا رب
الوليد اسماعيل
في مصر فيه استخدامين للاسعاف الاول زفاف العرايس في الافراح ..والتاني المشاركه في القبض علي المعارضين والاخوان المسلمين..الحاجه الوحيده اللي مش بتستخدم فيها عربيات الاسعاف هيا انقاذ المرضي!!!
Abdallah Elrefaiey
مفيش اي تعلق علي النظام والغريب ان النظام ده وصل للخليخ ومش عارف والله اذا كان هيروح مصر ولا لا
Omaima Ezz Eldeen
والله انا كمان عاوزة
اروح لامى
ازاى الحال دلوقت يا حوبا
Amr Aly
اتخيلت لو واحدة بتتصل بالنجدة بتقولهم مش عارفة افتح التليفزيون يا ابني هيكون ردهم عليها ايه
اتلمي يا ولية يا مهفوفة بدل ميكون أخر تليفيزون تشوفيه في حياتك
أماعن السجون والحياه فيها جاية في وقت الدنيا قايمة عالداخلية بسبب قضية الساعة وانتشرت فيديوهات التعذيب
عندي سئال لو انتشر فيديو تعذيب في لندن زي بتاع عماد الكبير او فيديو من الفيديوهات دي مهما كتير بسم الله ما شالله هيكون رد الفعل ايه ؟
وليه نروح بعيد لو قضية زي بتاعة خالد سعيد تفتكري يا رحاب رد الفعل هيكون ايه
Ganga Hoba
ممممممممممم حلو اوي الكلام
ده بس رخم اوي حوار الوقت الطويل في اي حادثه ده
طيب سؤال بقي لو في مظاهره وفي ناس منعرفش هي عايشه ام ميته ام معتقله ام مفرج عنهم ده وضع صحبتي دلؤقتي :)))ده طبعا بيحصل في مصر بتعملوا ايه عندكم في لندن
Mohamed Abd El Daym
على رأيك يا حوبا
دايما بقول كده تتهد وتتبنى من جديد ..بس وقفت قدامى مشكله هنعمل اية فى دماغ الناس ؛) ياترى العقدة الكام دى اللى عملتهالنا 6 باين ..انتى ناوية تعملى كام عقده قصدى كام حلقه ؛) من باب العلم بالشئ .حلوة يا رحاب .
Amir Elmelegy
ماقولتيش ليه يا رحاب علي ظباط البوليس
اللي لما عينيهم تييجي في عين حد و هما ماشيين في الشارع
يقوموا مبتسمين له
حاجه مستفزه بصراحه
:)
Basma Bahaa
gamila awe ya hoba wallahy
شوقتيني اجي لندن واشوف الجو الذوذ دا بجد عالمك جميل اوي يا حوبا وكانك منوره في مصر
Post a Comment