عايزة اعمل رجيم.. لكن جعااااانة يا ناس

فتحت عينيها الصبح مش علشان هى عايزة تصحى.. صحيت من الجوع.. حاسة إن مش العصافير بس اللى بتصوصو فى بطنها.. لأ، دى جنينة الحيوانات كلها بتنعر..

حطت إيديها على بطنها علشان تفتكر هى كلت إيه امبارح.. أكيد هى نامت خفيف خفيف طالما جعانة قوى كدة.. لكن اتصدمت لما افتكرت.. دى قبل ما تنام ضاربة طبق فتة كبير ومحلية بطبق بسبوسة بالقشطة وحبست بكوبيتن فخفخينا..

طب إيه؟؟ أمال هى جعانة ليه؟؟ دى حتى أكلت ونامت على طول من التخمة.. بس هى جعانة ولازم تاكل، وبعدين تبقى تفكر بقى فى حل للى هى فيه ده..

قامت وقبل ما تجرى على المطبخ اتكعبلت فى المراية بتاعتها.. شافت نفسها فى المراية برغم إنها حاولت تتجنب دة.. ولما شافت منظرها بقى عامل ازاى صعبت عليها نفسها.. ودموعها غطت عينيها بقت شايفة نفسها بصعوبة..

لقت إنها بقت عاملة زى الشوال.. برغم إنها لسة سنها صغير ماكملتش حتى ال25.. وشكلها جميل وجذاب ولكن المشكلة فى جسمها اللى بقى كل جزء فيه مستقل بذاته..

معرفتش تتحرك من قدام المراية واتسدت نفسها ونسيت جوعها الشديد.. مانسيتش قوى يعنى بس بقى تركيزها على جسمها اللى مش طايقة تبص عليه.. وبرغم كدة واقفة متسمرة قدام المراية مش قادرة تحرك عينيها عنه..

وفجأة جاتلها فكرة مجنونة إنها تعمل دايت.. أيوة هتعمل ريجيم.. وليكن ما يكون.. يعنى هى مش هتبقى أول وللا آخر واحدة تتحدى نفسها وتعمل ريجيم علشان توصل للجسم المثالى اللى هى عايزاه..

دخلت المطبخ أكلت بيضة وواحد توست وهى بتحاول تقنع نفسها إنها شبعت.. بس هى لسه جعانة؟؟ لأ،لأ شبعت شبعت.. أى حاجة فى أولها صعب وبعد كدة بتهون..

حاولت تفكر فى أى حاجة تشغلها عن تفكيرها فى الأكل.. الجو كان كويس فنزلت تمشى ساعة فى الشارع علشان تحرق دهون..

لكن رجعت بتسب وتلعن، ووشها مش باين من كتر العرق.. الشارع كله بلاعات وعربيات ورصيف طالع ورصيف نازل.. مفيش مجال للمشى المريح أبدا.. لما حاولت تمشى فوق الرصيف اتكعبلت فى زبالة ومحلات فارشة بضاعتها فى نص الرصيف.. ولما نزلت تمشى فى الشارع نفسه كانت عاملة زى اللى بتمشى على الحبل فى السيرك ما بين العربيات والبنى آدمين والكلاب كمان..

دخلت تاخد - شاور- كانت دايخة قوى من كتر الجوع ومش قادرة تفكر فى حاجة تانية غير فى الأكل.. وبعدين دورت على حاجة فى التلاجة تاكلها وتكون خفيفة.. لقت تفاح كانت عارفة ومتأكدة إنه مش هيشبعها.. بس أهو أى حاجة تقرقش فيها وتشغل بيها بقها وأهو يبقى بتاكل حاجة مفيدة ومش بطخن.. خلصت التفاحة بسرعة من غير ما تتمزج بيها.. طلعت غلها فى لبانة علشان إحساسها بالجوع .. بقت زى المدمن اللى بيخبط راسه فى الحيط علشان عايز الجرعة

رمت نفسها على الكنبة تفكر: أنا إيه اللى عملته فى نفسى ده؟ ما كنت مبسوطة ولا على بالى.. زعلانة باكل فرحانة باكل.. حتى وأنا نايمة باكل رز مع الملايكة.. إيه بقى اللى جد خلانى أغير تفكيرى وأفكر فى تغيير نفسى شكلا؟ وبعدين المهم المضمون وأنا والحمدلله محبوبة قوى وعندى أصحاب كتير ومتقبلينى زى ما أنا.. خلاص بقى ليه بعذب نفسى؟

لألأ، أنا مش عايزة الشيطان يلعب فى دماغى.. وبعدين أهو حاجة جديدة أتسلى بيها شوية.. بس دى حاجة متعبة ومقرفة قوى قوى.. لأ بس أنا جدع ولا يهزنى.. لأ يهزنى ... أنا بحب الأكل.. وبعدين ما أنا قدامى أمثلة كتير قوى من أصحابى اللى عملوا دايت وفشلوا..

فيه منهم اللى دفع فلوس قد كدة ومشى مع دكتور وبرضه فى الآخر خسر ماله ومن زعله وإحباطه على نفسه زاد أكتر..

ومنهم اللى لعب رياضة وعمل ريجيم وبرضه مانزلش زى ما كان بيحلم.. فرمى ورا ضهره وكمل حياته زى ما هى.. ويقول اللى يتقبلنى على كدة أهلا وسهلا واللى مش عايز محدش هيضربه على إيده..

أيوووووه أنا أسهل حاجة أروح أعمل عملية شفط.. أهى فلوس كتير لكن حل مضمون.. لاااااااأ لحسن أموت من إهمال دكتور.. يعنى أدخل على رجلى وأطلع على نقالة.. وأكون ضحية شوية كيلوهات زيادة!!!! لأ وعلى إيه!

ماتعيشيش الدور بقى إنك بتعملى عمل بطولى.. ماهو فيه برضه أمثال كتير لناس عملوا دايت وخسوا وبقوا - متفشخرين- بنفسهم على عزيمتهم القوية.

بس دى أجسام.. فيه أجسام بتتقبل بسهولة وفيه لأ.. لكن برضه الريجيم عزيمة قوية وطول نفس.. أيوة لازم الواحد يبقى نفسه طويل.. ولما يحس إنه - هينخ- يقول بقلب جامد أنا أكلت كتير من الحاجات دى قبل كدة.. علشان يشد من عزيمته ويكمل المشوار..

إيه ده بقى؟ أنا صدعت، هى كيميا ؟؟ دة دايت.. لكن أنا جعانة يا ناس.. وأنا ماكملتش يوم دايت.. أمال هعمل إيه كمان اسبوع!!! عااااااااااااااااااا

قررت إنها تدخل تنام.. برغم إن الساعة ماجاتش 8م لسه.. كلت حاجة خفيفة وقالت تسد جوعها بالنوم.. بس هى مش عارفة تنام.. نفسها فى طبق بطاطس محمرة.. وللا ساندوتش طعمية متحبش.. وللا حتى طبق محشى..وبعدين تبدأ تانى الريجيم من بكرة.. وعد، وعد

نامت وهى بتحلم بالمحشى والكشرى والكوارع.. صحيت على الفجر بتصرخ:

جعاااااااااااااااااانة يا نااااااس مش قادرة.. دخلت المطبخ وأكلت كل اللى قابلها فى وشها..

بلا دايت بلا كلام فارغ..

رحاب المليحي